1, 2. (a) Kukalanyi kwamonañawu anvwali, nawa anateli kukwimanisha ñahi? (b) Yikumanyi yiwana yitukuhanjekahu?

EYALA namumbanda adisumbula amuFrance ahosheli nawu: “Twamukuhwelela Yehova, ilaña hichinayi mukwila nawu nianyanetu akamukuhwelelaku.” Atwalekelihu nawu: “Chikuhwelelu hiyachiswanañaku. Anyanetu atachikaña kwikala nachikuhwelelu chovu-chovu.” Manakwetu wakuAustralia wasonekeli nindi: “Kukwasha mwanenu kulonda yekali nachikuhwelelu, hadaha dikukala kweneni kumunateli kumona muchihandilu chenu. Mwatela kuzatisha yitwa yejima yimukweti. Munateli kutoñojoka nenu munamwakuli mwanenu malwihu indi ejima nawa nenu nachitiyi. Chimukuhita mpinji, mukuwana nawu nakuyihula cheñi lwihu lwolumu! Ñakwilu yimukumuleja lelu, kumadiki wakayijimbala. Nsañu jikwawu mwatela kudiza nindi kakavulu.”

² Neyi mudi nvwali, komana mpinji yikwawu mwajinokaña neyi mukutwesha wanyi kudizisha nikufumba anyanenu kwikala amayala niambanda akweti chikuhwelelu? Kuhosha hohu chalala, kwosi niwumu hakachi ketu wukutwesha kuzata iwu mudimu namaana indi. (Yere. 10:23) Ilaña, tukutwesha neyi tukulomba wunlomboli kudi Nzambi. Shinshikenu hayuma yiwana yikuyikwasha kulonda mukwashi  anyanenu ekali nachikuhwelelu: (1) Yilukenu chikupu. (2) Yidizishenu chakufuma hamuchima. (3) Zatishenu yakutalilahu yikuyishika hanyichima. (4) Ikalenu awunda nawa lombenuña.

3. Anvwali anateli kwimbujola ñahi ntañishilu yaYesu?

³ Yesu watiyileña wanyi woma kwihula atumbanji twindi yuma yakuhweleleliwu. (Mat. 16:13-15) Mwimbujolenuña. Mwatela kwihula anyanenu munjila yayiwahi chinakutoñojokawu. Ichi chinabombelimu kuhosha nawu hayuma yabula kukuhwelelawu hela yajinokañawu. Manakwetu wudi nayaaka15 muAustralia wasonekili nindi: “Kakavulu atata ahanjekaña nanami kutalisha hachikuhwelelu chami nikunkwashaku kutoñojoka. Añihulaña nawu: ‘Bayibolu yahosha nawudi?’ ‘Wunakuhweleli chiyahosha?’ ‘Chumanyi chinaleteshi wuyikuhweleli?’ Akeñaña nawu naakuleña mumazu ami bayi neyi kufuntuluka mumazu ahosheleñawu atata hela amamaku. Chinakulili, nelukili chikupu chakwakula.”

4. Muloñadi chichalemena kumona malwihu ejima anayihuliyi mwanenu nenu alema? Shimunenu chakutalilahu.

⁴ Neyi mwana neluki wanyi yuma yimunakumudizisha, bayi mumuzuwila hela kumwakula munjila yatamaku. Mukwashenu mukuwunda kulonda yatoñojoki hanoyu nsañu. Nvwali wumu weyala wahosheli nindi, “Mwatela kumona malwihu anayihuliyi mwanenu nenu alema nankashi. Bayi muyimona neyi amukunkulwayiku, nawa bayi mukaana kumwakula nakutoñojoka nenu oyu nsañu yikuyitiyisha nsonyiku.” Kafwampi, neyi mwanenu nayihuli, chamwekeshaña nawu nakwakamena nawa nakukeña kwiluka. Yesu wehwileña malwihu alema nihampinji yadiñayi nayaaka 12 yakusemuka . (Tañenu Luka 2:46.) Mukwenzi weyala wakuDenmark wayaaka 15 yakusemuka wahosheli nindi: “Hampinji yinajinokeleña neyi chakwila twekala nakudifukula kwalala, anvwali jami awundishili mumesu hela chakwila añakameneni. Malwihu ami ejima inayihwili, ayakwili kuzatisha Bayibolu.”

