1, 2. Kukalanyi kunateli kunakumonawu ambuña aYehova?

KUTACHIKILA kudi muntu watachi washinshika, Abeli, kushika nimumafuku etu, akwakudifukula ashinshika analwishili chikuhwelelu. Kapostolu Pawulu wasonekeleli akwaKristu amuHeberu nindi “atatakeneni mukulwisha nankashi namakabi,” hampinji yakeñeleñawu nawu Yehova yayiteji nikuyinka nkisu. (Heb. 10:32-34) Pawulu wesekejeli kulwisha kwawakwaKristu kukulwisha kwawakwayisela adibecheleña muyisela yawaGiriki, yidi neyi kutemuka lufuchi, kudipika niyisela yakudeta jinkonyi. (Heb. 12:1, 4) Makonu, tunakutemuka lufuchi lwakuwumi nawa ayilumbu anakukeña kutukañesha, kutudimbwisha, kutweta, nikutuletesha tubuli kwikala namuzañalu nawa twakabuli kutambwila wuloku kumbidi.

² Chatachi, tunakulwisha (hela, “kuzuña”) naSatana nikaayi kindi katama. (Efwes. 6:12) Chikuwaha neyi tukukaana kutuluwañesha ‘nayuma yamukaayi yashimata chikupu.’ Muyuma yeniyi mwabombela ntañishilu yaku, ntañishilu yashindamena  hayitoñojoka yawantu, niyilwilu yatama, yidi neyi kwila wuvumbi, kunwa makanya, kusheta nikuzatisha yitumbu munjila yatama. Nawa twatela kutwalekahu kulwisha kulonda tushindi kuzeyazeya kwetu kwakumujimba nikutudimbulula.—2 Kor. 10:3-6; Kol. 3:5-9.

3. Nzambi watudizishaña ñahi chakuzuña nawayilumbu jetu?

³ Komana chapela kushinda awa ayilumbu? Eña, ilaña chiña kulwisha. Kushinshika hachakutalilahu chamukwakweta nkonyi wakushankulu, Pawulu waditeneni nindi: “Chinalwaña hinetaña mumpepelaku.” (1 Kor. 9:26) Neyi mukwakweta nkonyi chashindañayi chilumbu chindi, ninetu twatela kushinda ayilumbu jetu. Yehova watudizishaña nikutukwasha kuzuña. Mwizu dindi mwekala nshimbi jatukwashaña kushinda. Watukwashaña cheñi kuhitila munyikanda yashindamena haBayibolu, kupompa kwawakwaKristu, kupompa kwanyanya, nikupompa kwamaneni. Mwazatishaña yuma yimwadizaña? Neyi himwayizatishañaku dikwila nawu ‘mwetaña mumpepela,’ bayi chilumbu chenuku.

4. Twatela kwila ñahi hakwila nawu kutama kubuli kutushinda?

⁴ Ayilumbu jetu anateli kutulukuka hampinji yitunabuli kukuhwelela nikutweta hampinji yitunazeyi. Bayibolu yatusoñamishaña nayu: “Kutama bayi kuyimika mushinduku; fwomonenu yatama nayayiwahi.” (Rom. 12:21) Mazu akukolesha akwila nawu ‘kutama bayi kutwimika mushinduku’ amwekeshaña nawu tunateli kushinda kutama. Tunateli kushinda kutama neyi tutwalekahu kuzuña naniwu chilumbu. Ilaña, neyi tubula kwikala atona nikuleka kuzuña, anateli kutushinda kudi Satana, kaayi kindi katama nikubula kuwanina kwetu. Bayi mumwiteja Satana yayitiyishi woma kulonda muzeyeshi makasenu hampinji yimunakuzuñaku!—1 Pet. 5:9.

5. (a) Yumanyi yikutukwasha kutwalekahu kulwisha hakwila nawu tutambwili nkisu jaNzambi? (b) Antwinyi amuBayibolu itukuhanjekahu?

