1. Twatiyaña ñahi neyi ntaña yetu anamuhañi muchipompelu?

MUDIHU nantaña yenu ahañawu muchipompelu? Ichi chuma chatukataña chikupu. Muhela Hilda wahosheli nindi: “Chafwiliyi nfumwami hanyima yakushakama hamu yaaka 41 muwulu, natoñojokeleña nami iku hikukala kwasweja kunamweni. * Ilaña chelili mwanami, ñodindi nianyanindi afumi muchipompelu, chaswejeli kunkata nankashi.”

2-3. Kwesekeja naMasamu 78:40, 41, Yehova watiyaña ñahi neyi kambuñindi yaleka kumukalakela?

² Toñojokenu chatiyiliyi Yehova chelili añelu amakwawu adiña muchisaka chindi amufutaleli. (Yuda 6) Nawa fwikijenu chatiyiliyi chelili anyanindi akeñeliyi aIsarela, adikañi mapampa kakavulu nayena. (Tañenu Masamu 78:40, 41.) Dichi mwatela kwiluka nenu Tata yetu wamwiwulu niyena waneñaña neyi muntu imwakeña yamushiya. Weluka chimwatiyaña. Wukutwalekahu kuyikolesha nikuyikwasha.

³ Muchinu chibaaba, tukuhanjeka Yehova chinateli kutukwashayi neyi ntaña yetu naleki kumukalakela. Nawa tukuhanjeka cheñi chitunateli kukolesha akwetu muchipompelu akweti antaña jawu analeki kumukalakela Yehova. Chatachi, tusambilenu kushinshika yitoñojoka yaluwa yitwatela kutondolwela.

4. Anvwali amavulu atiyaña ñahi neyi mwanawu yaleka kumukalakela Yehova?

⁴ Neyi mwana yaleka kumukalakela Yehova, anvwali atoñojokaña nawu chiña twamukwashili mwanetu nankashi hakwila yatwalekihu kumukalakela Yehova. Hanyima yakwila mwanawu anamuhañi, manakwetu Luke wahosheli nindi: “Nadinkeleña nyiloña ami aweni. Nakañenyeña nikukaama chiwahi. Mpinji yikwawu nadilileña nawa muchima wakatileña.” Muhela  Elizabeth, wamweni kukala kwokumu wadihwili nindi: “Chumanyi chinabulili kwila hakwila nimukwashi? Natoñojokeleña nami nakañenyi kumudizisha mwanami chalala.”

5. Hinyi wukweti muloña neyi muntu yaleka kumukalakela Yehova?

⁵ Twatela kwanuka netu Yehova watwinka wejima wetu wuswa wakufuukula. Chumichi chinatalishi mukwila nawu tunateli kutondahu kumwovwahila hela nehi. Atwansi amakwawu akulishiliwu kudi anvwali abulileña kumukalakela Yehova, afuukulahu kumukalakela Yehova nawa anatwalekihu kwikala ashinshika. Ilaña amakwawu akweti anvwali jawu ayidizishili kumukalakela Yehova, chiyakuliliwu aleka. Dichi wejima wetu, twatela kutondahu kumukalakela Yehova. (Yosh. 24:15) Dichi enu anvwali munaneñi muloña anyanenu analeki kumukalakela Yehova, bayi mutoñojoka nenu yenu munaleteshiku!

6. Chumanyi chinateli kuyimwekena atwansi neyi nvwali yawu yaleka kumukalakela Nzambi?

⁶ Mpinji yikwawu, nvwali nateli kuleka kumukalakela Yehova hela kushiya chisaka chindi. (Mas. 27:10) Chumichi chaneñeshaña nankashi anyana alemesha anvwali jawu nawa atiyileña kuwaha nachazatileñawu. Muhela Esther, wukweti atata yindi ahañiliwu muchipompelu wahosheli nindi: “Kakavulu nadilileña muloña nelukili nami hiyanakufuma hohu muchalalaku. Ilaña afuukwilihu cheñi nawu analeki kumukalakela Yehova. Nayikeña atata, chayihañiliwu muchipompelu, nadakameneni chikuhandañawu. Muchima wakatileña.”

