Nasemukili mu 1934. Haniyi mpinji, anvwali jami, aFred naEdna Molohan, adiña dehi aTudizi aBayibolu adikita (A Yinsahu jaYehova) hadi yaaka 20. Natiyaña kuwaha muloña andizishili kumukeña Nzambi. Twashakamineña muParsons, tawuni yanyanya yamusoutheastern Kansas. Twadiña muchipompelu mwadiña akwaKristu awayishewa amavulu. Chisaka chetu chayileña nakupompa mpinji yejima nikushimwina chalala chaMwizu daNzambi. Hamposu namwaana twayileña nakushimwina munyikwakwa, kushimwina kutunakutena makonu netu kushimwina kudi antu amavulu. Mpinji yikwawu twazeyeleña, ilaña aTata atulandilileña ice cream neyi tunamanishi dehi kushimwina.

Chipompelu chetu chadiña neluña deneni dakushimwina, mwadiña matawuni anyanya amavulu kushilahu nimafamu amavulu. Chitwayileña kudi andimi, twahimpileña nyikanda namafu, mateta nitusumbi. Chineli aTata ahaninineña chadimu yawaana yanyikanda, yakuda yitwatambwileña twadiña nakuyida.

Anvwali jami alandili phonograph yazatishileñawu hakushimwina. Hela chakwila nadiña kansi, ilaña nayikwashileña aTata nawaMama hampinji yavumishileñawu mpanji jakukwata jaManakwetu Rutherford hitwafuntilileña kudi antu niatudizi aBayibolu.

Atata abalumwini motoka yetu, Ford yamu 1936 kwikala motoka yayihoshelu, motoka yakasilileñawu yihoshelu hewulu. Iyi motoka yazatikileña chiwahi mumudimu wakutandisha nsañu yaWanta. Kakavulu, twasambilileña kuvumisha tumina kulonda antu ashiku maana, nkumininaku  twavumishileña mpanji yaBayibolu yakukwata. Neyi mpanji yinamani dehi, twahanineña nyikanda kudi antu amwekesheleña mpwila.

Atupokola amutawuni yaCherryvale, Kansas, ayikaanishili aTata kuvumishila motoka mutawuni mwiluña dakunookela, muloña antu amavulu hamulungu adiña nakunooka, ilaña ayitejeli kuya nakuvumishila kunsa yatawuni. Atata atadikili wanyi, dichi ayili nakwimika motoka kunsa yeluña dakunookela, nawa ayitalishilili kwiluña dakunookela kulonda antu atiyeña jimpanji jikuvumaña. Natiyileña kuwaha kuzatila hamu nawaTata niyayami Jerry.

Hakumana kwayaaka yamuma 1930, twazatili kampeni yeneni kulonda tumanishi swayi maluña akushimwinamu mwadiña ikañesha dasweja. Twahindukileña kumacha (neyi chitwelili muJoplin, Missouri) nakusha matilakiti nitunyikanda twanyanya mwishina dayiisu yamatala chakadi kututiya. Kuhiñahu, twayileña nakuhumañena kunsa yamusumba kulonda tutali neyi kudi antu anakwatiwu kudi atupokola.

Njila yikwawu yitwashimwinineñamu muniyi yaaka, hikwenda munyikwakwa. Hakwila nawu tutiyakeshi Wanta, twadiña nakuvwala makaadi, yimu kumbidi yikwawu kunyima iku tunakwenda munyikwakwa yamumusumba. Inakwanuka hitwadiña nakwenda mutawuni yetu iku akwetu anavwali makaadi akusoneka nawu “Religion Is a Snare and a Racket.” Anyeñumokeli mutawuni hadi makilomita 1.6 nawa nkumininaku, afuntili kwitala. Hampinji yendeleñawu, hiyamwenihu ikañesha didi dejimaku, ilaña awanini antu amavulu adiña nampwila.

Kakavulu chisaka chetu chafumineña kuKansas nakuya kukupompa kwamaneni kuTexas. Atata adiña nakuzata kuMissouri-Kansas-Texas Railroad (ateneneñaku cheñi nawu M-K-T, hela Katy, Railroad), dichi twazatishileña pasi yawatata yakumudimu hakukandama sitima kulonda tuyi nakuhempula antaña jetu nikuya kukupompa kwamaneni. Amandumi awakulumpi, aFred Wismar niañodawu, aEulalie, ashakamineña muTemple, Texas. Amandumi aFred adizili chalala hachidiñawu anyiki muyaaka yakutachika yamuma 1900, apapatisheweli nawa adizishiliku nianyiki jawu kushilahu niamama. Ayilukili nankashi kudi amanakwetu amuTexas mwadiña nakuzatilawu wuzone servant (makonu wunkoñi wañinza). Adiña naluwi, namuzañalu nawa adiña chiwahi. Adiña akeña chalala nankashi nawa ankwashili chikupu hinadiña kansi.

