1, 2. (a) Kwambukaku nawantu akweti ñovu, Yehova wayilaña ñahi antu? (b) Tukuhanjekadi muchinu chibaaba?

KAKAVULU antu akweti ñovu “ekalaña nawuswa” hadi antu jawu nawa ayikabishaña. (Mat. 20:25; Mukwa. 8:9) Ilaña Yehova wambukaku chikupu! Hela chakwila Wañovu Jejima, watoñojokelañaku antu abula kuwanina. Wukweti luwi nawa watoñojokelañaku antu. Weluka chitwatiyaña nawa watiyililaña kuyuma yitwakeñaña. Chineli “waanukaña kwindi nindi hilunkuñu hohu kwalu,” hakeñaña nindi twileña yuma yabadika muñovu yetuku.—Mas. 103:13, 14.

² MuBayibolu mwekala yakutalilahu yayivulu yamwekeshaña Yehova chatoñojokeleleñaku ambuña indi. Tuhanjekenu hayakutalilahu yisatu. Chatachi, Nzambi chamutoñojokeleliku kansi Samweli nakumukwasha kushimuna mazu awunsompeshi kudi Kapristu Muneni Eli; chamuchiyedi, kudiwunjika kwamwekesheliyi Yehova hakaanineñayi Mosi kwikala nlomboli wawaIsarela; chamuchisatu,  Nzambi chayitoñojokeleliku aIsarela hakuyifumisha mwituña daEjipitu. Chitukuhanjekaña haniyi yakutalilahu, tushinshikenu chiyinakutudizisha hadi Yehova niyuma yitunateli kuzatisha muchihandilu.

3. Chumanyi chamumwekeneni kansi Samweli ifuku dimu nawufuku, nawa chumichi chinateli kutuleñela kwihula netudi? (Talenu mwevulu wakutachikilahu.)

³ Samweli watachikili ‘kumukalakela Yehova’ hatabanaka hachidiñayi kansi. (1 Sam. 3:1) Wufuku wumu henohu Samweli namanishi dehi kuzata nyidimu, kudi chuma chamwekeni. * (Tañenu 1 Samweli 3:2-10.) Watiyili izu dinakumutambika. Samweli watoñojokeli nindi Kapristu muneni Eli diyi wamutambikili, dichi wovwahilili nakuya lufuchi kudi Eli nakuhosha nindi: “Yamonu; wunantambiki.” Eli wahosheli nindi yami wanyi. Chumichi chamwekeni cheñi kapampa kayedi, Eli welukili nindi Nzambi diyi wadiña nakumutambika Samweli. Dichi wamulejeli iwu kansi chatela kwakulayi, nawa Samweli wovwahilili. Muloñadi Yehova chabuliliyi kudishimuna kudi Samweli hakusambila? Bayibolu hiyashimunaku, ilaña yuma yamwekeni yamwekesheli nawu chuma chalema chadiña chakwila nawu wamutoñojokeleliku kansi Samweli. Munjilanyi?

4, 5. (a) Samweli welili ñahi namudimu wamwinkeliwu kudi Nzambi, nawa yuma yendeli ñahi chikwachili? (b) Iyi nsañu yinakutudizishadi hadi Yehova?

⁴ Tañenu 1 Samweli 3:11-18. Nshimbi yaYehova yashimwini nawu atwansi atela kulemesha akulumpi, sweje-e anyuli. (Kwid. 22:28; Lev. 19:32) Komana Samweli wamwekesheli kuhamuka hakuya nakumuleja Eli mazu awunsompeshi waNzambi nantetemena? Inehi! Chakadi nikujina Bayibolu yashimuna nawu Samweli “watiyili woma wakumuleja Eli chimwenu chamweniyi.” Hela chochu, Nzambi wamwekesheli hatooka kudi Eli nindi wadiña nakumutambika Samweli. Dichi, Eli wamulejeli Samweli kushimuna yuma yamulejeliwu. Wamulejeli nindi: “Bayi [wunjindaku]; yuma yejima yahoshayi Yehova naneyi.”Samweli wovwahilili nawa “wamulejeli mwejima to-o.”

⁵ Eli wahayamini wanyi nanawa mazu amulejeliwu kudi Samweli, muloña esekeni namazu amulejeliwu kudi “muntu waNzambi” wenjili nakuhosha nakapristu muneni hakusambila. (1 Sam. 2:27-36) Nsañu yaSamweli yinakumwekesha hatooka nawu Yehova watoñojokelañaku nawa wukweti maana.

6. Yumanyi yitunateli kudizila kudi Nzambi chamukwashiliyi kansi Samweli?

⁶ Komana ninenu mudi atwansi? Neyi dimu, nsañu yakansi Samweli yinakumwekesha nawu Yehova weluka kukala kumwamonaña nichimwatiyaña. Hadaha mwekala nansonyi hela chayikalilaña kushimwina kudi akulumpi nsañu yaWanta hela kwikala ambukaku kudi akwenu. Ilukenu nenu Yehova nakukeña nindi yayikwasheña. Dichi mulombenuña chakufuma hamuchima. (Mas. 62:8) Toñojokenuña hayakutalilahu yekala muBayibolu chidi neyi chakansi Samweli. Hanjekenuña nawakwenu akwaKristu, atwansi hela akulumpi ashindili kukala kudi neyi kumunakumona. Anateli kuyileja chayikwashiliyi Yehova, hadaha niwena akuhweleleli wanyi.

