1. Chumanyi chalema chahosheliyi Yesu nawatumbanji twindi hawufuku wakukumishaku?

YESU wateneni izu dakukeña kwakwihi namapampa 30 hawufuku wakukumishaku hadiñayi nawatumbanji twindi. Washimwini nindi atumbanji twindi atela ‘kukeñañana.’ (Yow. 15:12, 17) Neyi adikeña wumu namukwawu dichinjikijilu chadi kuyilukilaku nawu hiyatumbanji twindi alala. (Yow. 13:34, 35) Iku hikukeña kwawunfwikijiku. Ilaña Yesu wadiña nakutena kukeña kwabadika kwakudihana etu aweni. Dichi wahosheli nindi: “Kwosi muntu wukweti kukeña kunabadiki iku kwakwila muntu yahani wumi windi kukoola amabwambu jindiku. Enu mudi amabwambu jami neyi mukoñaña yuma yinnakuyileja.”—Yow. 15:13, 14.

2. (a) Chumanyi chamwekeshañawu ambuña aNzambi? (b) Malwihwinyi itukwakula muchinu chibaaba?

² Kukeña kwakufuma hamuchima kwamwekeshañawu ambuña aYehova makonu dichinjikijilu chayilukilañaku nawu hiyantu jaNzambi. (1 Yow. 3:10, 11) Twatiyaña kuwaha muloña ambuña aYehova amwekeshaña kukeña kwamwekesheliyi Yesu hichidi namuloña netuña dawu, muchidi, idimi nichisemwa  chawuku. Tunateli kudihula netu: ‘Muloñadi chitwatela kumwekeshela kukeña makonu? Yehova niYesu atutuñaña ñahi mukukeña? Tunateli kumwekesha ñahi kukeña kwaKristu “kwatuñaña” hamuntu-hamuntu?’—1 Kor. 8:1.

3. Chumanyi chinakwilawu antu muyinu “mpinji yakala”?

³ Muloña wakwila chihandilu chamakonu “chakukabakana hohu nakumona ihuñu,” antu amavulu muyinu “mpinji jakala” anakumona kukala kwambokamboka. (Mas. 90:10; 2 Tim. 3:1-5) Antu amavulu atoñojokaña hohu jakudijaha. Kusandujola kumu kunakumwekesha nawu antu akubadika ha 800,000 anakudijaha hachaaka-hachaaka. Dikwila nawu hadi masekondi 40 muntu wumu chiña yadijahi. Chawushona, niakwaKristu amakwawu anadijahi.

4. Anyi ashimunawu muBayibolu akeñeleña nawu afwi?

⁴ Ambuña aNzambi ashinshika akunyima azeyeleña nakukala kwamweneñawu chakwila akeñeleña nawu adifwili tuhu kwawu. Chakutalilahu, Yoba wamweni yihuñu chikupu chakwila wahosheli nindi: “Wumi wami nakumini dakuwuhela, hinakeñi [kutwalekahu kuhandaku.]” (Yoba 7:16; 14:13) Yona waneñeli chelili yuma yihimpiki mumudimu wamwinkeliwu. Dichi wahosheli nindi: “Eyi Yehova, antambuli mwani wumi wami. Muloña chinawahi ami kufwa hohu, hichinawahi kuhandaku.” (Yona 4:3) Kaprofwetu washinshika Elija niyena waneñeli nakukala kwamweniyi chakwila wakeñeleña nindi yafwi. Wahosheli nindi: “Jinahu! Ichi dinu eyi Yehova fumishaku wumi wami muloña ami hinabadika ankakulula jamuku.” (1 Anya. 19:4) Hela chochu, Yehova wayikeñeli awa antu adihanini nawa hakeñeleña nindi afwiku. Chatela yayizuwili, ilaña wayikwashili kumanisha yitoñojoka yawu yakukeña nawu afwi nawa wayituñili mukukeña kwindi kulonda atwalekihu kumukalakela nakashinshi.

