1. Muloñadi chitwabulaña kuhayamina hakumona yilwilu yakubula kudikuhwelela yamukaayi?

 ANTU mukanu kaayi kaSatana eluka wanyi muntu atela kukuhwelelawu. Mpinji yejima aneñaña nayilwilu yawakulumpi munyitayi yakulanda nakulandulula, akulumpi jayiyuulu, niakulumpi jakwitiya. Amavulu niwena alekaña kukuhwelela amabwambu jawu, antuñinawu niantaña jawu. Hitwatela kuhayama nachumichiku. Bayibolu yashimwineñahu dehi nawu: “Mumafuku akukuminina . . . , antu akekala . . . abula kushinshika, . . . akakutwambila akwawu, . . . akakufukejela akwawu.” Munjila yikwawu, antu akamwekeshaña yilwilu yanzambi wakanu kaayi wakadi kukuhwelela.—2 Tim. 3:1-4; 2 Kor. 4:4.

2. (a) Anyi itwatela kukuhwelela chikupu? (b) Antu amakwawu atoñojokaña nawudi?

² Hela chochu, etu akaKristu tweluka netu twatela kumukuhwelela chikupu Yehova. (Yere. 17:7, 8) Tweluka chikupu netu watukeña nawa ‘hamba kashiya’ amabwambu jindiku. (Mas. 9:10) Twatela cheñi kumukuhwelela Kristu Yesu muloña waheni wumi windi kukoola etu. (1 Pet. 3:18) Nawa tunadimweni netu Bayibolu yatulombolaña chachiwahi. (2 Tim. 3:16, 17) Tuneluki netu twatela kumukuhwelela Yehova, Yesu niBayibolu. Amakwawu ajinookaña neyi chakwila atela kuyikuhwelela amanakwetu niahela muchipompelu. Neyi diimu, muloñadi chitwatela kuyikuhwelela?

3. Kukoolekanyi kutukweti? (Maku 10:29, 30)

³ Yehova watutonda kwikala muchisaka chindi chawakakudifukula chamukaayi kejima. Toñojokenu haniku kukooleka nihayuma yayiwahi yafumañamu! (Tañenu Maku 10:29, 30.) Mukaayi kejima, tukweti amanakwetu niahela amukeña Yehova  neyi chitwamukeña nawa esekaña nañovu kuhemba nshimbi jindi. Idimi, chisemwa niyakuvwala yinateli kwambuka, ilaña twadikunda nawu hela dikatachi kudimona nawu. Sweje-e twatiyaña kuwaha kwikala nawu hamu hakumushimeka nikudifukula kudi Tata yetu wamwiwulu.—Mas. 133:1.

4. Muloñadi chitunakuyikeñela amanakwetu niahela?

⁴ Ayinu diyi mpinji yitwatela kudikunda nankashi nawamanakwetu niahela. Mpinji yikwawu atukwashaña kusenda yiteli yetu. (Rom. 15:1; Ñal. 6:2) Atukoleshaña cheñi kutwalekahu kuzata mudimu waYehova nikukolesha wubwambu wetu nayena. (1 Tes. 5:11; Heb. 10:23-25) Toñojokenu chitwadi kutiya neyi twabulili chipompelu chakutukiña kulonda tutwalekihu kwimika mushindu ayilumbu jetu, dikwila nawu Satana Diyabolu nikaayi kindi katama. Satana niantu ayuulañayi katataka alukuki ambuña aNzambi. Haniyi mpinji twakatiya kuwaha kwikala hamu nawamanakwetu niahela.

5. Yumanyi yaleteshaña amakwawu kubula kuyikuhwelela amanakwetu niahela?

⁵ Hela chochu, amakwawu chayikalilaña kukuhwelela amanakwawu niahela hadaha mukwawu mukakwitiya wakañenyi kwila mwakaniniyi. Hela hadaha muntu wumu muchipompelu wahosheli hela welili chuma chamuneñesheli. Yuma yamuchidiwu yinateli kuletesha muntu kubula kukuhwelela akwawu. Hanu dinu chumanyi chinateli kutukwasha kuyikuhwelela amanakwetu niahela?

