1, 2. Muloñadi aYinsahu jaYehova chavwalilañawu yakuvwala yatelela? (Talenu mwevulu wakutachikilahu.)

“MWADIMWENA nvwalilu yabula kutelela yashiyashana, sweje-e chikwasweja iyena,” ichi dachahosheli chipapilu chansañu chamwidimi daDutch kutalisha hadi anlomboli jamachechi chavwaliliwu hapompeliwu. Chahosheli cheñi nawu, “Ilaña aYinsahu jaYehova dichiyavwalañawu wanyi hakupompa. . . . Amayala, kansi nimukulumpi avwalaña majaketi nintayi, ambanda niwena kansi nimukulumpi avwalaña masiketi amalehi . . . amawahi, nawa akatataka.” Mwamweni, aYinsahu jaYehova kakavulu ayihamekaña hakudiwahisha ‘nakuvwala mahina chalumbuluka, nakalemesha nikutoñojoka mwamaana . . . avwalaña yakuvwala yatelela aditenaña nawu amwakama Nzambi.’ (1 Tim. 2:9, 10) Kapostolu Pawulu wahosheleña hadi ambanda, ilaña iyi nshimbi yoyimu yakundama nikudi amayala akwaKristu.

² Yakuvwala yatelela yalema kudi etu antu jaYehova nawa yalema nikudi Nzambi wutwadifukulañaku. (Kut. 3:21) Chahosha Nsona kutalisha hayakuvwala nikudiwahisha chamwekeshaña hatooka to-o nawu, nleñi wakuleña kwejima wakeñaña nindi  akwakudifukula indi alala avwaleña yakuvwala yatelela. Dichi, hitwatela kudiwahisha nikuvwala yakuvwala yinakutuzañalesha etu aweni hohuku. Ilaña twatela kwiluka netu yakuvwala yetu yinakuzañalesha niMwanta Wakuleña, Yehova.

3. Yumanyi yitunateli kudizila kuNshimbi jayinkeliwu aIsarela kudi Nzambi jahosheleña hayakuvwala?

³ Chakutalilahu, muNshimbi jaNzambi jayinkeliwu aIsarela, mwadiña nshimbi jayikiñileña kuchihandilu chatama chanyunza yadikuminiwu nayu. Iji Nshimbi jamwekesheleña Yehova chaheleliyi yakuvwala yabulileña kumwekesha chaambu hakachi keyala namumbanda, yinakutenawu munanu mafuku etu nawu yakuvwala yamuntu wudi wejima, chili weyala hela wamumbanda. (Tañenu Kuhituluka 22:5.) Kwesekeja nanshimbi jahaniniyi Nzambi kutalisha hayakuvwala, tunamoni chikupu netu Nzambi hatiyaña kuwaha nanyitapu yayakuvwala yaleñelaña iyala yamwekaneña neyi himumbanda, mumbanda niyena yamwekaneña neyi hiiyala hela yaleñelaña chikali kwiluka chaambu chidi hakachi keyala namumbanda.

4. Yumanyi yinateli kukwasha akwaKristu kutonda chiwahi yakuvwala yatela kuvwalawu?

⁴ Mwizu daNzambi mwekala yishina yakwashaña akwaKristu kufuukula chiwahi hansañu yakuvwala. Hichikweti muloña neluña kwashakamañawu, chekala chisemwa chawu hela chekala chihandilu kunodu iluñaku. Hitwatela kusoneka ndandanda yayakuvwala yatelela niyakuvwala yabula kutelelaku. Ilaña, yishina yamuNsona diyatukwashaña kutonda yakuvwala yitwatela kuvwala. Chayinu mpinji, tuhanjekenu hayishina yimu yamuBayibolu yinateli kutukwasha kwiluka “mwaya muchima waNzambi, wawuwahi, watiyishaña kuwaha, walala chikupu” neyi tunakutonda yakuvwala yitwatela kuvwala.—Rom. 12:1, 2.

5, 6. Nvwalilu yetu yatela kuletesha antu amakwawu kwiladi?

