1, 2. (a) Yesu washili maana hamudimwinyi muchihandilu chindi chejima, nawa muloñadi? (b) Chumanyi chitwatela kwila hakwila nawu twikali “akwakukalakala hamu naNzambi”?

YESU KRISTU wadiña mukwakusoña nawa mukwakukalakala. (Maku 6:3; Rom. 15:8) Welukili chakuzata nyidimu yejima yiyedi. Chineli wazatishileña nyitondu, wadizili chakuzatisha yozelu yazatikaña kuniwu mudimu nikusoña chuma kufuma kumutondu. Nawa chineli wadiña ntañishi wansañu yayiwahi, wazatishileña chiwahi Nsona kulonda yakwashi antu ejima eluki chalala chaMwizu daNzambi. (Mat. 7:28; Luka 24:32, 45) Yesu chashikijiliyi yaaka 30, walekeli mudimu wakusoña muloña welukili nindi mudimu windi wakushimwina wadiña walema. Washimwini nindi Nzambi wamutumini kwinza nakushimwina nsañu yayiwahi yaWanta waNzambi hamaseki. (Mat. 20:28; Luka 3:23; 4:43) Yesu washili maana hamudimu wakushimwina muchihandilu chindi chejima nawa wakeñeleña antu amakwawu kuzatila hamu nayena.—Mat. 9:35-38.

² Hitwekala akwakusoñaku, ilaña twekala akwakukalakala ansañu yayiwahi. Iwu mudimu walema chikupu muloña niNzambi wazatañaku, dichatutenenañawu nawu “akwakukalakala hamu naNzambi.” (1 Kor. 3:9; 2 Kor. 6:4) Tweluka netu “Mwakuma izu [daYehova] hinsañu yalala.” (Mas. 119:159, 160) Dimuloña waweni wutwatela kwilukila ‘chakutañisha nikulumbulula chiwahi mazu achalala’ mumudimu wetu wakushimwina. (Tañenu 2 Timotewu 2:15.) Dichi,  twatwalekañahu kudiza chakuzatisha Bayibolu, chozelu chitwazatishaña hakudizisha chalala hadi Yehova, Yesu nihaWanta. Hakwila tuzati chiwahi mudimu wetu wakushimwina, kuloñesha kwaYehova kwaloñeshaku yozelu yikwawu yitwatela kwiluka chakuyizatisha. Iyi yozelu yekala muChikasha Chetu chaYozelu Yakuzatisha Hakudizisha.

3. Chumanyi chitwatela kushaku maana haniyi mpinji yakushimwina yinashaliku, nawa Yilwilu 13:48 yinateli kutukwasha ñahi kwila mwenimu?

³ Munateli kuhayama chaletesha tuchiteneña netu Chikasha chaYozelu Yakuzatisha Hakudizisha, chatela tuchiteni netu Chikasha chaYozelu Yakuzatisha haKushimwina. “Kutañisha” kwatalisha mukushimuna nsañu, ilaña “kudizisha” kwatalisha mukumuleja muntu nsañu yishakami muyitoñojoka nimumuchima windi kulonda yazatisheña yuma yinakutañayi. Haniyi mpinji yakushimwina yinashaliku, twatela kusha maana hakutachika kwilisha atudizi aBayibolu nikuyidizisha antu chalala. Dikwila nawu, twatela kukeñakeñaña antu adi “nanyichima yashinshika yakukeña kwikala nawumi wahaya nyaaka” nikuyikwasha kulonda etiyi.—Tañenu Yilwilu 13:44-48.

4. Tunateli kwiluka ñahi antu adi “nanyichima yashinshika yakukeña kwikala nawumi wahaya nyaaka,” nawa tunateli kuyiwana ñahi?

⁴ Tunateli kwiluka ñahi antu adi “nanyichima yashinshika yakukeña kwikala nawumi wahaya nyaaka”? Neyi chelileñawu mumafuku awapostolu, hakwila nawu tuwani antu amuchidiwu chiña tushimwinaña. Dichi, twatela kwila mwatulejeliyi Yesu nindi: “Mumusumba wejima hela mumukala mumukwiñila, keñakeñenumu muntu wunateleli.” (Mat. 10:11) Hitwatela kukuhwelela antu adinkaña wanta hela abulaña kukeña kumwiluka Nzambi netu akutambwila nsañu yayiwahiku. Twakeñakeñaña antu akweti nyichima yayovu, adizoza nawa akeñaña kudiza chalala. Iku kukeñakeña tunateli kukwesekeja nachuma chelileñayi Yesu hadiñayi mukwakusoña, watela wakeñakeñeleña nyitondu yayiwahi yakusoña yitwamu, yenzelu, mpaanda hela yuma yikwawu. Neyi nawani mutondu wawuwahi, wasendeleña chikasha chindi chayozelu yakuzatisha, wazatileña mudimu windi nakutuña chuma chidi chejima. Ninetu twatela kwila mwomumu hampinji yitunakwilisha antu akweti nyichima yayovu kwikala atumbanji.—Mat. 28:19, 20.

