1. Muloñadi akwakudifukula aYehova chekalilawu namuzañalu? (Talenu mwevulu wakutachikilahu.)

AYINSAHU JAYEJOVA hiyantu akweti muzañalu. Hakupompa kwawu, kupompa kweneni hela neyi anabulakani hamu, ahanjekaña nikuseha namuzañalu chikupu. Muloñadi chiyekalilawu namuzañalu? Muloña amwiluka, amukalakelaña nawa afwilaña kumwimbujola Yehova, “Nzambi waMuzañalu.” (1 Tim. 1:11; Mas. 16:11) Chineli muzañalu wafumaña kudi Nzambi, wakeñaña nindi ninetu twikali namuzañalu nawa watwinka yuma yikwawu yatuleñelaña kuzañalala.—Kuhit. 12:7; Mukwa. 3:12, 13.

2, 3. (a) Muzañalu watalisha mudihi? (b) Chinateli kukaliladi kwikala namuzañalu?

² Indi enu halwenu? Mukweti muzañalu? Kwila musweja kwikala namuzañalu nehi? Muzañalu tunateli kuwulumbulula netu “hikutiya kuwaha, kuzañalala nachihandilu cheyi, nikukeña kutwalekahu kwikala namuzañalu.” Bayibolu yamwekeshaña nawu  muzañalu walala watalisha kudi muntu anakiswiliwu kudi Yehova. Hela chochu, chinateli kukala kwikala namuzañalu mukaayi kamakonu. Muloñadi?

³ Yuma yaneñeshaña yidi neyi kufwisha muntu imwakeña, kumuhaña muchipompelu, kudiseña hela neyi nyidimu yinamani, yumiyi yinateli kumanisha muzañalu wetu. Kubula kutiyañana muchisaka nikubula kutiyañana muntu namukwawu kunateli kumanisha muzañalu. Neyi anakutuseha kudi akwetu mutwazatilaña hela itwatañaña nawu, kutuyandisha muloña wayuma yitwakuhwelela, hela kutukasa mutuleya, yumiyi yinateli kutuleñela kubula kwikala namuzañalu. Kuzeya kumujimba, kuyekela nayikatu hela chineñi nijena jinateli kumanisha muzañalu. Hela chochu, Yesu Kristu, “Mukwakuyuula wekala kankawindi nawa wamuzañalu,” watiyaña kuwaha kukundeja nikuzañalesha antu. (1 Tim. 6:15; Mat. 11:28-30) Mumpanji yindi yahaMpidi, Yesu washimwini yilwilu yayivulu yinateli kutuletela muzañalu hela chakwila tunakuhita mukukala kwakuvulu mukanu kaayi kaSatana.

4, 5. Tunateli kwikala ñahi namuzañalu nikutwalekahu kwikala nawu?

⁴ Chuma chatachi chashimwiniyi Yesu chalema nankashi. Washimwinini nindi: “Adi namuzañalu wowu antu eluka nawu atela kudiza hadi Nzambi, muloña Wanta wamwiwulu wawu.” (Mat. 5:3) Twamwekeshaña ñahi netu twakeñaña kudiza hadi Nzambi? Twelaña mwenimu neyi tutwalekahu kuda yakuda yakuspiritu, kuyilemesha chikupu nikutwamijaku kudifukula kwetu kutwadifukulaña kudi Nzambi wamuzañalu. Neyi twilaña yumiyi, muzañalu wetu wukuswejelaku. Tukukolesha chikuhwelelu chetu muyikaninu yaNzambi. Cheñi tukwikala akola muloña ‘wakuchiñeja kwaletaña muzañalu’ wafumaña Mwizu daNzambi wakwashaña akwakudifukula alala.—Tit. 2:13.

⁵ Neyi tunakukeña kwikala namuzañalu wahaya nyaaka, twatela kwikala nawubwambu wakola naYehova. Kapostolu Pawulu amoneneni kusoneka nawu: “Zañalelenuña mudi Mwanta [Yehova] mpinji yejima. Nukuhosha cheñi nami, Zañalalenuña.” (Fwi. 4:4) Hakwila nawu twikala nawubwambu wawuwahi naNzambi, twatela kukeñakeña maana indi. Izu daNzambi dashimuna nawu: “[Wudi namuzañalu yowu] muntu wukuwana maana nimuntu wukuheta kashinshi. Antu [akwatañaku] chikasa anakwati kumutondu wawumi; antu ejima [akukakelaku akwikala namuzañalu.]”—Yish. 3:13, 18.

