1. Muloñadi chitwatiyilaña kuwaha kwikala aYinsahu jaYehova?

TWATIYAÑA kuwaha chikupu hakwikala aYinsahu jaYehova! Tudi antu jaYehova nawa twamwekeshaña netu tudi aYinsahu jindi kuhitila mukushimwina nikudizisha antu. Twazañalalaña neyi tukwasha muntu wudi “namuchima washinshika wakukeña kwikala nawumi wahaya nyaaka” kulonda yekali mukwakwitiya. (Yilw. 13:48) Twatiyaña neyi chatiyiliyi Yesu, “wazañaleli nankashi” chelili atumbanji twindi amuleji yuma yayiwahi yamweniwu mumudimu wakushimwina.—Luka 10:1, 17, 21.

2. Tunateli kumwekesha ñahi netu twalemesha mudimu wakushimwina?

² Twalemesha mudimu wetu wakushimwina. Kapostolu Pawulu wamukolesheli Timotewu nindi: “Dihembeña eyi aweni nikusha muchima kuntañishilu yeyi.” Wabombelelihu nindi: “Mukwila mwenimu, wakadaamwina eyi aweni ninowu akutiyililaña.” (1 Tim. 4:16) Dichi mudimu wakushimwina wapulwishaña mawumi awantu. Twadihembaña etu aweni muloña tudi enimbu amuWanta waNzambi. Mpinji yejima twakeñaña kwikala nayilwilu yayiwahi yamuzañaleshaña Yehova nikumwekesha netu twakuhwelela nsañu yayiwahi yitwashimwinaña. (Fwili. 1:27) Twashaña muchima kuntañishilu yetu kuhitila mukuloñesha henohu kanda tuyi nakushimwina nikumulomba Yehova kulonda yatukwashi henohu kanda tutachiki kushimwina.

3. Komana antu ejima anateli kwiteja nsañu yaWanta? Hanenu chakutalilahu.

³ Hela chakwila tukushimwina hakumina ñovu jetu, antu amavulu mwiluña detu hiyanateli kutiyilila nsañu yayiwahi yaWantaku. Talenu chakutalilahu chamanakwetu Georg Lindal, washimwinini kankawindi muIceland kufuma mu 1929 nakushika mu 1947. Wahanini nyikanda yayivulu nankashi, ilaña kwosi niwumu wekalili Chinsahu. Wasonekeli nindi: “Antu amakwawu adimbulwileña nsañu yamuBayibolu, ilaña amakwawu akeñeleña wanyi.” Nihanyima yakutemesha amishonali kufuma kushikola yaGileyadi kulonda atwali mudimu wakushimwina hambidi, hahitili yaaka kwakwihi na 9 hakwila antu  amakwawu amuIceland adihani kudi Yehova nakupapatishewa. *

4. Tukutiya ñahi neyi antu anakukaana nsañu yayiwahi?

⁴ Twatiyaña kutama neyi antu anakukaana nsañu yamuBayibolu. Hadaha twatiyaña neyi chatiyiliyi Pawulu, watiyili “chineñi cheneni nikukata” muloña wakwila aYudeya ejima akaanini kwiteja nawu Yesu diyi Mesiya akaniniwu. (Rom. 9:1-3) Mukwila ñahi neyi munazati nañovu nawa munamulombeliku kadizi wenu ilaña kadizi wenu nakuzatisha wanyi yuma yinakudizayi nawa mwatela kuleka kumudizisha? Indochu neyi kanda mudizishihu muntu yashika kuchipapatishu? Komana mukutachika kudinka muloña hadaha nikutachika kutoñojoka nenu Yehova nakiswili wanyi mudimu wenu? Muchinu chibaaba, tukwakula awa malwihu ayedi: (1) Chumanyi chalemeshayi Nzambi hamudimu wakushimwina? (2) Yumanyi yitwatela kukuhwelela neyi tunakushimwina?

5. Muloñadi mudimu wutunakumukalakela Yehova chiwunateli kubula kulumbulukila kwesekeja nachitunakukuhwelela?

⁵ Bayibolu yahosha hadi muntu welaña nkeñelu yaNzambi nayu: “Yejima yakwilayi yikulumbuluka hohu.” (Mas. 1:3) Hela chochu, chumichi hichinayi mukwila nawu yuma yejima yitukumwililaña Yehova yikulumbulukaña neyi chitunakukeñaku. Chihandilu chawantu ‘chayihuñu’ muloña wakwila wonsu wetu hitwawaninaku. (Yoba 14:1) Cheñi, antu atudimbululaña, mpinji yikwawu anateli kutulekesha kushimwina. (1 Kor. 16:9; 1 Tes. 2:18) Hanu dinu, chumanyi chalemeshayi Yehova kutalisha hamudimu wakushimwina. Talenu yishina yamuBayibolu yikuyikwasha kwakula ilu lwihu.

