1, 2. (a) Chumanyi chazañaleshaña antu jaNzambi makonu? (b) Anvwali akwaKristu niaeluda anateli kukwasha ñahi atwansi kwiluka chalumbuluka kupapatishewa?

ELUDA wumu walejeli Christopher wudi nayaaka 12 nindi: “Nakwiluka kufuma tuhu kuwansi weyi, nawa natiyi kuwaha hakutiya nawu wunakukeña kupapatishewa. Inakukeña nikwihuliku, ‘Muloñadi chiwunakukeñela kupapatishewa?’” Iwu eluda welukili chamwihwililiyi. Twazañalalaña hakumona atwansi amavulu anakupapatishewa hachaaka nichaaka. (Mukwakutaŋisha 12:1) Ilaña anvwali akwaKristu niaeluda atela kudizisha atwansi muchipompelu kulonda adifuukwileña aweni nikwiluka chalumbuluka chipapatishu.

² Twadizaña muBayibolu nawu kudihana nichipapatishu diyi ntachikilu yachihandilu chachiha chamukwaKristu.  Ichi chihandilu chachiha chaletaña nkisu jajivulu kufuma kudi Yehova niikañesha kudi Satana. (Yishimu 10:22; 1 Petulu 5:8) Dimuloña waweni anvwali akwaKristu chatela kudizishilawu anyanawu kwiluka mwatalisha kwikala kambanji kaKristu. Neyi atwansi hiyakweti anvwali akwaKristuku, aeluda muchipompelu atela kuyikwasha kwiluka mwatalisha kudihana nikupapatishewa. (Tañenu Luka 14:27-30.) Neyi muntu nakukeña kutuña itala watela kudiloñesha, munjila yoyimu atwansi niwena atela kudiloñesha henohu kanda apapatishewi kulonda akamukalakeli Yehova nakashinshi kushika “nikunsa.” (Matewu 24:13) Chumanyi chikukwasha atwansi kumukalakela Yehova haya nyaka? Tuhanjekenu haniyi nsañu.

3. (a) Mazu aYesu naPetulu atudizishañadi kutalisha hakulema kwakupapatishewa? (Matewu 28:19, 20; 1 Petulu 3:21) (b) Tukushinshika hamalwihwinyi nawa muloñadi?

³ Wudi kansi wunakukeña kupapatishewa? Neyi wunakukeña kupapatishewa, wuneli chiwahi! Kupapatishewa nakwikala Chinsahu chaYehova hikukooleka. Dichuma chatela kwilayi mukwaKristu, nawa dichikapulwisha antu halukadi lwasweja. (Matewu 28:19, 20; 1 Petulu 3:21) Neyi wupapatishewa, wukumwekesha neyi wunamukani kumukalakela Yehova haya nyaka. Watela kwila muwunakani, malwihu analondeluhu akukukwasha kwiluka neyi wunadiloñeshi kupapatishewa: (1) Napami chakwila natela kupapatishewa? (2) Nafuukuluhu amaweni kupapatishewa? (3) Neluka chalumbuluka kudihana kudi Yehova? Tuhanjekenu hanawa malwihu.

4, 5. (a) Muloñadi chipapatishu chichabulila kwikala chawakulumpi hohu? (b) Kupama kwatalisha mudihi kudi mukwaKristu?

⁴ Bayibolu hiyatena yaaka yatela kushikijayi muntu hakwila nawu yapapatishewiku. Twatañaña haYishimu 20:11 netu: “Hela mwana wanyanya amwilukilaña kuyuma yelañayi, neyi nyidimu yindi yitooka, hela neyi yoloka.” Mwana niyena nateli kwila yuma yaloña nawa nateli kwiluka chalumbuluka kudihana kudi Nleñi yindi. Dichi kansi wunapami nawa wunadihani kudi Yehova watela kupapatishewa.—Yishimu 20:7.

⁵ Kupama kwatalisha mudihi? Kupama kwatalisha hohu wanyi kukukula kwakumujimba. Bayibolu yahoshaña nawu antu apama afumba dehi  “yitoñojoka yawu” yakwambula yayiwahi nayatama. (Aheberu 5:14) Muntu wapama weluka yaloña nawa wadikasaña mumuchima windi nindi wukuyila. Hanateli kuhuhwankana nakwila yuma yatamaku. Nawa amulejaña wanyi kwila yuma yaloña kudi muntu wacheñi. Tunateli kuhosha netu kansi wunakukeña kupapatishewa wukwilaña yuma yaloña hela chakwila anvwali jindi hela antu acheñi hosi.—Esekejenu Afwilipi 2:12.

6, 7. (a) Kukalanyi kwamweniyi Danyeli hadiñayi muBabiloni? (b) Danyeli wamwekesheli ñahi kupama?