7, 8. Yehova wamutoñojokeleliku ñahi Mosi?

⁷ Mosi chashikijiliyi yaaka 80, Yehova wamwinkeli mudimu wakala. Mosi amwinkeli mudimu wakufumisha aIsarela muwuduñu muEjipitu. (Kwid. 3:10) Chumichi chamukalilili Mosi muloña wadiña kabiña kuMidiyani hadi  yaaka 40. Dichi wahosheli nindi: “Ami yaminyi mwaka niyi kudi Fwaro nakufumisha anyana kaIsarela muEjipitu?” Ilaña Nzambi wamulejeli Mosi nindi: “Chalala ami nikwikala neyi.” (Kwid. 3:11, 12) Wamukanini cheñi nindi: Akulumpi amuIsarela “akatiya izu deyi.” Hela chochu, Mosi wakwili nindi: “Wena kwawu . . . hiyakatiya mwizu damuku.” (Kwid. 3: 18; 4:1) Mosi wadiña nakumutadikisha Nzambi. Ilaña Yehova wadiwunjikili. Kafwampi watwalekelihu kumukwasha. Wamwinkeli Mosi ñovu yakukoña yihayamisha. Nawa Mosi diyi muntu watachi ashimunawu kukoña yihayamisha.—Kwid. 4:2-9, 21.

⁸ Ilaña Mosi watwalekelihu kuleyaleya, nakuhosha nindi yena weluka wanyi kuhosha. Ilaña Nzambi wamwakwili nindi: “Ami nakekala nakanwa keyi, nakakuleja mwejima muwakahosha.” Komana Mosi wetejeli? Inehi mwani, muloña wamulejeli Yehova nindi yatemeshiku muntu wacheñi. Muloña wachumichi, Yehova wazuwili nankashi. Hela chochu, wamutoñojokeleliku. Hakwila yamutoñojokeliku Mosi nachatiyileñayi, Nzambi watondeli Aroni kwikala mukwakumuhoshelaku Mosi.—Kwid. 4:10-16.

9. Kudiwunjika kwaYehova nikutoñojokelaku kwamukwashili ñahi Mosi kuzata mudimu windi?

⁹ Iyi nsañu yinakutudizishadi hadi Yehova? Chineli diyi Wañovu Jejima, wadi kumuchinisha Mosi kulonda yamwovwahili. Ilaña Yehova wadiwunjikili nikumutiyila wushona, nawa watwalekelihu nakumuleja kambuñindi wadizoza nindi wukumukwasha. Komana iku kumutoñojokelaku kwazatikili? Kwazatikili. Mosi wekalili nlomboli wamuwahi wadiwunjikili nawakwawu nawa watoñojokeleleñaku akwawu neyi chamutoñojokeleliku kudi Yehova.—Kuch. 12:3.

10. Yumanyi yayiwahi yafumañamu neyi tutoñojokelañaku akwetu neyi chelañayi Yehova?

¹⁰ Yuma yitunateli kudizilaku: Komana  mwasumbula, mudi Anvwali, indi kwiji mudi aEluda muchipompelu? Neyi dimu, mukweti wuswa. Dichi mwatela kumwimbujola Yehova kuhitila mukutoñojokelaku, kwikala naluwi nawa adiwunjika nawantu imwakamenaña. (Kol. 3:19-21;1 Pet. 5:1-3) Neyi muzata nañovu nakumwimbujola Yehova niMosi Muneni, Yesu Kristu, mukwikala antu aswayi kusolomoka nawa mukukoleshaña akwenu. (Mat. 11:28, 29) Antu akwimbujolaña chakutalilahu chenu.—Heb. 13:7.

11, 12. Yehova welili ñahi hakwila nawu antu jindi ekali akiñewa nikubula woma hampinji yayifumishileñayi muEjipitu?

¹¹ A Isarela hiyafumineñawu muEjipitu mu 1513 B.C.E., atela abadikili ha 3 miliyoni. Haniwu mukanka hadiña mazanvu asatu hela awana, atwansi, akulumpi, akata hela ayifwayi. Chakeñekeleña nlomboli watoñojokelañaku nawa wakamenaña hakwila yafumishi awa antu amavulu muEjipitu. Yehova, wadimwekesheli kwikala nlomboli wamuchidiwu kuhitila mudi Mosi. Dichi aIsarela hiyatiyili kukala kushiya mukala wawu welukiliwuku.—Mas. 78:52, 53.

¹² Indi Yehova welili ñahi hakwila nawu antu jindi ekali akiñewa nikubula woma? Chuma chatachi, wayifumishili muEjipitu “nakwenda munyisululu.” (Kwid. 13:18) Iku kuloñesha kwayileñeleli aIsarela kwiluka nawu Yehova diyi wadiña nakuyilombola. Cheñi, Yehova “namwaana wayilombwelaña nevu, nawufuku wejima wayilombwelaña nachejeji chakesi.” (Mas. 78:14) Munjila yikwawu Yehova wayilejeleña nindi: “Bayi mutiya womaku. Ami nidi nanenu nikuyilombolaña nawa nikuyikiñaña.” Chalala akeñekeleña kuyikolesha muloña wachuma chenjileña nakumwekana.

