1, 2. (a) Yumanyi yinateli kumwekena mukwaKristu neyi yuma yihimpika mukukasumwisha? (Talenu mwevulu wakutachikilahu.) (b) Kwesekeja naMasamu 131, chilwilwinyi chinateli kutukwasha kutwalekahu kwikala nakuwunda muyitoñojoka?

MANAKWETU Lloyd nimuhela Alexandra chayilejeliwu nawu anakufuma haBeteli kulonda ayi nakushimwina, hakusambila aneñeli. Henohu anazatili haBeteli yaaka kubadika 25. Lloyd wahosheli nindi: “Nenjilili kushakama haBeteli nawa natiyileña kuwaha mudimu wunazatileña. Netejeli iku kuhimpika ilaña tukweji twalondelelihu, natachikili kutoñojoka nami ananhañi. Yitoñojoka yami yaluwankeni chikupu. Mpinji yikwawu natiyileña chiwahi ilaña mpinji yikwawu naneñeleña.”

² Neyi chihandilu chetu chihimpika mukukasumwisha, tunateli kuneña nikwakama. (Yish. 12:25) Chinateli kutukalila kwiteja netu yuma yinahimpiki. Mumpinji yamuchidiwu, tunateli ñahi ‘kumwenesha muchima wetu nakuduñumika nzo-o?’ (Tañenu Masamu 131:1-3.) Tushinshikenu antu ashimunawu muBayibolu  chatwalekelihu kwikala nakuwunda muyitoñojoka nichinatwalekihu ambuña aYehova makonu kwikala nakuwunda muyitoñojoka hela chakwila yuma yinahimpiki.

3. Yumanyi yamumwekeneni Yosefu?

³ Yosefu wadiña nayaaka 17 hamulandishiliwu kudi amanakwindi muwuduñu muloña wechima. Amutiyilili ichima muloña wakwila amukeñeli nankashi kudi tata yindi. (Kutach. 37:2-4, 23-28) Yosefu womikili hadi yaaka 13 muwuduñu nimukaleya muEjipitu, kwakulehi nakwashakamineñayi tata yindi Yakoba wakeñeliyi nankashi. Chumanyi chamukwashili Yosefu kubula kudihomba nikuhemba ndulu?

4. (a) Yumanyi yatoñojokeleñayi Yosefu hadiñayi mukaleya? (b) Yehova wakwili ñahi kulomba kwaYosefu?

⁴ Hampinji yakabakeneñayi mukaleya, Yosefu watela watoñojokeleña hayuma yamwekesheleña nkisu jaYehova. (Kutach. 39:21; Mas. 105:17-19) Chilota chawuprofwetu chaloteliyi Yosefu hadiñayi kansi nichena chatela chamukwashili kwiluka nindi Yehova wadiña nakumwakamena. (Kutach. 37:5-11) Watela wamulejeleñamu Yehova kukala kwamweneñayi. (Mas. 145:18) Yehova niyena wakwili kulomba kwaYosefu kwakufuma hamuchima, wamuwundishili muchima nakumuleja nindi ‘wukwikalaña nindi’ muyihuñu yejima.—Yil. 7:9, 10. *

5. “Kuwunda kwaNzambi” kunateli kutukwasha ñahi kutwalekahu kumukalakela?

⁵ Hela chakwila tunakuhita mukukala kwasweja makonu, ninetu tunateli kwikala ‘nakuwunda kwaNzambi’ kwahembaña yitoñojoka yetu. (Tañenu Afwilipi 4:6, 7.) Dichi neyi tumukuhwelela Yehova hampinji yitunaneñi, kuwunda kwaNzambi kunateli kutukolesha kutwalekahu kumukalakela nikutukwasha kubula kuzeya. Tushinshikenu hadi antu anakumwekesha chumichi makonu.

6, 7. Kulomba kwesekeja nayuma yitunakuhitamu kunateli kutukwasha ñahi? Shimunenu chakutalilahu.

⁶ Manakwetu Ryan nimuhela Juliette chayilejeliwu nawu aleki kuzata wupayiniya wadimena wakapinji kantesha, aneñeli. Ryan wahosheli nindi: “Twanyakeli kumulejamu Yehova mukulomba. Twelukili netu iyi diyi mpinji yitwateleleli kumukuhwelela Yehova. Dichi twamulombeli Yehova netu yatukwashi kwikala nachikuhwelelu chakola chineli antu amavulu muchipompelu chetu adiña amaha.”

⁷ Yehova wakwili ñahi kulomba kwawu? Manakwetu Ryan chanukiliyi wahosheli nindi: “Chitwamanishili hohu kulomba, yitoñojoka yatama nichineñi chitwadiña nachu hakusambila chamanini. Kuwunda kwaNzambi kwadiña nakuhemba nyichima yetu niyitoñojoka yetu. Twelukili netu Yehova wukutwalekahu kutuzatisha neyi tutwalekahu kwikala ashinshika.”

8-10. (a) Spiritu yaNzambi yinateli kutukwasha ñahi kuleka kwakama? (b) Yehova nateli kutukwasha ñahi neyi tutwalekahu kumukalakela?