⁵ Antu anakudibecha atela kusha maana hachuma chinakufwilawu hakwila nawu ashindi. Hakwila nawu Nzambi yayitiyi kuwaha nikuyinka nkisu, atela kutwalekahu kutoñojoka mazu akukolesha itwatañaña hamukanda waaHeberu 11:6 akwila nawu: “Muntu wukwinza kudi Nzambi chiña etiya nindi wudi kwoku, nindi wasomonaña antu amukeñakeñaña.” Izu dachiGiriki dabalumunawu nawu ‘kukeñakeña’ datalisha mukwila nawu kufwila chikupu nikuzata nañovu yayeni. (Yil. 15:17) MuBayibolu mwekala yakutalilahu yawamayala niambanda azatili nañovu yayeni kulonda atambwili nkisu jaYehova. Yakoba, Racheli, Yosefu niPawulu akabakeni kumujimba nimuyitoñojoka, ilaña amwekesheli nawu kutatakena kwaletaña nkisu. Tunateli kwimbujola ñahi awantu awana ashindili?

6. Yumanyi yamukwashili Yakoba kutatakena, nawa amukiswilili ñahi? (Talenu mwevulu wudi hefu datachi.)

⁶ Nkakulula Yakoba walwishili nikutatakena muloña wamukeñeli Yehova, walemesheli yuma yakuspiritu nawa wakuhweleleli chikupu muchikaninu chaYehova chakukiswila anyanindi. (Kutach. 28:3, 4) Chumichi chinakumweksha chuma chaletesheli Yakoba yazati nañovu hakwila yatambwili nkisu yaNzambi henohu wudi kwakwihi nayaaka 100; nawa walwishili nakañelu wadibalumwini nakuvwala mujimba wawuntu. (Tañenu Kutachika 32:24-28.) Komana Yakoba wazatishili ñovu jindi nikuumika hakwila yalwishi nakañelu wañovu tahindi? Inehi! Ilaña wadiña mukwakulwisha chikupu nawa wamwekesheli chikupu nindi wazatili nañovu. Chakadi nikujina, amusomweneni muloña wakutatakena kwindi. Amutumbili ijina dadiwahi nawu  Isarela, (datalisha mukwila nawu “Mukwakulwisha [Mukwakutatakena] naNzambi” hela “Nzambi Walwishaña”). Yakoba watambwili nkisu yitunakufwila ninetu, dikwila nawu kututiya kuwaha kudi Yehova nikutambwila ninkisu.

7. (a) Kukalanyi kwamweniyi Racheli kwamuneñesheli? (b) Watwalekelihu ñahi kulwisha kushika nimpinji yamukiswililiwu?

⁷ Racheli ñoda Yakoba nawa akeñeliyi, wafwilili kumona chakashikijayi Yehova chikaninu chindi kudi nfumwindi. Ilaña kwadiña chuma chimu chamwekeni neyi chakala kushinda. Hadiña nanyanaku. Mumafuku indi, kubula kwikala nanyana kwadiña hikukala kweneni. Indi Racheli wekalili ñahi nañovu jakutwalekahu kuzuña nakukala kwamuzeyesheli nawa kwabadikili muñovu jindi? Hazeyeli nakuleka kuchiñejaku. Ilaña watwalekelihu kulwisha kuhitila mukulomba nankashi. Yehova watiyili kulomba kwaRacheli kwakulembelela kwakufuma hamuchima, nawa nkumininaku amukiswilili, wekalili nanyana. Dichaletesheli Racheli mpinji yimu yadili nankashi nindi: “Nadikwati dehi kampaña kakeni . . . Namubulumu futu.”—Kutach. 30:8, 20-24

8. Kukalanyi kwasweja kwamweniyi Yosefu hadi mpinji yayilehi, nawa yuma yeliliyi yatudizishañadi?

⁸ Chakutalilahu chaYakoba niRacheli chakwikala akola mbe-e, chakadi nikujina chakwashili mwanawu Yosefu kuumika kweseka kwachikuhwelelu chindi. Hadiñayi nayaaka 17, chihandilu chindi chahimpikili chikupu. Hamuloña wakumutiyila ichima, amanakwindi amulandishili muwuduñu. Mukuya kwampinji, washakamini mukaleya muEjipitu hadi yaaka yayivulu hela chakwila hadiña namuloñaku. (Kutach. 37:23-28; 39:7-9, 20-21) Yosefu hetejeli kudimbulula kumuzeyeshiku hela yatiyi ndulu chakwila yafuntishi katamaku. Ilaña, washili maana hawubwambu windi naYehova. (Lev. 19:18; Rom. 12:17-21) Chakutalilahu chaYosefu chatela kutukwasha. Chakutalilahu, neyi chihandilu chetu kuwansi chadiña chatama hela neyi chakwila chihandilu chetu chayinu mpinji chidi chiwahi wanyi, twatela kulwisha nikutatakena. Tunateli kukuhwelela netu neyi tukwila mwenimu, Yehova wukutukiswila.—Tañenu Kutachika 39:21-23.