6. Kukeña kunateli kwatukwasha ñahi kukuhwelela akwetu? (1 AKorinda 13:4-8)

⁶ Kukeña dikwaleteshaña tukuhweleli antu. Kapetulu 13 kaAKorinda watachi kalumbulula kukeña chikunateli kutukwasha kukuhwelela hela kutachika cheñi kuyikuhwelela akwetu.  (Tañenu 1 AKorinda 13:4-8.) Chakutalilahu, vasi 4 yahosha nawu “kukeña kwadiwunjikaña nawa kwatiyilaña luwi.” Yehova wekala wadiwunjika hela chakwila tunamuvulumuni. Dichi, twatela kudiwunjika nawamanakwetu neyi anahoshi hela aneli yuma yinatuhilishi hela kututiyisha kutama. Vasi 5 yabombelahu nawu: “[Kukeña] hikwahilaña swayiku. Hikwahembaña nkunyiku.” Bayi ‘tuhembaña nkunyi’ nakwanuka mwatuluwañesheliwu amanakwetuku. Mukwakutañisha 7:9 yahosha nawu “bayi wunyakala kuzuwaku.” Dichi twatela kulondela mazu ekala haAEfwesesa 4:26, akwila nawu: “Bayi muhumisha itena saña mwahililaku”!

7. Yishina yekala haMatewu 7:1-5 yinateli kutukwasha ñahi kukuhwelela amanakwetu?

⁷ Chuma chikwawu chinateli kutukwasha kuyikuhwelela hikuyimona amanakwetu niahela neyi chayimonañawu kudi Yehova. Nzambi wayikeña nawa hayihembelaña nshidi jawuku. Ninetu dichitwatela kwila. (Mas. 130:3) Chatela tusheña muchima hayiluwa yawu, twatela kuzata nañovu kulonda tumoneña yilwilu yawu yayiwahi nikwiluka netu anateli kwila yuma yayiwahi. (Tañenu Matewu 7:1-5.) Twazataña nañovu kudiwula yiluwa yawu muloña kukeña “kwakuhwelelaña yuma yejima.” (1 Kor. 13:7) Awa mazu hiyanatalishi mukwila nawu Yehova hakeñaña hohu nindi tukuhweleleña antu chakadi wunsahu walalaku, ilaña wakeñaña nindi tuyikuhweleli muloña anamwekeshi nawu twatela kuyikwehwelela. *

8. Munateli kuyikuhwelela ñahi amanakwenu?

⁸ Kukuhwelela kudi neyi kalemesha, dichi muntu watela kuzata nañovu hakwila nawu amukuhweleli nawa hahitaña mpinji. Munateli kuyikuhwelela ñahi amanakwenu? Yilukenu chachiwahi. Hanjekenuña nawu hakupompa kwachipompelu. Zatenuña nawu mumudimu wakushimwina. Ikalenu adiwunjika nawena, kulonda amwekeshi nawu mwatela kuyikuhwelela. Hakusambila munateli wanyi kuyileja nsañu yejima muloña dihu himunakuyiluka. Neyi wubwambu wenu wunakoli, munateli kwikala akasunuka kuyileja nsañu yejima. (Luka 16:10) Mukwila ñahi neyi abula kuhemba kajindulu? Bayi mushikena kuyidiwula hohenohuku, ilaña lekenu hahiti mpinji. Bayi mwiteja yilwilu yawantu antesha yiyikañeshi kuyikuhwelela amanakwenuku. Haniyi nsañu tukuhanjeka hayakutalilahu yawambuña aYehova ashinshika atwalekelihu kukuhwelela akwawu hela chakwila ayineñesheli.

9. (a) Hana watwalekelihu ñahi kukuhwelela ntanjikilu yaYehova hela chakwila añimenu jindi amakwawu aluwañesheleña? (b) Chakutalilahu chaHana chinayikwashi ñahi kukuhwelela ntanjikilu yaYehova? (Talenu mwevulu.)

⁹ Komana mwaneñahu dehi nayilwilu yamukulumpi? Neyi chayimwekenahu dehi chakutalilahu chaHana chikuyikwasha. Haniyi mpinji Kapristu Muneni Eli diyi wadiña nakulombola mudimu wadikufukula kudi Yehova muIsarela. Ilaña chisaka chindi chadiña nayilwilu yatama. Anyanindi adiña atupristu elileña yuma yansonyi, yilwilu yatama; ilaña tata yawu kwosi chuma cheliliyi. Yehova hashikeneni kumutambula Eli mudimu wawukapristu muneniku. Hela chochu, Hana hadiwili ntanjikilu yaNzambi, nakuleka kudifukula hatabanaka iku Eli wuchidi kapristu muneniku. Eli chamweniyi Hana nakulomba iku nakudila,  wakunkulwili nindi nasheti. Chatela ehuli yena washikeneni dakumuhosha chatama iwu mumbanda wadiña nakukala. (1 Sam. 1:12-16) Hela chochu, Hana wakanini nindi neyi avwala mwana weyala wakamuleta kulonda akakalakeleña hatabanaka, hakamuhembañawu kudi Eli. (1 Sam. 1:11) Komana anyana kaEli ateleleli kuyibabesha? Eña, nawa Yehova welilihu chuma hampinji yatelela. (1 Sam. 4:17) Dichi, Nzambi wamwinkeli Hana mwana weyala, Samweli.—1 Sam. 1:17-20.

