1. Yilwilu yakudikeña yekala mukaayi yinateli kutuleñela ñahi kubula kwikala adizoza?

Muloñadi chichakalilaña kuzatisha yuma yitwadizaña Mwizu daNzambi? Chuma chimu chidi chakwila nawu chakeñekaña kwikala adizoza hakwila nawu twili yuma yayiwahi neyi tudi mukweseka. Munanu “mafuku akukuminina,” tunakushakama nawantu “akwakudikeña awenawu, asweja kukeña mali, akwakudinka wanta, akwakuditohesha” nawa “abulaña kudiyuula.” (2 Tim. 3:1-3) Antu jaNzambi anateli kuhela yuma yakoñañawu antu atama ilaña hampinji yoyimu anateli kutiya ichima muloña wayuma yikwetiwu. (Mas. 37:1; 73:3) Tunateli kudihula netu: ‘Komana kudi chuma chikuletesha nitwamijiku yuma yinakukeñawu akwetu? Komana neyi ‘nidikehesha,’ antu akunlemeshaña wanyi? (Luka 9:48) Neyi twiteja yilwilu yakudikeña kutuluwañesha, yinateli kumanisha wubwambu wetu wutwadiluñishaña muchipompelu nawa antu akutwiluka wanyi nawu tudi akwaKristu. Neyi tudiza nsañu yahosha hadi antu ashimunawu muBayibolu adiña nayilwilu yayiwahi nikuyimbujola mwafumaña yuma yayiwahi.

2. Yumanyi yitunateli kudizila kudi ambuña aNzambi ashinshika akunyima?

 ² Neyi tunakukeña kwimbujola antu ashinshika, twatela kusandujola yuma yeliliwu niyuma yayiwahi yafuminimu. Ekalili ñahi amabwambu jaNzambi, amutiyishili ñahi kuwaha nawa ekalili ñahi nawuswa wakwila nkeñelu yindi? Neyi tusandujolaña nikwimbujola yuma yeliliwu chikuhwelelu chetu chikwikala chakola chikupu.

3, 4. (a) Twatambwilaña ñahi kufumba kwakuspiritu? (b) Tukuhosheladi netu yakuda yakuspiritu mwabombela yuma yayivulu?

³ Twatambwilaña kufumba kwakuwahi kuhitila muBayibolu, munyikanda yetu yawakwaKristu, webusayiti yetu, JW Broadcasting, kupompa kwachipompelu nikupompa kwamaneni. Ilaña kwesekeja namazu aYesu ekala haYowanu 4:34, yakuda yakuspiritu mwabombela yuma yayivulu. Yumanyi yabombelamu? Yesu wahosheli nindi: “Yakuda yami yowu kwila nkeñelu yanowu wantemesheli nikumanisha mudimu windi.”

⁴ Yakuda yaYesu yakuspiritu mwabombeleli kwila nkeñelu yaNzambi. Munjilanyi muyinekalili neyi yakuda? Nyijimba yetu neyi tunakuyidisha yakuda yayiwahi yawahaña, chikuhwelelu chetu nichena chakolaña nikukuhwelela muwumi wahaya nyaaka neyi twilaña nkeñelu yaNzambi. Komana kanda mutiyeñahu dehi kuzeya hampinji yimunakuya nakushimwina, ilaña hanyima yakufuma mumudimu wakushimwina mutiya muzañalu niñovu?

5. Yumanyi yafumañamu neyi twikala namaana?

⁵ Neyi tunakukeña kwikala namaana twatela kulondela nshimbi jaNzambi. (Mas. 107:43) Maana hichuma chalema nankashi. ‘Yuma yejima yiwakeña hiyesekana namaanaku. . . . Himutondu wawumi kudi antu akukwataku chikasa, antu ejima akakelañaku akekala namuzañalu.’ (Yish. 3:13-18) Yesu wahosheli nindi: “Neyi muneluki yumiyi himukuyila, munakooleki.” (Yow. 13:17) Yesu wayilejeli atumbanji nindi akwikala namuzañalu neyi atwalekahu kwila yuma yayilejeliyi. Dichi hiyakuminini dakutiya nsañu yatañishileñayi niyakutalilahu yindi nikuyizatisha hayoyina mpinjiku, ilaña atwalekelihu kuyizatisha muchihandilu chawu.

