CHIBAABA CHAKUDIZA 39
Komana Ijina Denu Didi “Mumukanda Wawumi”?
“Mukanda wachanukishu wanowu amutiyaña Yehova woma . . . awusonekeli kumesu indi.”—Mal. 3:16.
KAMINA 61 Yenuña Kumbidi Enu aYinsahu!
NSAÑU YIDI MUCHIBAABA *
Kufuma tuhu kunyima, Yehova wasonekaña majina “mumukanda wawumi” (Talenu maparagilafu 1-2)
1. Kwesekeja naMalaki 3:16, mukandanyi wasonekañayi Yehova nawa mwekaladi?
HADI yaaka yayivulu, Yehova wasonekaña mukanda wadimena. Iwu mukanda mwekala majina awantu, kutachika kudi chinsahu washinshika Abeli. * (Luka 11:50, 51) Kufuma hayina mpinji, Yehova wabombelañamu majina muniwu mukanda nawa chayinu mpinji mudi mamiliyoni amajina. MuBayibolu, iwu mukanda awutenaña nawu “mukanda wachanukishu,” “mumukanda wawumi” nawa nawu “muvuñilu wawumi.” Muchinu chibaaba, tukuwutenaña netu “mukanda wawumi.”—Tañenu Malaki 3:16; Chim. 3:5; 17:8.
2. Anyi asonekawu mumukanda wawumi, nawa majina etu anateli kwikalamu ñahi?
2 Muniwu mukanda wadimena mwekala majina awantu ejima adifukulaña kudi Yehova nawoma, nakalemesha nawa alemesha ijina dindi. Akatambula wumi wahaya nyaaka. Makonu ijina detu anateli kudisoneka muniwu mukanda neyi twikala nawubwambu wakola naYehova, kushindamena hamulambu wefutu danyiloña daMwanindi, Yesu Kristu. (Yow. 3:16, 36) Wejima wetu tunakukeña majina etu kuyisoneka muniwu mukanda, hela chakwila tukweti chikuhwelelu chakushakama mwiwulu hela hamaseki.
3-4. (a) Komana twakashakama haya nyaaka neyi ijina detu didi mumukanda wawumi? Lumbululenu. (b) Yumanyi yitukuhanjika muchinu chibaaba nichinalondelihu?
3 Komana chinayi mukwila nawu antu ejima asonekawu majina awu muniwu mukanda akatambwila wumi wahaya nyaaka? Tukuwana ñakwilu yanilu lwihu mumazu aYehova amulejeliyi Mosi, ekala haKwidika 32:33. Yehova wahosheli nindi: “Muntu wejima wunanvulumuni, diyi inukujima mumukanda wami.” Dichi, majina adi muniwu mukanda chayinu mpinji anateli kuyijimamu hela kuyifumishamu, chidi neyi Yehova hakusambila wasonekaña awa majina napensulu. (Chim. 3:5) Munjila yikwawu, twatela kuzata nañovu hakwila majina etu atwalekihu kwikala muniwu mukanda kulonda ayisoneki nawulombu, hela inki.
4 Chumichi chinateli kutuletesha kudihula malwihu. Chakutalilahu, Bayibolu yashimunahu nawudi hadi antu asonekawu majina mumukanda wawumi niabula kusonekawu muniwu mukanda? Mpinjinyi yakatambwilawu wumi wahaya nyaaka ejima akashala muniwu mukanda? Indi ana afwili chakubula kumwiluka Yehova? Komana chikatwesheka kuyisoneka majina awu muniwu mukanda? Awa malwihu akuyakula muchinu chibaaba nichinalondelihu.
MAJINA AWANYI EKALA MUMUKANDA?
5-6. (a) Kwesekeja naAfwilipi 4:3, majina awanyi ekala hakachi kamajina ekala mumukanda wawumi? (b) Mpinjinyi yasonekañawu majina awu haya nyaaka?