10. Davidi watwalekelihu ñahi kukuhwelela akwawu hela chakwila amubalumukililimu?

¹⁰ Komana ayibalumukilamu dehi kudi ibwambu denu? Neyi chayimwekenahu dehi talenu chuma chamumwekeneni Mwanta Davidi. Ahitofweli wadiña hakachi kawamabwambu jindi. Ilaña chelili Abisalomi mwana kaDavidi nindi amuhukuli tata yindi wanta, Ahitofweli wadinuñili hamu nayena mukudikaña. Chumichi chatela chamuneñesheli Davidi hakumona mwanindi nimuntu amweneñayi nindi ibwamba dindi anadikañi nayena. Hela chochu, Davidi hetejeli chumichi chimuleteshi kuleka kukuhwelela amakwawuku. Watwalekeliku kukuhwelela ibwambu dindi mukwawu, Hushayi, wabulili kumubalumukilamu. Kudi yuma yaletesheli Davidi amukuhweleli Hushayi. Hushayi wadiña ibwambu wamuwahi, washili niwumi windi muwubanji kulonda amukwashi Davidi.—2 Sam. 17:1-16.

11. Munjilanyi ñamba yaNabali mwamwekesheleleliyi chikuhwelelu?

¹¹ Talenu cheñi chuma chelili ñamba yaNabali wumu. Davidi niantu jindi akiñili añamba jakaIsarela Nabali. Chimwahitili mpinji, Davidi wamulombeli samaheta Nabali yakuda yakwinka antu jindi, yakuda yidi yejima yikutwesha kuhanayi Nabali. Chelili Nabali akaani kuyinkahu, Davidi wahilili chakwila wafuukwilihu kujaha amayala ejima amwitala daNabali. Ñamba wamulejelimu Abigayili, ñoda Nabali iyi nsañu. Chineli wadiña munidi itala, welukili nindi Abigayili nateli kumupulwisha. Chatela atemuki, wakuhweleli nindi Abigayili wukuwahisha yuma. Welukili chumichi muloña amwilukili nawu wadiña mumbanda watoñojokeleña mwamaana. Mwamweni dichuma chamwekeni. Abigayili  wahamukili nakumushinjila Davidi kulonda abuli kwila mwafuukwiliyi. (1 Sam. 25:2-35) Wakuhweleli nindi Davidi wukwila chuma chaloña.

12. Yesu wamwekesheli ñahi nindi wayikuhweleleli atumbanji twindi hela chakwila adiña nakuluwañesha?

¹² Yesu wayikuhweleleli atumbanji twindi hela chakwila aluwañesheleña. (Yow. 15:15, 16) Yowanu naYakoba chamwililiwu Yesu nawu akashakami hamaluña alema muWanta, Yesu hajinokeli chuma chaletesheli amukalakeli Yehova hela kuyikaana kwikala apostolu. (Maku 10:35-40) Chimwahitili mpinji, atumbanji twaYesu ejima amushiyili nkawindi hawufuku wamukwatiliwu. (Mat. 26:56) Hela chochu, Yesu halekeli kuyikuhwelelaku. Welukili nindi awanina wanyi; hela chochu, “wayikeñeli kushika nikunsa.” (Yow. 13:1) Chelili anamusañuli dehi Yesu, wayinkeli apostolu indi ashinshinka 11 mudimu walema wakulombola mudimu wakushimwina nikwakamena nyikoku yindi yalema. (Mat. 28:19, 20; Yow. 21:15-17) Kudi yuma yaletesheli ayikuhweleli awa antu abula kuwanina. Ejima wawu adiña ashinshika sampu nichafwiliwu. Chakadi nikujina, twatela kumwimbujola Hana, Davidi, ñamba yaNabali, Abigayili niYesu nachakuhweleleliwu antu abula kuwanina.

13. Chumanyi chinateli kuletesha tuleki kukuhwelela amakwawu?

¹³ Mwalejahu dehi manakwenu nsañu yakujinda, ilaña mutiya nawu nalejiku muntu wacheñi? Chumichi chinateli kuyineñesha hama. Ifuku dimu, muhela wamulejeli mukulumpi nsañu yakujinda. Ifuku dalondelelihu, ñoda mukulumpi wayili nakumukolesha muhela, dikwila nawu owu mukulumpi wamulejeli ñodindi nsañu yakujinda. Chakadi nikujina, iwu muhela walekeli kumukuhwelela ona mukulumpi. Chuma chawahili, iwu muhela wayili nakulomba wukwashu. Wehwili mukulumpi mukwawu, nawa wamukwashili kutachika cheñi kukuhwelela akulumpi.