6. Chumanyi chalemeshayi Yehova hamudimu wakushimwina wutwamuzatilaña?

⁶ Yehova wamonaña chitwazataña nichitomikaña. Yehova watiyaña kuwaha neyi tushimwina neyena muloña wakumukeña, hela chakwila antu anakukaana kwiteja nsañu yitunakuyishimwina. Pawulu wasonekeli nindi: “Nzambi waloña nawa hakavulamena mudimu wenu nikukeña kumwakeñeli ijina dindiku, nanochu chimwakalakeleli akwakujila ninochu chimunatwalekihu nakuyikalakela.” (Heb. 6:10) Yehova weluka chitwazataña nañovu nichitwamukeña, hela chakwila kanda tukwasheñahu dehi muntu nakushika hachipimu chakupapatishewa. Dichi, mwatela kuzatisha awa mazu alejeliyi Pawulu akwaKorinda nindi: “Kudikita kwenu kumunakudikita mudi Mwanta kwamukunkulwayi wanyi,” hela chakwila kwosi yuma yinafumimu mumudimu wumwazataña.—1 Kor. 15:58.

7. Chumanyi chitunakudizila kudi kapostolu Pawulu chalumbulwiliyi mudimu windi?

⁷ Kapostolu Pawulu wadiña mishonali wadikita, nawa watuñili yipompelu yayiha munyisumba yayivulu. Ilaña chelili antu atachiki  kumuhosha nawu Pawulu wadiña ntañishi wamuwahi wanyi, wadisambili wanyi nindi nakwashi antu amavulu kwila akwaKristu. Chatela yaditadikisheña nawantu adimweneña nawu anamubadiki, Pawulu wasonekeli nindi: “Nazati nyidimu yayivulu.” (2 Kor. 11:23) Kufwana Pawulu, twatela kwanukaña netu kuzata nañovu nikuumika dichuma chalemeshayi Yehova.

8. Chumanyi chitwatela kwanukaña kutalisha hamudimu wakushimwina?

⁸ Yehova watiyaña kuwaha namudimu wetu wakushimwina. Yesu watemesheli atumbanji 70 kuya nakushimwina nsañu yaWanta, nawa chamanishiliwu kushimwina “afuntili iku anazañalali.” Chumanyi chayiletesheli azañalali? Ahosheli nawu: “Niandemoni anakutwovwahila muloña wakuzatisha ijina deyi.” Hela chochu, Yesu wayolweli nindi: “Bayi muzañalala muloña wakwila andemoni anakuyovwahila enuku, ilaña zañalalenu muloña wakwila majina enu anayisoneki mwiwulu.” (Luka 10:17-20) Yesu welukili nindi bayi neyi mpinji yejima akamonaña yuma yamuchidiwu mumudimu wawuku. Hela chochu, tuneluki wanyi kuvula kwawantu ahanjekeli nawatumbanji twaYesu ekalili akwaKristu. Atumbanji hiyateleli kutiya kuwaha nanyidimu yazatiliwuku, ilaña chuma chasweja kulema hikwiluka nawu Yehova watiyili kuwaha chazatiliwu nañovu.

9. Kwesekeja naAÑalija 6:7-9, chumanyi chikafumamu neyi tuumikaña mumudimu wakushimwina?

⁹ Neyi tuumikaña mumudimu wakushimwina, tukatambwila wumi wahaya nyaka. Neyi tuzata hakumina ñovu yetu kushimwina nikudizisha nsañu yayiwahi, dikwila nawu “tunakukuwila kuspiritu” kuhitila mukwiteja spiritu yaNzambi yajila yizatikeña muchihandilu chetu. Neyi tubula “kuzeya” hela “kuleka,” Yehova watukana nindi wakatwinka wumi wahaya nyaaka, hela chakwila hitunakwashihu muntu hela wumu kupapatishewaku.—Tañenu AÑalija 6:7-9.

