1. Antu jaNzambi amwekeshaña ñahi kukeña?

Antu jaNzambi mukaayi kejima hichisaka chakuspiritu chikweti kukeña. (1 Yow. 4:16, 21) Kukeña kwawu hiyakwimwekeshelaña muyuma yamaneni hohuku ilaña nimutuyuma twanyanya, chidi neyi kutoñojokelaku nikutiyila antu luwi. Neyi tuyitiyila antu amakwawu luwi nikuyitoñojokelaku, tukwikala “akwakwimbujola Nzambi, neyi anyana akeñayi.”—Efwe. 5:1.

2. Yesu wamwekesheli ñahi kukeña kwaNzambi?

² Yesu wamwimbujoleleña Tata yindi. Dichi Yesu wahosheli nindi: “Twayenu kudi ami, enu ejima munakukabakana, nukuyihizumwisha . . . , muloña ami nadikehesha nikudizoza mumuchima.” (Mat. 11:28, 29) Neyi tumwimbujola Yesu kuhitila “[mukutoñojokelaku] atuzweñi,” tukutambwila nkisu yafumaña kudi Tata yetu wekala mwiwulu nimuzañalu chikupu. (Mas. 41:1) Tushinshikenu  chitunateli kutoñojokelaku antu amakwawu, muchisaka, muchipompelu nimumudimu wakushimwina.

3. Amayala anateli kuyitiyilila ñahi añodi jawu nikutoñojokelaku? (Talenu mwevulu wakutachikilahu.)

³ Amayala atela kutoñojokelaku antu amuchisaka. (Efwes. 5:25; 6:4) Chakutalilahu, ayileja kushakama nawañodi jawu “nakuyiluka chiwahi chadiwu,” awa mazu anateli cheñi kuyibalumuna nawu “nakuyitoñojokelaku.” (1 Pet. 3:7; tth.) Mazu akwila nawu kwiluka nikutoñojokelaku endelaña hamu. Chakutalilahu, iyala watoñojokelañaku weluka nindi, ñodindi wamutelela, yena wambukaku chikupu munjila jajivulu, ilaña hatela kumumona neyi wamukunkulwayiku. (Kutach. 2:18) Dichi wamutoñojokelañaku kwesekeja nachatiyañayi, nikumulemesha. Mumbanda wumu wakuCanada wahosheli hadi nfumwindi nindi: “Hadiwulaña yitoñojoka yami hela kuhosha nindi: ‘Bayi wuhoshaña munoyu njilaku.’ Wantiyililaña chikupu. Neyi nakukeña kwolola yitoñojoka yami, wahoshaña naluwi.”

4. Iyala nateli kutoñojokelaku ñahi ñodindi neyi nakuhanjeka nawambanda amakwawu?

⁴ Iyala watoñojokelañaku, wamutoñojokelañaku chikupu ñodindi neyi nakuhanjeka nawambanda amakwawu. Hakenkamaña nawu hela kuyikeña munjila yatamaku. Cheñi nawa wamutoñojokelañaku hakuzatisha jinjila jakuhanjekelamu jahaIntaneti hela neyi nakuzatisha Intaneti. (Yoba 31:1) Wekala washinshika muyuma yejima muloña wamukeña ñodindi nawa wamukeña Nzambi nakuhela yatama.—Tañenu Masamu 19:14; 97:10.

5. Mumbanda nateli kutoñojokelaku ñahi nfumwindi?

⁵ Iyala neyi yembujolaña mutu windi Yesu Kristu, wukuletesha ñodindi niyena “kwikala nakalemesha” nayena. (Efwes. 5:22-25, 33) Neyi yamulemeshaña nfumwindi, wukumutoñojokelañaku, hadaha neyi wudi nanyidimu yayivulu yakuspiritu hela neyi wudi nakukala kwasweja. Iyala wakuBritain wahosheli nindi: “Mpinji yikwawu, ñodami wamweneña nindi kudi yuma yinakunkabisha. Dichi wadiña nakuzatisha chishina chekala haYishimu 20:5, hela chakwila wateleleli kuhembelela mpinji yayiwahi yinateleli kuhanjika nayena hayuma yinatoñojokeleña.”

