1. Antu ashinshika anateli kumutena Yehova nawudi?

MUCHISAKA chawakwakudifukula aYehova, munabombeli Yesu, “wedi wayileñaleña yejima” nimazaza awañelu. (Kol. 1:15; Mas. 103:20) Hampinji yadiñayi Yesu hanu hamaseki, wakwashili antu ashinshika kwiluka nawu anateli kumutena Yehova nawu Tata. Hahosheleñayi nawatumbanji twindi, Yesu wamuteneni Yehova nindi: “Tata yami nawa Tata yenu.” (Yow. 20:17) Nawa chitwadihanini kudi Yehova nikupapatishewa, twekalili muchisaka mudi amanakwetu niahela.—Maku 10:29, 30.

2. Tukuhanjekadi muchinu chibaaba?

² Antu amakwawu chayikalilaña kumumona Yehova nawu hiTata wukweti kukeña. Amakwawu hiyanateli kwiluka chakuyimwekeshela amanakwawu nihela kukeñaku. Muchinu chibaaba, tukuhanjeka Yesu chatukwashañayi kumumona Yehova netu hiTata yetu wukweti kukeña, muntu itwatela kuswina kwakwihi nayena. Tukumona cheñi njila mutunateli kumwimbujolila Yehova kwesekeja nachitwadikundaña nawamanakwetu niahela.

3. Indi kulomba kwachitalilu kwatuleteshaña ñahi kuswina kwakwihi naYehova?

³ Yehova hiTata wukweti kukeña. Yesu wakeñaña nindi tumumoneña Yehova neyi chamumonañayi, netu wukweti luwi nawa hinvwali wukweti kukeña nawa tunateli kuhanjeka nindi mpinji yidi yejima, bayi neyi muntu wabula luwi nawa wakeñaña hohu kutuleja jakwilaku. Twamonaña chumichi munjila mwayilejeleliyi Yesu atumbanji twindi chakulomba. Watachikili kulomba kwachitalilu namazu akwila nawu: “Tata yetu.” (Mat. 6:9) Yesu wadi kutuleja nindi mutenenuña Yehova nenu “Mukwañovu jejima,” “Nleñi,” hela “Mwanta wahaya  nyaaka” iyi nkumbu yejima yatelela muloña yamuNsona. (Kutach. 49:25; Isa. 40:28; 1 Tim. 1:17) Ilaña, Yesu watulejeli kumutena Yehova netu “Tata.”

4. Tuneluki ñahi netu Yehova nakukeña kuswina kwakwihi nanetu?

⁴ Komana chayikalilaña kumumona Yehova nenu hiTata wukweti kukeña? Etu amakwawu chatukalilaña. Neyi atata jetu atukulishileña adiña atukeña wanyi chinateli kutukalila. Twakundejewaña muloña tweluka netu Yehova weluka chitwatiyaña nichaleteshaña tutiyeña chenochu! Wakeñaña kuswina kwakwihi nanetu. Dihafuma Izu dindi kutuleja nawu: “Swinenu kwakwihi naNzambi, niyena wukuswina kwakwihi nanenu.” (Yak. 4:8) Yehova watukeña nawa watulejaña nindi yena nateli kwikala Tata yetu wamuwahi chikupu.

5. Kwesekeja naLuka 10:22, Yesu nateli kutukwasha ñahi kuswina kwakwihi naYehova?

⁵ Yesu nateli kutukwasha kuswina kwakwihi naYehova. Yesu wamwiluka Yehova chiwahi nawa wembujolaña yilwilu yindi, dihafumini kuhosha nindi: “Muntu wejima wunamoni ami, dikwila nawu namoni niTata.” (Yow. 14:9) Kufwana yayetu, Yesu watudizishaña chitunateli kumulemesha nikumwovwahila Tata yetu, kubula kumuneñesha nichitunateli kumutiyisha kuwaha. Sweje-e chihandilu chaYesu chahamaseki chatukwashaña kwiluka chekalayi Yehova naluwi nikukeña. (Tañenu Luka 10:22.) Tuhanjekenu hayakutalilahu.

