1, 2. Chumanyi chinaleti wubanji kudi antu, nawa hinyi wunaleteshi?

MAFONI, manoñu akesi kawuneñu, nyotoka nimafuliji, hiyuma yinakutuñawu yinakuwahishaku chihandilu chawantu. Hela chochu, yuma yikwawu yinakutuñawu yidi neyi mata, tupata, makanya, matendanzumbu niyuma yikwawu, yinakuleta wubanji kudi antu. Ilaña kudi chuma chinashimbuli kubadika iyi yuma yejima nawa chinaluwañeshi antu chikupu. Chumanyi chenichi? Kutwamba! Hikuhosha yuma yinabuli kwikala yalala kulonda kudimba muntu. Hinyi watachikili kutwamba? Yesu Kristu wamuteneni “Diyabolu” nindi “tata yakutwamba.” (Tañenu Yowanu 8:44.) Mpinjinyi yatachikiliyi kutwamba?

² Watachikili kutwamba mwitempa daEdeni hadi yaaka yayivulu yinahitihu. Eyala namumbanda atachi, aAdama naEva adiluñishileña muParadisa yayinkeliwu kudi Nleñi yawu. Ilaña Diyabolu wenjili nakuyiluwañesha. Welukili nindi Nzambi wayikaanishili eyala namumbanda kuda “[kumutondu] wakwiluka nachu niyayiwahi niyatama,” muloña neyi adaku akufwa. Hela chochu, Satana wazatishili kapela nakumuleja Eva nindi: “Chalala, himwakafwaku [kutwamba kwindi kwatachi]; muloña Nzambi neluki nindi ifuku dimukudya, mesu enu akatona, mwakekala neyi chadiyi Nzambi, mwakeluka niyayiwahi niyatama.”—Kutach. 2:15-17; 3:1-5.

3. Tukuhosheladi netu kutwamba kwaSatana kwadiña kwatama chikupu, nawa yumanyi yinafumimu?

³ Kutwamba kwaSatana kwadiña kwatama muloña welukili  chikupu nindi neyi Eva yamukuhwelela nawa yada mukabu, wukufwa. Eva naAdama afumpili lushimbi lwaYehova nawa nkumininaku afwili. (Kutach. 3:6; 5:5) Hichakuminini hohanaku, muloña waniyi nshidi, “kufwa kwataandili kudi antu ejima.” Dichi, “kufwa kwayuulili neyi mwanta . . . , kushilahu niantu abulili kuvulumuna neyi chavulumwiniyi Adama.” (Rom. 5:12, 14) Makonu, chatela adiluñisheña wumi wawanina, wumi wakafwaña neyi chakeñeleñayi Nzambi, antu neyi anashimbuli ashikaña hohu “munyaka makumi atanu namakumi ayedi, hela neyi nañovu yamuntu yikushika munyaka makumi atanu namakumi asatu.” Hela chochu, ichi chihandilu “chakukabakana hohu nakumona ihuñu.” (Mas. 90:10) Mwamweni, mukutwamba kwaSatana munakufuma yihuñu chikupu!

4. (a) Malwihwinyi itukwakula? (b) Kwesekeja na Masamu 15:1, 2, muntu wamuchidinyi watela kwikala ibwambu daYehova?

⁴ Yesu halumbulwileñayi yilwilu yaDiyabolu, wahosheli nindi: “Hatwalekelihu kwenda muchalalaku, muloña chalala hichekala mudi yenaku.” Kushika nimakonu chalala hichekala mudi Satanaku, muloña natwalekihu “kuluwañesha antu ashakama hamaseki hejima” namakudi indi. (Chim. 12:9) Bayi twiteja Diyabolu kutudimbaku. Tuhanjekenu hamalwihu asatu: Satana nakuluwañesha ñahi antu? Muloñadi antu chatwambilañawu? Nawa hakwila nawu tubuli kujimbesha wubwambu wetu naYehova neyi cheliliwu aAdama naEva, tunateli kumwekesha ñahi netu ‘twahoshaña nsañu yalala’ mpinji yejima?—Tañenu Masamu 15:1, 2.

5. Satana nakuluwañesha ñahi antu makonu?

⁵ Kapostolu Pawulu welukili nindi tunateli kutondolwela “kutupepa neyi halwalu kudi Satana, muloña hitwayamba tufuta twindiku.” (2 Kor 2:11, tth.) Tweluka netu kaayi kejima kushilahu ninsakililu jakutwamba, mapolitiki niakwakulanda nakulandulula akweti lwisu ayilombolaña kudi Diyabolu. (1 Yow. 5:19) Hitwahayamaña hakwiluka netu Satana niandemoni jindi anakuluwañesha antu adi hayifulu yamaneni ‘kuhoshaña makudiku.’ (1 Tim. 4:1, 2) Dichelañawu niantu akweti mabizininsi amaneni, alandishaña yuma yafwana nikuzatisha tufuta kulonda adileña antu mali kuhitila mukutiyakesha iyi yuma.