6. Wejima wetu tunateli kukolesha ñahi anyana kutoñojokelañaku amakwawu, nawa chinateli kuyikwasha ñahi anyana?

⁶ Anvwali neyi aditoñojokelañaku wumu namukwawu, anyana niwena akuyimbujola. Anvwali akweti mudimu wakudizisha anyanawu chinateli kutoñojokelaku amakwawu. Chakutalilahu, anvwali anateli kudizisha anyanawu kubula kutemokaña Mwitala daWanta. Neyi adi hachawija, anvwali atela kuleja anyanawu kuhembelela akulumpi kutachikilahu kwimana mumusululu nakutambula yakuda. Hela chochu, antu ejima muchipompelu atela kuyikwashaku anvwali. Chakutalilahu, neyi mwana natwilili chuma chachiwahi, hadaha natushinkwiliku chiisu twatela kumuhameka. Neyi twila mwenimu anyana anateli kutiya kuwaha nawa akwiluka nawu “mukuhana mwekala muzañalu chikupu kubadika wekala mukutambwila.”—Yil. 20:35.

7. Yesu wamutoñojokeleliku ñahi iyala wajika matu, nawa chikumanyi chitunateli kudizila kuchakutalilahu chaYesu?

⁷ Mpinji yimu Yesu hadiñayi munkambi yaDekapoli, antu “amuleteleli iyala wajika matu wakabakeneña hakuhosha.” (Maku 7:31-35) Chatela yamuukili mwizaza, Yesu “wamutwalili owu iyala kwakankawindi” nawa wamuukili. Muloñadi? Wufwayi waniwu iyala wadi  kumuleñela kutiya nsonyi kumuukila mwizaza. Hadaha Yesu chelukiliyi chumichi, dichaletesheli yayi nakumuukila kumbadi. Hela chochu, hitunateli kuuka antu muchihayamishaku. Ilaña twatela kuyitoñojokelaku akwetu akwakudifukula chinakutiyawu. Kapostolu Pawulu wasonekeli nindi: “Tudakameneña wumu namukwawu kulonda tudisañumuni wumu namukwawu kumwekesha kukeña nikukoña nyidimu yayiwahi.” (Heb. 10:24) Yesu welukili chatiyileñayi iyala wajika matu nawa wamutoñojokeleliku. Watumwekesheleli chakutalilahu chachiwahi chikupu!

8, 9. Munjilanyi mutunateli kuyitoñojokelaku atushinakaji niayifwayi? (Shimunenu yakutalilahu.)

⁸ Yitoñojokelenuñaku atushinakaji niayifwayi. Chipompelu chawakwaKristu hiyachilukilaña kunyidimuku, ilaña achilukilaña kukukeña. (Yow. 13:34, 35) Iku kukeña kwatuleñelaña kuya nakukwasha amanakwetu akula dehi niayifwayi kulonda ayi kukupompa kwawakwaKristu nikuya nakushimwina. Twayikwashaña hela chakwila anateli kuzataku nyidimu yikwawu muñovu jawu. (Mat. 13:23) Michael wendelaña hakakinga kawayifwayi, wasakililaña chisaka chindi niamanawetu amwizanvu dindi dakushimwina chamukwashañawu. Wahosheli nindi: “Muloña wawukwashu wawu, natweshaña kuya kukupompa nikushimwina mpinji yejima. Sweje-e nakeña kushimwina kumaluña kwawanikaña antu amavulu.

⁹ Muyisaka yaBeteli yayivulu mwekala atushinakaji amavulu niayifwayi. Amanakwetu alombolaña ayakamenaña awa ambuña ashinshika kuhitila mukuyikwasha kusoneka nyikanda nikushimwina kuzatisha jifoni. Manakwetu Bill wudi nayaaka 86 wasonekaña nyikanda kudi antu ashakamaña kwakulehi natawuni, wahosheli nindi: “Twasakililaña hakutwinka kukooleka kwakusoneka nyikanda.” Muhela Nancy wudi nayaaka kwakwihi na 90, wahosheli nindi: “Hinamonaña kusoneka nyikanda nami hikuvulisha hohu maenvelopuku. Iwu himudimu wakushimwina. Antu atela kwiluka chalala!” Muhela Ethel wasemukili mu 1921, wahosheli nindi: “Nakatakataña nankashi. Mafuku amakwawu nakañenyeña nikuvwala.” Hela chochu, washimwinaña hafoni nawa wekalaña nakufuntila kwakuvulu. Muhela Barbara wudi nayaaka 85 wahosheli nindi: “Muloña wakukatakata nakañanyaña kushimwina mpinji yejima. Kushimwina hafoni kunankwashi chikupu kuhosha nawantu amakwawu. Namusakililaña Yehova!” Mutukweji twantesha hohu, izanvu dawamanakwetu akula dehi azatili maora 1,228 mumudimu wakushimwina, asonekeli nyikanda 6,265, ashimwinini antu kubadika ku 2,000 hafoni nawa ahanini nyikanda 6,315. Chakubula nikujina, Yehova wazañaleli chikupu hamudimu wazatiliwu!—Yish. 27:11.

