1. Indi 2 Akorinda 3:1-3 yinateli kutukwasha ñahi kwiluka netu hikukooleka kwikala namudimu wakudizisha antu kulonda apapatishewi? (Talenu mwevulu wudi hakava.)

MWATIYAÑA ñahi neyi mumona kadizi waBayibolu wamuchipompelu chenu yapapatishewa? Mwazañalalaña chikupu. (Mat. 28:19) Nawa neyi yenu mwadizileña naniwu kambanji wamuha, mukutiya kuwaha nankashi hakumona nenu napapatishewi. (1 Tes. 2:19, 20) Atumbanji amaha anapapatishewi ‘hinyikanda yakuhameka nachu’ bayi kudi antu ayidizishileña hohuku, ilaña nichipompelu chejima.—Tañenu 2 Akorinda 3:1-3.

2. (a) Lwihwinyi lwalema lutwatela kutoñojokañahu, nawa muloñadi? (b) Kadizi waBayibolu hinyi? (Talenu tumazu twaheshina.)

² Hadi yaaka yiwana yinahitihu twatambwilileña lipoti yawatudizi aBayibolu * mwahita kaayi kejima akushika 10,000,000 kakweji nikakweji. Nawa muyeniyi yaaka antu akushika 280,000 apapatisheweleña chaaka nichaaka nakwikala aYinsahu jaYehova nawa atumbanji twaYesu Kristu. Tunateli kukwasha ñahi amakwawu hakachi kanawa atudizi aBayibolu kulonda apapatishewi? Yehova nadiwunjiki nawa nayinki antu mpinji kulonda ekali atumbanji twaKristu, dichi twatela kuzata kwesekeja nahakumina ñovu jetu kulonda tuyikwashi swayi-swayi apapatishewi. Mpinji yinamani dehi.—1 Kor. 7:29a; 1 Pet. 4:7.

3. Yumanyi yitukuhanjekahu muchinu chibaaba kutalisha hakulombola atudizi aBayibolu?

 ³ Chineli chinakukeñeka kwilisha atumbanji chayinu mpinji, ehwili tusanji twanyitayi chakwila kulonda tukwashi atudizi etu aBayibolu kushikahu nakupapatishewa. Muchinu chibaaba nichinalondelihu tukumona yuma yitunateli kudizila kudi apayiniya akulukila, amishonali niankoñi añinza. * (Yish. 11:14; 15:22) Analumbululi yuma yatela kwila antañishi niatudizi awu kulonda amukwashi kadizi waBayibolu kuyilaku hambidi. Muchinu chibaaba tukushinshika yuma yitanu yatela kwila kadizi hikadizi hakwila yapapatishewi.

4. Chumanyi chitwatela kwanukaña kutalisha hakuhanjeka nawantu Bayibolu mukapinji kantesha?

⁴ Amanakwetu niahela amavulu adizaña Bayibolu nawantu iku anemani hachiisu. Hela chakwila iyi hinjila yayiwahi yakusañumwinamu antu kudiza Bayibolu, iku kuhanjeka kwakapinji kantesha nawa hitunateli kuhanjeka nawu mulungu nimulunguku. Hakwila nawu amusañumuni muntu wunamwekeshi mpwila, amanakwetu niahela amakwawu atambulaña nambala yafoni yanona muntu kulonda amutemesheleña hela kumusonekela meseji kulonda ahanjekeña nindi hajiNsona. Anateli kuhanjeka nindi muniyi njila hadi tukweji chakadi iwu muntu kwikala kadizi waBayibolu wunakupaminaku. Komana iwu kadizi waBayibolu nateli kupaminaku nikudihana nikupapatishewa neyi chakwila nakwikala wanyi nampinji yeneni * yakudiza Izu daNzambi? Inehi.