⁶ Mwalala kansi nateli kumwekesha kupama kwamuchidiwu? Tushinshikenu chakutalilahu chaDanyeli. Hadaha Danyeli wadiña kampululu hampinji yamwambwiliwu nawanvwali jindi nakumutwala muBabiloni. Hohenohu Danyeli watachikili kushakama nawantu abulileña kwovwahila nshimbi jaNzambi. Tuhanjekenu hachihandilu chindi. Amulemesheli nankashi muBabiloni. Wadiña hakachi kawakwenzi atondeluwu kuzatila mwanta. (Danyeli 1:3-5, 13) Chinamwekani neyi Danyeli wadiña nachifulu cheneni muBabiloni kubadika chadi kwikalayi nachu muIsarela.

⁷ Danyeli welili ñahi? Komana wetejeli antu amuBabiloni kumuhimpa hela kuzeyesha chikuhwelelu chindi? Kwakulehi! Bayibolu yahosha nawu Danyeli hadiñayi muBabiloni, “wafuukwili mumuchima windi, nindi, Kwonti kwami kudijilola” nayuma  yejima yakundama kukudifukula kwakutwamba. (Danyeli 1:8) Mwalala wadiña wapama.

8. Mukudizila kwodi kuchakutalilahu chaDanyeli?

⁸ Mukudizila kwodi kuchakutalilahu chaDanyeli? Kansi wapama wakolelaña kuyuma yakuhwelelayi hela wudi mukukala. Wukwikala wanyi neyi iloñolu wahimpaña kwesekeja neluña hadiyi. Welaña wanyi chashikayi Kwitala daWanta hibwambu daNzambi ilaña chikushikayi kushikola hibwambu dakaayi. Ilaña wukutwalekahu kwikala washinshika hela chakwila anamweseki.—Tañenu Aefwesesa 4:14, 15.

9, 10. (a) Kansi nateli kudizila kwodi neyi yatoñojoka cheliliyi hampinji yadiñayi mukweseka? (b) Kupapatisha kwatalisha mudihi?

⁹ Kwosi muntu wawanina. Wejima wetu twaluwañeshaña mpinji yikwawu. (Mukwakutañisha 7:20) Ilaña neyi munakukeña kupapatishewa, mwatela kwovwahilaña nshimbi jaYehova. Dihulenu nenu, ‘Novwahilaña Yehova mpinji yejima?’ Anukenu chimwelili hampinji yimwadiña mukweseka. Mwelukili chuma chachiwahi chimwateleleli kwila? Kufwana Danyeli, kudihu muntu wayilejahu dehi kuzatisha yawana yenu mudinu ituña daSatana? Neyi anakuyeseka munjila yamuchidiwu, mwanukaña yuma yakeñayi Yehova?—Aefwesesa 5:17.

¹⁰ Muloñadi wutwatelela kwiluka ñakwilu yanawa malwihu? Muloña yikuyikwasha kwiluka chikwalemena kupapatishewa. Chipapatishu chamwekeshaña nawu munamukani Yehova. Munamukani nenu mukumukeña nikumuzatila namuchima wenu wejima haya nyaaka. (Maku 12:30) Muntu wejima wukupapatishewa watela kuhemba chikaninu chindi naYehova.—Tañenu Mukwakutaŋisha 5:4, 5.

11, 12. (a) Muntu wunakukeña kupapatishewa watela kwilukadi? (b) Chumanyi chikuyikwasha kulemesha chipapatishu neyi chachilemeshayi Yehova?

¹¹ Bayibolu yahosha nawu antu jaYehova ejima kushilahu tuhu niatwansi, akamukalakela ‘chakufuma hamuchima.’ (Masamu 110:3) Dichi muntu wunakukeña kupapatishewa watela kwiluka nindi hikufuukula kwindi. Nawa watela kwiluka muloña waweni wunakupapatishewelayi sweje-e neyi wakulila muchalala.

¹² Hampinji yimwakulileña mwamweneña antu amavulu anakupapatishewa hekwawu munamoni amabwambu jenu ayayenu nianyiki jenu. Ilaña mwatela kubabala kulonda mubuli kupapatishewa muloña nenu munakuli hela muloña ejima anakupapatishewa. Munateli kwila ñahi hakwila nawu  mulemeshi chipapatishu neyi chachilemeshayi Yehova? Ikalenu nampinji yakutoñojoka chaletesha chipapatishu kwikala chalemena. Muchinu chibaaba nichinalondeluhu tukushinshika chaletesha chipapatishu kwikala chalema.

13. Munateli kwiluka ñahi neyi kufuukula kwenu kwakupapatishewa kunakufuma hamuchima?

¹³ Munateli kwiluka neyi kufuukula kwenu kwakupapatishewa kunakufuma hamuchima neyi mutoñojoka hayuma yimwahoshaña mukulomba kwenu. Mwalombaña mpinji yejima kudi Yehova? Mwalombaña yuma yimunakukeña? Chimukwakula awa malwihu chikumwekesha chidi wubwambu wenu naYehova. (Masamu 25:4) Yehova wakulaña kulomba kwetu kuzatisha Bayibolu. Njila yikwawu yinateli kuyikwasha kwiluka neyi mwalala munakukeña kukundama kwakwihi naYehova nikumukalakela kufuma hamuchima hikwiluka chidi ndandanda yakudiza halwenu. (Yoshuwa 1:8) Dihulenu nenu: ‘Natañaña Bayibolu mpinji yejima? Nahoshañahu hakudifukula kwachisaka?’ Chimukwakula awa malwihu, chikuyikwasha kwiluka neyi mwalala munakukeñesha kupapatishewa.

