1. Tunateli kwiluka ñahi muntu washinshika?

 MUNTU washinshika welaña munashiikiyi nawa hatwambañaku. (Mas. 15:4) Antu amwiluka nawu atela kumukuhwelela. Tunakukeña amanakwetu niahela amoneña nawu atela kutukuhwelela. Chumanyi chinateli kutukwasha kulonda atushindameneña?

2. Yumanyi yitwatela kwila kulonda antu atukuhweleleña?

² Hitunateli kukanjikija antu netu atukuhweleliku. Antu atela kutukuhwelela awenawu. Antu ahoshaña nawu chikuhwelelu chekala neyi mali. Chakala kuyikwata; ilaña chapela kuyijimbesha. Chakadi nikujina Yehova watukuhwelela. Kwosi chuma chikuletesha etu tubuli kumukuhwelela, muloña “yuma yejima yelañayi yalala.” (Mas. 33:4) Nawa wakeñaña nindi tumwimbujoleña. (Efwe. 5:1) Tuhanjekenu hadi ambuña aYehova amwimbujoleli Tata yawu wamwiwulu nichamwekesheliwu nawu atela kuyikuhwelela. Tukumona yilwilu yitanu yinateli kutukwasha kulonda antu atukuhweleleña.

3-4. Kaprofwetu Danyeli wamwekesheli ñahi nindi atela kumukuhwelela nawa chumichi chikutuletesha kwiladi?

³ Kaprofwetu Danyeli himuntu akuhweleleliwu itwatela kwimbujola. Hela chakwila amutwalili muwunkoli muBabiloni, hashimbwili wanyi antu atachikili kumukuhwelela. Antu aswejeleliku kumukuhwelela, chelili alumbululi yilota yaMwanta Nebukaneza wakuBabiloni nawukwashu waYehova. Mpinji yimu, Danyeli wamulejeli mwanta nindi Yehova nazañalali wanyi naneyi, iyi nsañu yamuneñesheli mwanta.  Chumichi chakeñekeleña kuhamuka chikupu, muloña Nebukaneza wadiña wakuma kumuchima! (Dan. 2:12; 4:20-22, 25) Chimwahitili yaaka, Danyeli wamwekesheli cheñi nindi atela kumukuhwelela chelili alumbululi nsona yakuhayamisha yamwekeni hambañu muBabiloni. (Dan. 5:5, 25-29) Hela chochu chimwahitili mpinji, Dayirusi wakuMediya niayilolu jindi niwena amweni nawu mudi Danyeli “mwadiña spiritu chikupu.” Elukili chikupu nawu Danyeli “adiña amukuhwelela, hadiña wakatalaku, nawa hiyamuwaninihu nakutama kudi kwejimaku.” (Dan. 6:3, 4) Eña, nianyuuli abulileña kudifukula kudi Nzambi elukili nawu iwu kambuña aYehova atela kumukuhwelela!

⁴ Kwesekeja naniyi nsañu yaDanyeli, twatela kudihula netu: ‘Antu itwabulaña kupompa nawu ammonaña ñahi? Komana añiluka nawu nazataña chikupu nawa atela kunkuhwelela?’ Muloñadi chitwatela kwakwila awa malwihu? Muloña twaletaña kalemesha hadi Yehova neyi antu atukuhwelela.

5. Muloñadi Hananiya chamukuhweleleliwu?

⁵ Mu 455 B.C.E., hanyima yakwila Nguvulu Nehemiya natuñululi dehi mpwembu jaYerusalema, watondeli amayala ashindamenewa akuhemba musumba. Hadi antu ejima, Nehemiya watondeli Hananiya kwikala mukulumpi waMpwembu. Bayibolu yamulumbulula Hananiya nawu “iyala akuhweleleliwu nankashi nawa wamutiyileña  Nzambi walala woma kubadika antu amakwawu amavulu.” (Nehe. 7:2) Hananiya wazatili nañovu mudimu wamwinkeliwu muloña wamukeñeli Yehova nawa hakeñeleña kumuneñeshaku. Iyi yilwilu yinateli kutukwasha ninetu kwikala anshindamenewa mumudimu waNzambi.