⁵ Kapostolu Pawulu amwoneneni kukonkomwena hachishina chalema chekala hamukanda wa 2 aKorinda 6:4. (Tañenu.) Mmwekenu yetu yashimunaña yuma yayivulu hadi etu. Antu amavulu atutoñojokelaña yuma yashiyashana kushindamena hayuma ‘yamonañawu namesu.’ (1 Sam. 16:7) Dichi, hamu neyi akwakukalakala aNzambi, tweluka netu hitwakuminaña dakuvwala yakuvwala yitunakeñiku. Yishina yitweluka yekala Mwizu daNzambi yatela kutukojeja kutondolwela kuvwala yakuvwala yinakulamata chikupu hamujimba, yinakumwekesha mwejima munahiti yiidi yamujimba hela yinateli kusañumuna muntu kufwila kwila wuvumbi. Chumichi chinatalishi mukubula kuvwala yakuvwala yinakumwekesha hatooka yiidi yetu yamujimba yakujinda. Kwosi muntu niwumu watela kutiya kutama hela kumuletesha yatali kwacheñi neyi yamona chitunavwaliku.

⁶ Neyi tunakumwekana wutotombu, akadi majilu, tunavwali chiwahi nawa tunadiwahishi chiwahi, antu anateli kutulemesha hamu neyi akwakukalakala aMwanta Wakuleña, Yehova. Nawa anateli kwinza kudi Nzambi wutwadifukulañaku. Cheñi nawa, nvwalilu yetu yatelela yikuleta kalemesha hakuloñesha kutwemenañaku. Chikufumamu, antu amakwawu akukeñesha chikupu kutiyilila kunsañu yakupulwisha wumi.

7, 8. Mpinjinyi sweje-e yitwatela kuvwala yakuvwala yatelela?

⁷ Nzambi yetu wajila, amanakwetu niahela akuspiritu kushilahu niantu amwiluña mutwashimwinaña, anateli kutiya kuwaha nanvwalilu yetu hela nehi. Dichi nvwalilu yetu yatela kulemesha Yehova ninsañu yitwashimwinaña. (Rom. 13:8-10) Twatela kwila mwenimu sweje-e  neyi tudi munyidimu yawakwaKristu, yidi neyi tunakuya nakupompa hela neyi tunakuya mumudimu wakushimwina. Twatela kuvwala yakuvwala “yatelela [antu] adishimunaña nawu twaakamaña Nzambi.” (1 Tim. 2:10) Hela chochu, yakuvwala yikwawu kwiluña dimu yatelela, ilaña kwiluña dikwawu hiyatelelaku. Dichi, antu jaYehova mukaayi kejima alemesha yisemwa yamwiluña dawu kulonda abuli kuneñesha antu nanvwalilu yawu.

⁸ Tañenu 1 aKorinda 10:31. Neyi tudi kukupompa kwanyanya nikwamaneni, twatela kuvwala yakuvwala yatelela nawa yayiwahi chatela twimbujoleña nvwalilu yinavuli mukaayi. Nihampinji yitunakwiñila hela kufuma muhotelu, hela tunakuhanjeka nawakwetu henohu kupompa kanda kutachiki hela kunamani, bayi tuvwaleña yakuvwala yinabadiki muchipimuku. Neyi twila mwenimu, tukwikala amuzañalu kuditena netu tudi aYinsahu jaYehova. Mwamweni, tukwikala akasunuka kushimwina mpinji yejima.

9, 10. Mukanda waaFwilipi 2:4 wunateli kutukwasha ñahi kwiluka chitwatela kuvwala?

⁹ Tañenu aFwilipi 2:4. Muloñadi akwaKristu chatela kushinshikilawu hanvwalilu yawu chiyinateli kutiyisha akwawu kuwaha hela nehi? Njila yimu yidi yakwila nawu antu jaNzambi azataña nañovu kulonda alondeli kufumba kwamuBayibolu kwakwila nawu: “Dichi jahenu yidi yenu yidi hamaseki, wuvumbi, wuzondu wamumuchima, kufwila kwila yuma yatama.” (Kol. 3:2, 5) Bayi tuletesha akwetu akwakwitiya chiyikalili kulondela iku kufumbaku. Amanakwetu niahela aleka dehi chihandilu chawuvumbi, hadaha achidi kulwisha kulonda aleki  yilwilu yanshidi. (1 Kor. 6:9, 10) Tukukeña wanyi kuletesha chiyikalili kuleka yilwilu yatama, indi nawu mwacheñi?

¹⁰ Neyi tudi hamu nawamanakwetu niahela, nvwalilu yetu yatela kukwasha chipompelu kwikala chashinshika. Dichitwatela kwila neyi tudi hamu hakupompa hela tunakuzata wanyi nyidimu yakuspiritu. Tukweti wuswa wakutonda yakuvwala yitunakukeña kuvwala. Hela chochu, wejima wetu tukweti mudimu wakuvwala yuma yikuletesha amakwawu ekali ashinshika nikutwalekahu kulondela ntanjikilu yaNzambi yajila muyitoñojoka, munhoshelu nimuyilwilu. (1 Pet. 1:15, 16) Kukeña kwalala “hikwelaña chuma chabula kutelaku; hikwakokwelaña kwindi hohuku.”—1 Kor. 13:4, 5.