5 Majina awanyi asonekawu muniwu mukanda wachifwikija? Hakwila twakuli ilu lwihu, tukuhanjeka hamazanvu awantu atanu. Hakachi kawu, amakwawu ayisoneka muniwu mukanda wawumi, amakwawu nehi.
6 Izanvu datachi mwekala antu atondawu akayuula naYesu mwiwulu. Komana majina awu chayinu mpinji ayisoneka mumukanda wawumi? Eña. Kwesekeja namazu akapostolu Pawulu asonekeleleliyi ‘akwawu mwakalakeleleñawu’ muFwilipi, majina awantu awayishewa, atondawu kuyuula hamu naYesu, adi mumukanda wawumi. (Tañenu AFwilipi 4:3.) Ilaña hakwila nawu majina awu atwalekihu kwikala muniwu mukanda wachifwikija, atela kutwalekahu kwikala ashinshika. Neyi atambwila chilamiku chakukumishaku, henohu kanda afwi hela henohu lukadi lwasweja kanda lutachiki, majina awu akuyisoneka mumukanda wawumi haya nyaaka.—Chim. 7:3.
7. Kwesekeja naChimwekeshu 7:16, 17, izaza deneni dawanyikoku amakwawu majina awu akayisoneka mpinjinyi chahaya nyaaka mumukanda wawumi?
7 Izanvu damuchiyedi munabombeli izaza deneni danyikoku yikwawu. Komana majina awu chayinu mpinji ayisoneka mumukanda wawumi? Eña. Komana majina awu akatwalekahu kwikala mumukanda wawumi hanyima yakupuluka Amagedoni? Eña. (Chim. 7:14) Yesu wahosheli nindi awa adi neyi nyikoku “akekala nawumi wahaya nyaaka.” (Mat. 25:46) Ilaña akapuluka haAmagedoni hiyakashikena kutambwila wumi wahaya nyaaka hohenohuku. Majina awu akatwalekahu kwikala akusoneka mumukanda wawumi napensulu. MuChiyuulu Chayaaka Ikombakaji, Yesu “wakayibiñaña nikuyilombola kutuseloki twamenji awumi.” Owu aketeja wunlomboli waKristu nawa nkumininaku akatenawu kudi Yehova nawu ashinshika majina awu akayisoneka haya nyaaka mumukanda wawumi.—Tañenu Chimwekeshu 7:16, 17.
8. Majina awanyi abula kwikala mumukanda wawumi, nawa chumanyi chikayimwekena?
8 Izanvu damuchisatu munabombeli ampembi, akajilumunawu haAmagedoni. Majina awu hiyadi mumukanda wawumiku. Yesu wahosheli nindi “akayijilumuna haya nyaaka.” (Mat. 25:46) Hanyima yakumonena, Pawulu watulejeli nindi “antu wenawa akayisompeshela kukujilumuka kwahaya nyaaka.” (2 Tes. 1:9; 2 Pet. 2:9) Chuma chochimu dichakamwekena antu avulumunaña spiritu yajila mukudikeñela, muchihandilu chawu chejima. Niwena akatambwila kujilumuka kwahaya nyaaka, bayi wumi wahaya nyaakaku. Dikwila nawu hiyakayisañulaku. (Mat. 12:32; Maku 3:28, 29; Heb. 6:4-6) Ichi dinu tuhanjekenu hadi mazanvu ayedi awantu akasañulawu hamaseki.
ANTU AKASAÑULAWU
9. Neyi chinamwekeshiwu haYilwilu 24:15, mazanvwinyi ayedi akasañulawu hamaseki, nawa chambwinyi chidi hakachi kanawa mazanvu ayedi?
