1. Kwesekeja naMatewu 7:13, 14, muloñadi chitukuhoshela netu tudi halwendu?

WEJIMA wetu tudi halwendu. Tunakufwila kushika mwituña dadiha mwakekala chiyuulu chaYehova. Ifuku nifuku twafwilaña kwenda munjila yaya kuwumi. Ilaña neyi chochahosheli Yesu iyi njila yanyanya nawa yakala kwendamu. (Tañenu Matewu 7:13, 14.) Twawanina wanyi, dichi chinateli kwikala chaswayi kufuma muniyi njila.—Ñal. 6:1.

2. Tukuhanjekadi muchinu chibaaba? (Talenu chikasha chinakwila nawu: “ Kudizoza Kwatukwashaña Kuhimpa Yilwilu Yetu.”)

² Neyi tunakukeña kutwalekahu kwenda munjila yanyanya yaya kuwumi, twatela kuhimpaña yitoñojoka yetu niyilwilu yetu. Kapostolu Pawulu wayikolesheli akwakristu amuKorinda kutwalekahu ‘kolola yitoñojoka yawu.’ (2 Kor. 13:11) Iku kufumba kunatukundami ninetu. Muchinu chibaaba tukuhanjeka Bayibolu chiyinateli kutukwasha kuhimpa yilwilu yetu nichinateli kutukwashawu kudi akwetu apama kutwalekahu kwenda munjila yaya kuwumi. Tukuhanjeka cheñi yuma yinateli kuletesha chitukalili kulondela wunlomboli wutwatambwilaña mukuloñesha kwaYehova. Tukuhanjeka cheñi kudizoza chikunateli kutukwasha kuhimpa nikutwalekahu kumukalakela Yehova namuzañalu.

3. Izu daNzambi dinateli kuyikwasha ñahi?

³ Chatukalilaña kwiluka chitwatiyaña nichidi yitoñojoka yetu. Muchima wetu wadimbanaña dichi chinateli kutukalila kwiluka yuma yiwunateli kutukojeja kwila. (Yere. 17:9) Chinateli kwikala chaswayi kudidimba etu aweni “nayitoñojoka yakutwamba.” (Yak. 1:22) Dichi tuzatisheña Izu daNzambi kulonda tudishinshikeña. Izu daNzambi datukwashaña kwiluka  chekala wuntu wetu wamukachi, chidi neyi “yitoñojoka niyuma yafwilaña muchima.” (Heb. 4:12, 13) Munjila yikwawu, Izu daNzambi didi neyi ikina dazatishañawu kumona nachu mukachi kamujimba datenañawu nawu X-ray, datukwashaña kwiluka chitwekala mukachi. Ilaña twatela kwikala adizoza hakwila tuzatishi kufumba kwekala muBayibolu hela kwafumaña kudi antu amwimenañaku Nzambi.

4. Chumanyi chinakumwekesha nawu Mwanta Sawulu wekalili wadivwimba?

⁴ Chakutalilahu chaMwanta Sawulu chamwekeshaña chuma chinateli kufumamu neyi tubula kwikala adizoza. Sawulu wadinkeli wanta chakwila wakaanini kwiteja nindi naluwañeshi. (Mas. 36:1, 2; Hab. 2:4) Chumichi chamwekeni chelili Yehova yamuleji chatela kwilawu neyi anayishindi dehi aAmaleki. Hela chochu, Sawulu hamwovwahilili Yehovaku. Sawulu wakaanini kwiteja chiluwa chindi chelili kaprofwetu Samweli yamulejimu nindi naluwañeshi. Ilaña wadiyiñishili nindi waluwañesheli wanyi nawa wahosheli nindi antu diwu amukanjikijili kwila ichi chuma. (1 Sam. 15:13-24) Hakusambila Sawulu wamwekesheli chilwilu chochimu. (1 Sam. 13:10-14) Chawushona, wadivwimbili mumuchima windi. Hahimpili yitoñojoka yindiku, dichi Yehova wamufumbili nawa wamukaanini.

5. Chumanyi chitunateli kudizila kudi Sawulu?

⁵ Hakwila tudizili kudi Sawulu, twatela kudihula netu: ‘Neyi nitaña kufumba kudi Mwizu daNzambi, komana nadiyiñishaña ami aweni? Komana nadiwulaña yuma yinateli kufumamu? Komana natwikaña akwetu nyiloña hayuma yinelaña?’ Neyi twakula netu eña hakachi kanawa malwihu, twatela kuhimpa yitoñojoka yetu niyilwilu yetu. Muloña neyi tubula kuhimpa, tunateli kwikala adivwimba nawa Yehova wukukaana kwikala ibwambu detu.—Yak. 4:6.