6. Muloñadi chitwatela kutwalekahu kuzatisha yuma yitwadizaña?

⁶ Makonu, twatela kutwalekahu kwila yuma yitweluka netu yalala. Chakutalilahu, mukwakuloñesha nateli kwikala nayikuñu yakuloñesha nachu yejima nikwiluka chakuzata mudimu. Ilaña neyi nakuzatisha wanyi yumiyi yikwikala yamukunkulwayi. Hela chakwila wadizili chakuloñesha nawa weluka, watela kutwalekahu kuzatisha yuma yadizayi hakwila yatwalekihu kwikala nloñeshi wakuluka yitembi. Munjila yoyimu, hadaha ninetu hakusambila twatiyili kuwaha muloña twazatishileña yuma yitwadizileña muBayibolu. Hela chochu, tunateli kwikala namuzañalu neyi tutwalekahu kulondela nshimbi jaYehova mafuku ejima.

7. Yumanyi yitwatela kwila hampinji yitunakudiza hadi antu ashinshika akunyima?

⁷ Tushinshikenu hakukala kwashiyashana kunateli kutuleñela kubula kwikala adizoza nawa tukuhanjeka hakukala kwokumu kunadifwani nakwamweneñawu antu ashinshika akunyima. Tunateli kwikala akola kuspiritu kuhitila mukutaña nikuzatisha nsañu yitunakutaña. Dichi toñojokenu chimunateli kuzatisha iyi yuma yejima nawa yizatishenu chakadi kulaba.

8, 9. Nsañu yekala haYilwilu 14:8-15 yamwekeshañadi hakudizoza kwaPawulu? (Talenu mwevulu wakutachikilahu.)

⁸ Nzambi “wakeñaña nindi antu ejima ayamwini nawa nindi ekali nakwiluka kwalala kwakwiluka chalala.” (1 Tim. 2:4) Mwayimonaña ñahi antu achidi kanda adizi chalala? Hela chakwila kapostolu Pawulu washimwinineña aYudeya amwilukili Nzambi musinagogi, ilaña halekeli kushimwina cheñi antu adifukwileña kudi anzambi akutwambaku. Kushimwina antu adifukwileña kudi anzambi akutwamba kwadi kumuleñela kubula kudizoza.

⁹ Chakutalilahu, Pawulu hadiñayi halwendu lwindi lwatachi lwawumishonali, antu amuLikoniya atachikili kuyitena aPawulu naBaranaba nawu anzambi jawu aZewusi naHeremisi. Komana aPawulu naBaranaba akeñeleña kuya mpuhu? Komana amweni neyi anakuyikolesha muloña wakwila afumini nakuyikabisha munyisumba yiyedi yendeleliwu? Komana atoñojokeli nawu chuma chamwekeni chikuyikwasha kushimwina nsañu yayiwahi? Inehi! Hohenohu ashikeneni kutabula yakuvwala yawu nawa alundumukilili mwizaza dawantu nakubidika nawu: “Enu antu, munakukoñeladi yuma yamuchidiwu? Ninetu tudi antu atiyaña neyi chimwatiyaña enu.”—Yil. 14:8-15.

10. Pawulu naBaranaba atalishili mudihi chahosheliwu nawu niwena adiña neyi antu amuLikoniya?

¹⁰ Chahosheliwu nawu ninetu tudi antu neyi enu, aPawulu naBaranaba atalishili mukwila nawu niwena hiyadiña awaninaku, bayi neyi atalishili mukwila nawu niwena adifukwileña kudi anzambi akutwambaku. Komana hiyadiña amishonali atondeliwu kudi Nzambiku? (Yil. 13:2) Komana ayiwayishili naspiritu yajila nawa adiña nakuchiñeja kwakuya mwiwulu wanyi? Hela chochu, aPawulu naBaranaba elukili nawu antu amuLikoniya niwena anateli kutambwila kukooleka kwokumu neyi eteja nsañu yayiwahi.

