1, 2. (a) Kukalanyi kunakumonawu antu amavulu makonu, nawa yumanyi yinakufumamu? (b) Kuchiñejanyi kwalala kwekala haIsaya 41:10, 13?

PAYINIYA wasumbuka kudi eluda wahosheli nindi: “Naakameni hadi yaaka yayivulu hela chakwila nazataña chiwahi kuspiritu. Kwanleteshaña kubula kukaama tulu, yikatu kumujimba, kubula kushakama chiwahi nawakwetu nawa mpinji jikwawu nafuntaña hanyima kuspiritu.”

² Fwikijenu chatiyili iwu muhela. Chawushona, chihandilu mukaayi kaSatana katama chakala, chaleteshaña muntu kwakama nikudimona neyi wamukunkulwayi. Chidi neyi chikuñu chinakasiliwu kuwatu, chinakukañesha watu kuya hambidi. (Yish. 12:25) Chumanyi chikuyikojeja mutiyi muniyi njila? Hadaha munakuumika chineñi chakufwisha muntu imwakeña, mukweti chikatu cheneni, chinakuyikalila kwakamena chisaka chenu muyinu mpinji munakali mali hela anakuyidimbulula. Kukala kwamuchidiwu kunateli kuyizeyesha. Kunateli kuyiletesha cheñi kubula kwikala namuzañalu. Hela chochu, mukukuhwelela nenu Nzambi wukuyikwasha.—Tañenu Isaya 41:10, 13.

3, 4. (a) Bayibolu yazatishaña ñahi izu dakwila nawu “makasa”? (b) Yumanyi yinateli kuzeyesha makasetu?

³ Kakavulu, Bayibolu yazatishaña yiidi yamujimba wamuntu kwimenaku yilwilu hela nyidimu yashiyashana. Chakutalilahu, chikasa achitena kapampa kakavulu. Kukolesha chikasa  chamuntu kwatalisha mukumusañumuna muntu, kumukolesha hela kumwinka ñovu. (1 Sam. 23:16; Ezera 1:6) Kunateli cheñi kutalisha mukumukwasha kwikala nayitoñojoka yayiwahi nikuchiñeja yuma yayiwahi kumbidi.

⁴ Kuzeya kwamakasa achifwikija mpinji jikwawu akwizatishaña kukutena muntu wunazeyi, wunaneñi hela wunabuli kuchiñeja. (2 Kushi. 15:7; Heb. 12:12) Kakavulu muntu wudi mukukala kwamuchidiwu wazeyaña. Neyi mudi mukukala kunakuletesha mwakameni hela kunakuyiletesha muzeyi kumujimba nimuyitoñojoka hela kuspiritu, kudihi kumunateli kuwana wukwashu watelela? Munateli kukoleshewa ñahi nikwikala nañovu yakuumika kulonda mwikali namuzañalu?

5. (a) Neyi kunamwekani kukala twatela kwiladi, ilaña yumanyi yitwatela kutoñojokañahu? (b) Yumanyi yitukuhanjekahu?

⁵ Tañenu Zefwaniya 3:16, 17. Chatela tutiyi woma nikuzeya, kudi neyi kuzeyesha makasetu, Tata yetu wamwiwulu Yehova watuleja ‘kumuumbila kwakama kwetu kwejima.’ (1 Pet. 5:7) Twatela kutoñojoka mazu aNzambi alejeliyi aIsarela nindi, ‘chikasa chindi chañovu hichinehihi mwaka chikañanyi kwamwina’ ambuñindi ashinshikaku. (Isa. 59:1) Tukuhanjeka hayakutalilahu yalema yisatu yamuBayibolu yamwekeshaña nawu Yehova wafwilaña nawa wukweti wuswa wakukolesha antu jindi kulonda eli nkeñelu yindi hela chakwila kudi lukadi lwakutiyasha woma. Shinshikenu iyi yakutalilahu chiyinateli kuyikolesha.

6, 7. Yumanyi yalema yitukudizila kudi aIsarela chashindiliwu aAmaleki?

⁶ Chihahitili mpinji yantesha hohu hanyima yakuyifumisha muwuduñu muEjipitu, aIsarela ayilukukili kudi aAmaleki. Yoshuwa wadiña wahamuka walombweli aIsarela kunjita kuhitila mukulondela mwashimwiniyi Mosi. Hayina mpinji, Mosi wasendeli Aroni naHuri kuya hampidi yadiña kwakwihi hatwesheliwu kumona hazuñilileñawu. Komana awa amayala asatu atemukili kunjita muloña wawoma? Kwakulehi!