Mu 1941 twakandamini sitima hakuya kukupompa kweneni kuSt. Louis, Missouri. Atwansi ejima ayishakamishili hamu mwiluña dakupompela kulonda atiyilili kumpanji yaManakwetu Rutherford, yadiña namutu nawu “Anyana kaMwanta.” Chitwamanishili kutiyilila kumpanji, antu ejima atiyili kuwaha hakutambula mukanda wadiña namutu nawu Children, wahaniniyi Manakwetu Rutherford niakwawu amukwashileñaku.  Kwadiña atwansi akubadika 15,000, adiluñishili iku kupompa.

MuApril 1943 twadiluñishili cheñi kupompa kwañinza muCoffeyville, Kansas, kwadiña namutu nawu “Call to Action” (Kuzatila Chinayilejiwu.) Haniku kupompa abidikili nawu yipompelu yejima yikwikalaña naShikola Yawakwakushimwina nawa edishili mukanda wadiña nakudiza 52 wakuzatisha muniyi shikola. Chimwahitili mpinji, muchaaka chochimu nahanini mpanji yatachi mushikola. Iku kupompa kwañinza kwadiña kwalema muloña dihu hinapapatisheweli hamu nawakwetu mwijiya dachilly farm.

Namanishili shikola mu 1951 nawa nafuukwilihu yuma yinakelaña kumbidi. Nakeñeleña nankashi kuzatila haBeteli, hadiña nakuzatilayi Jerry, dichi natemesheli fomu yakukeña kuzatila haBeteli kukasanji kamutayi kuBrooklyn. Hashimbwili wanyi, anlejeli nawu natela kutachika kuzatila haBeteli haMarch 10, 1952. Munafuukwili munankwashi kumukalakela Nzambi chikupu.

Nakeñeli nankashi kuzatila kuyapulintilaña nyikanda kulonda nikwasheña mudimu wakupulinta magazini ninyikanda yikwawu. Ilaña anyinkeli mudimu wakuhana yakuda, kuhiñahu antwalili kwakutelekela yakuda, kweniku nadizili yuma yayivulu. Dichi hinazatililihu kuyapulitilaña nyikandaku. Hela chochu, kwakutelekela kunadiña nakuzatila twadiña nakudihimpashana, dichi nadiña nampinji yeneni yakudiza nkawami mulayibulali yamuBeteli. Chumichi chankwashili kukolesha wubwambu wami naNzambi nawa chikuhwelelu chami chakoleli chikupu. Chankwashili cheñi kutwalekahu kumukalakela Yehova haBeteli kwesekeja nahanakumini ñovu jami. Jerry wafumini haBeteli mu 1949 nawa wasumbwili Patricia, ilaña ashakamineña kwakwihi naBrooklyn. Ankwashili chikupu hampinji yinayili haBeteli.

Chinashikili tuhu haBeteli, nawanini ntanjikilu yakutonda amanakwetu amakwawu ahaBeteli akuhanaña jimpanji. Amanakwetu atondeliwu ayitumineña kuyipompelu hadiña makilomita 322 kufuma kuBrooklyn, kuya nakuhana jimpanji jawantu amavulu nikuzatila hamu nayipompelu mumudimu wakushimwina. Ninami antondeli. Hinahanineña mpanji yatachi yadiña naora yimu, natiyili woma. Hakuya kuyipompelu, nakandamineña sitima. Inakwanuka mu 1954 ifuku dimu hamulungu namwaana hikwatutili nankashi, nakandamini sitima yayileña kuNew York nawa nateleleli kushika haBeteli namelela. Ilaña kwanokeli nvula yachishika yitooka yeneni. Dichi sitima yafwili. Nkumininaku, sitima yashikili muNew York City hachimu na 5 koloku yantetemena. Chinasulukili, nahitilili munjanji yamwishina nakuya kuBrooklyn nawa napandakeneni kumudimu, ilaña nalabiliku chanti nawa nazeyeli muloña wakwila nakaaminihu wanyi. Hela chakwila nakabakeni, natiyili kuwaha muloña nayili nakukwasha amanakwetu nawa nadilukili nawamabwambu amavulu chikupu.