6. Hanenu yakutalilahu yinakumwekesha Yehova chamutiyililiyi Yesu.

⁶ Yehova wayitiyililaña anyanindi. Talenu Yehova chamutiyililiyi Mwanindi wawedi. Yehova watiyilili kulomba kwakuvulu kwalombeliyi Mwanindi hampinji yadiñayi hanu hamaseki. (Luka 5:16) Watiyilili kulomba kwaYesu hampinji yafuukwileñayi chuma chalema, chidi neyi hakutonda apostolu 12. (Luka 6:12, 13) Yehova watiyili cheñi kulomba kwaYesu hampinji yakameneniyi nankashi. Henohu kanda amufukejeli, Yesu walombeli kudi Tata yindi hayuma yenjili  nakumumwekena. Yehova hakuminini dakutiya kulomba kwaYesuku, ilaña watemesheli cheñi kañelu kulonda yamukoleshi Mwanindi wakeñayi.—Luka 22:41-44.

7. Twatiyaña ñahi hakwiluka netu Yehova watiyaña kulomba kwetu?

⁷ Nimakonu, Yehova natwalekihu kutiyilila kulomba kwawambuñindi, nawa wakulaña hampinji yatelela nawa munjila yayiwahi. (Mas. 116:1, 2) Talenu muhela wakuIndia chamweniyi Yehova chakwiliyi kulomba kwindi. Wakameneneña chikupu, nawa wamulombeli Yehova kulonda yamukwashi naniku kukala kwadiñayi naku. Wasonekeli nindi: “JW Broadcasting^® yaMay 2019 yahosheleña hachitunateli kwila neyi tunakwakama yankwashili. Yehova wakwili kulomba kwami.”

8. Yehova wamwekesheli ñahi nindi wamukeña Yesu?

⁸ Yehova watukeña nawa watwakamenaña neyi chochamukeñeliyi Yesu nikumwakamena hampinji yakalakeleñayi mudimu windi wahanu hamaseki. (Yow. 5:20) Wamukwashileña Yesu kutwalekahu kwikala nachikuhwelelu chakola, wamukwashileña neyi naneñi, nawa wamwinkeleña yuma yakumujimba. Nawa Yehova wamulejeleña Mwanindi nindi wamukeña nawa wamutiyileña kuwaha. (Mat. 3:16, 17) Muloña wakwila Yesu welukili nindi wadiña naTata yindi wamwiwulu nawa wakumukwasha muyuma yejima, hadakameneneñaku.—Yow. 8:16.

9. Tuneluki ñahi netu Yehova watukeña?

⁹ Kufwana Yesu, wejima wetu tunamoni Yehova chatukwashañayi munjila jamboka-mboka. Toñojokenu hachumichi: Yehova watwiteja kwikala amabwambu jindi nawa watwinka amanakwetu niahela atuzañaleshaña nawa atukoleshaña neyi tunaneñi. (Yow. 6:44) Yehova watwinkaña yuma yejima yitwakeñaña kulonda tukoleshi chikuhwelelu chetu. Nawa watukwashaña cheñi nayuma yakumujimba. (Mat. 6:31, 32) Neyi tutoñojoka hachatukeñayi Yehova, tukumukeña nankashi.

10. Chumanyi chitunateli kudizila kudi Yehova chelañayi nawamanakwetu niahela?

¹⁰ Yehova wayikeña amanakwetu niahela. Ilaña chapela wanyi kuyikeña nikuyimwekeshela kukeña mpinji yejima. Mpinji yikwawu chatukalilaña muloña twafuma kuyisemwa yambuka ninkulilu yashiyashana. Wejima wetu twaluwañeshaña nawa tunateli kuyineñesha hela kuyihilisha. Hela chochu, tunateli kuzata nañovu kulonda tuyikeñi awa amanakwetu niahela. Munjilanyi? Twatela kumwimbujolaña Tata yetu kuhitila mukumwekesha kukeña kudi amanakwetu niahela. (Efwe. 5:1, 2; 1 Yow. 4:19) Tutalenu yuma yitunateli kudizila kuchuma cheliliyi Yehova.

11. Indi Yesu wamwekesheleña ñahi “luwi” lukwetiyi Yehova?

¹¹ Yehova wamwekeshaña “luwi.” (Luka 1:78) Muntu waluwi wakamenaña neyi yamona muntu nakukabakana nawa wamonaña njila munateli kumukwashilayi nikumukundeja. Yesu chahandileñayi nawantu, wamwekesheleña Yehova chayakamenañayi. (Yow. 5:19) Chamweniyi mazaza awantu Yesu “wayitiyilili wushona, muloña ayikabishileña nikuyidiwula neyi anyikoku akadi kabiña.” (Mat. 9:36) Yesu wakuminineña dakuyimwekeshela hohu kukeñaku ilaña wayikwashileña. Wokileña antu akata nawa wadiña nakuyihizumwisha ‘antu ejima akabakeneña nawa asendeli yiteli yalema.’—Mat. 11:28-30; 14:14.

