Neyi munakukeña kwiluka mpinji, chumanyi chimwelaña? Mwashikenaña dakutala hankoloku yidi hachikasa hela nkoloku yidi mwitala. Neyi mukwenu yayihula mpinji, munateli kwakula nenudi? Kudi jinjila jambokamboka jakutenenamu mpinji. Munjilanyi?

Tuhoshi netu hanahiti ora yimu naminiti 30 kufuma hachayili. Munateli kwakula nenu 1:30 yamwaana. Kwesekeja nakumwashakamaña hela chimwayitenaña kunodu iluña, hela munateli kuhosha nenu yinashiki 13:30. Iyi njila yakutenenamu mpinji yinashindameni nachatanjikawu nawu ifuku dekala namaora 24. Kumaluña amakwawu atenaña mpinji yoyimu nawu “hafu 2,” chinakulumbulula nawu kunashali maminiti 30 henohu 2 koloku kanda yishiki.

Enu mwatañaña Bayibolu munateli kuhayama chiyateneneñawu mpinji hasonekeliwu Bayibolu. Hiyayiteneneña munjila yimuku. Nyikanda yamuBayibolu yaChiheberu yashimuna chiyateneneñawu mpinji, chidi neyi “ntetemena,” “hachayili,” “hakachi kamwaana mwiwulu,” “nimelela.” (Kutach. 8:11; 19:27; 43:16; Kuhit. 28:29; 1 Anya. 18:26) Hela chochu, mpinji yikwawu ateneneña mpinji kwesekeja nahiyinashiki.

Mumpinji yakunyima, azatishileña akwakuhemba. Kakavulu yadiña mpinji yawufuku. Hadi yaaka yayivulu yahitilihu henohu Yesu kanda yavwaliki, aIsarela ambwili wufuku muyibalu yisatu yateneneñawu nawu wulama. (Mas. 63:6) Ansompeshi 7:19 yashimuna “atulama amukachi kawufuku.” Mumpinji yaYesu, aYudeya azatishileña njila jazatishileñawu aGiriki nawaRoma, yakutena yilu yiwana yawatulama awufuku.

Nsañu Yayiwahi yashimuna iyi yilu kapampa kakavulu. Chakutalilahu, yadiña “hachilu chawufuku chamuchiwana” hampinji yendeliyi Yesu hamenji kwakwihi nawatu mwadiña atumbanji twindi. (Mat. 14:25) Muchishimu, Yesu wahosheli nindi: “Neyi mwini itala welukili chilu chikwinzayi ikombi, mutenowu wadi kutwalekahu nakutona nawa hadi kumwiteja ikombi kulokola nakwiñila mwitala dindiku.”—Mat. 24:43.

Yesu wateneneña yilu yejima yiwana hayilejeleñayi atumbanji twindi nindi: “Tonenuña, muloña enu himuneluki mpinji yakenzayi mwini italaku, kwiji namelela, indi kwiji hakachi kawufuku, indi kwiji kumacha, indi kwiji budidi nankashi.” (Maku 13:35 tth.) Chilu chatachi, “melela,” chatachikileña neyi itañwa dinahumi dehi kushika 9 koloku yamelela (21:00.) Chilu chamuchiyedi, “hakachi kawufuku,” chadiña kufuma 9 koloku yamelela kushika 12 koloku yawufuku (21:00–00:00). Chilu chamuchisatu, “kumacha,” hela “mpinji yedikilaña ikombu,” hikufuma hakachi kawufuku kushika 3 koloku yakumacha (00:00–03:00). Hadaha yadiña mpinji yeteleli ikombu nawufuku hamukwatiliwu Yesu. (Maku 14:72) Chilu chamuchiwana, “budidi nankashi,” chadiña kufuma 3 koloku yantetemena kushika mpinji yaselaña mutena.

Hela chakwila kunyima adiña najinkoloku wanyi, antu adiña nanjila jakutenenamu mpinji chidi neyi mpinji yamwaana nimpinji yawufuku.