13, 14. (a) Yehova wayitoñojokeleliku ñahi aIsarela haKaluñalwiji Kachinana? (b) Indi Yehova wamwekesheli ñahi ñovu yindi hadi aEjipitu?

¹³ Tañenu Kwidika 14:19-22. Fwikijenu mudi haniwu mukanka, anakuyikupisha kudi mashidika aFwaro nawa kumbidi kudi Kaluñalwiji Kachinana. Nzambi hakuyamwina. Chishimi chevu chifuma kuchadiña kumesu achilombu, nakuyijikilila aEjipitu nawa ekala nimumwidima. Ilaña chilombu chenu chikala muchejeji muchihayamisha. Dichi himukumona Mosi hakolola chikasa chindi hakaluñalwiji, nawa mpepela yeneni yakumusela hiyikupula njila hakaluñalwiji. Dichi enu, chisaka chenu niyimuna yenu himukuzambuka hakaluñalwiji homa niantu ejima chakadi kukabakana. Hohenohu, himukumona chuma chabulahu dehi kumwekana. Heseki dakaluñalwiji hihakuuma chawu, hosi hela malowa akuyikañesha kuzambuka chiwahi. Antu ejima niakwakwenda chovu hiyakuzambuka chiwahi.

¹⁴ Tañenu Kwidika 14:23, 26-30. Chakadi nikushimbula, Fwaro nimashidika indi hiyakwiñila mukachi kakaluñalwiji nakuyikupisha. Kuhiñahu, Mosi hakolola chikasa chindi hakaluñalwiji. Nawa, mbañu jiyedi jinadikwati hijikubuvuka. Kaluñalwiji kadibuta nikudibuta. Fwaro hamu nimashidika indi hiyakuyibutilamu nawa akañanya nimwakwilila.—Kwid. 15:8-10.

15. Iyi nsañu yinakuyidizishadi hadi Yehova?

¹⁵ Muyinu nsañu tunadizi netu Yehova hiNzambi wakuluwañesha wanyi, chilwilu chatukwashaña kwiluka netu twakiñewa. (1 Kor. 14:33) Cheñi Yehova hikabiña wamuwahi wahembaña antu indi munjila yayiwahi. Wayakamenaña, nikuyikiña kudi ayilumbu jawu. Chumichi chatukundejaña hampinji yitunakuswina kukukuma kwanshakaminu yamakonu.—Yish. 1:33.

16. Chikuhwelelu chetu chinateli kukola ñahi neyi twanuka Yehova chapulwishiliyi aIsarela?

 ¹⁶ Nimakonu, Yehova wakamenaña antu jindi kumujimba nikuspiritu neyi izanvu. Wukutwalekahu kwila mwenimu sampu mpinji yalukadi lweneni lunakwinza. (Chim. 7:9, 10) Dichi, hela hiyatwansi hela akulumpi, akola kumujimba hela ayifwayi, antu jaNzambi hiyakatiya woma hela kuzaala hampinji yalukadi lweneniku. * Dichi, akela chuma chambukaku. Akanuka awa mazu aYesu Kristu akwila nawu: “Mwakemani zululu-u nakubandula nyitu yenu kwiwulu, muloña wamwinu wenu wunakuswina kwakwihi.” (Luka 21:28) Akatwalekahu kwikala nanichi chikuhwelelu nihampinji yakayilukukawu kudi Gogi, kudibomba kwanyuza yikasweja ñovu kubadika Fwaro wakunyima. (Ezek. 38:2, 14-16) Muloñadi antu jaNzambi chiyakatwalekelawu kwikala nachikuhwelelu? Muloña eluka nawu Yehova hahimpañaku. Wakadimwekesha cheñi nindi wakamenaña nawa hiChamwinu watoñojokelañaku.—Isa. 26:3, 20.

17. (a)Yumanyi yayiwahi yinateli kufumamu neyi tudizaña nsañu yamwekeshaña Yehova chakamenañayi antu jindi? (b) Yumanyi yitukahanjeka muchibaaba chinalondelihu?

¹⁷ Yakutalilahu yitunadizi muchinu chibaaba yinakumwekesha nawu Yehova watoñojokelañaku, wukweti wushona, wakamenaña nawa wapulwishaña antu jindi. Chimukutoñojokaña haniyi nsañu, shinshikenu cheñi hayilwilu yikwawu yaYehova yinabuli kushimunawu. Neyi mutwalekahu kutoñojoka haniyi yilwilu, mukusweja kumukeña Yehova nawa chikuhwelelu chenu chikukola nankashi. Chibaaba chinalondelihu chikahosha jinjila mutunateli kumwimbujolela Yehova kuhitila mukutoñojokelaku amakwawu. Tukashinshika hachisaka, chipompelu chawakwaKristu nimudimu wakushimwina.