7. Indi Yehova watiyaña ñahi nawatwansi akweti nvwali yawu wunahañiwu?

⁷ Enu atwansi, neyi nvwali yenu amuhaña muchipompelu, ninetu twaneñaña! Mwani ilukenu nenu Yehova niyena neluki chimunakutiya. Wayikeña nawa watiyaña kuwaha chimwekala ashinshika, ninetu nawamanakwenu niahela twayikeña. Anukenu cheñi nenu, yenu munaleteshi wanyi anvwali jenu afuukulihu kumushiya Yehova. Neyi chitwashimuna hakusambila, Yehova wamwinka muntu wudi wejima wuswa wakufuukulahu. Nawa muntu wejima wadihana nawa wapapatishewa “wakadisendela chiteli chamudimu windi.”—Ñal. 6:5, tth.

8. Yumanyi yatela kwila antu amuchisaka hampinji yinakuhembelelawu ntaña yawu kufunta kudi Yehova? (Talenu cheñi chikasha chinakwila nawu “ Funtenu Kudi Yehova.”)

⁸ Neyi muntu imwakeña yamushiya Yehova, mwatela kwanukaña nenu ifuku dimu wukafunta kudi Yena. Chumanyi chimwatela kwila chayinu mpinji? Zatenuña nañovu kulonda mukolesheña chikuhwelelu chenu. Neyi mwilaña mwenimu, mukukwashaku antu amakwawu amuchisaka nawa hadaha nimuntu wunahañiwu muchipompelu. Chumichi chikuyikwasha kuumika chineñi. Ichi tuhanjekenu hayuma yimwatela kwila kulonda mukoleshi chikuhwelelu chenu.

9. Yumanyi yimwatela kwila hakwila mutwalekihu kukolesha chikuhwelelu chenu? (Talenu cheñi chikasha chinakwila nawu “ Nsona Jinateli Kuyikundeja Neyi Ntaña Yenu Namushiyi Yehova.”)

⁹ Zatenuña nañovu kulonda mutwalekihu kukolesha chikuhwelelu chenu. Chalema  nankashi kukolesha chikuhwelelu chenu enu aweni nikukolesha antu adi muchisaka chenu. Munateli kwila ñahi mwenimu? Ilenu Yehova yayikwashi kuhitila mukutaña Izu daNzambi nikutoñojokahu kushilahu nikuya kukupompa kwawakwaKristu. Muhela Joanna, wukweti atata yindi nimuhelindi afuma muchalala wahosheli nindi: “Muchima wawundaña neyi nitaña nsañu yawantu ashimunawu muBayibolu adi neyi Abigayili, Esita, Yoba, Yosefu niYesu. Nsañu yawu yankoleshaña nawa yankwashaña kuwundisha muchima. Cheñi tumina twadimena twankoleshaña.”

10. Masamu 32:6-8 yinateli kutukwasha ñahi kuumika chineñi?

¹⁰ Mulejenumu Yehova yuma yejima yinakuyakamisha. Neyi munaneñi, bayi muleka kulombaku. Twalekenuhu kumulomba Nzambi kulonda yayikwashi mumoneña yuma neyi chayimonañayi nawa ‘yayileji maana ninjila yimwatela kwenda.’ (Tañenu Masamu 32:6-8.) Hela chochu, chinateli kuyikalila kumulejamu Yehova chimunakutiya. Ilaña Yehova welukaña chimwatiyaña. Wayikeña nankashi nawa nakukeña nindi mumulombeña.—Kwid. 34:6; Mas. 62:7, 8.

11. Kwesekeja naAHeberu 12:11, muloñadi chitwatela kulemeshela njila yababeshelañamu Yehova? (Talenu cheñi chikasha chinakwila nawu “ Kuhaña Muntu Muchipompelu hiNjila Mwamwekeshelañayi Yehova Nindi Watukeña.”)

¹¹ Itejenu munafuukuliwu akulumpi. Kuhaña muntu muchipompelu hintanjikilu yashaku Yehova. Nawa hinjila yayiwahi yinateli kukwasha muntu wunaleki kumukalakela Yehova niantu ejima. (Tañenu AHeberu 12:11.) Amakwawu anateli kuhosha nawu akulumpi afuukula chiwahi wanyi hakumuhaña muntu. Ilaña mwatela kwanuka nenu, antu amuchidiwu hiyakeñaña kushimuna yuma yatama yakoñayi owu muntu wunavulumuniku. Tuneluki wanyi wunsahu walala wejima. Dichi mwatela kwiluka nenu akulumpi asompeli owu  muloña, azatili nañovu kulondela yishina yamuBayibolu nawa adiña “nakumusompelaku Yehova.”—2 Kushi. 19:6.