14. Chumanyi chamukwashili manakwetu wumu kutachika cheñi kukuhwelela amanakwindi?

¹⁴ Manakwetu wumu wahililili akulumpi ayedi hadi mpinji yayilehi amweneñayi nindi hatela kuyikuhwelelaku. Hela chochu, watachikili kutoñojoka hamazu ahosheliyi manakwetu alemesheliyi nankashi. Iyi nsañu yinakumwekana neyi yapela ilaña yalema nankashi yakwila nawu: “Satana diyi chilumbu chetu, bayi amanakwetuku.” Manakwetu watoñojokelihu hanawa mazu, walombelelihu nawa wayili nakuleta kuwunda nanawa akulumpi.

15. Muloñadi chihanateli kuhita mpinji hakwila muntu atachiki kumukuhwelela mukwawu? Shimunenu chakutalilahu.

¹⁵ Komana ayitambulahu dehi kukooleka? Chumichi chakataña kumuchima nankashi. Grete niamama yindi adiña aYinsahu ashinshika mumpinji yaNazi Germany muyaaka yamuma 1930 halekesheliwu mudimu wetu. Grete wadiña namudimu wakutayipilaku akwawu akakudifukula Kaposhi Kakutalila. Ilaña amanakwetu chelukiliwu nawu atata yindi anekali akakusekesha, amulekesheli iwu mudimu nakutoñojoka nawu atata yindi akulobela chipompelu kudi akakusekesha. Iku kweseka kwamweneñayi Grete hikwamanini hohenahaku. Mpinji yikwadiña Njita yaKaayi Yamuchiyedi, amanakwetu hiyamwinkeleña Grete niamama yindi magaziniku nawa hiyayihoshesheleña neyi anayibulakaniku. Chumichi chayikatili kumuchima! Waneñeli chikupu nawa Grete wahosheli nindi hashimbwili hakwila ayanakeni nikutachika kuyikuhwelela cheñi amanakwindi. Hela  chochu, mukuhita kwampinji welukili nindi Yehova wayanakena dehi, dichi niyena watela kuyanakena. *

16. Muloñadi chitwatela kuzatila nañovu kulonda tutachiki kuyikuhwelela akwetu?

¹⁶ Neyi mwamonahu dehi kukala kwamuchidiwu zatenu nañovu kulonda mutachiki kukuhwelela cheñi akwenu. Hanateli kuhita mpinji, ilaña ñovu yenu yikuya mumenji wanyi. Tuhanenu chakutalilahu, neyi twadahu dehi wulembi kuyakuda, mpinji yejima tukwikalaña asoñama neyi tunakunda. Hela chochu, chumichi hichikutukojeja kuleka kudaku. Munjila yoyimu, hitukwiteja chiluwa chimu chitukojeji kuleka kukuhwelela amanakwetu niahela itweluka netu avwalikili nanshidiku. Neyi tutachika cheñi kukuhwelela akwetu, tukwikala namuzañalu nankashi nawa tukushaña muchima hayuma yitwatela kwila kulonda tuleteña chilwilu chakudikuhwelela muchipompelu.

17. Kukuhwelela akwetu kwalemenadi, nawa tukahanjekadi muchibaaba chinalondelihu?

¹⁷ Chakala kukuhwelela antu mukanu kaayi kaSatana, ilaña twayikuhwelela amanakwetu niahela muloña twayikeña nawa niwena atukeña. Kudikuhwelela kwamuchidiwu kwatuletelaña muzañalu nikunuñañana nawa kwakatukiña neyi tunamoni kukala kumbidi. Indi neyi chayikalilaña kukuhwelela amakwawu hamuloña wakuyineñesha mukwila ñahi? Monenuña yuma neyi chayimonañayi Yehova, zatishenuña yishina yamuBayibolu, keñenu chikupu amanakwenu nawa dizilenuña kudi antu ashimunawu muBayibolu. Tunateli kuleka kutiya kutama nakutachika kukuhwelela amakwawu. Neyi twila mwenimu, tukwikala nawamabwambu amawahi amavulu ‘adikundaña namukwawu kubadika manakwindi.’ (Yish. 18:24) Hitwatela hohu kuyikuhwelela antuku, niwena atela kwiluka nawu atela kutukuhwelela. Muchibaaba chinalondelihu tukahanjeka chitunateli kumwekesha netu amanakwetu atela kutukuhwelela.