6. Muzañalu wetu wahaya nyaaka washindamena hachumanyi?

⁶ Neyi tunakukeña kwikala namuzañalu wahaya nyaaka, twatela kutañaña izu daNzambi nikuzatisha yuma yitunakudiza. Hakumwekesha kulema kwakuzatisha yuma yitunakudiza, Yesu washimwini nindi: “Neyi [mwiluka] yumiyi, mudi namuzañalu neyi muyikoña.” (Yow. 13:17; tañenu Yakoba 1:25.) Ichi dichuma chinateli kuyikwasha kwikala nawubwambu wakola naNzambi nikwikala namuzañalu wahaya nyaaka. Hanu dinu tunateli kwikala ñahi namuzañalu neyi tunakuhita mukukala kunateli kumanisha muzañalu wetu? Tushinshikenu cheñi yuma yahosheliyi Yesu muMpanji yindi yahaMpidi.

7. Antu aneñaña anateli kwikala ñahi namuzañalu?

⁷ “Adi namuzañalu wowu antu aneñaña, muloña akayikundeja.” (Mat. 5:4) Antu amakwawu anateli kwihula nawu, ‘antu ananeñi anateli kwikala ñahi namuzañalu?’  Yesu hateneneña ejima aneñañaku. Antu atama niwena aneñaña muloña wakukala kwayuma yinakumwekana muyinu “mpinji jakala.” (2 Tim. 3:1) Atoñojokaña hohu hayuma yakuditiyisha kuwaha, hiyatoñojokaña hadi Yehovaku. Dichi, kuneña kwawu hikunateli kuyiletela muzañaluku. Ilaña Yesu wadiña nakutena antu akeñaña kudiza hadi Nzambi, dichi aneñaña muloña wakwila antu amavulu amukaanaña Nzambi ninshimbi jindi. Eluka nawu hiyakwanshidi nawa aneñaña nayuma yatama yafuma munshidi yawantu. Yehova weluka antu akweti nyichima yayiwahi aneñaña; wayikundejaña nikuyikwasha kwikala namuzañalu muchihandilu chawu.—Tañenu Ezekeli 5:11; 9:4.

8. Lumbululenu kudizoza chikunateli kuleta muzañalu.

⁸ “Adi namuzañalu wowu antu adizoza, muloña akaswana iseki.” (Mat. 5:5) Kudizoza kunateli kutuleñela ñahi kwikala namuzañalu? Muntu neyi neluki chalala wahimpaña. Hadaha kunyima adiña azuwa, adiña nayikonkojola nawa akwamadombu. Ilaña ichi avwala dehi “wuntu wawuha” nawa amwekeshaña “muchima wawushona, luwi, kudizoza, kwovwaha nikudiwunjika.” (Kol. 3:9-12) Chafumamu, awunda, akweti kukeña nawa adi namuzañalu muchihandilu chawu. Kubombelahu, Izu daNzambi dakana nawu antu amuchidiwu “akaswana ituña.”—Mas. 37:8-10, 29.

9. (a) Munjilanyi “antu adizoza [muyakaswaninawu] iseki”? (b) Munjilanyi antu “atiyaña nzala nampwila yakuloña” muyakekalilawu namuzañalu?

⁹ Munjilanyi antu adizoza “[muyakaswaninawu] iseki”? Atumbanji twaYesu awayishewa naspiritu akaswana iseki hampinji yikayuulañawu iseki neyi anyanta nawa atupristu. (Chim. 20:6) Hela chochu, antu amavulu abula kwikala nakuchiñeja kwakuya mwiwulu, akaswana iseki, dikwila nawu akashakama hamaseki haya nyaaka, akekala awanina, akekala mukuwunda nawa namuzañalu. Awa diwu antu akweti muzañalu muloña “atiyaña nzala nampwila yakuloña.” (Mat. 5:6) Chineli atiyaña nzala nimpwila yakuloña akayikutisha mwituña dadiha. (2 Pet. 3:13) Neyi Nzambi nafumishihu dehi kutama kwejima, hikwakekala cheñi yuma yatama yikaletesha akabuli kwikala cheñi namuzañaluku.—Mas. 37:17.

10. Kwikala naluwi kwatalisha mudihi?

¹⁰ “Adi namuzañalu wowu antu akweti luwi, muloña akayitiyila luwi.” (Mat. 5:7) Izu dachiHeberu dakwila nawu luwi dalumbuluka nawu “kwikala neyena dakwakamena; . . . kwikala nawushona.” Munjila yoyimu izu dachiGiriki dabombelamu kutiyila muntu wushona. Hela chochu, Luwi hikutiyila hohu muntu wushonaku. Izu dakwila nawu luwi muBayibolu mwabombela kutiyila luwi nikukoñahu chuma chimu.