9 Bayibolu yahosha hadi mazanvu awantu akasañulawu nakuchiñeja kwakushakama haya nyaaka hamaseki, “aloña niabula kuloña.” (Tañenu Yilwilu 24:15.) “Aloña” diwu amukalakeleleña Yehova nakashinshi hachidiñawu amomi. Ilaña “abula kuloña” hiyamukalakeleleña Yehova nakashinshiku. Kafwampi, hiyelileña yuma yaloñaku. Chineli awa mazanvu ejima ayedi akayisañula, komana tukuhosha netu majina awu akusoneka mumukanda wawumi? Hakwila twakuli ilu lwihu, tuhanjekenu hezanvu hizanvu.
10. Muloñadi “aloña” chakayisañwilawu, nawa amakwawu akekala nakukoolekanyi? (Talenu cheñi chibaaba chidi muyinu magazini chinakwila nawu “Malwihu Kufuma Kudi Antañi” kutalisha hakusañuka kwahamaseki.)
10 “Aloña” didu izanvu damuchiwana. Henohu kanda afwi, majina awu ayisonekeli mumukanda wawumi. Komana majina awu ayifumishili muwuna mukanda chafwiliwu? Inehi, muloña kudi Yehova achidi “amomi.” Yehova “hiNzambi yawantu amomi, bayi afwaku, muloña kudi yena ejima wawu amomi.” (Luka 20:38) Chumichi chinayi mukwila nawu aloña neyi anayisañuli dehi hamaseki, majina awu akekala mumukanda wawumi, hela chakwila ayisonekeli “napensulu” hakusambila. (Luka 14:14) Chakadi nikujina, amakwawu hadi awa akasañulawu akekala nakukooleka kwakwikala “atulamba heseki dejima.”—Mas. 45:16.
11. Yumanyi yatela kudizawu antu “abula kuloña” hakwila akayisoneki mumukanda wawumi?
11 Nkumininaku, tutalenu hezanvu damuchiwana, “abula kuloña.” Hadaha muloña wakubula kwiluka nshimbi jaYehova, henohu kanda afwi elileña yuma yabula kuloña. Dichi majina awu hiyayisonekeli mumukanda wawumiku. Ilaña Nzambi chakayisañulayi, wakayinka kukooleka kwakuyisoneka majina awu muwuna mukanda. Awa “abula kuloña” akakeñekaña kuyikwasha chikupu. Hampinji yachidiñawu amomi, amakwawu elileña yuma yasweja kutama chikupu. Akakeñekaña kuyidizisha kulonda akashakameña kwesekeja nanshimbi jaYehova jaloña. Hakwila nawu iwu mudimu wukazatiki, Wanta waNzambi wakalombola progilamu yakutañisha antu hamaseki yakwila kanda yimwekaneñahu dehi.
12. (a) Anyi akayitañishaña antu abula kuloña? (b) Yumanyi yakayimwekena antu akakaana kuzatisha yuma yinadiziwu?
12 Anyi akayitañishaña antu abula kuloña? Izaza deneni niantu aloña akasañulawu. Hakwila antu abula kuloña akayisoneki majinawu mumukanda wawumi, atela kwikala nawubwambu wawuwahi naYehova nikudihana awenawu kudi yena. Yesu Kristu niakwawu ansompeshi akatalaña chachiwahi chikelañawu awa antu abula kuwanina nansañu yakayidizishañawu. (Chim. 20:4) Wejima wakakaana kutiyilila kuniwu wukwashu akamufumishamu hela chakwila wudi nayaaka 100. (Isa. 65:20) Yehova niYesu anateli kwiluka yuma yidi mumuchima nawa hiyaketeja muntu wudi wejima kuleta kukala mwituña dadihaku.—Isa. 11:9; 60:18; 65:25; Yow. 2:25.
KUSAÑUKILA KUWUMI NIKUKUSOMPESHA
13-14. (a) Kunyima, twelukili netu mazu aYesu atalishili mudihi ekala haYowanu 5:29? (b) Yumanyi yitwatela kwiluka hanawa mazu?