5. Chumanyi chitwatela kwiluka hayozelu yidi muChikasha Chetu chaYozelu Yakuzatisha Hakudizisha? Lumbululenu. (Talenu mwevulu wakutachikilahu.)

⁵ Yozelu yejima yekala muchikasha chayozelu, yekala namudimu wayu. Chakutalilahu, fwikijenu yozelu yakusoña nachu yazatishileñayi Yesu. * Watela wadiña nayozelu yakupima nachu nikufunda nachu mapulanga, yakuketula nachu, kulokola nikubaza nachu, kwolola nikukasa yikunku yejima hamu. Munjila yoyimu, chozelu chejima chekala muChikasha Chetu chaYozelu Yakuzatisha Hakudizisha chikweti mudimu wachu. Dichi twayenu tushinshiki muchikasha chetu chayozelu tutali chitunateli kuzatisha iyi yozelu yatwinkawu.

6, 7. Mwazatishaña ñahi yipapilu yakutambika nachu antu? (b) Nyidimwinyi yiyedi yazataña chipapilu chakutambika nachu antu kwinza nakupompa?

⁶ MaKaadi aKulombola Nachu Antu. Iyi hiyozelu yanyanya ilaña yazatikaña hakukwasha antu kutwiluka nikuyilombola hawebusayiti yetu, hawebusayiti, anateli kwiluka chitwekala nawa anateli nikulomba nawu adizi Bayibolu. Chayinu mpinji, antu akubadika ku 400,000 analombi ha jw.org kudiza Bayibolu nawa antu amavulu alombaña kudiza Bayibolu ifuku nifuku. Mwatela kusendahu makaadi antesha kulonda mushimwineña hampinji yimwayaña kunyidimu.

 ⁷ Yipapilu Yakutambika Nachu Antu. Chipapilu chakutambika nachu antu kukupompa chazataña nyidimu yiyedi. Chashimunaña nawu: “Tunayitambiki nakudiza Bayibolu nawaYinsahu jaYehova.” Kuhiñahu, chashimunaña nawu muntu nateli kwila ñana “hakupompa kwetu kwawantu amavulu” hela “ihulenu muntu wayidizishaña.” Dichi, ichi chozelu chalumbululaña chitwekala nawa chatambikaña “antu eluka nawu atela kudiza hadi Nzambi” kulonda adizi Bayibolu nanetu. (Mat. 5:3) Hela chochu, twayitambwilaña antu enzaña kukupompa kwetu hela chakwila aneteji kuyidizisha Bayibolu hela nehi. Neyi enza nakupompa, anateli kumona nikutiya chitwadizishaña antu chalala chamuBayibolu.