⁷ Mosi walondeleli kafuta kakasiliwu hakwila nawu ashindi. Mosi watwalekelihu kunyamuna mwiwulu makasindi nimukombu waNzambi walala. Mosi chatwalekelihu kwila mwenimu, Yehova wenkeli ñovu makasa awaIsarela kulonda ashindi aAmaleki. Hela chochu, chelili makasa aMosi azeyi nawa atachiki kufunta mwishina, aAmaleki atachikili kushinda. Dichi, Aroni naHuri anyakeli ‘nakunona ilola, amushililidu Mosi kwishina, washakaminihu; Aroni naHuri akwatilili makasindi, iwu mbadiyi, iwu mbadiyi makasindi akola nikukola nakushika nihaholokeli itañwa.’ Mwamweni, aIsarela ashindili muloña wachikasa chaNzambi chañovu chayikwashili.—Kwi. 17:8-13.

8. (a) Asa welili ñahi chelili aEtiyopiya alukuki aYudeya? (b) Tunateli kwimbujola ñahi Asa chashindameneniyi hadi Nzambi?

⁸ Mumafuku aMwanta Asa, Yehova wamwekesheli cheñi nindi chikasa chindi chachihi wanyi. MuBayibolu atenamu njita jajivulu. Ilaña, Zera kaEtiyopiya diyi wadiña namashidika amavulu. Wadiña namashidika 1,000,000 akuluka yitembi. Mashidika aAsa adiña antesha chakwila eñililimu kwakwihi nakapampa kayedi mumashidika awaEtiyopiya. Asa wadi kwakama nikutiya woma nawa makasindi adi kuzeya hampinji yakuzuña. Ilaña, Asa wanyakeli kulomba wukwashu kudi Yehova. Kwesekeja namwaya njita, Asa hadi kutwesha kushinda aEtiyopiyaku, ilaña ‘kudi Nzambi kwosi chuma chakalaku.’  (Mat. 19:26) Nzambi wamwekesheli ñovu jindi jabadika “hakutapa aEtiyopiya kwakuyayi Asa,” owu ‘washili chikupu muchima kudi Yehova mafuku indi ejima.’—2 Kushi. 14:8-13; 1 Anya. 15:14.

9. (a) Chumanyi chabulili kumukañesha Nehemiya kutuñulula mpwembu jaYerusalema? (b) Nzambi waakwili ñahi kulomba kwaNehemiya?

⁹ Fwikijenu chatiyiliyi Nehemiya hampinji yayiliyi kuYerusalema. Musumba hiwadiña wakiñewaku nawa akwawu aYudeya azeyeli nankashi. Chayilukukileñawu kudi akwakunyi nawu chakojejeli aYudeya azeyi nikuleka kutuña mpwembu jaYerusalema. Komana Nehemiya niyena wetejeli iku kukala kuzeyeshi makasindi tahindi? Inehi! Kufwana Mosi, Asa, niambuña amakwawu ashinshika aYehova, Nehemiya wadiña nachaaku chakushindamena hadi Yehova mukulomba. Nihampinji yamwekeni iku kukala dicheliliyi. Hampinji yamweniwu aYudeya kukala kwamwekeni neyi kweneni nankashi, Yehova waakwili kulomba kwaNehemiya kwakudikehesha. Nzambi wazatishili ‘ñovu yindi yeneni nichikasa chindi chañovu’ kukolesha makasa awaYudeya azeyeli. (Tañenu Nehemiya 1:10; 2:17-20; 6:9.) Komana munakuhweleli nenu Yehova wazatishaña ‘ñovu jindi jabadika nichikasa chindi chañovu’ kukolesha ambuñindi makonu?

10, 11. (a) Satana wafwilaña kuzeyesha makasetu munjilanyi? (b) Yehova wazatishañadi hakutukolesha nikutwinka ñovu? (c) Shikola yakuspiritu yinayikwashi ñahi?