11, 12. Chumanyi chitwatela kushinshikahu chikutukwasha kwiluka yakuvwala yitwatela kuvwala?

¹¹ Neyi anakufuukula yuma yatela kuvwalawu, ambuña aNzambi atela kwiluka nawu “kwekala mpinji yayuma yejima yafuukulawu niyanyidimu yejima.” (Mukwa. 3:1, 17) Tuneluki netu kushiyashana kwamaluña niyilaaka dikunateli kutuletesha kuvwala yuma yashiyashana. Cheñi, chihandilu niyuma yamwekanaña jashiyashanaña. Hela chochu, yilaaka hiyahimpaña yuma yakeñañayi Yehovaku.—Mal. 3:6.

¹² Kumaluña kutata, chinateli kukala kuvwala yakuvwala yakalemesha, yayiwahi nawa yatelela. Dichi, amanakwetu niahela atiyaña kuwaha neyi tubula kuvwala yakuvwala yinatulamati hamujimba hela yazumbula nankashi. (Yoba 31:1) Cheñi, neyi tunakunooka kuchikumu chakaloña hela kuchiwelelu, yakuvwala yakuwela nachu yatela kwikala yatelela. (Yish. 11:2, 20) Hela chakwila antu amavulu mukaayi avwalaña yakuvwala yakuwela nachu yamwekeshaña yidi yamujimba, etu twamukalakelaña Yehova twakeñaña wanyi kumuneñesha Nzambi wajila itwakeña.

13. Muloñadi kufumba kwekala hamukanda wa 1 aKorinda 10:32, 33 chikunateli kutukwasha kutonda yakuvwala yayiwahi?

¹³ Kudi cheñi chishina chikwawu chalema chatukwashaña kutonda yuma yashikila yitwatela kuvwala. Twatela kubabala kulonda tubuli kuneñesha yinleji yawantu amakwawu, chili hiyakwetu akwakudifukula hela nehi. (Tañenu 1 aKorinda 10:32, 33.) Twatela kushaku maana kulonda tubuli kuvwala yakuvwala yinateli kutuntwisha amakwawu. Pawulu wasonekeli nindi, “Tutiyishenu akwetu kuwaha wejima wetu hamuntu-hamuntu; tulondenu yuma yayiwahi yakukwasha akwetu.” Wabombelelihu ichi chikuma nindi: “Muloña Kristu haditiyishili yomweni kuwahaku.” (Rom. 15:2, 3) Mwamweni, Yesu wakeñeli nankashi kukwasha amakwawu kubadika kwila yuma yakuditiyisha nachu yomweni kuwaha, kuyikwasha diyadiña njila yayeni yakwililamu nkeñelu yaNzambi. Dichi, twatela kuleka yuma hela nvwalilu yitwakeña yinateli kuletesha antu itunakukeña kushimwina abuli kutiya nsañu.

14. Anvwali anateli kudizisha ñahi anyanawu kumulemesha Nzambi munvwalilu yawu?

¹⁴ Anvwali akwaKristu akweti mudimu wakudizisha yisaka yawu kulonda azatisheña yishina yamuBayibolu. Kwila mwenimu mwabombela kwiluka nawu wejima wawu anakuzañalesha Nzambi kuhitila munvwalilu nikudiwahisha kwawu kwakalemesha. (Yish. 22:6; 27:11) Anvwali anateli kudizisha anyanawu kulemesha Nzambi wajila wadifukulañawu kuhitila mukuyimikila chakutalilahu chachiwahi nikuyifumba munjila yakukeña nawa yayiwahi. Anvwali akwila chiwahi neyi akuleja anyanawu kwakuwana nichakulanda yakuvwala yatelela. Dikwila nawu anyanawu atela kulanda yakuvwala bayi neyi yinakukeñawu hohuku, ilaña niyuma yikuyikwasha kutwalekahu kuzata nyidimu yaYehova Nzambi wuyemenañaku.

15. Chumanyi chikutukwasha kutonda yakuvwala yatelela?

¹⁵ Mwizu daNzambi mwekala kufumba kwakuwahi kukutukwasha kutonda yakuvwala yayiwahi yikuleta kalemesha kudi Nzambi. Hela chochu, neyi tuvwala chuma dikwila nawu tunachikeñi. Yakuvwala yitwakeña kulanda hamuntu-hamuntu yaambuka kwesekeja namali itukweti. Ilaña, yakuvwala yetu yatela kwikala yayiwahi, yakadi majilu, yashikila nawa yetejewa mwiluña detu.