11. Chumanyi chitwatela kudizila kuchakutalilahu chakaSamariya wamwekesheli luwi?

¹¹ Tañenu Luka 10:30-37. Chakutalilahu chashimwiniyi Yesu chakaSamariya wamuwahi, chamwekeshaña mwatalisha luwi. Muloña wawushona niluwi, iwu kaSamariya wamukwashili ona iyala akatishiliwu. Yesu chamanishiliyi kushimuna ichi chakutalilahu, wamulejeli nindi: “Yaña nineyi wileña mwomumu.” Dichi, twatela kudihula etu aweni netu: ‘Inakwila chochimu? Inakumwekesha wushona neyi chamwekesheliyi kaSamariya? Komana namwekeshaña luwi nikuzataku nyidimu yayiwahi nakukwasha antu anakukabakana? Chakutalilahu, kwila nikwashaku akwetu akwaKristu akula dehi, anfwila, nianyana akweti atata jawu abulaña kupompa nehi? Komana kwila ‘nikundejaku antu ananeñi’ nehi?—1 Tesa. 5:14; Yak. 1:27.

12. Tunateli kwikala ñahi namuzañalu neyi tumwekeshaña luwi?

¹² Hanu dinu, tunateli kwikala ñahi  namuzañalu neyi tumwekeshaña luwi? Neyi tutiyilaña antu amakwawu luwi, twekalaña namuzañalu wafumaña mukuhana. Kubombelahu, tweluka netu tunakumutiyisha Yehova kuwaha. (Yilw. 20:35; tañenu Aheberu 13:16.) Mwanta Davidi wahosheli hadi muntu wakamenaña akwawu nindi: “Yehova wakamuhemba, wakamuhemba wamumi, wakakooleka munu mwituña.” (Mas. 41:1, 2) Neyi tumwekesha luwi niwushona kudi akwetu, Yehova niyena wakatutiyila luwi nawa twakekala namuzañalu haya nyaaka.—Yak. 2:13.

13, 14. Kunuñañananyi kwekala hakachi kamuchima wutooka namuzañalu?

¹³ Yesu wahosheli nindi: “Adi namuzañalu wowu antu atooka munyichima, muloña akamumona Nzambi.” (Mat. 5:8) Hakwila nawu twikali atooka munyichima, twatela kwikala awunyonji mukachi kamuchima nimuyitoñojoka. Twatela kwikala nayitoñojoka yitooka kulonda twikali nawubwambu wakadi majilu naYehova.—Tañenu 2 Akorinda 4:2; 1 Tim. 1:5.

¹⁴ Antu atooka munyichima anateli kwikala nawunyonji nimuzañalu kumesu aYehova, wahosha nindi: “Adi namuzañalu wowu antu akosaña nyinkukumba yawu.” (Chim. 22:14) ‘Akosaña ñahi nyinkukumba yawu’? AkwaKristu awayishewa “akosaña nyinkukumba yawu” munjila yakwila nawu ekala atooka kumesu aYehova nawa akayinka wumi wakafwaña nikudiluñisha muzañalu wahaya nyaaka mwiwulu. Izaza deneni dawantu akweti kuchiñeja kwakushakama hamaseki niwena anateli kwikala nawubwambu wawuwahi naNzambi. Niwena ‘anakukosa nyinkukumba yawu nakuyitookesha mumashi amwana kaMukoku.’—Chim. 7:9, 13, 14.

15, 16. Antu atooka munyichima ‘akamumona ñahi Nzambi’?

¹⁵ Hanu dinu, antu atooka munyichima “[akumumona] Nzambi” ñahi henohu ‘kwosi muntu wukumona Nzambi ahandaku’? (Kwid. 33:20) Izu dachiGiriki dabalumunawu nawu “kumona” datalisha mukwila nawu “kumona nayitoñojoka, kwiluka.” Antu amumonaña Nzambi ‘namesu amuchima’ hiyantu amwiluka chikupu, embujolaña yilwilu yindi. (Efwes. 1:18) Yesu wamwekesheli yilwilu yaNzambi, dichi wahosheli nindi: “Muntu wejima wunamoni ami, dikwila nawu namoni niTata.”—Yow. 14:7-9.

¹⁶ Kubombela hakwiluka yilwilu yaNzambi, akwakudifukula alala anateli “[kumumona] Nzambi” kuhitila mukushinshika hayuma yayililañayi. (Yoba 42:5) Ashinshikaña cheñi ‘mesu awu amuchima’ hayuma yayiwahi yashiikayi Nzambi antu anakuzata nañovu kulonda atwalekihu kwikala atooka nikumuzatila nakashinshi. Hela chochu,  awayishewa akasañulawu akamumona Yehova neyi anatambwili dehi wuloku wawu wamwiwulu.—1 Yow. 3:2.