¹⁰ Tunateli kukuhwelela netu makasa aDiyabolu akazeya wanyi hampinji yinakufwilayi kukañesha nyidimu yetu yawakwaKristu. Watudimbaña nikututiyisha woma kuhitila mudi akwanfulumendi, akulumpi jansakililu niakwakusekesha. Wafwilañadi? Wafwilaña kuzeyesha makasetu kulonda tuleki kushimwina nsañu yayiwahi yaWanta. Hela chochu, Yehova nateli nawa wafwilaña kutukolesha kuzatisha spiritu yindi yajila. (1 Kushi. 29:12) Chalema kushindamena haniyi spiritu kulonda yitukwashi kushinda kukala kwejima kwatuletelañayi Satana nikaayi kindi katama. (Mas. 18:39; 1 Kor. 10:13) Cheñi, twatela kusakilila muloña tukweti Izu daNzambi, dasonekeliwu kuzatisha spiritu yajila. Toñojokenu cheñi hayakuda yakuspiritu yashindamena haBayibolu yitwatambwilaña kakweji nikakweji. Mazu ekala haZekariya 8:9, 13 (tañenu) ayihosheli hampinji yadiña nakutuñululawu tembeli muYerusalema, nawa awa mazu amawahi nikudi etu.

¹¹ Atukoleshaña cheñi kuhitila munshimbi jitwatambwilaña hakupompa kwetu kwawakwaKristu, kupompa kwanyanya, kupompa kweneni, nimumashikola etu awakwakushimwina. Iku kudizisha kwatukwashaña kwikala nayilwilu yayiwahi, kwimika yikonkwanyi yakuspiritu nikuzata chiwahi nyidimu yetu yawakwaKristu. (Mas. 119:32) Komana mwafwilaña kwikala nañovu kuhitila mushikola yamuchidiwu?

12. Yumanyi yitwatela kwila kulonda twikali akola kuspiritu?

¹² Yehova wakwashili aIsarela kushinda aAmaleki niaEtiyopiya nawa wenkeli Nehemiya niakwawu ñovu yakumanisha mudimu wakutuñulula. Nzambi wukutwinka ninetu ñovu yakuumika neyi anakutudimbulula, anakutudiwula nawa neyi tunakwakama kulonda tutwalekihu namudimu wetu wakushimwina. (1 Pet. 5:10) Yehova hakumanisha kukala kwetu muchihayamishaku. Ilaña, twatela kuzata nañovu. Mukuzata nañovu mwabombela kutaña Izu daNzambi mafuku ejima, kuloñesha nikuya nakupompa mulungu nimulungu, mpinji yejima twatela kwikalaña nakudiza kwahalwetu nikudifukula  kwachisaka nikushindamena hadi Yehova mukulomba. Bayi twiteja yuma yitwafwilaña ninyidimu yikañeshi njila mwatwinkelañayi Yehova ñovu nikutukoleshaku. Neyi mutiya nenu makasenu anazeyi, chakwila munakukañanya kwila yumiyi, lombenu wukwashi kudi Nzambi. Mukumona spiritu yindi ‘chiyikuyikolesha kuhitila mukuyinka muchima wakufwila kukoña yuma niñovu yakwilamu.’ (Fwi. 2:13) Hanu dinu, yumanyi yimunateli kwila kulonda mukoleshi makasa awantu amakwawu?

13, 14. (a) Manakwetu wumu wakolesheweli ñahi chelili ñodindi yafwi? (b) Njilanyi mutunateli kukoleshela amakwawu?

¹³ Yehova watwinka anakwetu mukaayi kejima akwakudifukula atukoleshaña. Anukenu nenu kapostolu Pawulu wasonekeli nindi: “Ololenu makasa analepuki nimanuñu anabuli ñovu. Ololenu njila jimukwenda.” (Heb. 12:12, 13) Antu amavulu muyaaka nkulakaji yakusambila ayikolesheli kuspiritu muniyi njila. Chochimu nimakonu. Manakwetu wumu chelili nafwishi dehi ñodindi nawa yahiti mukukala kukwawu, wahosheli nindi: “Nelukili nami hitunateli kuditondela kweseka kutwatela kuhitamu hela mpinji indi kwiji kapampaku. Kulomba nikudiza kwahalwami kwankwashili kubula kuzeya. Cheñi wukwashu wafumineña kudi amanakwami niahela akuspiritu wunankundeji chikupu. Neluki kulema kwakwikala nawubwambu wawuwahi naYehova henohu kukala kanda kumwekani.”