14. Lumbululenu chaambu chekala hakudihana nikupapatishewa.

¹⁴ Atwansi amakwawu eluka wanyi chaambu chekala hakudihana nakupapatishewa. Amakwawu anateli kuhosha nawu adihana kudi Yehova ilaña anadiloñeshi wanyi kupapatishewa. Komana muntu nateli kudihana chakadi kudiloñesha kupapatishewa? Kudihana hikumuleja Yehova mukulomba nenu mukumukalakelaña haya nyaka. Dichi chimwapapatishewa, mukumwekesha kudi antu nenu mwadihana dehi kudi Yehova. Ilaña, henohu kanda mupapatishewi, mwatela kwiluka chichalumbuluka kudihana kudi Nzambi.

15. Kudihana kwalumbulukadi?

¹⁵ Neyi mudihana kudi Yehova dikwila nawu munakumuleja nenu ichi mukwikalaña kukabadi kindi. Munakani nenu kumukalakela dichuma chimukulemeshaña nankashi muchihandilu chenu. (Matewu 16:24) Mwatela kushikija mumunamukani Nzambi. (Matewu 5:33) Munateli kumwekesha ñahi nenu mweluka nenu mudi kukabadi kaYehova?—Aroma 14:8.

16, 17. (a) Lumbululenu chichalumbuluka kudibonda enu aweni. (b) Neyi muntu nadihani neli ñahi?

¹⁶ Tuhanenu chakutalilahu. Fwikijenu ibwambu denu nayinki motoka. Yayinka niyipapilu yamotoka nakuyileja nindi: “Motoka yeyi iyi.” Ilaña ibwambu denu yayileja nindi: “Iyami nukwikalaña nsapi. Nawa yami nukwendeshaña motoka, bayi eyi.” Mukutiya ñahi? Mukumumona ñahi ibwambu denu wunayinki motoka?

¹⁷ Neyi muntu yadihana kudi Yehova wamulejaña Nzambi nindi: “Nakwinki wumi wami. Nukwikala kukabadi keyi.” Yehova wakeñaña nindi muntu  wunadihani yeli kwesekeja namunamukaniyi. Indi neyi iwu muntu yaleka kumwovwahila Yehova kuhitila mukukeña muntu wakudisumbula nindi wabulaña kumukalakela Nzambi? Indi kwiji iwu muntu yeñila mudimu wukumuletesha yabuleña kuwana mpinji yakushimwina hela kuya nakupompa mpinji yejima? Dikwila nawu iwu muntu nakwila wanyi mwamukaniniyi Yehova. Chidi neyi nakuhemba nsapi yamotoka. Neyi tudihana kudi Yehova, twamulejaña netu, “Nukwikalaña kukabadi keyi, bayi kamiku.” Dichi twatela kwilaña yuma yejima yakeñañayi Yehova nindi twili bayi yitunakukeña etu aweniku. Twatela kumwimbujola Yesu, wahosheli nindi: “Chinasuluki mwiwulu hinalondi kwila muchima wamami awenuku, nalondi kwila muchima wayena wantemesheli.”—Yowanu 6:38.

18, 19. (a) Mazu ahosheluwu aRose naChristopher amwekeshaña ñahi nawu mukupapatishewa mwafumaña nkisu? (b) Kupapatishewa mwakwimonaña ñahi?

¹⁸ Mwamweni, chipapatishu chalema nankashi. Kudihana kudi Yehova nikupapatishewa hikukooleka kwakweni. Atwansi akeña Yehova nawa eluka mwalumbulukila kudihana ashintajalaña wanyi kudihana kudi Nzambi nikupapatishewa. Aditoñeshaña wanyi. Rose kansi wamumbanda wapapatishewa wahosheli nindi: “Namukeña Yehova nawa natiyaña muzañalu kumukalakela kubadika yuma yejima. Nafwilileña chikupu kupapatishewa.”

¹⁹ Indi Christopher, wutwatena hakutachika kwachinu chibaaba watiyili ñahi? Watiyaña ñahi hakufuukula kwindi kwakupapatishewa hadiñayi nayaaka 12? Wahosheli nindi watiyaña muzañalu namwafuukwiliyi. Watachikili kuzata wupayiniya wampinji yejima nayaaka 17 nawa wekalili nkoñi wakuzatila nayaaka 18. Chayinu mpinji nakuzatila haBeteli. Wahosheli nindi: “Nafuukwili chachiwahi kupapatishewa. Inakuzañalalaña chikupu kukalakela Yehova nikuloñesha kwindi.” Neyi munakukeña kupapatishewa, munateli kudiloñesha ñahi? Chibaaba chinalondeluhu chikakula ilu lwihu.