12. Yumanyi yayiwahi yinafumimu muloña wakwila antu amakwawu alondeleli ntanjikilu yaYehova yakubabeshelamu?

¹² Neyi mwitejaña munafuukuliwu akulumpi, kuhaña ntaña yenu muchipompelu munateli kumukwasha kufunta kudi Yehova. Muhela Elizabeth itwashimunahu hakusambila wahosheli nindi: “Chineli twahanjekeleña wanyi namwanetu weyala, chatukalilili. Ilaña chelili nafunti dehi kudi Yehova, wahosheli nindi chawahili chamuhañiliwu. Chimwahitili mpinji, wahosheli nindi wadizililiku yuma yayivulu. Nenjili nakwiluka nami, njila yababeshelañamu Yehova yayiwahi.” Nfumwindi Mark niyena wabombelelihu nindi: “Chimwahitili mpinji, mwanetu wanlejeli nindi inakukeña kufunta muloña twovwahilili nshimbi. Nidi namuzañalu muloña Yehova watukwashili kwikala ovwahila.”

13. Chumanyi chinateli kuyikwasha kubula kusweja kuneña?

¹³ Hanjekenuña nawamabwambu aneluki chimunakutiya. Nawa hanjekenuña nawakwaKristu apama anateli kuyikwasha kulonda mubuli kuzeya. (Yish. 12:25; 17:17) Muhela Joanna itwashimunahu hakusambila wahosheli nindi: “Naneñeleña chikupu. Ilaña kuhanjeka nawamabwambu inakuhwelela kwankwashili nankashi.” Munateli kwila ñahi neyi antu amakwawu muchipompeli ahosha yuma yikuyiletesha enu muneñi nankashi?

14. Muloñadi chitwatela “[kuditiyilila] wumu namukwawu nikudanakena wumu namukwawu chakufuma kumuchima”?

¹⁴ Ikalenu adiwunjika nawamanakwenu niahela. Hitwatela kukuhwelela antu ejima kuhosha yuma yayiwahiku. (Yak. 3:2) Twawanina wanyi, dichi bayi muhayama neyi muntu wakañanyaña kwiluka yuma yayiwahi yatela kuhoshayi hela neyi yahosha mazu anateli kuyineñeshaku. Anukenuña kufumba kwakapostolu Pawulu kwahosheliyi nindi: “Ditiyililenuña wumu namukwawu nikudanakena wumu namukwawu chakufuma kumuchima hela chakwila kudi muntu wudi namuloña namukwawu.” (Kol. 3:13) Muhela wadiña nantaña yindi ahañiliwu wahosheli nindi: “Yehova nankwashi kuyanakena amanakwetu esekaña kunkolesha ilaña aneñesha muloña wakubula kuwanina.” Chipompelu chinateli kwila ñahi kulonda chikwashi antu amuchisaka ashinshika?

15. Chumanyi chinateli kukwasha yisaka yikweti ntaña yawu ahañawu muchipompelu?

¹⁵ Yitiyilenuña luwi antu ashinshika amuchisaka nawa ikalenuña amabwambu jawu. Muhela Miriam wahosheli nindi wakeñeleña wanyi kuya nakupompa chelili manakwindi amuhañi muchipompelu. “Nadakameneneña hayuma yikuhoshañawu antu. Ilaña kwadiña amanakwetu niahela amavulu aneñeli niwena nachuma chamwekeni nawa hiyahoshelihu chuma chatama hadi manakwamiku. Nayisakililaña muloña hinadiña nkawamiku.”  Muhela mukwawu wahosheli nindi: “Chelili mwanetu amuhañi amabwambu jetu enjileña nakutukundeja. Amakwawu atulejeli nawu tuneluki wanyi chitwatela kuhosha. Amakwawu twadilili hamu nawa amakwawu ansonekeleli mukanda wakunkolesha. Yuma yeliliwu yankwashili chikupu!”