Hampinji yinayili haBeteli, natachikili kuwanika mumbadi yakudiza Bayibolu yatiyakesheleñawu hachikunzulemba chaWBBR mulungu nimulungu. Hayina mpinji itu tusanji twakukwatilamu mazu twadiña hetala damuchiyedi da 124 Columbia Heights. Manakwetu A. H. Macmillan wakalakeleli haBeteli yaaka yayivulu niyena wadiña munawa maprogiramu. Twadiña nakumutambika netu Manakwetu Mac. Wamwekesheli chakutalilahu chachiwahi kudi atwansi amuchisaka chaBeteli muloña watwalekelihu kuumika mumudimu waYehova hela chakwila wahitileña mukukala kwakuvulu.

Mu 1958, antambikili kuya nakuzatila muShikola yaGileyadi. Nadiña nakutambwila amanakwetu niahela mapasi nikuyiloñeshela chakwenda hakuya kumatuña kwayitumineñawu. Chineli muniyi yaaka kundeki afwetesheleña mali amavulu, akashikola antesha hohu diwu azatishileña madeki. Kakavulu akashikola ayileña muAfrica nikuAsia, akandamineña mbopolu. Ndeki chijavulili, wuseya wakeheli, dichi amishonali amavula atachikili kuya kwayitumineñawu nandeki.

Mu 1960 natachikili kuyibukiñila amanakwetu ayileña kukupompa kwamatuña kwamu 1961 madeki, kufuma kuUnited States nakuya kuEurope. Nakandamini ndeki muNew York nakuya kukupompa kweneni kwadiña kuHamburg, muGermany. Chitwamanishili kupompa, ami niamanakwetu asatu amuchisaka chaBeteli twabukiñili motoka kufuma kuGermany nakuya kuItaly, twayili nakuhempula kasanji kamutayi kakuRome. Chitwafumini kweniku, twayili kuFrance, twahitili muMpidi jaPyrenees nawa twayili kuSpain, mwituña mwakaanishiliwu mudimu wetu wakushimwina. Twatwesheli kuyinsendela amanakwetu akuBarcelona nyikanda, yitwavuñili neyi yawaana. Twatiyili kuwaha chitwadimweni nawu. Chitwashikili kuAmsterdam, twakandamini ndeki yayileña kuNew York.

Chimwahitili chaaka chimu, natachikili cheñi kuloñeshela amanakwetu atondeliwu chakwenda hakuya kukupompa kwamatuña kwadiñaku mukaayi kejima. Kupompa kwamu 1963, kwadiña namutu nawu “Everlasting Good News” (Nsañu Yayiwahi Yahaya Nyaka.) Naloñesheleli antu 583 ayileña kukupompa kwamaneni kwadiña kuEurope, Asia, South Pacific niayileña nakuhempula kuHonolulu, Hawaii nikuPasadena, muCalifornia. Ayileña cheñi nakuhempula kuLebanon nikuJordan, maluña ashimunawu muBayibolu. Kubombela hakuyiloñeshela ñendelu nikwakukaama, Beteli yayiloñesheleli cheñi mapasi akeñekeleña hakwiñila mwituña.

Mu 1963 natiyili muzañalu chikupu. HaJune 29 nasumbwili Lila Rogers wakuMissouri, wayili haBeteli mu 1960. Chimwahitili mulungu wumu kufuma hinasumbwili, ami niLila twayili hamu nawamanakwetu nakuhempula kuGreece, Egypt nikuLebanon. Twakandamini ndeki kufuma kuBeirut hakuya muJordan. Chineli mudimu wetu awukañesheleña muJordan nawa atulejeli nawu aYinsahu jaYehova ayinkeleña wanyi mapasi akwiñila nachu mwituña, dichi twelukili wanyi yuma yadi kutumwekena neyi tunashiki. Ilaña twatiyili kuwaha chitwashikili, twamweni izaza dawantu dinemani kwibulu dandeki nayipapilu yasonekeliwu nawu “Shikenu mwani aYinsahu jaYehova”! Twatiyili kuwaha chikupu hakumona iluña dashimunawu muBayibolu. Twayili nakutala maluña kwashakamineñawu ankakulula, kumaluña kwashimwininiyi Yesu niapostolu indi nikwatachikililiwu akwaKristu hakwila atandi mwahita iseki dejima.—Yil. 13:47.