13 Yesu wahosheli cheñi nihadi antu akasañulawu hanu hamaseki. Chakutalilahu, wahosheli nindi: “Mpinji yinakwinza hakatiyawu antu ejima adi mumajamu achanukishu izu dindi nakufumamu, owu akoñeleña yuma yayiwahi akasañukila kuwumi wahaya nyaaka, nawa akoñeleña yuma yatama akasañukila kukuyisompesha.” (Yow. 5:28, 29) Yesu watalishili mudihi?
14 Kunyima, twelukili netu mazu aYesu atalishileña kuyuma yakelañawu antu akasañulawu hanyima yakuyisañula; dikwila nawu, amakwawu akayisañula nawa akakoñaña yuma yayiwahi amakwawu niwena nawa akayisañula akakoñaña yuma yatama. Hela chochu, mazu aYesu anakumwekesha wanyi nawu antu akafuma mumajamu achanukishu akakoñaña yuma yayiwahi hela nawu akakoña yuma yatama. Nazatishi chinyika chakunyima. Nahoshi hadi “akoñeleña yuma yayiwahi” nihadi “akoñeleña yuma yatama.” Chumichi chinakumwekesha nawu iyi yuma yamwekeni henohu kanda afwi. Iyi nsañu yinalumbuluki, netu? Muloña, kwosi muntu aketejawu kukoña yuma yatama mwituña dadiha. Antu abula kuloña akoñeleña yuma yatama henohu kanda afwi. Hanu tukutiyishisha ñahi mazu akwila nawu “akasañukila kuwumi” niakwila nawu “akasañukila kukuyisompesha”?
15. Anyi “akasañukila kuwumi,” nawa muloñadi?
15 Aloña, elileña yuma yayiwahi henohu kanda afwi, “akasañukila kuwumi” muloña majina awu akusoneka dehi mumukanda wawumi. Chumichi chinayi mukwila nawu kusañuka kwawantu “akoñeleña yuma yayiwahi” ashimunawu haYowanu 5:29 kwokumu nakusañuka kwawantu “aloña” ashimunawu haYilwilu 24:15. Iyi ntiyishishilu yinesakani namazu ekala haARoma 6:7, akwila nawu: “Muntu wunafwi, nasubuki dehi kunshidi jindi.” Nshidi yakoñeleñawu antu aloña yamanini hampinji yafwiliwu, ilaña kashinshi kawu hiyakivulameneniku. (Heb. 6:10) Hela chochu, aloña akasañulawu atela kutwalekahu kwikala ashinshika hakwila nawu majina awu akatwalekihu kwikala mumukanda wawumi.
16. Indi ‘kusañukila kukuyisompesha’ kwatalisha mudihi?
16 Indi ana akoñeleña yuma yatama henohu kanda afwi? Hela chakwila nshidi yawu yamanini hampinji yafwiliwu, hiyadiña ashinshikaku. Majina awu akusoneka wanyi mumukanda wawumi. Dichi, kusañuka kwawantu “akoñeleña yuma yatama” kwokumu nakusañuka kwawantu “abula kuloña” kwashimunawu haYilwilu 24:15. Wena “akasañukila kukuyisompesha.” * Aloña akayisompesha muloña akayishinshikaña kudi Yesu. (Luka 22:30) Hakahita mpinji hakwila akayimoni neyi anashikilimu kuyisoneka majina awu mumukanda wawumi. Chiña neyi antu abula kuloña akaleka yilwilu yawu yatama nawa adihana awenawu kudi Yehova dihu dinu hakayisonekawu majina awu mumukanda wawumi.
17-18. Chumanyi chakelawu antu akasañulawu nawumi hamaseki, nawa ‘nyidimwinyi’ yinakutenawu haChimwekeshu 20:12, 13?
