KUNYEÑUMUKA kaayi kejima, aeluda alemesha mudimu wazatañawu hadi antu jaNzambi. Hikukooleka kwikala nawantu amuchidi awa! Hela chochu, hadi yaaka yantesha yinahitihu kwadiña kuhimpika. Aeluda akula dehi ayilejeli kwinka aeluda achidi atwansi nyidimu yamaneni yazatileñawu. Munjilanyi?

Ntanjikilu yakatataka yidi yakwila nawu neyi ankoñi añinza niankoñi adizishaña anashikiji dehi yaaka 70 atela kuleka nyidimu yawu. Cheñi aeluda anashikiji dehi yaaka 80 atela kwinka aeluda achidi atwansi nyidimu yazatañawu, chidi neyi Nloñeshi weZanvu daMutayi hela Nloñeshi wezanvu dawaeluda wamuchipompelu. Indi awa amanakwetu elili ñahi naniku kuhimpika? Amwekesheli kwovwahila kudi Yehova nikuloñesha kwindi.

Manakwetu Ken wadiña Nloñeshi waMutayi hadi yaaka kwakwihi na 49 wahosheli nindi: “Netejeli chikupu naniku kuhimpika. Kafwampi, mpinji yikwadiña iku kuhimpika nantetemena, namulombeli Yehova, nakumuleja nami yakwashi atwansi kulonda akalakaleña neyi anloñeshi.” Chuma chelili manakwetu Ken dicheliliwu niamanakwetu akula dehi ashinshika mukaayi kejima. Hela chochu, chineli akeñeli nankashi kukalakela amanakwawu, hatachi aneñeli.

 Manakwetu Esperandio wadiña nloñeshi wezanvu dawaeluda muchipompelu wahosheli nindi: “Naneñeli.” Ilaña wenjili nakwiteja cheñi nindi, “Nakeñekeleña kwikala nampinji yakudakamena kumujimba muloña wakukatakata.” Neyi chitunamoni, Manakwetu Esperandio natwalekihu kumukalakela Yehova nakashinshi nawa nakukwasha chipompelu chawu.

Indi ankoñi adiña mumudimu wakwenda ahimpili nakutachika kuzata mudimu wacheñi? Manakwetu Allan, wadiña nkoñi wendaña hadi yaaka 38, wahosheli nindi, “Chinachitiyili, naneñeli.” Hela chochu, welukili chichalemena kudizisha atwansi awamayala nyidimu, ilaña watwalekelihu kukalakala nakashinshi.

Manakwetu Russell wadiña nkoñi wendaña nawa wazatiliku mudimu wawunkoñi wakudizisha hadi yaaka 40, wahosheli nindi yena niñodindi hakusambila aneñeli. “Twadiña twakeña nankashi mudimu wetu nawa twatoñojokeli netu twatela kutwalekahu.” Manakwetu Russell niñodindi anakuzatisha yuma yadiziliwu niyuma yelukawu hakukwasha chipompelu nawa akwakushimwina akalakalaña hamu nawu atiyaña kuwaha.

Hela chakwila enu halwenu kanda mutiyeñahu dehi neyi chatiyili awa antu itunashimuni hewulu, nsañu yekala ha 2 Samweli yinateli kuyikwasha kutiyishisha chichatiyakanaña.

Toñojokenu chuma chamwekeni chelili Abisalomi mwana kaMwanta Davidi yamunyamukili tata yindi. Davidi watemukili kuYerusalema nakuya kuMahanayimi kumusela waKaloña kaYodana. Kweniku Davidi ninana antu adiñayi nawu akeñekeleña yuma yakeñekaña kumujimba. Munakwanuka chuma chamwekeni?

Amayala asatu amunidi iluña aleteli tudidi, yakuda, niyuma yikwawu yakeñekeleña. Bazilayi niyena wadiña hakachi kanawa amayala. (2 Sam. 17:27-29) Chelili kudikaña kwa Abisalomu akukañeshi, Davidi wafuntili kuYerusalema nawa Bazilayi wamushinjikijiliku kushika kuYodana. Davidi wamulejeli kuya kuYerusalema. Ilaña mwanta wakeñeleña nindi yakamwinkeña yakuda, hela chakwila Bazilayi “wadiñi muntu [waheta] nankashi” nawa hakeñekeleña kumwinka yakudaku. (2 Sam. 19:31-33) Ilaña Davidi wakeñeleña nindi Bazilayi yayi nindi kuYerusalema kulonda yakamulejeñaku maana muloña Bazilayi wadiña wakuluka yitembi mukwiluka yuma. Kwadiña kukooleka chikupu kwakuya nakushakama nikuzatila kuchipañu chamwanta.

Muloña wakutoñojokelaku, Bazilayi wahosheli nindi wadiña nayaaka 80. Wabombelelihu cheñi nindi: “Nitweshi kwiluka niyayiwahi niyatama?” Watalishili mudihi? Bazilayi watela wekalili namaana muloña wayaaka yayivulu yashakaminiyi hamaseki. Hela chochu, wadi kutwalekahu kumuleja maana neyi  chadiña nakwilawu “akulumpi” kudi Mwanta Rehobowami. (1 Anya. 12:6, 7; Mas. 92:12-14; Yish. 16:31) Mazu ahosheliyi Bazilayi akwiluka yayiwahi niyatama adiña nakutalisha hakukala kwamweneñayi kumujimba muloña wakukula. Washimwini hatooka nindi wushinakaji wamuletesheli kukañanya kwiluka yatowala nawa wakañenyeña kutiya. (Mukwa. 12:4, 5) Dichi Bazilayi wamulejeli Davidi kusenda kansi weyala Chimihami, hadaha wadiña mwana kaBazilayi.—2 Sam. 19:35-40.