8. Muloñadi chichalemena antu kwinza kukupompa kwetu hela kamu hohu? Shimunenu chakutalilahu.

⁸ Twatela kutwalekahu kutambika antu kwinza kukupompa kwetu hela kamu hohu. Muloñadi? Akumona chaambu chekala hakudiluñisha kuspiritu kutwadiluñishaña hakupompa kwetu nayilwilu yatama yekala muBabiloni Muneni. (Isa. 65:13) Manakwetu Ray nimuhela Linda akuUnited States amweni ichi chaambu hadi yaaka yayivulu yinahitihu. Dichi, afuukwilihu kutachika kuya kuchechi. Amukuhweleleli Nzambi nawa akeñeleña kudiza hadi yena, dichi atachikili kuya mumachechi ashiyashana amumusumba wawu. Ayili mumachechi amavulu chikupu nimazanvu ansakililu yashiyashana. Henohu kanda atondi chechi, awa adisumbula afuukwilihu yuma yiyedi yatela kwikala muchechi yatela kuyawu. Chatachi, ateleleli kwilukahu yuma yikwawu hampinji yinakutañawu, chamuchiyedi, antu amuchechi ateleleli kuvwala chiwahi nakumwekesha nawu amwimenañaku Nzambi. Hadi yaaka yayivulu, ayili kumachechi ejima amumusumba wawu, ilaña yuma yakeñeleñawu ayiwanini wanyi. Kwosi yuma yadiziliwu nawa antu ayileña kumachechi avwalileña chatama. Hanyima yakwila anafumi dehi kuchechi yakukumishaku yadiña handandanda yawu, Linda wayili kumudimu nawa Ray wafuntili kwitala. Hafuntileñayi kwitala, wemeni namotoka yindi Hetala daWanta nawa watoñojokeli nindi, ‘Komana kwila niñila mukachi kulonda nitali chinakwilawu nehi?’ Hela chochu, wenjili nakuwana chuma chabulili kuwanayi kumachechi ejima! Antu ejima Hetala daWanta adiña akasunuka, amuzañalu nawa avwalili chiwahi. Ray washakamini kumbidi nawa watiyili kuwaha yuma yadiziliyi! Chuma chamwekeni chidi tuhu neyi chahosheli kapostolu Pawulu hadi muntu wunenzi kukupompa kwawakwaKristu katachi nakuhosha nindi: “Chalala Nzambi wudi mukachi kenu.” (1 Kor. 14:23-25) Kufuma hanidi ifuku, Ray watwalekelihu kuya kukupompa haMulungu-haMulungu, kuhiñahu watachikili nikupompa mukachi kamulungu. Linda niyena watachikili kupompa nawa chashikiliwu muyaaka yamuma 70, etejeli kuyidizisha Bayibolu nawa apapatisheweli.

9, 10. (a) Muloñadi matilakiti chapelelawu kuyizatisha? (b) Lumbululenu chakuzatisha tilakiti yaWanta waNzambi hiChumanyi?

⁹ MaTilakiti. Tukweti matilakiti 8 muchikasha chetu. Awa matilakiti apela kuzatisha nawa azatikaña chiwahi hakutachika kuhanjeka nawantu. Kufuma hatachikili kuyidishawu mu 2013, matilakiti akushika ku 55 biliyoni anayipulinti. Kuwaha kwanawa matilakiti kudi kwakwila nawu chimweluka kuzatisha yimu, chikuyipelela kuzatisha ejima muloña ayisoneka munjila yoyimu. Munateli kuzatisha ñahi tilakiti hakutachika kuhanjeka namuntu?

¹⁰ Munateli kuzatisha tilakiti yakwila nawu Wanta waNzambi hiChumanyi? Mulejenu muntu malwihu adi hefu dakutachikilahu nawa mwihulenu nenu: “Komana mwadihulahu dehi nenu Wanta waNzambi hiChumanyi? Komana mukuhosha nenu. . . ?” Kuhiñahu mwilenu yatondihu ñakwilu yimu haniyi ñakwilu yisatu. Chakadi kumuleja nenu nakuli mwalala hela nehi, bakulenu hanasonekiwu nawu “Bayibolu Yahoshaña  Nawu” nawa tañenu nsona yaDanyeli 2:44 niIsaya 9:6. Neyi chinatwesheki, twalekenuhu kuhanjeka nindi. Nkuminaku, mulejenu lwihu lwakufuntila ludi kunyima heshina damutu wunakwila nawu “Lwihu Lutwatela Kutoñojokahu”: “Indi antu akashakamaña ñahi muchiyuulu chaWanta waNzambi?” Chikuyikwasha kushiya nsañu yimwakenza nakuhanjekahu namuntu. Neyi munadiwani cheñi, munateli kumuleja nsañu yidi mukudiza 7 mubroshuwa yaNsañu Yayiwahi Yinafumi Kudi Nzambi!, chozelu chimu chitwazatishaña hakudizisha Bayibolu.

11. Magazini etu ayisonekelaña mudimwinyi, ilaña chumanyi chitwatela kwiluka hanawa magazini?

¹¹ Magazini. Kaposhi Kakutalila niAwake! dinyikanda yinedishiwu nawa yinabalumuniwu nankashi mukaayi! Muloña wakwila awa magazini ashikaña mukaayi kejima, nyitu yekala hakava ayisonekaña kulonda yikokoleña antu kwejima kwekalawu. Twatela kuyizatisha iyi yozelu kulonda tusañumuneña nachu antu ekali nampwila yakwiluka chuma chalema muchihandilu makonu. Hela chochu, hakwila awa magazini azatiki chiwahi, twatela kwiluka antu anasonekeliwu magazini himagazini.