17 Hela chakwila kunyima adiña aloña hela abula kuloña, antu akasañulawu atela kwovwahila nshimbi yakekala munyivuñilu yayiha yakavuñululañawu mumpinji yekombakaji dayaaka. Kapostolu Yowanu walumbulwili yuma yamweniyi muchimwenu, nindi: “Namweni afu alema niabula kulema anemani kwitanda, nawa nyivuñilu ayivuñulwili. Ilaña avuñulwili muvuñilu wukwawu; himuvuñilu wawumi. Dichi afu ayisompesheli kushindamena hayuma yasonekeliwu munyivuñilu kwesekeja nanyidimu yawu.”—Chim. 20:12, 13.
18 Antu akasañulawu akayisompesha kushindamena ‘hanyidimwinyi?’ Komana yakekala nyidimu yakoñeleñawu henohu kanda afwi? Inehi! Anukenu, nshidi yakoñeleñawu henohu kanda afwi yamanini hampinji yafwiliwu. Haniyi nsañu, “nyidimu yawu” hinyidimu yakoñeleñawu kunyimaku. Ilaña, iyi yinakutalisha kuyuma yakayidizishañawu mwituña dadiha. Amayala ashinshika niwena adi neyi Nowa, Samweli, Davidi niDanyeli atela kumwiluka Yesu Kristu nikukuhwelela mumulambu windi. Nikudi antu abula kuloña dichichakekala.
19. Chumanyi chakayimwekena antu akakaana iku kukooleka?
19 Chumanyi chakayimwekena antu akakaana iku kukooleka? Chimwekeshu 20:15 yatuleja nawu: “Muntu wejima abulili kusonekawu mumukanda wawumi, amuumbilili mwijiya dakesi.” Akayijilumuna haya nyaaka. Dichi twatela kuzata nañovu, kulonda ijina detu adisoneki mumukanda wawumi nawa ditwalekihu kwikalamu!
Manakwetu nakuzata mudimu weneni wakudizisha wakekalaku muyaaka Ikombakaji (Talenu paragilafu 20)
20. Mudimwinyi wakazatikaña muChiyuulu chaYaaka Ikombakaji? (Talenu mwevulu wudi hakava.)
20 Mpinji yaChiyuulu chaYaaka Ikombakaji yakekala mpinji yayiwahi nankashi! Mwakekala mudimu weneni wakutañisha antu hanu hamaseki wakwila antu jaNzambi kanda awuzateñahu dehi. Nawa yakekala mpinji yakashinshikañawu yilwilu yawantu aloña niabula kuloña. (Isa. 26:9; Yilw. 17:31) Iwu mudimu wakutañisha wakazatika ñahi? Chibaaba chinalondelihu chakatukwasha kwiluka chikekala yuma.
KAMINA 147 Nzambi Watushiika Wumi Wahaya Nyaaka
^ Achinu chibaaba chinashimuni kuhimpika kwantiyishishilu yetu hamazu aYesu ekala haYowanu 5:28, 29 akwila nawu “akasañukila kuwumi wahaya nyaaka” niakwila nawu “akasañukila kukuyisompesha.” Tukudiza mwatalisha iku kusañuka kuyedi niantu anadibombelimu.
^ Iwu mukanda atachikili kuwusoneka “kufuma haaliliwu chikuku chakaayi,” dikwila nawu, antu akweti kukoleka kwakuyikuula kunshidi. (Mat. 25:34; Chim. 17:8) Chakadi nikujina iyala waloña Abeli diwadiña watachi kusoneka muniwu mukanda wawumi.
^ Kunyima, twalumbulwileña izu dakwila nawu “kuyisompesha” dinazatishiwu hanu kutalisha kukusompesha kwatama, hela kusompeshela kukufwa. Hela chochu, izu “dakusompesha” dinateli kutalisha mwenimu. Ilaña haniyi nsañu, chinamwekani neyi Yesu wazatishili izu “dakusompesha” bayi hakutena kusompesha kwakweniku, watalishileña kukushinshika muntu hela kumweseka, hela neyi chahosha lexicon yachiGreek nawu “kushinshika chikupu yilwilu yamuntu.”