6. Tikikusa wamwekeseheli ñahi nindi hibwambu dakapostolu Pawulu akuhweleleliyi?

⁶ Talenu chakutalilahu chikwawu chaTikikusa, ibwambu dakapostolu Pawulu akuhweleleliyi. Hampinji yamukasiliwu Pawulu mwitala, washindameneni hadi Tikikusa, wamulumbulwili nindi ‘mukakukalakala washinshika.’ (Efwe. 6:21, 22) Pawulu wamukuhweleleli, wamuzatishileña hakutemesha nyikanda kudi amanakwetu muEfwesesa nimuKolosi nawa nikukolesha nikuyikundeja. Tikikusa natwanukishi amayala ashinshika nawa ashindamenewa atwakamenaña kuspiritu makonu.—Kol. 4:7-9.

7. Yumanyi yitwatela kwila hakwila akulumpi niankoñi akuzatila atukuhweleleña muchipompelu?

⁷ Makonu twayisakililaña akulumpi niankoñi akuzatila. Kufwana Danyeli, Hananiya niTikikusa, azataña nyidimu yawu namuchima wejima. Chakutalilahu, neyi tunayi nakupompa kupompa kwamukachi kamulungu, twelukaña netu yibalu yejima yakupompa anenki antu atela kuyihana. Nawa akulumpi asakililaña nankashi neyi antu anenkiwu jimpanji aloñesha chiwahi nawa ajihana! Tuhanenu chakutalilahu, twakañanyaña wanyi kutambika atudizi etu aBayibolu kukupompa kwakunsa yamulungu, nakuchiina netu hekwawu manakwetu najimbaliku kuloñesha mpanji yawantu amavulu. Nawa twelukaña netu nyikanda yakuzatisha mumudimu wakushimwina yidi kwoku. Awa amanakwetu ashinshika atwakamenaña chikupu nawa twamusakililaña Yehova hakutwinka amayala amuchidiwu! Hanu dinu, yumanyi yitwatela kwila kulonda antu atukuhweleleña?

8. Tunateli kwikala ñahi nahakukumina neyi tunakukeña kwiluka nsañu yawantu amakwawu? (Yishimu 11:13)

⁸ Twayikeña amanakwetu niahela nawa twafwilaña kwiluka chinakuhandawu. Ilaña twatela kwikala nahakukumina ninakalemesha hansañu yakujinda yinatulejiwu. Antu amakwawu muchipompelu chawakaKristu akusambila adiña “akamatuñu, akakudiñija munsañu jawakwawu nikuhosha yuma yatela kubula kuhoshawu.” (1 Tim. 5:13) Hitwatela kuyimbujola hela hantiku. Indi neyi muntu atuleja nsañu yakujinda nawa nakuhweleli nindi hitukulejaku muntu wacheñiku. Chakutalilahu, muhela nateli kutuleja nsañu yayikatu yakatayi hela kukala kukwawu kunakumonayi, nawa atuleja nindi bayi mulejaku muntu mukwawuku. Twatela kuhemba kajindilu. * (Tañenu Yishimu 11:13.) Ichi tuhanjekenu hayuma yikwawu yinakumwekesha nawu chalema kuhemba kajindilu.

9. Yumanyi yatela kwilayi muntu wamuchisaka kulonda amukuhweleleña?

⁹ Muchisaka. Muntu wejima muchisaka watela kuhemba kajindilu, hansañu yinakundami chisaka. Chakutalilahu, muhela nateli kwikala nachilwilu chamuseheshaña nfumwindi. Komana nateli kulejaku antu amakwawu nakumutiyisha nsonyi? Inehi! Wamukeña  ñodindi nawa kwila ela chuma chikumutiyisha ñodindi kutama nehi. (Efwe. 5:33) Atwansi akeñaña kuyilemesha. Anvwali atela kwiluka chumichi. Bayi ayisawishaña anyanawu kuhitila mukulejaku antu amakwawu yiluwa yawuku. (Kol. 3:21) Anyana niwena atela kwikala nakajindilu, bayi asololaña nsañu yinateli kusawisha antu amuchisaka kudi antu amakwawuku. (Kuhit. 5:16) Neyi muntu himuntu muchisaka ahembaña nsañu yamuchisaka, chisaka chikwikala chanuñañana.