Kuhimpika kwakukula kumujimba kutwahoshahu kunadifwani nachuma chamwekesheliyi Bazilayi. Hela chochu, kuhimpika kwadiñaku katataka hiyashinshikileña hakukala kunakumonayi muntu hela wuswa wukwetiyi neyi kukala kwamweneñayi Bazilayiku. Ilaña adiña nakutoñojoka yuma yinateli kukwasha aeluda ashinshika mukaayi kejima.

Awa amayala akwakristu adizoza akula dehi amweni nawu kuloñesha kwaYehova kunateli kuyilaku hambidi neyi nyidimu yinazatiwu yaaka yayivulu atachika kuyizata kudi amanakwetu achidi atwansi. Kakavulu amanakwetu akula dehi diwu adiña nakudizisha atwansi, neyi chadizishiliyi Bazilayi mwanindi nawa neyi cheliliyi kapostolu Pawulu naTimotewu. (1 Kor. 4:17; Fwi. 2:20-22) Awa amanakwetu atwansi anakumwekesha nawu ‘ekala yawaana,’ nawa akwashaña “nikutuña mujimba waKristu.”—Efwes. 4:8-12; esekejenu Kuchinda 11:16, 17, 29.

Antu amavulu mukaayi kejima muyipompelu yawantu jaNzambi ahanini nyidimu yazatileñawu, ichi anakudikita nankashi mumudimu wa Yehova.

Manakwetu Marco wadiña nkoñi wendaña hadi yaaka 19 wahosheli nindi: “Iku kuhimpika kunanleñeli kukwasha amayala abula kwitiya asumbula ahela muchipompelu chetu.”

Manakwetu Geraldo wadiña mumudimu wakwenda hadi yaaka 28 wahosheli nindi: “Yuma yitwafuukulahu mwabombela kukwasha antu azeya nikulombola atudizi amavulu.” Washimwini nindi chayinu mpinji yena niñodindi anakulombola atudizi aBayibolu 15 nawa akwakushimwina amavulu azeya anatachiki kupompa.

Manakwetu Allan itwashimuna hakusambila washimwini nindi: “Chayinu mpinji tunakudikita nankashi mumudimu wakushimwina. Twashimwinaña kumaluña kudantu amavulu, kumaluña akulandishila nikushimwina antu itwashakamaña nawu nawa ayedi enzaña Kwitala daWanta nakupompa.”

Neyi mudi hakachi kanawa amanakwetu anenkiwu mudimu wacheñi hakachi kawantu jaNzambi, kudi nyidimu yikwawu yimwatela kukwashilamu. Munateli kukwashaku mudimu waYehova kuhitila mukuzatisha yuma yimwadiza kukwasha atwansi muchipompelu. Manakwetu Russell itwatena hakusambila wahosheli nindi: “Yehova nakudizisha nikuzatisha atwansi akweti chawaana. Amanakwetu atiyaña kuwaha muloña wakudikita kwawu mukutañisha nimumudimu wakubiña!” Talenu chikasha chinakwila nawu “ Kwashenuña Anyikwenzi Awamayala Azateña Hakumina Ñovu Yawu.”

Neyi mwatambwilili kuhimpika, twalekenuhu kwikala neyena. Munakwashi antu amavulu muloña wakudihana kwenu nawa twalekenuhu. Antu amavulu ayikeña nawa lekenu atwalekihu nakuyikeña.

Chuma chasweja kulema, munamuzañaleshi Yehova chikupu. Yena “hakavulamena mudimu wenu nikukeña kumwakeñeli ijina dindiku, nanochu chimwakalakeleli akwakujila ninochu chimunatwalekihu nakuyikalakela.” (Heb. 6:10) Iyi vasi yonenawu yinakutukolesha nawu wakatufweta nihanyidimu yitwamuzatilili kunyima. Mwalema chikupu kudi  Yehova nawa hamba kayivulamena hela kuvulamena nyidimu yimwamuzatilili kunyima nichimunatwalekihu kumutiyisha kuwahaku.

Indi neyi himudi hakachi kanawa amanakwetu itunahanjekihu atambwilili kuhimpikaku? Ilukenu nenu iyi nsañu yinayikundami ninenu. Munjilanyi?

Neyi mwekala namanakwetu washinshika alejeliwu kuhana nyidimu yazatileñayi, mwatela kutambwila wukwashu nikudiza yuma yayivulu yelukayi. Lombenuña wukwashi kudi yena. Mwihulenu chinakutoñojokayi. Nawa shinshikenuña chinakuzatayi nyidimu yindi chayinu mpinji nichinakuzatisha yuma yelukayi.

Hela chakwila mudi akulumpi analeki kuzata nyidimu yimwazatileña hela mudi manakwetu hela muhela anakukwashawu, mwatela kwiluka nenu Yehova walemesha kashinshi kawantu anamuzatili yaaka yayivulu nawa anakutwalekahu kumuzatila.