5. Muloñadi chitwatela kuyimwekeshela amanakwetu niahela kukeña sweje-e chayinu mpinji?

⁵ Hela chakwila amanakwetu niahela hiyakeñaña nawu afwiku, amavulu makonu ahitaña mukukala kwasweja, dichi akeñekaña kuyituña mukukeña. Amakwawu ayikabishaña nikuyiseha. Amakwawu niwena ayihosholaña nikuyifukejela kunyidimu. Hadaha azeyaña muloña wakuzata mpinji yeneni hela muloña wakufwila kumanisha nyidimu yinayinkiwu. Hela chochu amakwawu amonaña kukala kwasweja muyisaka yawu, hadaha ayikabishaña kudi enikwawu abula kwitiya. Muloña wayumiyi nikukala kukwawu, antu amavulu muchipompelu azeyaña muyitoñojoka nikumujimba. Hinyi wunateli kuyikolesha antu anazeyi?

6. Yehova wayituñaña ñahi antu jindi mukukeña?

⁶ Yehova wayituñaña akwakudifukula indi nakuyileja nindi wayikeña nankashi. A Isarela azañaleli chikupu hakutiya mazu aYehova akwila nawu: “Chiwasweja wuseya kumesu ami nichiwalema nichinakukeñi. . . . Bayi wutiyaña womaku muloña ami nidi neyi.” (Isa. 43:4, 5) Chineli mudi ambuña aYehova mwatela kwiluka nenu Yehova wayikeña chikupu nikuyilemesha. * Izu daNzambi dayikana antu akeña kudifukula kwalala nawu: “[Chineli] Hichilobu wemikaña mushindu. Wakakuzañalela eyi nakutiya kuwaha.”—Zef. 3:16, 17.

7. Munjilanyi mwamwekeshelañayi Yehova kukeña neyi kwamwekeshañayi mama yawantu wunakwamwisha? (Talenu mwevulu wakutachikilahu.)

 ⁷ Hela chakwila antu jindi akumona kukala kwamuchidinyi, Yehova wayishiika nindi wukuyikwashaña nikuyikolesha. “Mwakaamwa akayipakata mumbavu akayisha hamanuñu. Mwakundejañawu muntu kudi mama yindi dimu nakayikundejami.” (Isa. 66:12, 13) Mwana wanyanya wekala wakiñewa chikupu nawa watiyaña kuwaha neyi amweleka hela amulela hanyendu kudi mama yindi. Munjila yoyimu, Yehova niyena dichelañayi nawakwakudifukula indi alala. Mwatela kwiluka nenu Yehova wayilemesha nawa wayikeña nankashi.—Yere. 31:3.

8, 9. Kukeña kwaYesu kunateli kutukolesha ñahi?

⁸ Wunsahu wukwawu wunakumwekesha nawu Yehova wakeña akwaKristu alala, wudi wakwila nawu: Yena “wakeñeli nankashi kaayi chakwila watemesheli Mwanindi wumu hohu, kulonda muntu wejima wukumukuhwelela yakabuli kujilumuka, ilaña yakekali nawumi wahaya nyaaka.” (Yow. 3:16) Yesu niyena wamwekesheli kukeña hakuhana wumi windi kukoola etu. Iku kukeña kwatukoleshaña chikupu. Izu daNzambi datukana nawu “Lukadi” hela “yihuñu” “hijinateli kutwambula kukukeña kwaNzambi kwekala mudi Kristuku.”—Rom. 8:35, 38, 39.

⁹ Neyi tunakuhita mukukala kunakutuzeyesha muyitoñojoka hela kumujimba, kukeña kwatukeñayi Kristu kukutwinka ñovu yakuumika. (Tañenu 2 Akorinda 5:14, 15.) Kukeña kwaYesu kukweti ñovu yinateli kutukwasha kubula kuzeya hela chakwila tunakumona kweseka kudi neyi wubanji, ikabisha, chineñi hela kwakama.

10, 11. Anyi akweti mudimu wakutuña amanakwetu ananeñi? Lumbululenu.

¹⁰ Njila yimu mwatutuñilañayi Yehova mukukeña hikuhitila muchipompelu chawakwaKristu. Hamuntu-hamuntu, tunateli kumwekesha kukeña kwindi neyi tukeñaña nikutuña amanakwetu niahela kuspiritu nimuyitoñojoka. (1 Yow. 4:19-21) Kapostolu Pawulu wayikonkomweneni akwaKristu nindi: “Dikoleshenuña wumu namukwawu nikudituña wumu namukwawu neyi chimunakwila.” (1 Tesa. 5:11) Aeluda niantu ejima amuchipompelu atela kumwimbujola  Yehova niYesu hakukolesha nikutuña amanakwetu niahela muchipompelu.—Tañenu Aroma 15:1, 2.