5. Anvwali anateli kumwekesha ñahi nawu alemesha chikuhwelelu chamwanawu?

⁵ Yilukenu anyanenu chikupu, ilukenu chatoñojokañawu, chatiyañawu niyuma yayakameshaña. Bayi mutoñojoka nenu adi nachikuhwelelu muloña ayaña kukupompa kwawakwaKristu nawa mwayaña nawu hamu mumudimu wakushimwinaku. Hampinji yimunakuzata nyidimu yakumujimba, hanjekenuña nawu nihayuma yakuspiritu. Lombenuña nawu hamu nawa yilombelenukañaku. Fwilenu kwiluka yuma yesekaña chikuhwelelu chawu nawa yikwashenu kulonda ashindi kweseka kunakumonawu.

6. Anvwali neyi adiza chikupu chalala chamuBayibolu, chikuyikwasha ñahi kwikala antañishi amawahi?

⁶ Chineli wadiña ntañishi, Yesu washikileña antiyilili jindi hanyichima muloña wakeñeli Yehova, Izu daNzambi niantu. (Luka 24:32; Yow. 7:46) Munjila yoyimu, kukeña kwamuchidiwu kukukwasha anvwali kushika anyanawu hanyichima. (Tañenu Kuhituluka 6:5-8; Luka 6:45.) Dichi, anvwali dizenu chikupu Bayibolu ninyikanda yetu yikwawu. Keñenu nankashi yileñaleña ninyikanda yetu yahosha haniyi nsañu. (Mat. 6:26, 28) Neyi mukwila mwenimu, mukwiluka chikupu yuma yayivulu, mukumuhameka Yehova nankashi nawa mukwiluka chiwahi chakudizisha anyanenu.—Luka 6:40.

7, 8. Yumanyi yikufumamu neyi nvwali yeluka chikupu Bayibolu? Lumbululenu.

⁷ Neyi mwiluka chikupu chalala chamuBayibolu, mukufwilaña kuhanjeka nachisaka chenu. Dizenuña chalala mpinji yejima, bayi neyi hampinji yimunakuloñesha kupompa kwawakwaKristu hela hakudifukula kwachisaka hohuku. Kubombelahu, kuhanjeka kwamuchidiwu bayi kwikala kwakukanjikijaku, ilaña kwatela kwikalaku mpinji yejima muchihandilu chenu nawa kwakufuma hamuchima. Eyala namumbanda adisumbula muUnited States atoñojokaña hadi Yehova neyi chisaka chawu chinakudiluñisha hansañu yayileñaleña hela hampinji yinakudawu  yakuda yashiyashana. Awa anvwali ahosheli nawu, “twayanukishaña anyanetu kutalisha hakukeña nimaana aYehova amwekanaña muyuma yejima yatwinkayi.” Hadiña nakuwahishawu mwitempa nawanyanawu ayedi awambanda, eyala namumbanda adisumbula amuSouth Africa ayilejeli anyanawu chamenaña mbutu nichiyakulaña. Awa anvwali ahosheli nawu: “Twafwilaña kukwasha anyanetu kulonda alemesheña chikupu wumi nichawuleñawu muchihayamisha.”

