“HAMPINJI yinapapatisheweli nadiña nayaaka 15 yakusemuka nawa chimwahitili tukweji 6 natachikili kuzata wupayiniya wakukwasha. Chihahitili chaaka chimu, nasonekesheli wupayiniya wampinji yejima. Chinamanishili kutaña shikola yakusekondari, nalombeli kuya nakuzatila kwiluña kwadiña kukaankila kweneni kwawakwakushimwina aWanta. Nakeñeleña kufuma mumbaka yetu nikutemuka nkaaka yami wamumbanda inashakamineña nindi wavweli amama nawa wadiña Chinsahu chaYehova wanyi. Naneñeli nankashi chanlejeliyi nkoñi wañinza nindi iluña dinukushimwinañamu dikwikala mwomumbaka munavwalikilili. Hinamulejeli chinatiyiliku. Nakuminini dakunoñamisha mutu wami heseki nakutachika kuya kulonda nitoñojoki hayuma yanlejeliyi. Nalejeli mukwetu mutwazatilileña, nami: “Inakwila neyi cheliliyi Yona. Ilaña nkumininaku Yona wayili kuNineve. Dichi, ninami nukuzatila mwomwiluña dinanyinkiwu.”

“Ichi nakalakali wupayiniya mumbaka yetu hadi yaaka yiwana nawa namoni chichawahilili kulondela wunlomboli wanyinkeliwu. Kutoñojoka mwaluwa dikukala kwakweni kunadiña naku. Ichi nidi namuzañalu chikupu. Mukakweji kamu, natwesheli kulombola atudizi aBayibolu 24. Inakumusakilila Yehova, natachikili nikudizisha nkaaka yami Bayibolu owu wadiña nakundimbulula hatachi.”

Kadizi waBayibolu muFiji wateleleli kutondahu chuma chimu, kuya kukupompa kweluña kwawakwaKristu hela kuya nanfumwindi nakwanakana ifuku davwalikili ntaña yeyala. Nfumwindi wetejeli nindi watela kuya kukupompa kweluña. Wamulejeli nfumwindi nindi wukumuwana neyi nafumi dehi kukupompa. Hela chochu, chafuntiliyi kwitala kufuma kukupompa kweluña, watoñojokeli nindi chikuwaha yena yabuli kudiñija muyuma yikusha wuspiritu windi muwubanji, dichi wayiliku wanyi.

Ilaña iyala chalejeliyi antaña jindi awamayala niawambanda nindi ñodindi walomba nindi wukwinza kuchidika hanyima “yakupompa kwawaYinsahu,” amwakwili nawu, “Wukwinzaku wanyi; aYinsahu jaYehova hiyanakanaña mafuku akuvwalikaku!” *

Chafuminimu, nfumwindi wazañaleli nankashi hakuwana nawu ñodindi wafuukwilihu kulondela chinleji chindi chamuchima niyuma yakuhwelelayi. Muloña wakwikala washinshika, watwesheli kushimwina nfumwindi niantu amakwawu. Yumanyi yafuminimu? Nfumwindi wetejeli kudiza Bayibolu nawa watachikili kuya kukupompa hamu nañodindi.