9. Hakwimbujola Yakoba, Racheli niYosefu, yumanyi yitwatela kwila kulonda tutambuli nkisu jaYehova?

⁹ Toñojokenu hakukala kumunakumona kunateli kwikala kweseka kudenu. Hadaha munakumona kukala kudi neyi kuheñesha wuñanji, chaambu hela kuyisekesha. Hela munakumona kukala kwakuyitwambila kudi muntu muloña wechima. Chatela muzeyi, mwatela kwanuka yuma yakwashili Yakoba, Racheli niYosefu kutwalekahu kumukalakela Yehova namuzañalu. Nzambi wayikolesheli nikuyikiswila muloña atwalekelihu kulemesha yuma yakuspiritu. Atwalekelihu kulwisha nikwila yuma kwesekeja nakulomba kwawu kwakufuma hamuchima. Chineli tunakushakama kwakwihi nakukuma kwashakamini yamakonu, twatela kutwalekahu kuchiñeja yuma yatukanawu kumbidi! Komana munakufwila nkisu jaYehova dikwila nawu kulwisha?

10, 11. (a) Tunateli kufwila ñahi nkisu jaNzambi? (b) Yumanyi yikutukwasha kufuukula chiwahi kulonda tushindi kukala nawa neyi anakutudimbulula?

¹⁰ Yumanyi yinateli kutukojeja kufwila nkisu jaNzambi? Kukala kumu kunamoniwu antu amavulu, hikulwisha kulonda ashindi kuzeyazeya kwawu. Amakwawu azataña nañovu kulonda atwalekihu kuzata chiwahi mumudimu wakushimwina. Hadaha, munakuumika hela chakwila mwakatakataña kumujimba indi kwiji mwatiyaña wudi. Amakwawu chayikalilaña kwanakena muntu wunayineñeshi hela wunayivulumuni. Hela chakwila tunamukalakeli Yehova hadi yaaka yayivulu hela nehi, wejima  wetu twatela kuzata nañovu kulonda tushindi yuma yinateli kutukañesha kumukalakela Nzambi, wasomwenaña ashinshika.

¹¹ Kuhosha hohu chalala, chinateli kutukalila kutonda yuma yaloña nikulondela nshimbi jawakwaKristu. Chumichi chinateli kumwekana sweje-e neyi muchima wetu wasweja kudimbana wututwala munjila yacheñi. (Yere. 17:9) Neyi mwiluka nenu munaluwankani, lombenu spiritu yajila kulonda yiyikwashi. Kulomba nispiritu yajila jinateli kuyinka ñovu yakuya munjila yayiwahi yinateli kukiswilayi Yehova. Zatilenu hayuma yimunakulomba. Esekenu kutaña chibalu chamuBayibolu hefuku-hefuku nikwikala nampinji yakudiza kwahalwenu kushilahu niKudifukula kwaChisaka mpinji yejima.—Tañenu Masamu 119:32.

12, 13. AkwaKristu ayedi ayikwashili ñahi kuleka kufwila kwatama?

¹² Tukweti yakutalilahu yayivulu yinakumwekesha Izu daNzambi, spiritu yajila ninyikanda yetu yawakwaKristu chiyinakwashi akwaKristu kushinda kufwila kwatama. Kampululu wumu wayaaka 17 watañili chibaaba chakwila nawu “How Can You Resist Wrong Desires?” chasonekeliwu muAwake! yaDecember 8, 2003. Welili ñahi? Wahosheli nindi, “Inakufwila kushinda yitoñojoka yatama. Chinatañili muchibaaba nawu ‘antu amavulu, chayikalilaña chikupu kushinda kufwila kwatama,’ chanletesheli nitiyi nami nidi hakachi kawamanakwetu. Nelukili nami hiyami hohuku.” Iwu kampululu waheteleli cheñi muchibaaba chakwila nawu “Alternative  Life-Styles—Does God Approve?” chasonekeliwu muKaposhi Kakutalila kaOctober 8, 2003. Chatañiliyi munichi chibaaba, welukili nindi kudi antu amakwawu iku kulwisha kudi neyi “mwiña mumujimba.” (2 Kor. 12:7) Hampinji yinakulwishawu kulonda atwalekihu kwikala nayilwilu yayiwahi, anateli kutalila yuma yakumbidi nachikuhwelelu. Wahosheli nindi, “Muloña wachumichi, namoni nami nateli kutwalekahu kwikala washinshika hefuku-hefuku. Namusakililaña Yehova hakuzatisha kuloñesha kwindi kulonda kutukwasheña kwikala ashinshika hefuku-hefuku mukanu kaayi katama.”