⁸ Nvwali weyala wumu wakuAustralia wamutwalili mwanindi weyala wadiña nayaaka yakusemuka kwakwihi na 10 kwitala kwahembelañawu yuma yashiyashana kulonda yakoleshi chikuhwelelu chindi mudi Yehova nimukuleña. Tata yindi wahosheli nindi, “Twamweni anatanjiki yileñaleña yamumenji yakushankulu yatenañawu nawu ma ammonoid nima trilobite, añoñi amumenji. Iyi yileñaleña yajiya dehi yadiña yayiwahi, yakuhayamisha nawa yashikila kubadika yitunakumona makonu. Dichi, neyi chakwila wumi wafumini muyuma yapela nakubalumuka nakwikala yileñaleña yakuhayamisha, muloñadi iyi yileñaleña yakushankulu chiyadiña yakuhayamisha hayina mpinji? Iyi nsañu yantiyishili kuwaha nawa namulejeli mwanami.”

9. Muloñadi yakutalilahu chiyashikilaña antu hanyichima, nawa chakutalilahwinyi chachiwahi chazatishiliyi nvwali wumu wamumbanda?

⁹ Kakavulu Yesu wazatishileña yakutalilahu yaletesheleña antu kutoñojoka, yayishikileña hanyichima nawa yayikwashileña kwanuka yuma. (Mat. 13:34, 35) Anyana afwikijaña chiwahi. Dichi, anvwali esekenuña kuzatisha yakutalila yayivulu hampinji yimunakuyidizisha. Nvwali wumu wamumbanda muJapan dicheliliyi. Anyanindi ayedi awamayala chashikijiliwu yaaka wumu 8, mukwawu 10, wayidizishili kutalisha hampepela yamuluzwizu nikashinshi kadiñayi naku Yehova hakuyituña. Hakwila yeli mwenimu, wayinkeli anyanindi mayeli, shuga nikofi. Dichi wayilejeli anyanindi amupangili kofi, iwu nkawindi, iwu nkawindi. Wahosheli nindi, “Ashiliku kashinshi hakumupangila kofi. Chinayihwili chuma chaletesheli ashiku kashinshi hakupanga kofi, ahosheli nawu akeñeleña apangi kofi kwesekeja nachinakeña. Nayilumbulwilili nami Nzambi wabombeli chiwahi mpepela yamuluzwizu kulonda tuhandeña chiwahi neyi chochimwashaku kashinshi hakupanga kofi.” Ichi chakutalilahu chadiña chatelela kwesekeja nayaaka yadiñawu nayu, nawa adiluñishili chikupu. Chakadi nikujina atwalekañahu kwanuka yuma yadiziliwu.

10, 11. (a) Chakutalilahwinyi chimunateli kuzatisha kukwasha mwanenu kumukuhwelela Nzambi? (Talenu mwevulu wudi hefu datachi.) (b) Yakutalilahwinyi yimwazatishahu dehi?

¹⁰ Munateli kuzatisha njila yalondelañawu hakwocha mankendi kulonda mumukwashi mwanenu yamukuhweleli Nzambi. Munjilanyi? Neyi munochi dehi keki hela mabisiketi, lumbululenu chichawahila kulondela njila hakwocha. Kuhiñahu, mwinkenu mwanenu nkabu, chidi neyi apo, nakumwihula nenu: “Komana weluka neyi kwekala ‘njila’ yalondelaña apo hakwila yimwekani ñana?” Kuhiñahu, yibalulenu hakachi  nawa mwinkenu nchacha yimu. Mulumbulwilenu nenu nchacha yekala neyi njila yalondelaña apo hakwila yikuli. Munateli kumwihula nenu: “Neyi nshimbi jakulondela hakupanga keki kudi wajisonekeli, hanu dinu hinyi wasonekeli njila yalondelaña apo hakwila nawu yimwekani ñana?” Neyi mwana himukulumpi, munateli kumulumbulwila nenu njila yalondelaña mutondu waapo wejima hakwila nawu wukuli yafuma muDNA yaluchacha. Wejima wenu, munateli kutala niyakutalilahu yidi mubuloshuwa yaThe Origin of Life—Five Questions Worth Asking. mafu 10 kushika ku 20.

