Kwesekeja na 1 AKorinda 15:8, Pawulu wahosheli nindi: “Nkumininaku wamwekeni nikudi ami, ami nadiña neyi mwana wunavwaliki wamwisu.” Kunyima, twalumbulwileña netu Pawulu watela wateneneña chuma chamumwekeneni hampinji yamweniyi chimwenu chaYesu mukulema kwamwiwulu. Chadiña tuhu neyi anamwinki kukooleka kwakuvwalika cheñi hela kusañuka, nawumi wakuspiritu henohu kuchidi mpinji, kuchidi nkulakaji yayaaka hakwila kusañuka kwamuchidiwu kwikaliku. Hela chochu, hanyima yakusandujola chikupu, tunamoni netu twatela kuhimpa chitwalumbulwileña iyi vasi.

Diimu tuhu, Pawulu nakuhosha hachuma chamumwekeneni hampinji yabalumukiliyi nakwikala mukaKristu. Hanu watalishili mudihi chahosheliyi nindi wadiñi neyi “mwana wunavwaliki wamwisu”? Kudi yuma yayivulu yaletesheli ahoshi mwenimu.

Wabalumukili munjila yakukasumwisha nawa yakuhayamisha. Mama yawantu wavwalaña mwana wamwisu hampinji yinabuli kukuhwelelayi. Hayileñayi Sawulu (atachikili kutena nawu Pawulu) kuDamakasa nakukabisha akaKristu, welukili wanyi nindi wukumumona Yesu asañwiliwu muchimwenu. Pawulu wahayamini chikupu chabalumukiliyi nawa akaKristu ayileña nakukabishayi muniwu musumba niwena ahayamini. Kubombelahu, chuma chamwekeni chadiña chakuhayamisha chakwila wekalili mputa mesu hakampinji kantesha.—Yilw. 9:1-9, 17-19.

Wabalumukili “hampinji yabula kutelela.” Izu dadeni dachiGiriki dabalumunawu nawu “mwana wunavwaliki wamwisu” anateli cheñi kudibalumuna nawu “mwana wunavwaliki hampinji yabula kutelela.” Bayibolu yaJerusalem yabalumuna nawu: “Chadiña tuhu neyi navwalikili hampinji yabulili kukuhwelelawu antu.” Hampinji yabalumukiliyi Pawulu, Yesu wadiña wafunta dehi mwiwulu. Kwambukaku nawantu ateneniyi Pawulu mumavasi anafumihu, yena wamumweni wanyi Yesu asañwiliwu henohu kanda afunti mwiwulu. (1 Kor. 15:4-8) Yesu chamwekeniyi kudi Pawulu hampinji yabuliliyi kukuhwelelayi chamukwashili Pawulu kumumona hela chakwila chamwekeni neyi yadiña “mpinji yabula kutelela.”

Waditeneneña yamweni munjila yakudikehesha. Kwesekeja nawantu adiza Bayibolu, mazu anazatishiyi Pawulu aha anakumwekesha nawu wadikehesha. Neyi dichuma chatoñojokeleñayi Pawulu, welukili nindi hateleleli ilu luwi lwamumwekesheleliwuku. Dichi, watwalekelihu kuhosha nindi: “Ami yami nakehelamu hakachi kawapostolu, nawa ami hinashikilimu kuntena nawu kapostoluku, muloña nakabishili chipompelu chaNzambi. Ilaña naluwi lwaNzambi lwasweja, nekali kapostolu.”—1 Kor. 15:9, 10.

Muwihi, chinamwekani neyi Pawulu wateneneña njila yakukasumwisha nawa yabuliliyi kukuhwelelayi yamwekeniyi Yesu kudi yena, njila yabalumukiliyi yabulili kukuhwelelayi hela chelukiliyi nindi wadiña washikilamu wanyi kumona ichi chimwekeshu. Hadi iyi yuma yitunahoshihu tuneluki wanyi chuma chaletesheli ilaña Pawulu walemesheli ichi chawaana. Chumichi chamukwashili chikupu kwiluka nindi Yesu amusañwili mudi afu. Dichaletesheli yashimuneña ichi chuma chamumwekeneni mukuhayamisha kudi antu ashimwinineñayi hakusañuka kwaYesu.—Yilw. 22:6-11; 26:13-18.