6. Shimunenu chaambu chadiña hakachi kaMwanta Sawulu naMwanta Davidi?

⁶ Talenu chaambu chadiña hakachi kaMwanta Sawulu naMwanta Davidi, muntu wakeñeli ‘nshimbi jaYehova.’ (Mas. 1:1-3) Davidi welukili nindi Yehova wamwinaña antu adizoza, ilaña wadikañaña nawantu adivwimba. (2 Sam. 22:28) Dichi Davidi wetejeli nshimbi jaNzambi kuhimpa yitoñojoka yindi. Wasonekeli nindi: “Nukumukiswila Yehova nkisu, diyi nanleji maana: chalala muchima wami wanlejaña kashinshi nawufuku.”—Mas. 16:7.

7. Tunateli kwila ñahi neyi twadizoza?

⁷ Neyi twadizoza tukwiteja Izu daNzambi kuhimpa yitoñojoka yetu henohu kanda tukoñi yuma yatama. Izu daNzambi dikwikala neyi izu dinakutuleja nawu: “Njila iyi, endenu mwomwenimu.” Dikutusoñamisha neyi tutachika kukoña yuma yatama. (Isa. 30:21) Neyi tukwilaña yuma yatulejañayi Yehova, mwakafuma yuma yayiwahi. (Isa. 48:17) Chakutalilahu, hitukutiyaña nsonyi muloña wakutufumba kudi manakwetu hachuma chituneliku. Tukuswina kwakwihi naYehova muloña tuneluki netu nakutwimona neyi mwana wakeñewa.—Heb. 12:7.

8. Neyi chinashimuniwu haYakoba 1:22-25, tunateli kuzatisha ñahi Izu daNzambi neyi chibanjilu?

⁸ Izu daNzambi didi neyi chibanjilu kudi etu. (Tañenu Yakoba 1:22-25.) Etu amavulu twatalaña muchibanjilu ntetemena henohu kanda tufumi hetala. Twaditalaña muchibanjilu kulonda tumoni hitwatela kudiwahisha henohu antu kanda atumoni. Munjila yoyimu, neyi tutañaña Bayibolu mpinji yejima, tukwiluka chitwatela kuhimpila yitoñojoka yetu niyilwilu yetu. Amavulu atañaña nsona yefuku nifuku ntetemena henohu kanda afumi hetala. Atoñojokaña hayuma yatañañawu. Dichi ifuku dejima awanaña njila mwatela kuzatishilawu kufumba kwaMwizu daNzambi. Kubombelahu,  twatela cheñi kudizaña nikutoñojoka chikupu Hezu daNzambi ifuku nifuku. Chumichi chamwekanaña neyi chapela, ilaña hichuma chidi hakachi kayuma yasweja kulema yitwatela kwila kulonda tutwalekihu kwenda munjila yanyanya yakuwumi.

9. Chumanyi chaletesheli ibwambu denu yayololi?

⁹ Mwatachikilihu kwila yuma yaluwañesheleña wubwambu wenu naYehova? (Mas. 73:2, 3) Neyi ibwambu denu wapama wenjili nakuyolola, komana mwamutiyilili nikuzatisha kufumba? Neyi dichi mwelili, mwelili chiwahi, chakadi nikujina mwasakililaña muloña wayisoñamishili.—Yish. 1:5.