17. Antu aletaña kuwunda ekalaña ñahi muzañalu?

¹⁷ Yesu wahosheli cheñi nindi: “Adi namuzañalu wowu antu aletaña kuwunda.” (Mat. 5:9) Antu azataña nañovu kulonda aleti kuwunda ekalaña namuzañalu. Kambanji Yakoba wasonekeli nindi: “Antu aletaña kuwunda, atumbaña mumpinji yakuwunda nawa añulaña nyikabu yakuloña.” (Yak. 3:18) Neyi tunadivulumuni namuntu muchipompelu hela muchisaka, twatela kumulembelela Yehova kulonda yatukwashi kuleta kuwunda. Dichi, Yehova wukutwinka spiritu yindi yajila yikutukwasha kwikala nayilwilu yayiwahi nimuzañalu. Yesu wakonkomweneni chalemena kuleta kuwunda hahosheliyi nindi: “Dichi, neyi wunakuleta mulambu weyi kukameña nawa kwenoku wanuka neyi wukweti muloña namanakweyi, shiyaku mulambu weyi kumbidi yakameña nawa funtaku. Sambilaku kutiyañana namanakweyi, kuhiñahu dinu wufunti nakulambula mulambu weyi.”—Mat. 5:23, 24.

18, 19. Muloñadi akwaKristu chiyatela kuzañalelawu hela chakwila anakuyikabisha?

¹⁸ “Mudi namuzañalu enu ahoshañawu kasawuntu kudi antu nikuyikabisha nakuyitwambila yuma yatama yeñi-nayeñi kukoola ami.” Yesu watalishili mudihi chahosheliyi awa mazu? Watwalekelihu cheñi nindi: “Zañalalenu nawa tiyenu kuwaha chikupu, muloña wufwetu wenu weneni mwiwulu, dichakabishiliwu niatuprofwetu adiñaku henohu enu kanda muvwaliki.” (Mat. 5:11, 12) Apostolu chayivupoleliwu yikoti nikuyileja nawu aleki kushimwina, “afumini kudi akwaSanihedirini iku anazañalali.” Hela chochu, bayi neyi azañaleli muloña wayikoti yayeteliwuku. Ilaña azañaleli “muloña ayisawili hamuloña wakuzatisha ijina [daYesu.]”—Yil. 5:41.

¹⁹ Munanu mafuku, antu jaYehova omikaña namuzañalu neyi anakuyikabisha muloña wejina daYesu hela neyi anakuhita mukweseka kwasweja. (Tañenu Yakoba 1:2-4.) Kufwana apostolu, hitwazañalalaña nayihuñu yitwamonañaku. Ilaña neyi tutwalekahu kwikala ashinshika kudi Nzambi mumpinji yakweseka, Yehova wukutukwasha kuumika chikupu. Chakutalilahu, muAugust 1944, akwanshimbi janfulumendi amutwalili manakwetu Henryk Dornik nimanakwindi muchilombu chakuyandishila. Hela chochu, akwakudimbulula ahosheli nawu: “Kwila tuyikanjikija kwila chuma chidi chejima nehi. Yihuñu yamweniwu yayileñeleli kwikala namuzañalu.” Manakwetu Dornik walumbulwili nindi: “Hela chakwila hinakeñeleña nami ankabishiku, kuumika yihuñu nikutwalekahu kwikala washinshika kudi Yehova kwanleteleli muzañalu. . . . Kulomba chikupu kwankundamishili kudi Yehova nawa wekalili Nkwashi yami.”

20. Muloñadi chitwatiyilaña kuwaha kukalakela “Nzambi wamuzañalu”?

²⁰ Neyi twikala namuzañalu wafumaña kudi “Nzambi wamuzañalu,” tunateli kwikala namuzañalu hela chakwila anakutukabisha muloña wayuma yitwakuhwelela, kutudimbulula muchisaka, yikatu hela muloña wawushinakaji. (1 Tim. 1:11) Twekalaña cheñi namuzañalu muloña wayuma yayiwahi yatukanayi Nzambi, “wabulaña kutwamba.” (Tit. 1:2) Kushikijewa kwayikaninu yaYehova kukawaha chikupu muloña kweseka niyuma yatama yejima yitunakumona yikajiya. MuParadisa, Yehova wakatukiswila nawa yuma yitwakamona yikabadika yitwafwikijaña. Nawa twakekala namuzañalu wasweja chikupu. “[Twakatiya] kuwaha nankashi nakushakama chachiwahi chamwena.”—Mas. 37:11.