¹³ Shinshikenu cheñi yuma yamweniyi muhela waku United States. Wasonekeli nindi: “Inakukeña kuyisakilila hakutudisha yakuda yitwakeñaña nawa hampinji yatelela. Kakavulu natiyaña nami iyi yibaaba asonekelaña ami. Nalwishi hadi yaaka yayivulu nakufwila kwatama kwakwila yuma yahelayi Yehova. Mpinji jikwawu, nakeñaña kuleka kuzuña. Neluka nami Yehova waluwi nawa waanakenaña, ilaña muloña wakwila nikweti chaaku chakufwila yuma yatama nawa ichi chaaku nachihela wanyi mukachi kamuchima wami, natiyaña nami hakutwesha kunkwashaku. Iku kulwisha kunatwalekihu kuluwañesha chihandilu chami chejima. . . . Chinatañili chibaaba chakwila nawu ‘Komana Mukweti ‘Muchima Wakumwiluka’ Yehova?’ muKaposhi Kakutalila kaMarch 15, 2013, nelukili chikupu nami Yehova nakukeña kunkwasha.”

14. (a) Indi Pawulu watiyili ñahi hakulwisha kwindi? (b) Tunateli kushinda ñahi kuzeyazeya kwakumujimba?

¹⁴ Tañenu aRoma 7:21-25. Pawulu welukili chichinateli kukala kulwisha nayilwilu yidi neyi kufwila kwatama nikuzeyazeya kwenzaña muloña wakubula kuwanina. Hela chochu, wakuhweleleli chikupu nindi nateli kushinda kuhitila mukushindamena hadi Yehova mukulomba nikukuhwelela mulambu waYesu wefutu danyiloña. Indetu? Neyi tukulwishaña hakufwila kushinda kuzeyazeya kwetu kwakumujimba, twakatwesha. Munjilanyi? Kuhitila mukwimbujola Pawulu, kushindamena chikupu hadi Yehova bayi hañovu jetuku nikuhwelela mwiifutu.

15. Kulomba kunateli kutukwasha ñahi kwikala ashinshika nikuumika kweseka?

¹⁵ Mpinji jikwawu Nzambi nateli kutwiteja kulonda tumwekeshi chitunakutiya hakukala kutukweti. Chakutalilahu, tunateli kwila ñahi neyi etu (hela muntu wamuchisaka) nakati chikatu cheneni hela nakukabakana nankashi? Twatela kumwekesha netu twamukuhwelela Yehova chikupu kuhitila mukulomba kulonda yatwinki ñovu yakutwalekahu kwikala ashinshika, kutwalekahu kwikala namuzañalu nikwikala akola kuspiritu. (Fwi. 4:13) Yuma yamonañawu antu amavulu, chili mumafuku aPawulu hela chayinu mpinji, yamwekeshaña nawu kulomba kunateli kutukwasha kwikala cheñi nañovu nikukuhwelela nakutwalekahu kuumika.

16, 17. Munafuukulihu kwiladi chineli mudi mukwakufwila?

¹⁶ Diyabolu wukutiya kuwaha neyi yamona nindi munaleki kulwisha nawa munazeyeshi makasa enu hakulwisha. Fwilenu ‘kukakela chikupu kuyuma yayiwahi.’ (1 Tesa. 5:21) Kuhwelelenu chikupu nenu munateli kushinda Satana, kaayi kindi katama nikufwila kwatama. Munateli kwila mwenimu kuhitila mukukuhwelela chikupu muwuswa waNzambi wakuyikolesha.—2 Kor. 4:7-9; Ŋal. 6:9.

¹⁷ Twalekenuhu kuzuña. Twalekenuhu kulwisha. Twalekenuhu kufwila. Twalekenuhu kutatakena. Kuhwelelenu chikupu nenu Yehova ‘wakayihuñunwina nkisu jajivulu jakukañanya nihakujitambwila.’—Mal. 3:10.