¹¹ Antu amakwawu amuchipompelu anakukabakana nachineñi hela kusweja kwakama akeñekaña kuyitwala kuchipatela kulonda ayikwashi. (Luka 5:31) Aeluda niantu amakwawu amuchipompelu eluka nawu wena hiyayidizisha jakuchipatelaku. Ilaña wena niantu amuchipompelu akweti mudimu walema, ‘wakukundeja antu ananeñi, kukolesha azeya nikwikala mukuwunda nawantu ejima.’ (1 Tesa. 5:14) AkwaKristu ejima atela kumwekesha kukeña nikudiwunjika, kuhosha nakukundeja kulonda atuñi antu ananeñi. Komana mwakundejaña nikukolesha akwenu? Neyi twiluka chakuyikolesha nikuyikundeja akwetu, munateli kufuma yuma yayiwahi.

12. Shimunenu chakutalilahu chamuntu atuñiliwu kudi chipompelu.

¹² Kukeña kwetu kunateli kutuña ñahi antu anakukabakana nachineñi? Muhela mukwaKristu wakuEurope wahosheli nindi: “Mpinji yikwawu natoñojokeleña jakudijaha. Ilaña amanakwetu ankwashaña nankashi. Chipompelu munekala chinapulwishi wumi wami. Amanakwetu niahela ankoleshaña nawa ankeña nankashi. Hela chakwila antu antesha hohu diwu eluka nawu nakabakanaña nachineñi, chipompelu chankwashaña mpinji yejima. Adisumbula amu ekala anvwali jami kuspiritu. Añakamenaña chikupu mpinji yejima.” Mwamweni, bayi neyi antu ejima anateli kutukwasha munjila yoyimuku. Ilaña neyi tuyikwasha chakufuma hamuchima, antu anakukabakana nachineñi anateli kukola. *

13. Chumanyi chitwatela kwila neyi tunakukeña kutuña akwetu?

¹³ Ikalenu akwakutiyilila. (Yak. 1:19) Kutiyilila nawushona kwamwekeshaña kukeña. Mwatela kuyihula chiwahi malwihu anateli kuyikwasha kwiluka chinakutiyayi muntu wunakukabakana. Kuhiñahu, chikuyikwasha kumutiyila wushona nikumukwasha mukwenu mukwaKristu. Mwekeshenu hamesu nenu munaneñi. Neyi mukwenu mukwaKristu nakukeña kulumbulula nsañu yayivulu, diwunjikenu nakutiyilila nawa bayi mumukañeshaku. Neyi mudiwunjika nakumutiyilila nakanañachima, mukwiluka chinakutiyayi. Chumichi chinateli kumukwasha manakwenu hela muhela wunakukabakana kuyishindamena nawa anateli kuyitiyilila hampinji yimunakufwila kumutuña. Neyi muyakamenaña chikupu, anateli kukundejewa.

14. Muloñadi chitunakukeñela kubula kwikala akalisha?

¹⁴ Bayi mwikala akalishaku. Neyi twikala akalisha tukuletesha muntu wunaneñi kusweja kuneñelaku nawa hakutambwila wukwashu wetuku. “Muntu wahoshaña mazu akutuboka [wudi neyi] nakukutapola mpoku yakabali; ilaña madimi awakwamaana akoleshaña antu.” (Yish. 12:18) Kuhosha hohu chalala, hitwakeñaña “kutapola” muntu wunaneñi namazu akukatishaku. Hela chochu, chakataña chikupu kumuchima hela chakwila muntu ‘anamutapi’ chakubula kwiluka kudi muntu wunamutapi. Hakwila nawu tutuñi akwetu mukukeña nikuyikolesha, twatela kwikala nawushona nikuyitoñojokelaku.—Mat. 7:12.