¹¹ Anvwali amavulu adiluñishaña kuhanjeka nawanyanawu hayibaaba yamuAwake! yashiyashana yahoshaña hamutu wakwila nawu “Was It Designed?” Hela azatishaña iyi yibaaba kudizishilamu anyanawu achidi anyanya chikupu yuma yapela. Chakutalilahu, eyala namumbanda adisumbula muDenmark esekejeli ndeki natujila. Ahosheli nawu: “Ndeki jamwekanaña neyi tujila. Hanu dinu ndeki jinateli kusema mateta nikuyitetula kulonda mufumi tundeki twanyanya? Komana tujila twakeñekaña mabulu mwakuwilila? Nawa wunateli kwesekejaña ñahi chivumina chandeki nachembañayi kajila? Hinyi wukweti maana, watuñaña jindeki tahindi Nleñi yatujila?” Nsañu yamuchidiwu, nikuzatisha malwihu ashikaña hanyichima anateli kukwasha mwana ‘kutoñojoka mwakashinshi’ nikumukuhwelela Nzambi.—Yish. 2:10-12.

12. Yakutalilahu yinateli kukwasha ñahi anyana kukuhwelela Bayibolu?

¹² Yakutalilahu yashikaña hanyichima yinateli cheñi kuletesha mwana yakuhweleli chikupu nindi Bayibolu yoloka. Chakutalilahu, shinshikenu mukanda waYoba 26:7. (Tañenu.) Munateli kulumbulula ñahi nenu iwu mukanda awonena? Munateli kutena hohu yikuma yalala. Kwila mumukwasha mwanenu yafwikiji yuma nehi? Mulejenu nenu Yoba wadiñaku henohu kanda kwikala makina akutalisha nachu mwiwulu atenañawu nawu matelescope nimaspaceship. Mwanenu wukwikala namudimu wakutoñojoka chichinateli kukala kudi amakwawu kwiteja nawu chuma cheneni chidi neyi iseki chikali hamukunkulu. Mwana nateli kuzatisha ngunja hela ilola kulonda yalumbululi chikuma kuhitila mukumwekesha nawu chuma chalema nankashi chatela kushakama hachuma chikwawu. Nsañu yamuchidiwu yinateli kuhayamisha mwanenu kwiluka nindi Yehova wadiña nayikuma yasonekeliwu muBayibolu henohu antu kanda ayiluki.—Nehe. 9:6.

13, 14. Anvwali anateli kuleja ñahi anyanawu kulema kwayishina yamuBayibolu?

¹³ Chikwikala chalema neyi mukudizisha anyanenu kulema kwakulondela yishina yamuBayibolu. (Tañenu Masamu 1:1-3.) Kudi njila jajivulu jakwililamu mwenimu. Chakutalilahu, munateli kuleja anyanenu afwikiji nawu anakubuukila kuyitutu kwekala antu antesha, nawa atela kutonda antu antesha atela kuya nakushakama nawu. Kuhiñahu yihulenu nenu, “Antu atela kwikala nayilwilu yamuchidinyi hakwila nawu akashakami chiwahi nawakwawu?” Munateli cheñi kuyileja kufumba kwakuwahi kwekala ha Aŋalija 5:19-23.

¹⁴ Muniyi njila munateli kudizisha anyanenu yikuma yiyedi. Chatachi, nshimbi jaNzambi jaletaña kuwunda nikunuñañana. Chamuchiyedi, Yehova nakutuloñeshela chihandilu chachiwahi mwituña dadiha kuhitila mukutudizisha. (Isa. 54:13; Yow. 17:3) Munateli kwidisha iyi yikuma kuhitila mukutondahu nsañu yimu yamwekeni munyikanda yetu. Yinateli kufuma muyibaba yidi neyi, “Bayibolu Yahimpa Yihandilu Yawantu,” muKaposhi Kakutalila. Hela neyi muntu wumu muchipompelu chenu nahimpi chihandilu chindi kulonda yamutiyishi Yehova kuwaha, munateli kumutambika kulonda yayileji nsañu yindi chiyadiña. Yakutalilahu yamuchidiwu yamwekeshaña nawu yishina yamuBayibolu yalema.—Heb. 4:12.