12. Tunateli kuyitiyila ñahi amanakwetu niahela wushona.

¹² Henohu kanda tuyimwekesheli amanakwetu nawahela wushona, twatela kwiluka kukala kunakumonawu. Chakutalilahu, muhela  nateli kwikala wakata chikupu. Wahoshaña wanyi hakukala kukwetiyi, ilaña wukutiya kuwaha neyi muntu yamukwasha. Komana watweshaña kukeñela chisaka chindi yuma yakeñañawu? Komana kwila tumutelekelaku yakuda hela kumukwashaku kuwahisha mwitala nehi? Manakwetu niyena mudimu wunateli kumana. Twatela kumwinkahu kadali chakadi kumuleja netu iyetu tunakwinki, sampu nawani mudimu wukwawu?

13-14. Tunateli kwikala ñahi namuchima wakuhana neyi Yehova?

¹³ Yehova wahanaña. (Mat. 5:45) Hitwatela kuhembelelaña amanakwetu niahela atuleji nawu tuyikwashi mwaka dinu tuyimwekesheleña wushonaku. Kufwana Yehova, twatela kuyikwashaña henohu kanda atulombi. Watuntwishaña itena chakadi etu kumulomba! Nawa mwana wakwashaña antu ejima, bayi neyi amusakililaña hohuku. Komana mukwiteja wanyi nenu chatwinkañayi Yehova yuma yejima yitwakeñaña, watumwekeshelaña kukeña? Twamukeña nankashi Yehova muloña wekala naluwi nawa wahanaña!

¹⁴ Amanakwetu niahela amwimbujolaña Yehova, nawa enkañahu akwawu yuma yikwetiwu. Chakutalilahu, mu 2013, Typhoon Haiyan chiyaholokeleli mwituña daPhilippines yakisañeni yuma yayivulu. Amanakwetu nihela amavulu ajimbesheli matalawu nimahetawu. Ilaña amanakwawu niahela mukayi kejima ayikwashili nayuma yakumujimba. Amavulu ahanini mali hela kuyikwasha kutuña, hela kutuñulula matala akushika ku 750 kwakwihi nachaaka chimu! Mumpinji yachipupu chaCOVID-19, aYinsahu akwashili amanakwawu niahela. Neyi tuyikwashaña amanakwetu niahela, tukumwekeshaña netu twayikeña.

15-16. Luka 6:36, yahoshaña nawu chumanyi chitwatela kwila hakwila tumwimbujoli Tata yetu wamwiwulu?

¹⁵ Yehova wukweti luwi nawa wanakenaña. (Tañenu Luka 6:36.) Mpinji yejima twamonaña chatumwekeshelañayi luwi Tata yetu wamwiwulu. (Mas. 103:10-14) Akwakumulondela Yesu adiña awanina wanyi ilaña wayimwekesheleleña luwi nikuyanakena. Wahanini niwumi windi kulonda nshidi jetu  ajanakeni. (1 Yow. 2:1, 2) Chatwanakenañayi Yehova niYesu niluwi lwatutiyilañawu chatukwashaña kuswina kwakwihi nawena?

¹⁶ Kukeña kutwadikeña wumu namukwawu kwaswejelañaku neyi “[tudanakenaña] wumu namukwawu.” (Efwe. 4:32) Hela chochu, chatukalilaña kuyanakena akwetu mpinji jikwawu, ilaña twatela kuzata nañovu. Muhela wumu wahosheli nindi chibaaba chaKaposhi Kakutalila chahosheleña nawu, “Danakenenu Chikupu Muntu naMukwawu” chamukwashili. * Wasonekeli nindi: “Ichi chibaaba chinankwashi kwiluka kwanakena antu, chikunateli kunkwasha. Walumbulwili nindi kwanakena antu hikwatalisha mukwila nawu wuneteji yiluwa yawu hela hiyakuneñeshaku. Ilaña kwanakena kwatalisha mukubula kuhemba nkunyi hayuma yatama yelawu nikutwalekahu kwikala mukuwunda.” Neyi tuyanakenaña amanakwetu niahela chakufuma hamuchima tukumwekeshaña netu twayikeña nawa tunakumwimbujola Tata yetu Yehova.