Tunakalakali hamu naLila hadi yaaka 55 mumudimu wetu. Twayili kapampa kakavulu kuSpain nikuPortugal hampinji yalekesheliwu mudimu wetu munawa matuña. Twayikolesheleña amabwambu, kuyitwalila nyikanda niyuma yikwawu yakeñekeleña. Twahempwileña niamanakwetu adiña mukaleya kadiña kuCádiz, muSpain. Nazañaleli chikupu hakuyituña nampanji jamuNsona.

Kutachika hohu mu 1963 nazatileñaku mudimu wakuloñeshela amanakwetu chakwenda ayileña  kukupompa kwamatuña muAfrica, Australia, Central niSouth America, Europe, Asia, Hawaii, New Zealand, niPuerto Rico. Ami naLila tunapompi kupompa kwamaneni kwakuvulu, kushilahu nikwadiñaku mu 1989, kuWarsaw, muPoland. Amanakwetu amavulu afumini kuRussia nakuya kukupompa kweneni nawa dikwadiña kupompa kwawu kwatachi. Amanakwetu amavulu itwadiwanini nawu ayikasili yaaka yayivulu mutuleya twamuSoviet muloña wachikuhwelelu chawu.

Twatiyili kuwaha hakwendela tusanji twamukaayi kejima nakutuña nikukolesha mamembala amuchisaka chaBeteli kushilahu niamishonali. Hampinji yitwayili nakuhempula kasanji kakukumishaku kakuSouth Korea, twadiwanini nawamanakwetu 50 akasiliwu mukaleya muSuwon. Awa amanakwetu ejima amwekesheli yilwilu yayiwahi nawa adiña cheñi nakukeña kuzata mudimu wawu wakushimwina. Atukolesheli chikupu!—Rom. 1:11, 12.

Namoni Yehova chinakwashiyi antu jindi kuvula muniyi yaaka yinahitihu, kufuma mpinji yinapapatisheweli mu 1943 akwakushimwina adiña 100,000, ilaña chayinu mpinji anabadiki ha 8,000,000 nawa anakumukalakela Yehova mumatuña 240. Iwu mudimu wunazatiki muloña wakuzata nañovu kwawakwakushimwina ayili kushikola yaGileyadi. Twazañaleli chikupu kuzatila hamu nawamishonali yaaka yayivulu nikuyikwasha kulonda azati chiwahi mudimu wawu kumatuña acheñi.

Natiyaña kuwaha chinafuukwili kuya nakuzatila haBeteli. Yehova nankiswili chikupu muyuma yejima yinnazati. Kubombela hamuzañalu wutunadiluñishi haBeteli, ami naLila tunakalakali yaaka yayivulu mumudimu wakushimwina hamu nayipompelu yamuBrooklyn nawa twekalili nawamabwambu amavulu.

Lila natwalekihu kunkwasha kuzatila haBeteli. Hela chakwila nabadiki yaaka 84, natwalekihu kuzata mudimu wahakasanji.

Natiyaña kuwaha kwikala mukuloñesha kwaYehova kwakuwahi nawa neluki chaambu chekala hadi antu amukalakelaña Yehova niantu abulaña kumukalakela. Tunateli kwiluka chikupu mwatalisha mazu ekala haMalaki 3:18 akwila nawu: “Mwakafunta cheñi, mwakashinshika nakwambula niwaloña niwatama, niwamukalakelaña Nzambi, niwabulaña kumukalakela.” Mafuku ejima tunakumona yuma yatama yinakumwekana mukaayi kaSatana, munenzali antu abula kwikala nakuchiñeja nawa abula muzañalu. Ilaña antu amukeña Yehova nawa amukalakelaña adi namuzañalu muyinu mpinji yakala nawa akweti kuchiñeja. Tukweti mudimu wakushimwina nsañu yayiwahi yaWanta. (Mat. 24:14) Twatalilaña ifuku didi kwakwihi nakwinza, mpinji yakajilumuna Wanta waNzambi kaayi kamakonu nakuleta ituña dadiha niyuma yejima yayiwahi yakanayi, kushilahu kukola kumujimba niwumi wahaya nyaaka. Kuhiñahu ambuña aYehova ashinshika akadiluñisha wumi wahaya nyaaka hamaseki.