6, 7. (a) Tukuhosheladi netu akulumpi jansakililu atwambaña akweti muloña? (b) Ntañishilwinyi yakutwamba yatandishañawu akulumpi jansakililu?

⁶ Sweje-e dinu akulumpi jansakililu akweti muloña chikupu hansañu yamakudi awu muloña akaleñela antu ayikuhwelelaña kubula kwikala nawumi kumbidi. Neyi muntu yeteja ntañishilu yakutwamba nawa yatachika kwila yuma yakaanishayi Nzambi, chinateli kumuleñela kubula kwikala nawumi wahaya nyaaka. (Hos. 4:9) Yesu welukili nindi akulumpi jansakililu amumafuku indi niwena adiña naniwu muloña wakudimba antu. Wayilejeli hatooka nindi: “Oyihuñu yimwakamona enu ansoneki nawaFwarisi, anfwikiji! muloña mwazambukaña kaluñalwiji nikuhita mumaluña oma kulonda mubalumuni muntu wumu yekali kaYudeya nawa neyi nekali dehi kaYudeya, mwamwilishaña kwikala watama nankashi neyi enu kulonda yekali watelela kuya muGehena [kujilumuka kahaya nyaaka.]” (Mat. 23:15, tth) Yesu wayilejeli awa akulumpi jansakililu chakubula kuhita mumbadi nindi adiña nakuluwañesha. Mwalala ‘afumini kudi tata yawu Diyabolu, mukwakujaha antu.’—Yow. 8:44.

⁷ Makonu, akulumpi jansakililu anavuli chikupu mukaayi. Ayitenaña nawu mapasta, atupristu, arabi kushila nimajina amakwawu. Kufwana awa akulumpi jansakililu amumafuku awapostolu, niwena “elaña yuma yatama yakañeshaña antu kwiluka chalala” chaMwizu daNzambi. (Rom. 1:18, 25) Atandishaña ntañishilu yakutwamba yidi neyi “muntu neyi amutena nawu mukwaKristu dikwila nawu  wakajilumuka wanyi,” wumi wamuntu wafwaña wanyi, muntu neyi nafwi wasañukilaña muchuma chacheñi nawa atañishaña nawu Nzambi weteja eyala neyala hela mumbanda namumbanda kudisumbula.

8. Makudinyi akabidikawu akwamapolitiki, ilaña twakela ñahi neyi chumichi chinamwekani?

⁸ Akwamapolitiki analuwañeshi antu chikupu muloña wakutwamba. Katataka keña tutiyi kutwamba kwasweja, hakabidikawu antu nawu “kuwunda nikukiñewa!” Ilaña “hohenohu kujilumuka kwakayishikena.” Bayi twiteja nsañu yawu yakukeña kumanisha yuma yatama yamunshakaminu yamakonu kutuluwañeshaku. ‘Tuneluki chikupu netu, ifuku daYehova dinakwinza neyi chenzañayi ikombi nawufuku.’—1 Tesa. 5:1-4.

9, 10. (a) Muloñadi antu chatwambilañawu, nawa yumanyi yafumañamu? (b) Chumanyi chitwatela kwanukaña hadi Yehova?

⁹ Neyi kudi chuma chachiha chinediki nawa achiluka nankashi kudi antu, akwakutuña aswejelañaku kuchituña. Kutwamba nikwena dichi kwekala. Makonu, kutwamba kunasweji chikupu muchituñilu, nawa bayi neyi antu akweti ñovu hohu diwu adimbaña akwawuku. Neyi chashimunawu muchibaaba chinakwila nawu “Chitwatwambilaña” (“Why We Lie”) chasonekeliyi Y. Bhattacharjee, chahosha nawu “kutwamba kunekali neyi hichaaku kumuchidi wamuntu.” Kakavulu antu atwambaña kulonda adikiñi hela kudinka yifulu. Atwambaña kulonda asweki yiluwa yawu niyuma yatama yinakoñiwu hela kukeña kuheta nikuditiyisha aweni kuwaha. Ichi chibaaba chashimwini nawu, kudi antu “atwambaña chakadi kutiya kukala, muyuma yamaneni niyanyanya, kudi antu abula kwilukawu, akwawu mwazatilañawu, amabwambu jawu niantaña jawu.”