12. (a) Awake! ayisonekelaña antu amuchidinyi, nawa yekala nankeñelwinyi? (b) Yumanyi yayiwahi yafuminimu hampinji yimwazatishili ichi chozelu?

¹² Awake! ayisonekelaña antu elukaku chantesha hela abula kwiluka Bayibolu. Anateli kwikala antu abula kwiluka ntañishilu yawakwaKristu, antu aleka dehi kukuhwelela nsakililu yakutwamba yidi yejima hela abula kwiluka nawu muBayibolu mwekala nsañu yinateli kuyikwasha. Nkeñelu yaAwake! yakukwasha muntu yeluki nindi Nzambi wekala kwoku. (Rom. 1:20; Heb. 11:6) Yakwashaña cheñi muntu kukuhwelela nawu Bayibolu ‘chalala . . . hizu daNzambi.’ (1 Tes. 2:13) Nyitu yisatu yaAwake! yamu 2018 yinakwila nawu: “Chakwikala Namuzañalu” (“The Way of Happiness,”) “Yuma 12 Yinateli Kukwasha Chisaka.” (“12 Secrets of Successful Families,”) “niYuma Yinateli Kukwasha Antu Ananeñi.” (“Help for Those Who Grieve.”)

13. (a) Kaposhi Kakutalila, kawantu amavulu akisonekelaña antu amuchidinyi? (b) Yumanyi yayiwahi yafuminimu hampinji yimwazatishili ichi chozelu?

¹³ Kaposhi Kakutalila, kawantu amavulu akisonekelaña antu alemeshaku Nzambi niIzu dindi. Hela chakwila elukaku Bayibolu chanti, ilaña elukisha wanyi chiyatañishaña. (Rom. 10:2; 1 Tim. 2:3, 4) Nyitu yisatu yamu 2018 yinakwakula malwihu akwila nawu: “Komana Bayibolu Yinateli Kutukwasha Makonu?,” “Yumanyi Yikamwekana Kumbidi?,” “niNzambi Wayakamenaña?”

14. (a) Mudimwinyi wazataña mavidiyo awana ekala muChikasha Chetu? (b) Yumanyi yayiwahi yafuminimu hampinji yimwatalishili antu awa mavidiyo?

¹⁴ Mavidiyo. Mumafuku aYesu, mukwakusoña wazatishileña hohu yozelu yakumakasa. Ilaña antu asoñaña munanu mafuku azatishaña yozelu yakesi kawuneñu, yidi neyi mpoku yakupula nachu mapulanga, mbumbu, makina akupopa nachu nyisumali niyuma yikwawu. Kubombela hanyikanda yakupulinta, muchikasha chetu chayozelu mudi mavidiyo amawahi awana akutalisha antu, anakwila nawu: Muloñadi Wutwatela Kudizila Bayibolu?, Yumanyi Yamwekanaña Hakudiza Bayibolu?, Yumanyi Yamwekanaña Hetala daWanta?, niaYinsahu jaYehova Twekala Antu Amuchidinyi? Mavidiyo amaminiti ayedi nakufunta mwishina azatikaña chiwahi halwendu lwatachi. Mavidiyo amalehi tunateli kuyizatisha hakufuntila nikudi antu ekalaña nampinji yeneni. Iyi yozelu yinateli kusañumuna antu kudiza Bayibolu nikwinza kukupompa kwetu.

15. Shimunenu yuma yayiwahi yafumañamu neyi muntu yatala vidiyo yetu mwidimi dindi.

¹⁵ Chakutalilahu, muhela wumu wabulakeni mumbanda wafumini kuMicronesia wahosheleña idimi daYapese, dichi wamutalishili vidiyo  yaMuloñadi Wutwatela Kudizila Bayibolu? mwidimi dindi. Vidiyo chiyatachikili kuvuma, iwu mumbanda wahosheli nindi: “Nahayami! Iwu diwu muchidi wami. Nakuhosha neyi chitwahoshaña kwetu. Nakuhosha muchidi wetu.” Kufumahu, wahosheli nindi nakuya nakutaña yuma yejima nikutala mavidiyo ejima adi ha jw.org mwidimi dindi. (Esekejenu Yilwilu. 2:8, 11.) Shinshikenu cheñi chakutalilahu chikwawu. Muhela wakuUnited States wamulejeli mwihwindi chatela kutalayi vidiyo yoyimu mwidimi dindi. Wayitalili nawa wamutemesheleli emelu nakumuleja nindi: “Chibalu chinakuhosha nawu watama diyi wunakuyuula kaayi chanshika hamuchima. Dichi nalomba nami andizishi Bayibolu.” Iwu muntu washakamaña mwituña mwalekeshawu nyidimu yetu.