5. Kwesekeja naLuka 14:27-33, Yesu wahosheli nindi yumanyi yinateli kutukwasha mumudimu wetu wakwilisha atumbanji?

⁵ Mpinji yimu, Yesu walumbulwili chuma chatela kwilayi muntu neyi nakukeña kwikala kambanji kindi. Wahosheli hadi muntu wunakukeña kutuña kaposhi nimwanta wunakukeña kuya kunjita. Yesu wahosheli nindi mukwakutuña watela “kusambila kushakama hamaseki nakuchinda mali akuzatishayi” kulonda yamoni neyi wukutwesha kuhwisha kutuña kaposhi kindi nawa cheñi nindi mwanta watela “kusambila kushakama hamaseki” nakumona neyi amashidika indi anateli kulwa njita. (Tañenu Luka 14:27-33.) Munjila yoyimu, Yesu welukili nindi muntu wunakukeña kwikala kambanji kindi watela  kutoñojokahu chikupu chatela kwilayi hakwila yekali kambanji kindi. Muloña wachumichi twatela kukolesha atudizi etu aBayibolu kulonda tudizeña nawu mulungu nimulungu. Tunateli kwila ñahi mwenimu?

6. Yumanyi yitwatela kwila hakwila nawu tukwashi kadizi kuyilaku hambidi?

⁶ Tachikenu kuleheshaku mpinji yakuhanjeka nawantu imwahanjekaña nawu wimeni. Hadaha munateli kubombelahu Nsona yikwawu mpinji yimunamwendeli. Neyi chakwila mwini itala nenjilili dehi kuhanjeka nindi hadi mpinji yayilehi, mwihulenu neyi kudihu iluña kumwatela kushakamaña kulonda mutwalekihu kuhanjeka. Chikwakulayi mwiniitala chikumwekesha neyi chakwila wukweti mpwila yakudiza hela nehi. Hakwila nawu yadizi yuma yayivulu, mwatela kumwihula kadizi neyi chakwila wukukeña nindi mudizeña kayedi mumulungu. Hela chochu, kudi yuma yayivulu yatela kwilayi kubadika kudiza hohu kamu hela kayedi mumulungu.

7. Ntañishi nateli kuloñesha ñahi chiwahi kudiza hikudiza?

⁷ Chineli mudi antañishi, mwatela kuloñeshaña chiwahi kudiza hikudiza. Mwatela kusambila kutaña nsañu yimukuhanjekahu ninsona jidimu. Ilukenu yikuma yamaneni yidimu. Toñojokenu hamutu wakudiza, tunyitu twanyanya, malwihu akudiza, nsona jinashimuniwu nawu “tañenu,” nyevulu yidimu nimavidiyo anateli kuyikwasha kulumbulula nsañu yimukuhanjekañahu. Toñojokenu hadi kadizi wenu nichimunateli kumulumbulwila iyi nsañu kulonda yayitiyi nikuyizatisha.—Nehe. 8:8; Yish. 15:28a.

8. Mazu akapostolu Pawulu adi haAkolosi 1:9, 10 atudizishañadi kutalisha hakulombelaku atudizi etu aBayibolu?

⁸ Chimukuloñeshaña, lombelenuku kadizi wenu kudi Yehova nihayuma yinateli kumukwasha. Lombenu kudi Yehova yayikwashi kutañisha nsañu yidi muBayibolu munjila yinateli kumushika muntu hamuchima. (Tañenu Akolosi 1:9, 10.) Toñojokenu hayuma yinateli kumukalila kadizi wenu kutiyishisha hela kwiteja. Ilukenu nenu chuma chimunakufwila hikumukwasha kulonda yapapatishewi.

9. Ntañishi nateli kumukwasha ñahi kadizi kuloñesha kudiza hikudiza? Lumbululenu.

⁹ Tunakuhweleli netu kuhitila mukudiza Bayibolu mpinji yejima, kadizi waBayibolu wukumwekesha kusakilila hayuma yelayi Yehova niYesu nawa wukufwilaña kudizilahu  yuma yikwawu. (Mat. 5:3, 6) Kadizi watela kushaku muchima hakwila nawu yuma yinakudizayi yimukwashi. Hakwila yashiku muchima, mukwashenu yeluki chichalemena kuloñesha kudiza hikudiza kuhitila mukutaña kudiza nikutoñojoka chinateli kuzatishayi oyu nsañu. Ntañishi nateli kumukwasha ñahi kuloñesha? Loñeshenu hamu nakadizi kulonda mumuleji chakwila. * Mulumbulwilenu chatela kuwanayi ñakwilu yamalwihu imunakudiza, nawa mulejenu kufunda yikuma hela nyikuku hadi yikuma chikunateli kumukwasha kwanuka ñakwilu. Kuhiñahu mulejenu yakuleña ñakwilu mumazu indi. Neyi yakulaña mumazu indi, mukwiluka neyi chakwila natiyishishi nsañu yimunadizi. Hela chochu, kudi cheñi yuma yikwawu yimwatela kumukwasha kadizi kwila.