10. Chumanyi chimwatela kwila neyi mukwenu yayifumba?

¹⁰ Izu daNzambi datwanukishaña nawu: “Yitu yakudi mukwenu wakukeña yikweti kashinshi.” (Yish. 27:6) Awa mazu anatalishi mudihi? Talenu ichi chakutalilahu: Fwikijenu munakukeña kukiluka mukwakwa mudi nyotoka yayivulu nawa munashi maana hafoni yenu. Mutachika nikukiluka mukwakwa chakadi kutala mbadi jejima jiyedi. Hohenohu ibwambu denu yayikwata nihachikasa nakuyikokela cheñi kunsa. Wayikwatisha nañovu chakwila hachikasa chenu hanakwabuki, ilaña chuma chelayi chayipulwisha kumotoka. Hela chakwila munkwazu wayikwabulayi wukukata hadi mafuku amavulu, komana mukuhila nenu mukwenu wayikwata? Inehi. Mukumusakilila muloña wayipulwisha. Munjila yoyimu, neyi mukwenu yayileja nindi nhoshelu yenu niyilwilu yenu yesekana wanyi nanshimbi jaNzambi, munateli kuneña. Ilaña bayi muhila muloña wakuyifumbaku. Neyi muhila chikwikala hiwusupi. (Mukwa. 7:9) Ilaña musakililenu ibwambu denu muloña wamwekesha kuhamuka hakwila yayikwashi.

11. Chumanyi chinateli kuletesha muntu kukaana kufumba neyi ibwambu dindi namufumbi?

¹¹ Chumanyi chinateli kuletesha muntu kukaana kufumba neyi ibwambu dindi namufumbi? Kudinka wanta. Antu adinka wanta akeña “yuma yakeñañawu kutiya namatu awu.” Akeña wanyi “kutiyilila kuchalala.” (2 Tim. 4:3, 4) Atoñojokaña nawu akweti maana nawa alema kubadika akwawu, dichi kwosi muntu watela kuyifumbaku. Hela chochu, kapostolu Pawulu wasonekeli nindi: “Neyi muntu nakutoñojoka nindi walema henohu wamukunkulwayi, nakudidimba yomweni.” (Ñal. 6:3) Mwanta Solomoni walumbulwili chiwahi iyi nsañu. Dichi wasonekeli nindi: “Mukwenzi wakazweñi wukweti maana wabadika mwanta wakashinakaji wasupa wakalejewaña kudi akwawu.”—Mukwa. 4:13.

12. Neyi chashimunawu haAñalija 2:11-14, chumanyi chitwadizilaña kudi kapostolu Petulu?

¹² Talenu chelili kapostolu Petulu chelili amufumbili hamesu awantu kudi kapostolu Pawulu. (Tañenu Añalija 2:11-14.) Petulu wadi kumuhilila Pawulu muloña wanochu chahosheliyi niluña dahosheleliyi. Ilaña Petulu wadiña namaana. Wetejeli kufumba nawa hamuhembeleli Pawulu nkunyiku. Nkumininaku wamuteneni Pawulu nindi ‘manakwetu itwakeña.’—2 Pet. 3:15.

13. Chumanyi chitwatela kwanukaña neyi tunakufwila kufumba muntu?

¹³ Chumanyi chimwatela kwanukaña neyi munakukeña kufumba mukwenu? Henohu kanda muhoshi namukwenu, dihulenu nenu, “Komana nadimonaña nami ‘naswejesha nankashi kuloña’?” (Mukwa. 7:16) Muntu wadimonaña nindi wasweja kuloña, hasompeshaña akwawu kushindamena hanshimbi jaYehovaku, ilaña wayisompeshaña nayitoñojoka yindi nawa hakweti luwiku. Neyi munadishinshiki dehi nawa muchidi kukeña kuhanjeka nindi,  ilukenu chuma chinaleteshi nawa zatishenu malwihu kulonda yamoni mwaluwañeshayi. Mukwashenu kuzatisha Nsona nawa mwatela kwanuka nenu mukwenu akamusompesha kudi Yehova bayi enuku. (Rom. 14:10) Zatishenu maana ekala Mwizu daNzambi nawa neyi munakufumba muntu mwekeshenuña wushona neyi chelileñayi Yesu. (Yish. 3:5; Mat. 12:20) Muloñadi? Muloña Yehova wakatwila neyi chitwayilaña akwetu.—Yak. 2:13.

14. Yumanyi yatuloñeshelaña kuloñesha kwaNzambi?

¹⁴ Yehova watulombolaña munjila yaya kuwumi kuhitila mukuloñesha kwindi kwaheseki, iku Kuloñesha kwatuloñeshelaña mavidiyo, nyikanda nikupompa kwatukwashaña kuzatisha kufumba kwaMwizu daNzambi. Iyi nsañu yashindamena haNsona. Izanvu Dalombolaña dashindamenaña haspiritu yajila neyi dinakufuukulahu chakuzata mudimu wakushimwina. Hela chochu, Izanvu Dalombolaña dahitulukaña mpinji yejima muyuma yafuukwiliwu kulonda amoni neyi kudi jatela kuhimpawu. Muloñadi? Muloña “yuma yamukaayi yinakuhimpika,” nawa kuloñesha kwaNzambi kwatela kwendela hamu nayuma yinakuhimpika.—1 Kor. 7:31.