¹⁰ Yumanyi yafumaña muniku kutwamba? Antu alekaña kudikuhwelela nawa wubwambu wamanaña. Chakutalilahu, fwikijenu chichatiyakanaña neyi mumbanda adimbaña nfumwindi washinshika kulonda yasweki yilwilu yindi yawuvumbi. Hela neyi iyala wudi namuchima watama, wakabishaña ñodindi nianyanindi kumbadi, ilaña hadi antu wamwekeshaña neyi wayikeña. Hela chochu, twatela kwanuka netu, antu amuchidiwu hiyanateli kumusweka Yehova yuma yejima yelañawuku, muloña “yuma yejima yidi nzekesi nawa yidi hatooka” kudi yena.—Heb. 4:13.

11. Chuma cheliliwu aAnaniya naSafwira chinakutudizishadi? (Talenu mwevulu wakutachikilahu.)

¹¹ Chakutalilahu, Bayibolu yatulejaña ‘Satana chaleñeleliyi’ eyala namumbanda akwaKristu amumafuku awapostolu atwambi kudi Nzambi. Ananiya naSafwira akwatili kafuta mumuchima wawu nakudimba apostolu. Alandishili iheta dawu ilaña aleteli hohu chibalu chamali kudi apostolu chayuma yalandishiliwu. Awa adisumbula akeñeleña kudimwekesha neyi amawahi kuchipompelu, neyi kwiji adiña nachisambu nankashi hakuhana chawaana. Ilaña Yehova wamweni chuma cheliliwu nawa wayibabesheli.—Yilw. 5:1-10.

12. Chumanyi chakayilawu antu abulaña kubalumuka, atwambaña kutwamba kwahamesu bwi-i, nawa muloñadi?

¹² Yehova wamutiyaña ñahi muntu watwambaña? Satana niantu ejima abulaña kubalumuka mumuchima nawa atwambaña kutwamba kwahamesu bwi-i keña ayumbili “mwijiya dakesi.” (Chim. 20:10; 21:8; Mas. 5:6) Muloñadi? Muloña Yehova wamonaña nindi antu atwambaña adi neyi antu ejima “akoñaña yuma yawuzondu kumesu aNzambi.”—Chim. 22:15, tth.

13. Chumanyi chitweluka hadi Yehova, nawa chumichi chatuleñelaña kwiladi?

¹³ Tweluka netu Yehova “Nzambi himuntuku mwaka atwambi.” Mwamweni, “Nzambi hanateli kutwambaku.” (Kuch. 23:19; Heb. 6:18) ‘Yehova wahela . . . idimi datwambaña.’  (Yish. 6:16, 17) Hakwila nawu yatutiyi kuwaha, twatela kuhoshaña walala mpinji yejima. Dichaleteshaña tubuleña ‘kuditwambila wumu namukwawu.’—Kol. 3:9.

14. (a) Twambukaku ñahi nawantu amunsakililu yakutwamba? (b) Lumbululenu chishina chekala haLuka 6:45.

¹⁴ AkwaKristu alala ambukaku ñahi nawantu amunsakililu yakutwamba? ‘Twahoshaña walala.’ (Tañenu Zekariya 8:16, 17.) Pawulu walumbulwili nindi: “Tunakudihameka etu aweni kwikala akwakukalakala aNzambi, . . . mukuhosha yuma yalala.” (2 Kor. 6:4, 7) Yesu wahosheli nindi: “Yuma yayivulu yidi mumuchima wamuntu, diyi yahoshaña kanwa kindi.” (Luka 6:45) Dichi neyi muntu wamuwahi nakuhosha yuma yalala mumuchima windi, mukanwa kindi mukufuma yuma yalala. Wukuhosha walala kutalisha hatuyuma twanyanya nimuyuma yamaneni, wukuhosha walala kudi antu abula kwilukayi, akwawu mwazatilañawu, amabwambu niantaña jindi. Shinshikenu yakutalilahu mutunateli kumwekeshela netu twekalaña ashinshika muyuma yejima.

15. (a) Muloñadi chichatamina kwila yuma yatama iku tunakumwekesha neyi twelaña yuma yayiwahi? (b) Chumanyi chinateli kuyikwasha atwansi kutondolwela yilwilu yatama yawakwawu? (Talenu tumazu twaheshina.)