10. Muloñadi antu amakwawu chetejelañawu nsañu yitwayishimwinaña ilaña amakwawu nehi?

¹⁰ Hela antu akwiteja chalala hela akukaana chinashindameni hadi wena. Yesu walumbulwili ichi chalala muchakutalilahu chindi chamukwakukuwa mbutu, wakuwili mbutu yindi hamaseki ashiyashana, ilaña mbutu yakuwiliyi hamaseki amawahi diyi yasoñeli nyikaabu. (Luka 8:5-8) Yesu wahosheli nindi maseki ashiyashana emenañaku antu akweti nyichima yetejaña “Izu daNzambi” munjila yamboka-mboka. (Luka 8:11-15) Kufwana mukwakukuwa mbutu, ninetu hitunateli kukulisha mbutu mukachi kanyichima yawantu itwashimwinañaku. Etu mudimu wetu hikutwalekahu kushimwina nsañu yaWanta. Neyi chahosheliyi kapostolu Pawulu nindi, “muntu-himuntu wakatambwila wufwetu windi kwesekeja namudimu windi,” bayi nayuma yafumaña mumudimu windiku.—1 Kor. 3:8.

11. Muloñadi Yehova chatiyiliyi kuwaha namudimu wakushimwina wazatiliyi Nowa hela chakwila antu etejeli wanyi? (Talenu mwevulu wudi hakava.)

¹¹ Kufuma tuhu kunyima, ambuña aYehova amavulu ashimwinineña antu abulileña kwiteja nsañu yayiwahi. Chakutalilahu, Nowa wadiña “mukwakushimwina kuloña,” hadi yaaka yayivulu. (2 Pet. 2:5) Chakadi nikujina, wakuhweleleli nindi antu amakwawu aketeja nsañu yashimwinineñayi, ilaña Yehova hamwekesheli nindi chumichi chikamwekanaku. Dichi, Nzambi chamulejeliyi Nowa kutuña watu wamulejeli nindi: “Wakeñila muwatu, nineyi, nianyaneyi, niñodeyi, niañodi jawanyaneyi hamu naneyi.” (Kutach. 6:18) Chamulejeliwu kudi Yehova kutalisha hakutoha kwawatu wateleli kutuñayi, hadaha Nowa welukili nindi antu  amavulu akamutiyilila wanyi muloña watu wadiña wanyanya. (Kutach. 6:15) Neyi chitweluka, kwosi muntu niwumu wamutiyilili Nowa. (Kutach. 7:7) Komana Yehova watoñojokeli nindi Nowa washimwinini chiwahi wanyi? Inehi mwani! Yehova watiyili kuwaha namudimu wazatiliyi Nowa, muloña wazatili mudimu wamwinkeliwu kuzata.—Kutach. 6:22.

12. Chumanyi chamuletesheli kaprofwetu Yeremiya kwikala namuzañalu mumudimu windi hela chakwila wamweneña kukala nikañesha?

¹² Kaprofwetu Yeremiya washimwinini hadi yaaka 40 nikubadikahu hela chakwila antu amutiyilili wanyi nawa adiña nakumukañesha. Waneñeli muloña wakwila ‘amusawishileña’ nikumuseha kudi akwakumudimbulula chakwila wakeñeleña nikuleka mudimu wazatileñayi. (Yere. 20:8, 9) Ilaña Yeremiya wazeyeli wanyi! Chumanyi chamukwashili kutwalekahu kushimwina nikuzañalala namudimu windi? Washili muchima haniyi yuma yiyedi yalema. Chatachi, nsañu yaNzambi yalejeleñayi antu yayinkeleña antu ‘mbidi yayiwahi nikuchiñeja’ hela kukuhwelela. (Yere. 29:11) Chamuchiyedi, Yehova wamutondeli Yeremiya kumuhoshelaku kulonda yayileji antu nsañu yindi. (Yere. 15:16) Ninetu twashimwinaña nsañu yakuchiñeja mukanu kaayi nawa tudi aYinsahu jindi emenañaku ijina daYehova. Neyi tusha muchima haniyi yuma yiyedi yalema tukwikalaña namuzañalu hela chakwila antu anakwiteja hela nehi.

13. Chumanyi chitunakudizilaku kuchakutalilahu chaYesu chekala haMaku 4:26-29?

¹³ Hahitaña mpinji hakwila nawu muntu yekali nachikuhwelelu. Yesu washimwini ichi chalala muchakutalilahu chindi chamukwakukuwa mbutu wakamini. (Tañenu Maku 4:26-29.) Hanyima yakwila mukwakukuwa mbutu nakuwi dehi mbutu jindi, jakulileña chovu-chovu nawa mukwakukuwa mbutu helilihu chuma chidi chejima hakwila nawu mbutu jindi jikuli swayiku. Ninenu hanateli kuhita mpinji hakwila nawu kadizi wenu yatachiki kuzatisha yuma yinakudizayi. Ndimi hanateli kukanjikija mbutu jindi kukula swayi-swayi kwesekeja nachinakukeñayiku, munjila yoyimu ninetu hitunateli kukanjikija atudizi etu kupama swayi-swayi kwesekeja nachitunakukeñaku. Dichi bayi muneña hela kuzeya neyi atudizi enu anakushimbula hakwila apami kwesekeja nachimwakuhweleleliku. Neyi chochekala wundimi, mudimu wakwilisha atumbanji wakeñekaña kwikala adiwunjika.—Yak. 5:7, 8.