10. Muloñadi chichalemena kutaña Bayibolu mafuku ejima, nawa chumanyi chatela kwilayi kadizi hakwila nawu yuma yinakutañayi muBayibolu yimukwashi?

¹⁰ Kubombela hakudiza nantañishi yindi mulungu nimulungu, kadizi watela kuhetelamu neyi nakwila yuma yimu kankawindi mafuku ejima. Watela kuhanjekaña naYehova. Munjilanyi? Kuhitila mukutiyilila nikuhosha naYehova. Nateli kumutiyilila Nzambi kuhitila mukutaña Bayibolu mpinji yejima. (Yosh. 1:8; Mas. 1:1-3) Mulejenu chakuzatisha “Ndandanda yaKutaña Bayibolu” yidi ha jw.org^®. * Hakwila nawu yuma yinakutañayi muBayibolu yimukwashi, mukwashenu yatoñojokeña chikupu hayuma yinakumudizisha Bayibolu kutalisha hadi Yehova nichinateli kuyizatishayi muchihandilu chindi.—Yilw. 17:11; Yak. 1:25.

11. Kadizi nateli kwiluka ñahi chakulomba chiwahi, nawa chalemenadi kulomba kudi Yehova mpinji yejima?

¹¹ Mukwashenu kadizi wenu kuhosha naYehova kuhitila mukulomba mafuku ejima. Lombenuña chakufuma hamuchima hakutachika nihakukumisha kudiza nawa mutenenuña kadizi wenu mukulomba. Chikutiyañayi chimunakulomba, wukudiza chakulomba kudi Yehova chakufuma hamuchima nawa wukulombaña kuhitila mwijina daYesu Kristu. (Mat. 6:9; Yow. 15:16) Kutaña Bayibolu mpinji yejima (kumutiyilila Yehova) nikulomba (kuhanjeka naYehova) kunateli kumukwasha kadizi wenu kukundama kwakwihi naNzambi. (Yak. 4:8) Neyi yelaña yumiyi,  chikumukwasha kwila yuma yikwawu yikumukwasha kudihana nikupapatishewa.

12. Ntañishi nateli kumukwasha ñahi kadizi kwikala ibwambu daYehova?

¹² Yuma yinakudizayi kadizi hakudiza Bayibolu yatela kushakamaña mumuchima nimuyitoñojoka yindi. Muloñadi? Muloña muchima wetu, munabombeli yuma yitwafwilaña, yitoñojoka nichitwatiyaña chatuleñelaña kwilahu yuma. Yesu wadiña nakutañisha antu nawa antu akeñeli yuma yayitañishileñayi. Ilaña antu adiña cheñi nakumulondela muloña wadiña nakuyishika hamuchima. (Luka 24:15, 27, 32) Kadizi wenu watela kumumonaña Yehova neyi hiMuntu, muntu wunateli kwikala ibwambu dindi, kumumona nindi hiTata yindi, Nzambi yindi nawa Ibwambu dindi. (Mas. 25:4, 5) Mpinji yimunakudiza, hoshenuña nankashi hayilwilu yaNzambi. (Kwid. 34:5, 6; 1 Pet. 5:6, 7) Hamutu wansañu wudi wejima wumunakuhanjekahu, hoshenuña chekalayi Yehova. Mukwashenu kadizi wenu yeluki yilwilu yaYehova, yidi neyi kukeña, luwi niwushona. Yesu wahosheli nindi “lushimbi lwabadika nawa lwakusambila” dilu lwenilu “keñaku Yehova Nzambi yeyi.” (Mat. 22:37, 38) Mukwashenu kadizi wenu yamukeñi chikupu Nzambi.