10. Yumanyi yabombela mukwikala ibwambu walala? (Yishimu 17:17)

¹⁰ Muwubwambu wetu. Mpinji yimu hela yikwawu, twayilejañaku amabwambu jetu nsañu yakujinda. Ilaña mpinji yikwawu chakalaña. Hadaha twenjilila wanyi kulejaku antu amakwawu yuma yidi mumuchima wetu, nawa neyi twiluka netu ibwambu detu walejaku amakwawu nsañu yitwamuleja, chatuneñeshaña. Munjila yikwawu, twatiyaña kuwaha nankashi neyi muntu ahemba kajindilu! Owu muntu wukwikala “ibwambu walala.”—Tañenu Yishimu 17:17.

11. (a) Akulumpi niañodijawu amwekeshaña ñahi nawu atela kuyikuhwelela? (b) Chumanyi chitunateli kudizila kudi mukulumpi wahanjekeli nsañu yakujinda yachipompelu nkumininaku aya nakudiwana nachisaka? (Talenu mwevulu.)

¹¹ Muchipompelu. Akulumpi ahembaña kajindilu adi neyi “iluña mwakuswama mpepela, iluña mwakwiyama” amanakwawu. (Isa. 32:2) Tweluka netu twatela kwikala akasunuka kuhosha nanawa amanakwetu, nakukuhwelela netu akuhemba nsañu yitunayileji. Hitwayikanjikijaña netu atulejiku nsañu yakujindaku. Kubombelahu, twayihamekaña añodi jawakulumpi muloña hiyayikanjikijaña anfumu jawu kushimuna nsañu yakujindaku. Chachiwahi nankashi kubula kumulejaku ñoda mukulumpi nsañu yinakundami amanakwetu niahela. Ñoda mukulumpi wumu wahosheli nindi: “Namusakililaña nankashi nfumwami  chahembañayi nsañu yawantu ayaña nakubiñawu hela anakukeñeka kuyikwasha kuspiritu, hela kushimuna majina awu. Chikuwaha neyi abula kunlejaku nsañu yinukubula kwilahu chuma chidi chejima. Nahanjikaña chachiwahi nawantu ejima muchipompelu. Nawa nakuhwelelaña nami neyi nimulejaku nfumwami chinakutiya nikukala kunikweti, neluki nami wukuhemba kajindilu.” Hela chochu, wejima wetu tunakukeña kutukuhwelela. Chilwilwinyi chinateli kutukwasha kulonda atukuhweleleña? Tuhanjekenu hayilwilu yitanu.

12. Tukuhosheladi netu kukeña dikwaleteshaña muntu kukuhwelela mukwawu? Shimunenu chakutalilahu.

¹² Kukeña dikwaleteshaña muntu kukuhwelela mukwawu. Yesu wahosheli nindi nshimbi jasweja kubadika jiyedi hikumukeña Yehova nikukeña mukwenu. (Mat. 22:37-39) Chineli Yehova amukuhwelela, kukeña kutwamukeña kukutukojeja twimbujoli chakutalilahu chindi chachiwahi. Chakutalilahu, kukeña kutwakeña amanakwetu niahela kukutuletesha kuhemba nsañu yakujinda yinatulejiwu. Bayi tushimuna nsañu yikuletesha ekali mukukala, yikuyisawisha hela yikuyikatishaku.—Yow. 15:12.

13. Kudizoza kwatukwashaña ñahi kulonda antu atukuhweleli?

¹³ Neyi twikala adizoza, antu akutukuhwelelaña. MukaKristu wadizoza hakeñaña kutiyisha akwawu kuwaha kuhitila mukwikala watachi kushimuna nsañu yakujindaku. (Fwili. 2:3) Hadimwekeshaña nindi walema kuhitila mukuhosha nindi neluki nsañu yimu yakujindaku. Kudizoza kukutukwasha cheñi kubula kutandisha nsañu yabula kushimunawu muBayibolu hela munyikanda yetu yashindamena haBayibolu.