15. Yitwanyi yitukweti yitunateli kuzatisha hakutuña akwetu mukukeña?

¹⁵ Kundejenu akwenu Nezu daNzambi. (Tañenu Aroma 15:4, 5.) Nsona yajila  yinateli kukolesha nikukundeja antu. Bayibolu yafuma kudi “Nzambi watwinkaña wuswa wakuumika nawa watukundejaña.” Kubombela haNsona jatukundejaña, tukweti cheñi yozelu yatukwashaña kudiza Bayibolu. Tunateli kuzatisha Watch Tower Publications Index niChitwa Chakukwasha aYinsahu jaYehova Hakusandujola Nsañu. Iyi yuma yinateli kutukwasha kuwana Nsona jinateli kutuña antu kulonda atweshi kuumika kukala kwejima. Yozelu yeniyi yinateli cheñi kutukwasha kuwana nsañu yitunateli kuzatisha hakukwasha antu anakumona kukala kwashiyashana.

16. Twatela kwikala nayilwilu yamuchidinyi neyi tunakukolesha mukwaKristu wunaneñi?

¹⁶ Ikalenu naluwi nawa amwovu. Iyi himbadi yakukeña kwakudihana kutwamwekeshaña neyi tunakukolesha nikutuña muntu. Yehova yomweni “wasweja luwi nawa hiNzambi wakukundeja kwejima,” cheñi wukweti “luwi” hadi ambuñindi. (Tañenu 2 Akorinda 1:3-6; Luka 1:78; Rom. 15:13) Pawulu wamwekesheli chumichi chasonekeliyi nindi: “Twadiña amwovu mukachi kenu neyi mama yawantu wunakwamusha chakamenañayi chiwahi anyanindi. Dichi, chineli twayikeñeli nankashi, hitwafwilileña hohu kuyileja enu nsañu yayiwahi yaNzambiku, ilaña twahanini nimawumi etu muloña twayikeñeli chikupu.” (1 Tesa. 2:7, 8) Neyi tumwekesha kwovwaha kwamwekeshañayi Nzambi, nateli kwakula kulomba kwamuntu wunaneñi kuhitila mudi etu.

17. Twatela kuyimona ñahi amanakwetu hakwila nawu tuyituñi mukukeña?

¹⁷ Bayi mumonaña nenu amanakwenu awaninaku. Yimonenuña amanakwenu niahela nenu hiyantu abula kuwanina. Chaluwa kutoñojoka nenu amanakwenu akwilaña hohu yuma yaloña. (Mukwa. 7:21, 22) Mwatela kwanuka nenu, Yehova weluka nindi ambuñindi awanina wanyi. Dichi neyi tumwimbujolaña chikutukwasha kudiwunjika nakudiwula yiluwa yawakwetu. (Efwes. 4:2, 32) Chatela twili yuma yikuletesha atoñojokeña nawu kwosi yuma yinakwilawu, twatela kuyihameka hayuma yayiwahi yinakwilawu. Chumichi chinateli kuyikolesha. Neyi tuyihamekaña chakufuma hamuchima tukuyituña mukukeña nawa chikuyikwasha kuzata mudimu wawu ‘namuzañalu.’ Chikuwaha nankashi neyi twila mwenimu kubadika kwesekeja nyidimu yawu nayawantu amakwawu.—Ñal. 6:4.

18. Muloñadi chitwatela kutuña akwetu mukukeña?

¹⁸ Nyikoku yaYehova yejima yalema kumesu indi nikumesu aYesu, wahanini ifutu danyiloña. (Ñal. 2:20) Twayikeña nankashi amanakwetu niahela. Nawa tunakukeña kuyakamena nikuyikeña chikupu. Hakwila nawu tuyikundejeña, “tufwileña yuma yaletaña kuwunda niyuma yatuleñelaña kudikolesha wumu namukwawu.” (Rom. 14:19) Tunakutalila mpinji yitwakekala muParadisa mukabula yuma yinateli kutuneñesha! Hikwakekala yikatu, majita, kufwa kutwaswana, kutukabisha, kukala kwamuchisaka nikuneñaku. Neyi Ikombakaji daYaaka daKuyuula kwaYesu dinamani dehi, antu ejima akekala awanina. Ejima akahita hakweseka kwakukumishaku, Yehova Nzambi wakayilisha kwikala anyanindi ahamaseki “nakwikala [asubuka] mukulema kwawanyana kaNzambi.” (Rom. 8:21) Tutwalekihu kumwekesha kukeña kwatuñaña nikudikwasha wumu namukwawu kulonda tukatambwili wumi muParadisa.