⁸ Kubombela hakuwundisha nyichima yetu, spiritu yaNzambi yinateli kutukwasha kuwana nsona jinateli kutukwasha kutwamijaku yuma yakuspiritu. (Tañenu Yowanu 14:26, 27.) Shinshikenu manakwetu Philip nimuhela Mary, akalakeleli haBeteli kwakwihi nayaaka 25. Chimwahitili tukweji tuwana kufuma hafuminiwu haBeteli, anvwali jawu awambanda afwili, kushilahu nintaña yamuhela Mary nawa atachikili kuhemba atata yaMary adiña nachikatu chaluwañeshaña yitoñojoka.

 ⁹ Manakwetu Philip wahosheli nindi: “Namweneña nami nomikileña chikupu, ilaña kudi chuma chimu chinabulileña kwila. Natañili nsona yaAkolosi 1:11 yinawanini muKaposhi Kakutalila kakudizamu. Chalala nadiña nakuumika, ilaña hinomikileña chikupuku. Nakeñekeleña ‘kuumika chikupu nakuwunda nimuzañalu.’ Iyi vasi yañanukishili nawu muzañalu wami hiwashindamena hayuma yamuchihandiluku, ilaña washindamena hachankwashaña spiritu yaNzambi muchihandilu chami.”

¹⁰ Yehova wayikiswilili aPhilip naMary munjila jajivulu, muloña atwalekelihu kumukalakela. Chafuminiwu hohu haBeteli, wejima wawu awanini antu adiña nampwila yakudiza Bayibolu. Mary chanukayi wahoshaña nindi: “Awa antu adiña nakutuzañalesha chikupu nawa diyi njila yimu mwatulejeleleñayi Yehova nindi yuma yejima yikwikala hohu chiwahi.”

11, 12. (a) Yosefu wamwinkeli ñahi Yehova chuma chakukiswila? (b) Yosefu amukiswilili ñahi muloña wakuumika kwindi?

¹¹ Neyi chihandilu chetu chihimpika mukukasumwisha, tunateli kutachika kutoñojoka hohu hakukala kutukweti. Chumichi chadi kumumwekena Yosefu. Ilaña womikili nakumwinka Yehova chuma chinateli kukiswilayi. Hela chakwila wadiña mukaleya, Yosefu wazatili nañovu nyidimu yejima yamwinkeleñawu kudi mukulumpi wawakwakuhemba kaleya neyi chochazatileñayi kudi Potifwari.—Kutach. 39:21-23.

¹² Ifuku dimu, Yosefu amwinkeli mudimu wakuhemba amayala ayedi adiña nayifulu yamaneni muchota chaPotifwari. Muloña wakwila Yosefu wadiña wakasunuka, awa amayala ejima ayedi amulejelimu yilota yaloteliwu nawufuku yabulili kwilukawu muyatalishili. (Kutach. 40:5-8) Yosefu welukili wanyi, ilaña iyi nsañu yahanjekeliwu yaleñeleli chihandilu chindi kuhimpika kumbidi. Hela chakwila womikili yaaka yiyedi mukaleya, chimwahitili mpinji amwidishilimu nawa hefuku dodimu amutondeli kwikala mulopu, chindonda chamwanta Fwaru.—Kutach. 41:1, 14-16, 39-41.

13. Tunateli kumwinka ñahi Yehova chuma chikukiswilayi hela chakwila tukweti kukala muchihandilu chetu?

¹³ Kufwana Yosefu, ninetu tunateli kwikala mukukala kutunateli kukañanya kumanisha. Hela chochu, neyi tudiwunjika nikuzata nañovu hakukala kutukweti muchihandilu, tukumwinka Yehova chuma chikukiswilayi. (Mas. 37:5) Mwamweni, mpinji yikwawu tunateli ‘kuluwankana,’ ilaña hitunateli ‘kudihombaku’ neyi chahosheliyi kapostolu Pawulu. (2 Kor. 4:8; tth.) Awa mazu aPawulu anateli kuzatika nikudi etu, sweje-e neyi tutwalekahu kusha muchima hakushimwina.

14-16. Fwilipi mukwakushimwina washili ñahi muchima hakushimwina hela chakwila yuma yahimpikili muchihandilu chindi?

¹⁴ Fwilipi mukwakushimwina wamwekesheli chakutalilahu chachiwahi chamuntu watwalekelihu kusha muchima hamudimu wakushimwina hela chakwila yuma yahimpikili muchihandilu. AkwaKristu muYerusalema atachikili kuyikabisha nawa chaletesheli Stefwanu amujahi. * Haniyi mpinji Fwilipi wadiña nakudiluñisha mudimu wazatileñayi. (Yil. 6:1-6) Ilaña hampinji yapalañeniwu akwakumulonda Kristu, Fwilipi hashakamini hohuku. Wayili nakushimwina kuSamariya, musumba weneni mwabulili kushimwinawu nsañu yayiwahi hayina mpinji.—Mat. 10:5; Yil. 8:1, 5.

