Kuhakwilaku Nsañu Yayiwahi Kudi aYilolu Alema
“YENA hinsaba yinatondi ami aweni, kulonda atwali ijina dami kudi aJentili, nikudi anyanta ankanu.” (Yil. 9:15) Mwanta Yesu wahosheli awa mazu kutalisha hadi muntu wabalumukili nakwikala mukwaKristu, kaYudeya atachikili kutenawu nawu kapostolu Pawulu.
Wumu hakachi kanawa “anyanta” wadiña Mwanta wawaRoma Nero. Mwadi kutiya ñahi kuhakwilaku chikuhwelelu chenu kumesu anyuuli wamuchidiwu? Hela chochu, akwaKristu atela kwimbujola Pawulu. (1 Kor. 11:1) Yuma yikutukwasha kwila mwenimu, yinakundami kuyuma yahitilimu Pawulu muyota yanyiloña mumafuku indi.
Nshimbi jaMosi jadiña nshimbi jamwituña muIsarela nawa dijadiña nakulondelawu aYudeya kwejima kwadiñawu. Hanyima yaPentekosta 33 C.E., akwakudifukula alala alekeli kulondela Nshimbi jaMosi. (Yil. 15:28, 29; Ŋal. 4:9-11) Ilaña, Pawulu niakwaKristu amakwawu hiyasupishileña Nshimbiku; atwesheli kushimwina muyituñilu yayivulu yamuYudeya chakadi kuyikañesha. (1 Kor. 9:20) Kakavulu Pawulu wayileña mumasinagogi, mwadiña nakushimwinayi antu elukili Nzambi yaAbarahama nawa adiña nakuhanjekayi nawu Pawulu kuzatisha Nsona jachiHeberu.—Yil. 9:19, 20; 13:5, 14-16; 14:1; 17:1, 2.
Apostolu atondeli Yerusalema kwikala iluña dakushimwina. Mpinji yejima atañishileña hatembeli. (Yil. 1:4; 2:46; 5:20) Mpinji yimu, Pawulu wayili kuYerusalema nawa kwenoku amukwatili. Aha dihatachikiliwu kumusompesha nkumininaku hiyakumutwala kuRoma.
NSHIMBI JAWAROMA JAMUKWASHILI ÑAHI PAWULU?
Indi akulumpi jawaRoma amweneña ñahi nsañu yashimwinineñayi Pawulu? Hakwila nawu twaakuli ilu lwihu, chalema kwiluka aRoma chamweneñawu kudifukula kwejima. Hiyakanjikijili yisemwa yashiyashana yadiña muwanta wawu yileki kudifukula kwawuku, chiña hohu neyi anamoni nawu akuleta kukala Kwituña dawu hela nawu akuleta yilwilu yatama.
* Pawulu wazatishili nshimbi jawaRoma jayinkeliwu aYudeya hakuhakwilaku kudifukula kwawakwaKristu hamusompesheleñawu kudi ayilolu awaRoma.
A Roma enkeli aYudeya wuswa wakwila yuma yayivulu muwanta. Mukanda waBackgrounds of Early Christianity wahosha nawu: “A Yudeya adiña nakukooleka kwakuvulu muwanta wawaRoma. . . . A Yudeya adiña akasunuka kutwalekahu nakudifukula kwawu nawa ayikaanishili kudifukula kudi anzambi amwituña dawaRoma. Chihandilu chawu chashindameneni munshimbi jamwituña dawu.” Cheñi hiyazatileña mudimu wawushidikaku.Akwakumudimbulula Pawulu esekeli njila jashiyashana kulonda aleteshi antu niakwakuyuula añovu kulonda amuheli kapostolu. (Yil. 13:50; 14:2, 19; 18:12, 13) Shinshikenu hachuma chamwekeni. Aeluda akwaKristu amuchipompelu chadiña muYerusalema atiyili nsañu yataandili mukachi kawaYudeya nawu Pawulu wadiña nakushimwina nindi “aleki Mosi.” Nsañu yamuchidiwu yadi kukojeja aYudeya akwaKristu amaha kutoñojoka nawu Pawulu walemesheli wanyi ntanjikilu yaNzambi. Cheñi, akwaSanihedirini adi kutena akwaKristu nawu hiyakwakudikaña afumini mukudifukula kwawaYudeya. Neyi chumichi chamwekeni, aYudeya adibombeli nawakwaKristu adi kuyibabesha. Adi kuyambula nikuyikaanisha kushimwina mutembeli hela mumasinagogi. Dichi, aeluda amuchipompelu amulejeli Pawulu kudihakwila kuniyi nsañu neyi yakutwamba kuhitila mukuya kutembeli nakwila yuma yabulili kumulejawu kudi Nzambi ilaña yetejeliwu.—Yil. 21:18-27.
Pawulu wayili kutembeli, chakojejeli ‘yahakwiliku nikukolesha nsañu yayiwahi kwesekeja nanshimbi.’ (Phil. 1:7) Hatembeli, hatachikili ipumba nikukeña kumujaha Pawulu. Mukulumpi wamashidika awaRoma wamutwalili Pawulu nakumuhemba mukaleya. Hampinji yakeñeleñawu nawu amweti Pawulu yikoti, wadishimwini nindi himwenimbu wamuRoma. Chumichi chaletesheli amutwali kuKesareya, kwayiyuulileñawu aYudeya kudi aRoma. Kweniku Pawulu wadiña nakukooleka kwakushimwina chakadi woma kudi ayilolu. Chumichi chaletesheli akwaKristu ayiluki chikupu kudi antu abulili kuyiluka.