10. Tunateli kukwasha ñahi amanakwetu niahela kulonda adiluñisheña kupompa kwawakwaKristu?

¹⁰ Toñojokelenuñaku antu hakupompa kwawakwaKristu. Tunakukeña amanakwetu adiluñisheña chikupu hakupompa. Neyi tuyitoñojokelañaku akudiluñishaña nankashi. Munjilanyi? Twatela kwila mwenimu neyi tushikaña nampinji kukupompa kulonda tubuleña kuyiluwañesha. Hela chochu, mpinji yikwawu tunateli kulaba muloña wayuma yamwekanaña. Ilaña neyi twalabaña mpinji yejima, twatela kuzatilahu kulonda tutoñojokeleñaku akwetu. Mwatela kwanukaña nenu wejima wetu atutambikaña kudi Yehova niMwanindi. (Mat. 18:20) Tukumwekesha netu twayilemesha neyi tushikaña nampinji kukupompa.

11. Muloñadi amanakwetu ahanaña jimpanji chatela kulondelawu kufumba kwekala ha 1 Akorinda 14:40?

¹¹ Kutoñojokelaku amanakwetu kwabombelamu cheñi kulondela nshimbi yakwila nawu:  “Yuma yejima yilenuña mukutelela nawa mukuloña.” (1 Kor. 14:40) Amanakwetu ahanaña jimpanji atela kulondelaña mpinji. Neyi abulaña kuda mpinji dikwila nawu anakutoñojokelaku akwawu adi najimpanji nichipompelu. Amanakwetu amakwawu ashakamaña kwakulehi. Amakwawu ashindamenaña hanyotoka yawantu amavulu. Amakwawu asumbuka nawantu abula kwitiya ayinkaña mpinji yakufunta hetala.

12. Muloñadi chitwatela “kuyitoñojokelaku chikupu mukukeña” aeluda? (Talenu chikasha chinakwila nawu “ Toñojokelenuñaku Antu Anakulombola.”)

¹² Atubiña akuspiritu azataña nañovu muchipompelu nikulombola mudimu wakushimwina, twatela kuyitoñojokelañaku. (Tañenu 1 Atesalonika 5:12, 13.) Chakadi nikujina, mwasakililaña nyidimu yayizatilañawu aeluda. Dichi, zatenu hakumina ñovu yenu kulonda muzatileña hamu nikuyikwasha. “Muloña wena anakuyihemba enu nawa akalumbulula kudi Nzambi.”—Heb. 13:7, 17.

13. Yumanyi yitunateli kudizila kudi Yesu chayakameneneñayi antu?

¹³ Isaya washimwineñahu dehi hadi Yesu nindi: “Iteti dachikeka hakadikotolaku, wanda wudi nakufwinda wishi hakawujimaku.” (Isa. 42:3) Yesu watiyilileña antu wushona muloña wayikeñeli. Welukili chatiyileñawu antu adiña neyi Iteti dachikeka hela wanda wudi nakufwinda wishi wunakukeña kujima. Chafuminimu, wadiña nakuyitoñojokelaku, kuyitiyila luwi nikudiwunjika. Niatwansi anyanya  enjileña kudi yena. (Maku 10:14) Hela chochu, hitukweti maana niwuswa wakutañisha neyi Yesuku. Ilaña tunateli kutoñojokelaku antu amwiluña detu dakushimwina. Mukutoñojokelaku antu munabombeli chitwahanjekaña nawu, mpinji yitwahanjekaña nawu nikuleha kwampinji yitwahanjekaña nawu.