¹⁴ Aroni niHuri akolesheli makasa aMosi hampinji yanjita. Ilaña etu, tunateli kukeña njila mwakukoleshela nikukwashila amakwawu. Antu amuchidinyi? Hiyantu anakukabakana muloña wakukala kwenzaña muloña wawushinakaji, abula kukola kumujimba, anakukabishawu kudi chisaka chawu, anakukabakana muloña wakwikala nkawawu hela anafwishi antu akeñawu. Tunateli cheñi kukolesha atwansi anakumona ikañesha dakukeña kudibomba muyuma yatama hela anakufwila kwikala nachihandilu chachiwahi mukanu kaayi kuhitila mukutaña mashikola ahewulu nikwikala namali amavulu hela kukuluka yitembi munsañu yanyidimu. (1 Tesa. 3:1-3; 5:11, 14) Wanenu njila yakwilukilamu chinakuhandawu akwenu neyi mudi Hetala daWanta, mumudimu wakushimwina, neyi munakudiila hamu hela neyi munakuhanjeka hatelefoni.

15. Mazu amawahi anateli kukwasha ñahi akwenu akwaKristu?

¹⁵ Chelili Asa nashindi dehi, kaprofwetu Azariya wamukolesheli niantu jindi nindi: “Hakwila enu ikalenu nañovu, makasa enu bayi azeyaku, muloña mudimu wenu wakutambwila wuloku.” (2 Kushi. 15:7) Chumichi chaletesheli Asa yahimpi yuma yayivulu kulonda yafuntishi kudifukula kwalala. Munjila yoyimu, mazu enu amawahi anateli kukwasha chikupu amakwawu. Neyi mwila mwenimu, munateli kuyikwasha kumukalakela Yehova chikupu. (Yish. 15:23) Nawa neyi munakupompa, mwatela kwiluka nenu munateli kukolesha nankashi anakwenu neyi mwakula yikuma yinateli kuyikwasha anakwenu.

16. Kufwana Nehemiya, aeluda anateli kukolesha ñahi makasa awantu amuChipompelu? Shimunenu halwenu chinayikwashiwu kudi akwenu akwakwitiya.

¹⁶ Muloña wakuyikwasha kudi Yehova, Nehemiya niakwawu adiñayi nawu akolesheli makasawu kulonda azati mudimu. Amanishili kutuñulula mpwembu jaYerusalema mumafuku 52 hohu. (Nehe. 2:18; 6:15, 16) Nehemiya hatalileña hohu chatuñileñawuku.  Ilaña wazatileñaku hakutuñulula mpwembu jaYerusalema. (Nehe. 5:16) Munjila yoyimu, aeluda amavulu akweti kukeña anembujoli Nehemiya kuhitila mukuzataku nyidimu yakutuña yamukuloñesha hela kuwahisha nikutuñulula Itala dawu daWanta. Akwashaña cheñi makasa anazeyi awantu anakwakama kuhitila mukuzata nawu mumudimu wakushimwina nikuya nakubiña anyikoku.—Tañenu Isaya 35:3, 4.

17, 18. Yumanyi yitwatela kukuhwelela neyi tumona kukala hela tunakwakama?

¹⁷ Kuzatila hamu nawamanakwetu niahela kwatunuñañeshaña. Kwakoleshaña cheñi wubwambu wetu nikwikala nachikuhwelelu chakola hankisu jitukukeña kutambwila muWanta waNzambi. Chitunakukolesha makasa awakwetu, tunakuyikwasha kushinda kukala kunakumonawu nikuyikwasha kutwalekahu kuchiñeja chikupu yuma yayiwahi yinakwinza kumbidi. Hela chochu, kwila mwenimu kwatukwashaña kwikala atona kuspiritu nikukuhwelela chikupu yuma yinatuhembeliyi Nzambi. Cheñi nawa, chumichi chakoleshaña makasetu.

¹⁸ Kumona Yehova chakwashiliyi nikukiña ambuñindi kunyima hampinji jashiyashana, kwatela kukolesha chikuhwelelu chetu nikumukuhwelela makonu. Dichi, neyi mumona kukala, “makasenu bayi azeyaku”! Ilaña, hanjekenu naYehova mukulomba nawa itejenu chikasa chindi chañovu chiyikoleshi nikuyilombola kunkisu jakaleta Wanta.—Mas. 73:23, 24.