Yililu kapetulu 24 yalumbula chamusompesheliwu Pawulu kudi Felisi, nguvulu wawaRoma wakuYudeya watiyili yuma yakuhwelelawu akwaKristu. A Yudeya amwinkeli Pawulu nyiloña yisatu hakufumpa nshimbi jawaRoma. Ahosheli nawu wadiña nakuzuñañesha aYudeya muwanta mwejima chakwila waleteli kukala kweneni; nawa walemesheleña wanyi tembeli yadiña mumakasa awaRoma. (Yil. 24:5, 6) Iku kusompesha kwadi kumutwala kukufwa.
AkwaKristu makonu atela kwiluka chasompeleñayi Pawulu nyiloña yindi. Wadiwunjikili nawa wadiña nakalemesha. Pawulu washindameneni haNshimbi niaTuprofwetu nawa wahosheli nindi wadiña nawuswa wakudifukula kudi ‘Nzambi yawankakulula jindi.’ Iwu wuswa diwadiña nawaYudeya amakwawu ayuulileñawu kuzatisha nshimbi jawaRoma. (Yil. 24:14) Mukuhita kwampinji, Pawulu watwesheli kuhakwilaku nikushimuna yuma yakuhweleleliyi hamusompesheleñawu kudi nguvulu wahiñilihu, Porokiwu Fesitusi, nikudi Mwanta Herodi Agiripa.
Nkumininaku, hakwila nawu atiyishishi walala, Pawulu wahosheli nindi: “Niyi kudi Kesari,” wadiña nyuuli wañovu hayina mpinji.—Yil. 25:11.
KUMUSOMPESHA PAWULU MUCHOTA CHAKESARI
Chimwahitili mafuku, kañelu wamulejeli Pawulu nindi, “chiña wakemani kumesu aKesari hohu.” (Yil. 27:24) Mwanta wawaRoma Nero hatachikili kuyuulayi, wahosheli nindi hamba kasompesha nyiloña yejima nkawindiku. Muchiyuulu chindi chayaaka 8, wenkeleña antu acheñi mudimu wakusompesha. Mukanda waThe Life and Epistles of Saint Paul washimuna nawu chelili Nero yeteji kusompa, muloña weniwu wawutiyililili muchipañu chindi, mwamukwashiliwu kusompa kudi izanvu dawakwakumuleja maana adiña akuluka yitembi nawa adiña nañovu chikupu.
Rom. 13:1-7; Tit. 3:1, 2) Chinamwekani neyi Pawulu wayiñili namuloña hakuhakwilaku nsañu yayiwahi hampinji yamusompesheleñawu kudi ayilolu, kuhiñahu, chota chaKesari chamuumbiliku Pawulu.—Fwi. 2:24; Fwile. 22.
Bayibolu yahosha wanyi nawu Nero watiyili nikusompesha Pawulu hela nawu welili muntu wacheñi kulonda atiyi mwabu windi kulonda amuleji cheñi Nero mwabu waPawulu. Hela chochu, Pawulu walumbulwili nindi wadifukwileña kudi Nzambi yawaYudeya nawa walejeli antu ejima kulemesha nfulumendi. (MUDIMU WETU WAKUHAKWILAKU NSAÑU YAYIWAHI
Yesu walejeli atumbanji twindi nindi: “Akayitwala nikumesu awanguvulu, nikumesu awanyanta, kukoola nsañu yamami, kulonda chakayilili wunsahu niwena niaJentili.” (Mat. 10:18) Hikukooleka kwakweni kumwimenaku Yesu muniyi njila. Chitwazataña nañovu kuhakwilaku nsañu yayiwahi kwaleteshaña tuyiñi nanyiloña. Hela chochu, yuma yikufuukulawu antu abula kuwanina ‘hiyakoleshaña’ nsañu yayiwahi chikupuku. Wanta waNzambi hohu diwu wakakuula antu nikuleta wuhaku walala haya nyaaka.—Mukwa. 8:9; Yere. 10:23.
Hela chochu, nimakonu ijina daYehova anateli kudijilika neyi akwaKristu akuhakwilaku chikuhwelelu chawu. Kufwana Pawulu, twatela kwikala awunda, ashinshika nawa amaana. Yesu walejeli atumbanji twindi nindi atela ‘kuleka kutoñojokañahu dehi mwakwakula; muloña wakayinka kanwa nimaana, kulonda akwankunyi nawu ejima akakañanyi hela kudikañilamu, hela kutadikamu.’—Luka 21:14, 15; 2 Tim. 3:12; 1 Pet. 3:15.
Neyi akwaKristu ahakwilaku chikuhwelelu chawu kudi anyanta, anyuuli hela ayilolu, anateli kushimwina kudi antu akwila hadaha chadi kukala kuyishimwina nsañu yawakwaKristu. Nyiloña yitunayiñi muyota yanyiloña yinaleteshi kupeleshaku nshimbi jikwawu, yuma yinafumimu antu anekali akasunuka kuhosha nikudifukula. Hela chochu, hichikweti muloña nayuma yinakufumamuku, kuhamuka kwamwekeshañawu ambuña aYehova neyi adi mukweseka kwamuzañaleshaña Nzambi.
Neyi tuhakwilaku yuma yitwakuhwelela, ijina daYehova dayaña mpuhu
^ par. 8 Nsoneki James Parkes wasonekeli nindi: “A Yudeya . . . adiña akasunuka kutwalekahu kulondela nshimbi jawu. Hela chochu, hikwadiña chuma chalema chaletesheli ayiteji kutwalekahu kudifukulaku, ilaña aRoma alondeleli chaaku chawu chakwinka antu wuswa wakudilila yuma aweni kumaluña ashiyashana amuwanta wawu.”