15. Yumanyi yimwatela kufwila kwila hampinji yimunakudizisha anyanenu?

 ¹⁵ Chikuma chidi chakwila nawu: Neyi munakudizisha anyanenu, bayi muzatishaña njila yoyimuku. Ilaña esekenu kufwikija yuma. Yikwashenu kutoñojoka, hela chochu toñojokenu hayaaka yikwetiwu. Kudiza kwenu kwikaleña kwakuzañalesha nawa kwakukolesha chikuhwelelu. Nvwali weyala wahosheli nindi: “Bayi muzeya kuzatisha njila jajiha hakuhanjekelamu nsañu jakunyaakaku.”

16. Muloñadi kudiwunjika chikwalemena hakudizisha anyana? Lumbululenu.

¹⁶ Spiritu yaNzambi yakeñekaña hakwila nawu muntu yekali nachikuhwelelu chakola. (Ŋal. 5:22, 23) Kufwana mukabu, chikuhwelelu chashimbulaña hakwila nawu chikuli. Dichi mwatelela kudiwunjika nikutatakena hakudizisha anyanenu. Nvwali weyala wakuJapan wukweti anyana ayedi wahosheli nindi, “Ami nañodami twayishileña anyanetu maana. Kufuma tuhu kuwansi wawu, nadizileña nawu hadi maminiti 15 hefuku, kufumishaku hohu mafuku hitwayileña kukupompa kwawakwaKristu. Chatukalilileña wanyi kudiza hadi maminiti 15.” Nkoñi wañinza wasonekeli nindi: “Hinadiña kampululu, nadiña namalwihu amavulu hela nadiña nakujinoka nankashi. Chihashimbwili, malwihu ami twayidizileña kukupompa, hakudifukula kwachisaka hela hakudiza kwahalwami. Dichi anvwali atela kutwalekahu kudizisha anyanawu.”

17. Muloñadi chichalemena kudi anvwali kwimika chakutalilahu chachiwahi, nawa eyala namumbanda adisumbula emikila ñahi anyanawu awambanda chakutalilahu?

¹⁷ Hela chochu, chuma chalema nankashi hichakutalilahu chenu chachikuhwelelu. Anyanenu akumonaña yuma yimukwilaña, nawa yumiyi yikuyikwasha kwila yuma yayiwahi. Dichi chineli mudi anvwali, twalekenuhu kukolesha chikuhwelelu chenu. Anyana atela kumona nawu mwamukuhwelela Yehova chikupu. Eyala namumbanda adisumbula muBermuda neyi kudi yuma yinayakameshi, alombelaña hamu nawanyanawu kulonda yayilomboli nawa akoleshaña anyanawu nawu alombeña nkawawu, iwu halwindi iwu halwindi. “Twamulejeleña cheñi mwanetu wamumbanda wamukulumpi netu, ‘Mukuhweleli Yehova chikupu, dikitaña mumudimu waWanta nawa bayi wuswejeña kwakamaku.’ Neyi yamona yuma yayiwahi yinafumimu, welukaña nindi Yehova nakutukwasha. Chumichi chinaleteshi yakuhweleli Nzambi niBayibolu.”

18. Chikumanyi chalema chatela kwilukawu anvwali?

¹⁸ Hela chochu, anyana atela kukolesha chikuhwelelu chawu awenawu. Hakwikala anvwali, munateli kutumba nikutukumwina. Ilaña Nzambi diyi wukuyikulisha. (1 Kor. 3:6) Dichi, lombenu spiritu yindi, zatenu nañovu kulonda mudizishi anyanenu, muloña neyi mukwila mwenimu Yehova wukuyikiswila.—Efwes. 6:4.