¹⁵ Fwilipi wadiloñesheli kuya kwejima kukumulombola spiritu yaNzambi, dichi Yehova wamuzatishili kuya nakushimwina mumaluña mwabulawu dehi kushimwina. A Samariya ayidiwili kudi aYudeya, ilaña Fwilipi wadiña nachaambu wanyi nawa wayishimwinineña nsañu yayiwahi. Dichaletesheli izaza dawantu ditiyilili “namuchima wumu”!—Yil. 8:6-8

¹⁶ Kuhiñahu, spiritu yaNzambi yamulombweli Fwilipi kuya kuAshidodi nikuKesareya, nyisumba yiyedi mwadiña aJentili amavulu. (Yil. 8:39, 40) Chimwahitili yaaka 20 kufuma hayiliyi katachi nakushimwina muSamariya, chihandilu chaFwilipi chahimpili cheñi. Chineli wekalili nachisaka, watachikili kushakama kwiluña kwashimwinineñayi. Hela chakwila yuma yahimpikili muchihandilu chindi, Fwilipi washili muchima hakushimwina nawa Yehova wamukiswilili nichisaka chindi.—Yil. 21:8, 9.

17, 18. Kusha muchima hakushimwina kunateli kutukwasha ñahi kwikala namuzañalu neyi yuma yinahimpiki?

¹⁷ Amanakwetu amavulu ekala mumudimu wampinji yejima anateli kuyileja nawu kusha muchima hakushimwina kunayikwashi kwikala namuzañalu hela chakwila yuma yinahimpiki. Adisumbula akuSouth Africa, aOsborne naPolite, chafuminiwu haBeteli atoñojokeleña nawu akushikena kwiñila mudimu nawa akuwana itala swayi. Osborne wahosheli nindi: “Chawushona, twawanini wanyi mudimu swayi neyi chitwakuhweleleli.” Ñodindi Polite wahosheli nindi: “Tukweji tusatu twamanini kuwana mudimu nehi nawa hitwadiñahu namaliku. Twakabakeni chikupu.”

 ¹⁸ Chumanyi chayikwashili kuumika iku kukala? Osborne wakunkulwili nindi: “Kushimwina hamu nachipompelu dichuma chatukwashili nankashi kusha muchima hayuma yayiwahi. Chatela tushakami hohu nakwakama, twafuukwilihu kudikita nankashi mumudimu wakushimwina nawa chumichi chatuleteleli muzañalu chikupu. Twakeñakeñeli mudimu nawa nkumininaku twawuwanini.”

19-21. (a) Chumanyi chikutukwasha kutwalekahu kwikala nakuwunda kwamuyitoñojoka? (b) Yumanyi yayiwahi yafumañamu neyi twiteja yuma yinahimpiki muchihandilu?

¹⁹ Neyi chinamwekeshiwu muniyi yakutalilahu, neyi tuzata nañovu hakukala kutukweti nawa tumuchiñilila Yehova, tukutwalekahu kwikala nakuwunda kwamuyitoñojoka. (Tañenu Mika 7:7.) Tunateli kwiluka cheñi netu wubwambu wetu naNzambi wunakoli chikupu muloña wayuma yinahimpiki muchihandilu chetu. Muhela Polite itwashimuna hakusambila, chanukiliyi yuma yamumwekeneni, wahosheli nindi: “Kuhimpa mudimu kunankwashi kwiluka mwatalisha kumushindamena Yehova hela chakwila chuma chamwekeni channeñeshaña. Wubwambu wami naNzambi wunakoli chikupu.”

²⁰ Muhela Mary itwashimuna kunyima, wuchidi kuhemba atata yindi akula dehi hampinji yoyimu nikuzata wupayiniya. Washimwini nindi: “Neyi nitachika kwakama, nalombaña, nkumininaku muchima wawundaña. Chuma chinnadizi chidi chakwila nawu neyi nidi mukukala natela kushindamena hadi Yehova nawa nukutwalekahu kumushindamena.”

²¹ Manakwetu Lloyd nimuhela Alexandra itwashimuna hakusambila, ahosheli nawu yuma yahitilimu yesekeli chikuhwelelu chawu munjila yabulili kukuhwelelawu. Ilaña ahoshaña nawu: “Kweseka kwamwekeshaña neyi chalala chikuhwelelu chetu chakola nawa chinateleli kutukwasha nikutukundeja mumpinji jakala. Ichi tunekali nachikuhwelelu chakola.”

22. Yumanyi yayiwahi yinateli kufumamu neyi tuzata nañovu kwesekeja nakukala kutunakumona?

²² Neyi kudi yuma yinahimpiki muchihandilu mukukasumwisha, chidi neyi nyidimu yitwazataña mukuloñesha kwetu, yikatu hela kwakamena chisaka, ilukenu nenu Yehova wayakamenaña nawa wukuyikwashaña hampinji yatelela. (Heb. 4:16; 1 Pet. 5:6, 7) Chayinu mpinji zatenu nañovu kwesekeja nakukala kumunakuhitamu. Swinenu kwakwihi naTata yenu wamwiwulu mukulomba nawa shindamenenuña hadi yena. Neyi mwila mwenimu, ninenu mukutwalekahu kwikala nakuwunda kwamuyitoñojoka hela chakwila yuma yinahimpiki.