16. Lumbululenu nkeñelu yanawa mabroshuwa: (a) Mutiyililenu Nzambi Kulonda Mwakahandi Haya Nyaka. (b) Nsañu Yayiwahi Yinafumi Kudi Nzambi! (c) Anyi Anakwila Mwaya Muchima waYehova Makonu?

¹⁶ Broshuwa. Munateli kudizisha ñahi muntu chalala wabula kwilukisha kutaña hela wabula nyikanda yetu mwidimi dawu? Tukweti chozelu chitwatela kuzatisha, broshuwa yaMutiyililenu Nzambi Kulonda Mwakahandi Haya Nyaka. * Broshuwa yaNsañu Yayiwahi Yinafumi Kudi Nzambi! Hichozelu chachiwahi nankashi chakutachika nachu kudizisha antu. Munateli kuleja muntu nyitu 14 yidi kunyima yabroshuwa nawa mulejenu yatondihu mutu wunamutiyishi kuwaha. Kuhiñahu, tachikenu kuhanjeka hakudiza kunatondiyi. Mwesekahu dehi kuzatisha iyi njila hakufuntila? Broshuwa yamuchisatu yidi muchikasha chetu, hibroshuwa yaAnyi Anakwila Mwaya Muchima waYehova Makonu? Ayisoneka kulonda tukwasheña atudizi eluki kuloñesha kwetu. Hakwila mwiluki chakuzatisha iyi broshuwa kudi kadizi hikadizi, talenu Chihandilu niMudimu Wanetu AkwaKristu—Mukanda Wakupompa waMarch 2017.

17. (a) Nkeñelwinyi yikweti mukanda wejima wakudizamu? (b) Chumanyi chatela kwilawu antu anapapatishewi, nawa muloñadi?

¹⁷ Nyikanda. Neyi munatachiki dehi kudiza mubroshuwa, hadi mpinji yidi yejima, mwatela kuya mumukanda waYumanyi Yinateli Kutudizisha Bayibolu? Ichi chozelu chikukwasha muntu kwiluka ntañishilu yamuBayibolu. Hanyima yakumanisha iwu mukanda nawa neyi kadizi nakutwalekahu kupama kuspiritu, mwatela kutachika kudiza mumukanda waShakamenu Mukukeña kwaNzambi. Ichi chozelu chikumukwasha kadizi kuzatisha yishina yamuBayibolu muchihandilu chindi chejima. Anukenu nenu, hela hanyima yakupapatishewa, antu anapapatishewi atela kutwalekahu kudiza sampu anamanishi nyikanda yejima yiyedi. Chumichi chikuyikwasha kwikala nachikuhwelelu chakola muchalala.—Tañenu Akolosi 2:6, 7.

18. (a) 1 Timotewu 4:16 yatukoleshaña kwiladi etu antañishi achalala, nawa yumanyi yinateli kufumamu? (b) Tukweti nkeñelwinyi hampinji yitunakuzatisha Chikasha chaYozelu Yakuzatisha Hakudizisha

¹⁸ Etu aYinsahu jaYehova atwinka mudimu wakushimwina “nsañu yakuchiñeja kuhitila mumazu achalala ansañu yayiwahi” yinateli kukwasha antu kwikala nawumi wahaya nyaka. (Kol. 1:5; tañenu 1 Timotewu 4:16.) Hakwila twili mwenimu, atwinka Chikasha chaYozelu Yakuzatisha Hakudizisha chidi nayuma yejima yitwatela kuzatisha. (Talenu “ Chikasha chaYozelu Yakuzatisha Hakudizisha.”) Tuzatisheña iyi yozelu munjila yayiwahi. Mukwakushimwina wejima nateli kusakula mukanda wunateli kuzatishayi hakuhanjika namuntu wudi nampwila nimpinji yakuwuzatisha. Bayi neyi mudimu wetu wakuhana hohu nyikanda hela kwinka muntu wunakubula kukeña kutiya kunsañu yetuku. Nkeñelu yetu yakwilisha atumbanji ashinshika, adizoza, adi nanzala yakudiza izu daNzambi, antu adi “nanyichima yashinshika yakukeña kwikala nawumi wahaya nyaaka.”—Yilw. 13:48; Mat. 28:19, 20.