13. Hanenu chakutalilahu chinateli kumukwasha kadizi kwiluka chekalayi Yehova.

¹³ Himunakuhanjeka nakadizi wenu, mulumbulwilenu chimwamukeñela Yehova. Chumichi chinateli kumukwasha kadizi wenu kwiluka nindi watela kumukeña Nzambi nikwikala ibwambu dindi. (Mas. 73:28) Chakutalilahu, kudihu mukuku wamazu mumukanda wakudizamu hela munsona wunayishiki hamuchima wunakumwekesha kukeña, maana, wuñanji hela ñovu jaYehova? Mulejenu kadizi wenu haniyi nsañu nawa mukwashenu yeluki nindi iwu dimuloña waweni waletesha mumukeñi Tata yetu wamwiwulu. Kudi cheñi yuma yikwawu yatela kwilayi kadizi waBayibolu hakwila yashikihu kupapatishewa.

14. Aheberu 10:24, 25 yatulejaña nawudi kutalisha hakupompa kunateli kumukwasha kadizi waBayibolu kuyilaku hambidi?

¹⁴ Wejima wetu tunakukeña atudizi etu ashikihu kupapatishewa. Njila yimu yalema mutunateli kuyikwashila hikuyikolesha kulonda apompeña mafuku ejima. Antañishi amavulu ahoshaña nawu atudizi apompaña apamaña swayi. (Mas. 111:1) Antañishi  amakwawu ayilejaña atudizi awu nawu kudi yuma yayivulu yinateli kudizawu kukupompa yiyanateli kubula kudizawu hakudiza Bayibolu. Tañenu Aheberu 10:24, 25 nakadizi wenu nawa mulumbulwilenu yuma yinateli kufumamu neyi yayaña nakupompa. Mutalishenu vidiyo yaYumanyi Yamwekanaña Hetala daWanta? * Mukwashenu kadizi wenu yabuleña kujiña kukupompa mulungu nimulungu.

15. Yumanyi yitwatela kwila hakwila nawu tumukoleshi kadizi kuyaña nakupompa mpinji yejima?

¹⁵ Yumanyi yimwatela kwila neyi kadizi wenu kanda yapompeñahu dehi hela neyi wapompaña mpinji yejima wanyi? Hoshenu namuzañalu yuma yimwadiza hakupompa kwafumahu. Neyi yamona chimunakutiya kutalisha hakupompa chikumusañumuna niyena kuya nakupompa. Mwinkenu Kaposhi Kakutalila hela Chihandilu niMudimu Wanetu akwaKristu Mukanda waKupompa wumunakuzatisha hakupompa. Mulejenu yuma yimwakapompa mulungu wunalondelihu nawa mwihulenu yashimuni chibalu chinamutiyishi kuwaha. Yuma yikumonayi kadizi wenu neyi yapompa katachi yikubadika yuma yejima yamweniyi nikutiya kunsakililu yikwawu. (1 Kor. 14:24, 25) Nateli kuwana antu akweti yilwilu yayiwahi yinateli kwimbujolayi nawa anateli kumukwasha kushikahu kupapatishewa.

16. Yumanyi yakeñekaña hakulombola kadizi hakwila yashikihu kupapatishewa, nawa twakahanjekadi muchibaaba chinalondelihu?

¹⁶ Tunateli kulombola ñahi kadizi waBayibolu kulonda yapapatishewi? Tunateli kukwasha kadizi wejima kushaku muchima hakudiza kuhitila mukumukolesha kulonda yadizeña mulungu nimulungu nikuloñesha kudiza hikudiza. Twatela cheñi kumukwasha kulonda yahanjekeña naYehova mafuku ejima nawa yekali ibwambu Dindi. Twatela kumukwasha kadizi kulonda yekali nampwila yakuya nakupompa. (Talenu chikasha chidi hefu 12 chinakwila nawu “ Yuma Yatela Kwilawu Atudizi Kulonda Ashikihu Kupapatishewa.”) Hela chochu, neyi chinalumbululiwu muchibaaba chinalondelihu, kudi yuma yikwawu yitanu yatela kwilawu antañishi aBayibolu hakwila akwashi atudizi kushikahu kupapatishewa.