14. Muloñadi chitwatela kwilukila chakuhosha nawantu?

¹⁴ Tunateli kuhosha ñahi nawantu? Makonu antu amavulu ‘ayikabishaña nikuyidiwula’ kudi akwakuselujola abula luwi, akwamapolitiki nianlomboli amunsakililu. (Mat. 9:36) Hamuloña wachumichi, antu amavulu hiyakweti chikuhwelelu nikuchiñejaku. Dichi mazu ninhoshelu yetu yatela kwikala yaluwi niwushona. Bayi neyi antu amavulu etejaña nsañu yetu muloña wakwiluka Bayibolu nichitwayilumbululañaku, ilaña muloña wakuyikeña nikuyitoñojokelaku.

15. Tunateli kuyitoñojokelaku ñahi antu itwashimwinaña?

¹⁵ Kudi njila jajivulu mutwatela kuyitoñojokelaku antu itwashimwinaña. Chakutalilahu, malwihu amawahi neyi tunakutañisha. Twatela kupeleshaku malwihu nikuyihula nakalemesha. Payiniya wumu washimwinineña mwiluña mwadiña antu adiña nakutiya nsonyi, walekeli kwihula malwihu anateli kuyitiyisha nsonyi. Dichi, mwabombeleli malwihu akañenyeñawu kwakula. Chakutalilahu, walekeli kwihula malwihu adi neyi, ‘Mweluka ijina daNzambi?’ hela, ‘Komana mweluka Wanta waNzambi?’ Ilaña wahosheleña mazu adi neyi, “Natañili muBayibolu nami Nzambi wukweti ijina. Niyilejiku idi ijina?” Hela chochu, yisemwa niantu jambuka, kwosi nshimbi jitwatela kulondela. Dichi mpinji yejima twatela kuyitoñojokelañaku nikuyilemesha antu, dikwila nawu twatela kuyiluka chiwahi antu itwashakamaña nawu.

16, 17. Tunateli kuyitoñojokelaku ñahi antu itwashimwinaña (a) kwesejeka nampinji yitwayendelaña hamatala awu? (b) kutalisha hakuleha kwampinji yitunateli kuhanjika namuntu?

¹⁶ Mpinjinyi yitwatela kwendela antu? Kwosi watutambikaña neyi tunakushimwina kwitala nikwitala. Dichi chachiwahi kuyaña hampinji yatelela yinateli kutiyawu antu kunsañu yetu. (Mat. 7:12) Chakutalilahu, komana mwiluña denu antu ahindukaña swayi wanyi kunsa yanyilungu? Neyi dichelañawu, mwatela kutachika kushimwina munyikwakwa, kumaluña kudi antu amavulu hela kuya nakufuntila kudi antu imuneluki nenu atela adi hohu.

¹⁷ Twatela kuhanjeka maora añahi? Antu amavulu ekala nanyidimu yayivulu, dichi neyi munakuhanjeka nawu katachi, mwatela kukeheshaku mazu. Bayi mushimbulaña neyi munakuhanjekaku. (1 Kor. 9:20-23) Neyi antu eluka nawu tunakuyakamena nakubula kuyidila mpinji, hadaha akukeñaña nawu tukafuntiku cheñi. Mwamweni, nyikabu yaspiritu yaNzambi twatela kuyimwekeshaña mumudimu wakushimwina. Neyi twila mwenimu, tukwikala “akwakukalakala hamu naNzambi,” nawa Yehova nateli kutuzatisha kudizisha antu chalala.—1 Kor. 3:6, 7, 9.

18. Nkiswinyi yitukatambwila neyi tutoñojokelañaku akwetu

¹⁸ Dichi mpinji yejima twatela kutoñojokelaku antu amakwawu, muchisaka, muchipompelu nimumudimu wakushimwina. Neyi twila mwenimu, tukutambwila nkisu jajivulu makonu nikumbidi. Masamu 41:1, 2, yahosha nawu: “Wayitoñojokaña atuzweñi [wudi namuzañalu,] Yehova wakamupulwisha mwifuku datama. . . . Wakamuhemba wamumi, wakakooleka munu mwituña.”