16. Muloñadi chichalemena kuzata nañovu kulonda tuvwaleña yakuvwala yashikila?

¹⁶ Tweluka netu chakala kutonda yakuvwala yayiwahi, yatelela nawa yashikila. Mumasitolu amavulu mudi yuma yayivulu yakatataka, dichi chinateli kusenda mpinji yeneni niñovu hakwila nawu muntu yawani masiketi, madiresi nimabulawuzi amawahi hela masuti niyakuvwala yikwawu yabulaña kulamata hamujimba. Hela chochu, akwetu akwakwitiya akumona nawa akuhameka neyi tuzata nañovu kukeña yakuvwala yashikila nawa yatelela. Nawa muzañalu wutwatiyaña hakumulemesha Tata yetu wamwiwulu waleteshaña tudihaneña kuvwala yakuvwala yamulemeshaña yena.

17. Manakwetu neyi nakukeña kuhemba wevu watela kutoñojoka hayumanyi?

¹⁷ Indi amanakwetu ahembaña wevu? MuNshimbi jaMosi amayala ayitejeli kuhemba wevu. Hela chochu, akwaKristu hiyekala muNshimbi jaMosiku hela hiyakeñekaña kujilondelaku. (Lev. 19:27; 21:5; Ŋal. 3:24, 25) Muyisemwa yikwawu, eteja kuhemba wevu nikuwuteta chiwahi nawa awulemesha, chumichi hichinateli kukañesha antu kutambwila nsañu yaWantaku. Kafwampi, amanakwetu amakwawu atondewa, ahembaña wevu. Hela chochu, amanakwetu amakwawu akeñaña wanyi kuhemba wevu. (1 Kor. 8:9, 13; 10:32) Muyisemwa yikwawu hela mumaluña amakwawu, ahembaña wanyi wevu nawa amonaña nawu mukwaKristu hatelela kuhemba wevuku. Kafwampi, neyi manakwetu wumu wukwila mwenimu, chikumukañesha kulemesha Nzambi kuhitila munvwalilu nikudiwahisha nawa wukwikala nahakumwinkela muloña.—Rom. 15:1-3; 1 Tim. 3:2, 7.

18, 19. Mukanda waMika 6:8 wukutukwasha ñahi chitunakufwila kwikala nanvwalilu yakumutiyisha Nzambi kuwaha?

¹⁸ Twamusakililaña Yehova hakubula kutwinka chiteli chandandanda yanshimbi jitwatela kulondela hanvwalilu nikudiwahisha. Ilaña, watwiteja kuzatisha wuswa wetu wakudifuukwila nikutonda yuma yayiwahi, yashindamena hayishina yayiwahi yamuNsona. Dichi, tunateli kumwekesha munvwalilu nimummwekenu yetu netu, tunakukeña ‘kwenda naNzambi yetu chakudizoza.’—Mika 6:8.

¹⁹ Twelukaña chikupu netu Yehova wajila nawa hakweti majiluku, nawa yuma yakeñañayi diyi yinateli kutukwasha. Cheñi kwabombelamu kulemesha chinakutiyawu nichinakutoñojokawu akwetu. Dichi, ‘twendaña naNzambi yetu chakudizoza’ kuhitila mukwikala nachihandilu chachiwahi kwesekeja nayuma yakeñañayi nikulemesha chatiyañawu antu amakwawu.

20. Nvwalilu nikudiwahisha kwetu kwatela kuletesha antu amakwawu kwiladi?

²⁰ Yakuvwala yetu bayi yiletesha antu atujinokeña nawu twadifukulaña wanyi kudi Yehova. Amanakwetu niahela kushilahu niantu acheñi atela kutumona nawu tunashikilimu chikupu kwimenaku Nzambi waloña. Wakeñaña nindi tuvwaleña chiwahi nawa twafwilaña kulondela mwatulejañayi. Kuhameka amanakwetu niahela hanvwalilu yawu, kukuletesha akokoli antu akweti nyichima yayiwahi kwiteja nsañu yawumi yekala muBayibolu nikuleta kalemesha nimuzañalu kudi Yehova. Kufuukula mwamuwahi kutalisha hayuma yitwatela kuvwala kukuleta kalemesha kudi Wadivwika “kulema niwanta.”—Mas. 104:1, 2.