14. Chakutalilahwinyi chinakumwekesha nawu hanateli kuhita mpinji hakwila antu atachiki kwiteja nsañu yitwayishimwinaña?

¹⁴ Kumaluña amakwawu, hahitaña yaaka yayivulu hakwila nawu muntu yapapatishewi. Talenu chuma chayimwekeneni awa akansi namukulumpi, amuhela Gladys niamuhela Ruby Allen, mu 1959 ayitumini kuya nakuzata wupayiniya wampinji yejima mumusumba waQuebec wekala muCanada. * Antu akaanineña nsañu yaWanta muloña achinineña ikañesha dadiña muchituñilu nawa ayikañesheleña kudi chechi yaKatolika. Muhela Gladys wahosheli nindi: “Twashimwinineña kwitala nitala maora 8 ifuku nifuku hadi yaaka yiyedi, kwosi nimuntu niwumu wetejeli kuhanjeka nanetu. Antu ashinkileña kuyiisu neyi amona nawu yetu tudiku. Ilaña hitwazeyeliku.” Mukuhita kwampinji, antu atachikili kuhimpa chovu-chovu nawa atachikili kwiteja. Chayinu mpinji, muniwu musumba mudi yipompelu yisatu.—Isa. 60:22.

15. 1 AKorinda 3:6, 7 yinakutudizishadi hamudimu wakwilisha atumbanji?

¹⁵ Chakeñekaña antu amavulu kuzatila hamu hakwila nawu akwashi muntu kwikala kambanji. Antu ejima muchipompelu atela kuzatila  hamu hakwila akwashi muntu kupapatishewa. (Tañenu 1 AKorinda 3:6, 7.) Chakutalilahu, mukwakushimwina nateli kumushila muntu wunamwekeshi mpwila tilakiti hela magazini. Dichi iwu manakwetu nakañanyi kufuntilaku nawu nakasiki nawa naleji mukwakushimwina mukwawu kuyaku. Mukwakushimwina wunayiku natachiki kumudizisha Bayibolu. Iwu manakwetu natambiki amanakwetu niahela kuya nakuzatila nawu hamu nawa wejima wawu anamukoleshi kadizi munjila jashiyashana. Amanakwetu niahela ejima akuhanjeka naniwu kadizi akumukwasha kwikala nachikuhwelelu chakola. Munjila yoyimu, neyi chahosheliyi Yesu, mukwakukuwa nimukwakumuna akuzañalela hamu neyi amona kadizi napapatishewi.—Yow. 4:35-38.

16. Munateli kwikala ñahi namuzañalu mumudimu wakushimwina hela chakwila mwakatakataña hela kubula ñovu mumujimba?

¹⁶ Hadaha himukutwesha kushimwina hela kudizisha neyi chimwazatileñaku muloña wakukatakata hela kubula ñovu mumujimba? Munateli kwikala namuzañalu namudimu wumwazataña wakumuna. Talenu chuma chamumwekeneni Mwanta Davidi hampinji yelili yena niamayala indi apulwishi yisaka yawu niyuma yawu kudi aAmaleki. Amayala 200 azeyeli nanjita yazuñileñawu, dichi ashalili kunyima nakuhemba yuma yawu. Chelili anashindi dehi, Davidi wayilejeli nindi anzañani hakachi nakachi yuma yejima yapupiliwu. (1 Sam. 30:21-25) Dichekala nimudimu wetu wakwilisha atumbanji mukaayi kejima. Muntu wudi wejima wazataña hakumina ñovu jindi nateli kwikala namuzañalu neyi muntu wamuha yamwiluka Yehova nawa yapapatishewa.

17. Chumanyi chikuletesha tumusakilileña Yehova?

¹⁷ Twamusakililaña Yehova nachamonañayi mudimu wetu wutwamuzatilaña. Weluka nindi hitunateli kukanjikija antu kututiyilila hela kutachika kudifukula kudi yenaku. Hela chochu, wamonaña chitwazata nañovu, nichitwamukeña nawa wakatufweta. Watudizishaña cheñi chitunateli kwikala namuzañalu namudimu wutunakumuzatila mumudimu wakushimwina. (Yow. 14:12) Twatela kwiluka chikupu netu neyi tubula kuzeya tukumutiyishaña Nzambi kuwaha!