11. Tunateli kwimbujola ñahi kudizoza kwaPawulu hampinji yitunakushimwina?

¹¹ Tunateli kwimbujola ñahi kudizoza kwamwekesheliyi Pawulu? Chatachi, hitwatela kukeña netu antu atulemesheña hamuloña wayuma yitunazati muñovu jaYehovaku. Wejima wetu twatela kudihula netu: ‘Nayimonaña ñahi antu inashimwinaña? Komana nahela antu amakwawu neyi chayihelawu mwiluña detu?’ A Yinsahu jaYehova mukaayi kejima atwalekañahu kukeñakeña antu mumaluñawu akushimwina kulonda akwashi anakukeña kutiya nsañu yayiwahi. Mpinji yikwawu, chakeñekaña kudiza idimi nikwiluka chisemwa chawantu asekeshawu mwiluña. A Yinsahu ayaña nakushimwina kudi antu amuchidiwu, hiyadimonaña nawu abadikaku. Ilaña, akeñaña kwiluka muntu wejima kulonda amushiki hamuchima nansañu yaWanta.

12. Epafwarasa wamwekesheli ñahi nindi wayakameneneña antu amakwawu?

¹² Njila yikwawu yitwatela kumwekeshelamu netu tunakulondela nshimbi jaNzambi hikulombelaku “antu ejima adi nachikuhwelelu chalema neyi chetu.” (2 Pet. 1:1) Epafwarasa niyena dicheliliyi. MuBayibolu amutena kapampa kasatu hohu munsona yonenawu yasonekeliyi Pawulu. Hampinji yadiñayi mukaleya muRoma, Pawulu wayisonekeleli akwaKristu ashakamineña muKolosi nindi Epafwarasa “mpinji yejima [wadiña] nakudikita chikupu nakuyilombelaku [wena] mukulomba kwindi.” (Kol. 4:12) Epafwarasa wayilukili chiwahi amanakwetu  nawa wayakameneneña nankashi. Hela chakwila ‘amukasilili hamu naPawulu mukaleya’ halekeli kuyakamena akwawu kuspirituku. (Fwil. 23) Wakoñelihu chuma chimu. Komana chumichi chinakumwekesha wanyi nawu wadiña nakwakamena akwawu? Neyi tuyilombelañaku akwetu ambuña aYehova anateli kukola, sweje-e neyi tuyanukaña nikuyitena hamajina mukulomba.—2 Kor. 1:11; Yak. 5:16.

13. Munateli kumwimbujola ñahi Epafwarasa mukulomba kwenu?

¹³ Anukenuñahu antu imunateli kutena majinawu mukulomba. Kufwana Epafwarasa, amanakwetu niahela amavulu alombelañaku antu amakwawu muyipompelu yawu, yisaka yikweti nyidimu yayivulu niantu anakumona kukala kwasweja hela anakuhita mukweseka kweneni. Amavulu alombelañaku antu ashimunawu majina muyibaaba yaha jw.org yinakuhosha nawu “aYinsahu jaYehova akasawu Muloña Wachikuhwelelu Chawu.” (“Jehovah’s Witnesses Imprisoned for Their Faith.”) (Talenu hanasonekiwu nawu NEWSROOM > LEGAL DEVELOPMENTS.) Kubombelahu, twatela cheñi kwanuka antu afwisha antaña jawu, antu anapuluki muwubanji wadimwekenaña, anapuluki munjita niejima anakuhita mukukala kwamali. Mwamweni, tukweti amanakwetu niahela amavulu anakukeñeka kuyilombelaku. Neyi tulombelañaku antu amuchidiwu, tunakumwekesha netu hitwafwilaña yuma yatiyishaña kuwaha etu aweni hohuku, ilaña yatiyishaña niakwetu kuwaha. (Fwi. 2:4) Yehova watiyaña kulomba kwamuchidiwu.

14. Yehova watumwekeshela ñahi chitwatela kutiyilila antu?

¹⁴ Njila yikwawu yitwatela kumwekeshelamu netu twadizoza hikutiyilila antu. Yakoba 1:19 yahoshaña nawu ‘nyakalenu kutiya.’ Yehova yomweni wamwekesha chitwatela kutiyilila antu. (Kutach. 18:32; Yosh. 10:14) Shinshikenu yuma yitwatela kudizila kumazu ekala haKwidika 32:11-14. (Tañenu.) Hela chakwila Yehova wakeñeleña wanyi nindi Mosi yahoshihu, ilaña wamwitejeli kushimuna yuma yadiña kumuchima windi. Hinyi wunateli kutiyilila mpinji yayilehi kudi muntu wunakuluwañesha nawa nkumininaku azatisha nimazu anamulejiwu? Hela chochu, Yehova wadiwunjikaña nakutiyilila kudi antu alombaña nachikuhwelelu.