¹⁵ Indi neyi wudi kansi wunakukeña kwila yuma yinakwilawu akwenu? Bayi wila yuma yatama yelañawu amakwawu amwekeshaña neyi elaña yuma yayiwahiku. Neyi adi nachisaka chawu hela nawantu amuchipompelu amwekanaña neyi adi nayilwilu yayiwahi, ilaña neyi adi nawakwawu atwansi hela neyi adi haintaneti, elaña yuma yambukaku chikupu. Ahoshaña mazu atama, kuvwala yakuvwala yabula kushikilamu, kutiyilila kutumina twatama, kunwa walwa chatama hela kuzatisha yitumbu chatama, kushilahu niyuma yikwawu. Atwambaña kudi anvwali jawu, kudi akwawu akwakudifukula nikudi Nzambi. (Mas. 26:4, 5) Yehova weluka neyi chakwila ‘tunakumulemesha hohu nanyivumbu yetu, ilaña nyichima yetu yidi kwakulehi nayena.’ (Maku 7:6) Chikuwaha neyi tulondela chahosha chishimu chakwila nawu: “Muchima weyi bayi wutiyila akwanshidi ichimaku, mwakamaña kweyi Yehova mwaana wejima.”—Yish. 23:17. *

16. Tunateli kumwekesha ñahi netu twashinshika hakwakula malwihu neyi tunakusonekesha kwiñila mumudimu wampinji yejima?

¹⁶ Hadaha munakukeña kukalakala wupayiniya wampinji yejima hela nyidimu yikwawu, chidi neyi kuzatila haBeteli. Hampinji  yimunakusonekesha, chalema nankashi kuhana wunsahu walala hamalwihu anehuliwu kutalisha hakukola kumujimba, hayisela yimwatondaña nichekala yilwilu yenu. (Heb. 13:18) Indi neyi mwadiñijahu dehi muyilwilu yawuzondu hela yilwilu yatama yimwabula kuleja akulumpi? Yilejenumu ayikwashi kulonda mutwalekihu kukalakala nachinleji chitooka.—Rom. 9:1; Ñal. 6:1.

17. Twatela kwila ñahi neyi antu atukabishaña anakutwihula hadi amanakwetu?

¹⁷ Chakutalilahu, munateli kwila ñahi neyi akwanshimbi alekesha mudimu waWanta mwiluña denu nawa ayitambika nakuyihula malwihu hadi amanakwenu? Komana mukuyileja wunsahu wejima? Yesu welili ñahi chamwihwileñawu kudi Nguvulu wawaRoma? Kwesekeja nachishina chamuNsona, kudi “mpinji yakumwena, nimpinji yakuhosha,” dichi mpinji yikwawu Yesu wamweneneñahu kwindi! (Mukwa. 3:1, 7; Mat. 27:11-14) Haniyi mpinji, mwatela kuzatisha maana kulonda mubuli kusha amanakwetu mukukala.—Yish. 10:19; 11:12.

18. Tunateli kwila ñahi neyi akulumpi anakutwihula kutalisha hadi amanakwetu?

¹⁸ Indi neyi kudi muntu wamuchipompelu wunakoñi nshidi yeneni nawa ninenu muneluki nsañu yamwekeni? Akulumpi ekala namudimu wakuhemba chipompelu chakadi majilu, anateli kuyihula nsañu yimuneluki hadi iwu muntu. Munateli kwila ñahi, sweje-e neyi muntu wunaluwañeshi hibwambu denu imwakuhwelela hela hintaña yenu? “Muntu washimunaña hatooka nsañu yakashinshi wamwekeshaña kuloña.” (Yish. 12:17; 21:28) Dichi mwatela kuyileja akulumpi nsañu yejima chakubula kushiyahu wunsahu wukwawu hela kuhimpa nsañu. Atela kwiluka wunsahu walala kulonda amoni njila yayiwahi yakukwashilamu muntu wunakoñi chiluwa hakwila yekala cheñi nawubwambu wawuwahi naYehova.—Yak. 5:14, 15.

19. Yumanyi yitukadiza muchibaaba chinalondelihu?

¹⁹ Ñimbi yaMasamu Davidi walombeli kudi Yehova nindi: ‘Watiyaña kuwaha nansañu yalala yekela mumuchima wamuntu.’ (Mas. 51:6) Davidi welukili nindi walala wafumaña mukachi kamuchima wetu. AkwaKristu ‘ahoshaña yalala muntu namukwawu’ muchihandilu chawu chejima. Twamwekeshaña cheñi netu tudi ambuña aNzambi ambukaku kuhitila mukudizisha antu chalala mumudimu wetu wakushimwina. Chibaaba chinalondelihu chikashimuna chitunateli kwila mwenimu.