17. Kwesekeja naMatewu 5:16, tunateli kumulemesha ñahi Tata yetu wamwiwulu?

¹⁷ Hikukooleka nankashi kwikala muchisaka chawamanakwetu niahela mukaayi kejima adikeña wumu namukwawu. Tunakukeña antu amavulu enzi nakudifukula kudi Nzambi yetu. Dichi, bayi twila chuma chidi chejima chikuletesha antu atoñojokeña yuma yatama hadi Yehova Nzambi niantu jindiku. Twatela kwikala nayilwilu yayiwahi yinateli kukokola antu kulonda adizi nsañu yayiwahi.—Tañenu Matewu 5:16.

18. Chumanyi chinateli kutukwasha kushimwina chakadi woma?

¹⁸ Mpinji jikwawu, antu amakwawu anateli kutukabisha muloña wakwila twamwovwahilaña Tata yetu wamwiwulu. Indi neyi twatiyaña woma kulejaku antu yuma yitwakuhwelela? Twatela kukuhwelela netu Yehova niMwanindi akutukwashaña. Yesu walejeli atumbanji twindi nindi hiyatela kwakama nayuma yatela kuhoshawu hela chiyatela kuhoshawuku. Muloñadi? Yesu walumbulwili  nindi: “Akayileja yuma yimwakahosha hanoyu mpinji; muloña hiyenu mwakahoshañaku, ilaña spiritu yaTata yenu diyi yakahoshelaña mudi enu.”—Mat. 10:19, 20.

19. Shimunenu chakutalilahu chamanakwetu washimwinini chakadi woma.

¹⁹ Talenu chakutalilahu chamanakwetu Robert. Kunyima hampinji yadizileñayi Bayibolu nawa hadiñayi kanda yelukishi yuma yayivulu yamuBayibolu, wayili kuchota chanyiloña muSouth Africa kulonda yalumbululi chuma chaletesheleña yabuleña kwiñila wushidika. Washimwini nakuhamuka nindi wakeñeleña wanyi kudiñija munsañu jamatuña nachiyuulu muloña wakeña amanakwindi akwaKristu. Watiyileña kuwaha kwikala muchisaka chaYehova! Nsompeshi wamwihwili nindi: “Amanakweyi anyi?” Manakwetu Robert hakuhweleleli nindi akumwihula ilu lwihuku, ilaña washikeneni kwanuka nsona yadina ifuku. Yadiña Matewu 12:50 yahosha yawu: “Muntu wejima welaña nkeñelu yaTata yami wekala mwiwulu, yenowu diyi manakwami, diyi muhelami nawa diyi mama yami.” Hela chakwila manakwetu Robert wadiña kadizi waBayibolu wamuha, spiritu yaYehova yamukwashili kwakula aluna lwihu nimalwihu amakwawu abuliliyi kukuhwelelayi. Yehova wamutiyili Robert kuwaha! Nawa Yehova watutiyaña kuwaha ninetu neyi tumushindamena nikushimwina chakadi woma muyinu mpinji yakala.

20. Chumanyi chitwatela kufwilaña kwila? (Yowanu 17:11, 15)

²⁰ Dichi tutwalekihu kusakilila hakwikala muchisaka chawantu jaNzambi akwetu kukeña. Tukweti Tata yetu wamuwahi niamanakwetu niahela atukeña. Twatela kusakililaña hachumichi mpinji yejima. Satana niantu jindi afwilaña kutuletesha tujinookeña netu Tata yetu wamwiwulu watukeña wanyi nawa afwilaña kuluwañesha kunuñañana kwetu. Hela chochu, Yesu watulombeleliku kudi Tata yindi nakumuleja nindi yatuhembi kulonda tutwalekihu kwila anuñañana. (Tañenu Yowanu 17:11, 15.) Yehova nakwakula iku kulomba. Kufwana Yesu, tutwalekenuhu kukuhwelela netu Tata yetu wamwiwulu watukeña nawa wukutukwashaña. Dichi tutwalekenuhu kuswina kwakwihi nachisaka chetu mudi amanakwetu niahela.