16. Chipompelu chinateli kutwalekahu ñahi kukundeja nikukwasha antu akweti ntaña yawu wunahañiwu?

¹⁶ Twalekenuhu kukwasha antu amuchisaka ashinshika. Sweje-e dinu chayinu mpinji, anakukeña nawu muyikeñi nikuyikolesha chikupu. (Heb. 10:24, 25) Mpinji yikwawu, chisaka chikweti ntaña yawu anahañiwu muchipompelu, chatiyaña neyi ayikeña wanyi kudi antu amuchipompelu. Bayi mwiteja chuma chamuchidiwu kumwekanaku! Sweje-e dinu atwansi akweti anvwali jawu anafumi muchalala, akeñaña kuyihameka nikuyikolesha. Muhela Maria, wukweti nfumwindi ahañiliwu muchipompelu nawa washili chisaka wahosheli nindi: “Amabwambu jetu amakwawu enjili kwitala detu, atelekeli yakuda nawa twadizilili hamu kudifukula kwachisaka. Aneñeli nawa twadilili nawu hamu. Anhosheleleñaku neyi antu anakuhosha nsañu yakutwamba hadi ami. Ankolesheli chikupu!”—Rom. 12:13, 15.

17. Akulumpi anateli kukundeja ñahi antu ananeñi?

¹⁷ Akulumpi, zatenuña nañovu kulonda mukolesheña yisaka mudi antu ashinshika. Mudi namudimu weneni nankashi wakukundeja akwenu akwakudifukula akweti antaña jawu analeki kumukalakela Yehova. (1 Tes. 5:14) Yikoleshenuña henohu kupompa kanda kutachiki nihanyima yakupompa. Yendelenuña kumatala awu nawa yilombelenuñaku. Yenuña nakushimwina hamu nawa mpinji yikwawu yitambikenuñaku kukudifukula kwachisaka. Akulumpi atela kuyakamenaña antu ananeñi, kuyitiyila wushona nikuyimwekeshela kukeña.—1 Tes. 2:7, 8.

18. Kwesekeja na 2 Petulu 3:9, Nzambi wakeñaña nindi antu alekaña kumukalakela elidi?

¹⁸ Yehova “hakeñaña muntu hela wumu akamujilumuniku, ilaña wakeñaña nindi antu ejima ekali nakukooleka kwakubalumuka munyichima.”  (Tañenu 2 Petulu 3:9.) Hela chakwila muntu wukukoña nshidi yamuchidinyi, wumi windi walema kudi Nzambi. Toñojokenu hawuseya wahaniniyi Yehova, ifutu danyiloña daMwanindi akeñayi kukola nshidi jetu. Muloña wakukeña, Yehova wesekaña kuyikwasha awa antu kulonda afunti kudi yena. Wakuhwelelaña nindi akufunta kudi yena, neyi chashimunawu muchakutalilahu chaYesu chamwana wajimbeli. (Luka 15:11-32) Antu amavulu afumini muchalala afunta cheñi kudi Tata yawu wamwiwulu. Nawa amanakwetu niahela atiyili kuwaha kuyitambwila. Muhela Elizabeth, itwashimuna hakusambila, wazañaleli nankashi chelili mwanindi amufuntishi muchipompelu. Neyi yanuka chuma chamwekeni wahoshaña nindi, “Nayisakililaña nankashi antu ankolesheli kulonda nitwalekihu chakadi kuzeya.”

19. Muloñadi chitwatela kutwalekelahu kumukuhwelela Yehova?

¹⁹ Twatela kumukuhwelela Yehova mpinji yejima. Yuma yatulejañayi yatukwashaña mpinji yejima. HiTata wahanaña nawa wukweti wushona wayikeña antu ejima adifukulaña kudi yena. Ilukenu chikupu nenu Yehova hakayishiya mumpinji yayihuñuku. (Heb. 13:5, 6) Manakwetu Mark itwashimunahu hakusambila wahosheli nindi: “Yehova hatushiliku. Hekalaña kwakulehi nanetu neyi tunakumona kukalaku.” Yehova wukutwalekahu kunyika “ñovu yabadika hañovu jawantu.” (2 Kor. 4:7) Mwamweni, munateli kutwalekahu kwikala ashinshika nikukuhwelela nenu ntaña yenu wunaleki kumukalakela Yehova wukafunta.