14. Kashinshi kanateli kutukwasha ñahi hakwila nawu atukuhweleli?

¹⁴ Kashinshi kanateli kukwasha mukaKristu kwiluka “mpinji yakumwena nimpinji yakuhosha.” (Mukwa. 3:7) Antu amakwawu muyisemwa yikwawu ahoshaña nawu: “Kuhosha hisiliva, ilaña kumwena hiwuru.” Munjila yikwawu, kudi mpinji yatela kumwenayi muntu bayi kuhoshaku. Nawa Yishimu 11:12 yahosha nawu: “Muntu wukweti kashinshi kakeni wadimwenenañahu kwindi.” Talenu chakutalilahu. Mukulumpi wumu avula kumulomba nawu akwashi yipompelu yikwawu nakukala kukwetiwu. Mukulumpi mukwawu wahosheli haniyi nsañu nindi, “Mpinji yejima wekalaña wasoñama kulonda abuli kushimuna nsañu yakujinda yayipompelu yikwawu.” Izanvu dawakulumpi mwazatilañawu damulemesha muloña wakashinshi kindi. Eluka chikupu nawu hanateli kushimuna nsañu yakujinda kudi amakwawuku.

15. Shimunenu chakutalilahu chinakumwekesha nawu kushinshika kunateli kuletesha antu amakwawu kutukuhwelela.

¹⁵ Kushinshika hichilwilu chinateli kutukwasha hakwila nawu antu atukuhweleleña. Twakuhwelelaña muntu washinshika muloña tweluka netu mpinji yejima wahoshaña mwalala. (Efwe. 4:25; Heb. 13:18) Chakutalilahu, twili netu munakukeña kuwahishaku ntañishilu yenu. Dichi muleja muntu nenu enzi nakutiyilila kumpanji yenu nawa ayileji himwatela kuwahisha. Hinyi imwatela kukuhwelela nenu wukuyileja himwatela kuzatila? Muntu wukuyileja yuma yimunakukeña nenu mutiyi tahindi wukuyileja chalala? Muneluki ñakwilu. Bayibolu yahosha nawu:  “Kuzuwila kwahatooka kwakuwahi kubadika kukeña kwakusweka. Yilonda yakukukatisha kudi ibwambu yashinshika.” (Yish. 27:5, 6) Hela chakwila chikwikala chakala kutiya hakusambila, chuma chikutulejayi ibwambu detu chakadi kuhita mumbadi chikatukwasha mukuhita kwampinji.

16. Yishimu 10:19 yamwekeshaña ñahi nawu chalema kudiyuula?

¹⁶ Twatela kwikala nachilwilu chakudiyuula neyi tunakukeña netu antu atukuhweleleña. Ichi chilwilu chikutukwasha kuhemba nyivumbu yetu kulonda tubuli kushimuna nsañu yakujinda. (Tañenu Yishimu 10:19.) Tunateli kwikala mukweseka sweje-e neyi tunakuhanjeka kuzatisha njila jakuhanjekelamu jaha intaneti. Neyi kubabala nehi, tunateli kuleja antu amavulu nsañu yakujinda. Neyi tutudika oyu nsañu haintaneti, tuneluki wanyi antu chakayizatishawu oyu nsañu hela yuma yatama yikafumamu. Kudiyuula cheñi kukutukwasha kumwenahu neyi akakudimbulula anakukeña nawu tushimuni nsañu yikuyisha amanakwetu niahela muwubanji. Chumichi chinateli kumwekana neyi atupokola anakutwihula mumatuña mwakaanishawu hela mwalekeshawu mudimu wetu. Tunateli kuzatisha chishina chahosha nawu “nukukasa kanwa kami namwonji” haniyi mpinji nimuyuma yikwawu. (Mas. 39:1) Hela chakwila tudi nachisaka chetu, amabwambu jetu, amanakwetu niahela, hela nawantu acheñi, twatela kuzata nañovu kulonda atukuhweleleña. Nawa hakwila atukuhweleli, twatela kudiyuulaña.

17. Tunateli kukwasha ñahi ejima muchipompelu adikuhweleleña wumu namukwawu?

¹⁷ Twamusakililaña nankashi Yehova hakutubomba muchisaka chawamanakwetu akweti kukeña nawa itwatela kukuhwelela! Dichi wejima wetu twatela kuyikuhwelela awa amanakwetu niahela. Neyi wejima wetu hamuntu-hamuntu tukumwekeshaña kukeña, kudizoza, kashinshi, kushinshika nikudiyuula, tukuleteshaña ejima kudikuhwelela wumu namukwawu muchipompelu. Twatela kuzata nañovu kulonda antu atwalekeñahu kutukuhwelela. Tumwimbujoleña Nzambi yetu, Yehova, nikutwalekahu kumwekesha netu atela kutukuhwelelaña.