15. Kukalanyi kunamoniwu akwakushimwina amakwawu?

¹⁵ Chakadi nikujina, neyi kudi kuhimpika hantañishilu yetu yashindamena haBayibolu ninshimbi, twayilondelaña. Hanu dinu twelaña ñahi neyi mukuloñesha kwaYehova mudi kuhimpika kunateli kuhimpa yuma yimu muchihandilu chetu? Chakutalilahu, hadi yaaka yinahitihu mali aneñili nankashi kukutuña nikuwahisha matala akudifukwilamu. Dichi Izanvu Dalombolaña dafuukwilihu nawu yipompelu yayivulu yizatisheña Itala daWanta dimu. Chinafumimu yipompelu yayivulu anayibombi hamu nawa Matala aWanta amakwawu anayilandishi. Nawa awa mali anakuyizatisha kutuñamu Matala aWanta kumaluña kunabuli Matala aWanta. Neyi mwashakamaña kumaluña kunalandishiwu Matala aWanta hela kunabombiwu yipompelu, chinateli kuyikalila kwinjilila iyi ntanjikilu yayiha. Akwakushimwina amakwawu ichi anakwenda yintampu yayilehi kulonda ayi nakupompa. Amakwawu atuñiliku hela adiña nakuwahisha awa Matala aWanta anateli kwihula muloña wunakulandishilawu. Anateli kutoñojoka nawu akisili hohu  mpinji yawu niñovu yawu. Hela chochu, anakulondela iyi ntanjikilu yayiha nawa twatela kuyihameka.

16. Kuzatisha kufumba kudi haAkolosi 3:23, 24 kunateli kutukwasha ñahi kutwalekahu kwikala namuzañalu?

¹⁶ Tukwikalaña namuzañalu neyi twanukaña netu mudimu wejima wutwazataña tunakumukalakela Yehova nawa netu diyi wunakulombola kuloñesha kwindi. (Tañenu Akolosi 3:23, 24.) Mwanta Davidi wamwekesheli chakutalilahu chachiwahi hakuhanaku yawaana yakutuña nachu tembeli. Wahosheli nindi: “Ami yaminyi niantu ami hiyanyi mwaka tumoni ñovu jakutiya kuwaha kwakulambula mwejimimu? Muloña yuma yejima yafuma kudeyi tunakwinki yafuma kuchikasa cheyeyi aweni.” (1 Kushi. 29:14) Neyi tuhana yawana, ninetu twamwinkaña Yehova yuma yafumini kumakasa indi. Hela chochu, Yehova watiyaña kuwaha neyi tuzatisha mpinji yetu, ñovu nimaheta etu kulonda tukwashi mudimu wunakukeña kuzatayi.—2 Kor. 9:7.

17. Muloñadi chimwatela kubulila kuneña neyi kudi yuma yimwatela kuhimpa?

¹⁷ Hakwila nawu tutwalekihu kwenda munjila yanyanya yakuwumi, wejima wetu twatela kulondela mumahaji aKristu. (1 Pet. 2:21) Neyi kudi yuma yimwatela kuhimpa, bayi muneñaku. Chumichi chikumwekesha nawu munakukeña kulondela wunlomboli waYehova. Mwatela kwanuka nenu Yehova weluka nindi twawanina wanyi nawa hanakukeña nindi twileña yuma yejima neyi chelileñayi Yesuku.

18. Chumanyi chitwatela kwila hakwila nawu tukashiki kutunakuya?

¹⁸ Dichi, wejima wetu tusheña maana hayuma yidi kumbidi nawa tufwileña kuhimpa yitoñojoka yetu, yilwilu yetu niyuma yitwelaña. (Yish. 4:25; Luka 9:62) Twikalenu adizoza nawa ‘tutwalekenuhu nakuzañalala nikolola yitoñojoka yetu.’ (2 Kor. 13:11) Neyi twila yumiyi, “Nzambi wakukeña nawa wakuwunda wukwikalaña [nanetu].” Wukutukwasha kwikala namuzañalu chayinu mpinji nawa wakatwinka wumi mwituña dadiha.