15. Tunateli kumwimbujola ñahi Yehova hakulemesha amakwawu?

¹⁵ Dichi twatela kudihula netu: ‘Neyi Yehova wukudizoza nakutiyilila antu adi neyi Abarahama, Racheli, Mosi, Yoshuwa, Manowa, Elija niHezekiya, kwila ninami nilemesha amanakwami, kutiyilila yuma yinakuhoshawu nikwila munahoshiwu nehi? Kudihu muntu muchipompelu hela muchisaka inatela kukwasha? Chumanyi chinatela kwila? Nawa nateli kwila ñahi mwenimu?’—Kutach. 30:6; Ansomp. 13:9; 1 Anya. 17:22; 2 Kushi. 30:20.

16. Mwanta Davidi welili ñahi chamuvulokeliwu kudi Shimeyi?

¹⁶ Kudizoza cheñi kwatukwashaña kudiyuula neyi anatuvuloki. (Efwe. 4:2) Tunateli kuwana chakutalilahu chachiwahi chakudizoza ha 2 Samweli 16:5-13. (Tañenu.) Davidi niantu jindi omikili chayitukiliwu kudi Shimeyi, ntaña yaMwanta Sawulu. Davidi womikili hela chakwila wadiña nañovu yakumanisha iku kukala. Chumanyi chamukwashili Davidi kudiyuula? Twadizaña chuma chamukwashili Davidi Mwisamu damuchisatu.

17. Chumanyi chamukwashili David kudiyuula, nawa tunateli kumwimbujola ñahi?

 ¹⁷ Mazu ekala heSamu damuchisatu amwekeshaña nawu ayisonekeli hampinji Davidi “hatemukiliyi mwanindi Abisalomi.” Vasi 1 ni 2 yashimuna nsañu yidi mukapetulu 16 kaSamweli wamuchiyedi. Masamu 3:4 yashimuna chikuhwelelu chamwekesheliyi Davidi, chahosheliyi nindi: “Nenda nimutambika Yehova nezu dami, hakwitiyila mumpidi yindi yajila.” Ninetu twatela kulomba neyi anatulukuki. Yehova nateli kutwinka spiritu yindi yajila, yinateli kutukwasha kuumika. Komana munateli kudiyuula hela kwanakena muntu neyi yayitiyisha kutama? Komana mwakuhwelela nenu Yehova nateli kumona yihuñu yenu nawa wukuyikwasha?

18. Yumanyi yayiwahi yinateli neyi tutwalekahu kuzatisha nshimbi yaNzambi?

¹⁸ Kwila yuma yitweluka netu yaloña mwafumaña yuma yayiwahi. Dichahoshela mukanda waYishimu 4:7 nawu “chuma chalema yowu maana.” Hela chakwila maana ashindamena hakwiluka, hiyashindamena hayuma yitwelukaku ilaña ashindamena hayuma yitwafuukulaña. Anzenkeneni niwena amwekeshaña maana. Anzenkeneni amwekeshaña maanawu kuhitila mukuloñeshela chadimu yakuda munoña. (Yish. 30:24, 25) Kristu, “maana aNzambi,” mpinji yejima welaña yuma yamuzañaleshaña Tata yindi. (1 Kor. 1:24; Yow. 8:29) Nzambi weluka chaambu chekala hakufuukula yuma yayiwahi nikuzatisha yuma yitunafuukuli. Nawa wakiswilaña antu ejima adizoza nawa atwalekañahu kuumika nakwila yuma yelukawu nawu yalala. (Tañenu Matewu 7:21-23.) Dichi, twalekenuhu kwikala adizoza kulonda muchipompelu mwikali kunuñañana. Kuzatisha yuma yitweluka netu diyalala, chakeñekaña mpinji nikudiwunjika, ilaña hakwila twikali namuzañalu chayinu mpinji nihaya nyaaka chiña twikala adizoza.