1, 2. (a) Lumbululenu muntu chatelelayi kulemesha chipapatishu. (b) Muntu watela kusha maana kuyumanyi henohu kanda yapapatishewi, nawa muloñadi?

WUDI kansi wunakukeña kupapatishewa? Neyi dimu, hikukooleka kwakweni. Neyi chitwahanjeka muchibaaba chinafumuhu, chipapatishu hichuma chakuhemesha wanyi. Chamwekeshaña kudi antu nawu wunadihani kudi Yehova, dikwila nawu wunamukani neyi wukutwalekahu kumukalakela haya nyaka nikwila nkeñelu yindi muchihandilu cheyi. Chineli Nzambi walemesha chipapatishu, dichi watela kupapatishewa neyi wunapami chikupu, wukweti mpwila, nawa wuneluki chalumbuluka kudihana kudi Nzambi.

² Hadaha wunakudimona neyi wunashikilimu wanyi kupapatishewa. Indi kwiji wunakudimona neyi wunashikilimu ilaña anvwali jeyi anakutoñojoka nawu wuchidi kansi nawa kanda wiluki yuma yayivulu. Wukwila ñahi? Bayi  wuzeyaku. Ilaña, zatishaku iyi mpinji kulonda wukashikihu kupapatishewa. Hampinji yiwunakuhembelela kupapatishewa, shaku maana kuniyi yuma yisatu: (1) chikuhwelelu cheyi hela yuma yiwakuhwelela, (2) yilwilu yeyi, (3) nikusakilila kweyi.

3, 4. Atwansi anateli kudizilaku kwodi kudi Timotewu?

³ Toñojokaku chiwunateli kwakula awa malwihu: Muloñadi chinakuhwelela nami Nzambi wekala kwoku? Muloñadi chinakuhwelela nami Bayibolu hiizu daNzambi? Muloñadi chinovwahilaña nshimbi jaNzambi kubadika kwila yuma yatama yamukaayi? Awa malwihu anateli kukukwasha kulondela kufumba kwakapostolu Pawulu kwakwila nawu: “Mushinshiki mwaya muchima waNzambi, diwu wawuwahi, watiyishaña kuwaha, walala chikupu.” (Aroma 12:2) Muloñadi wuwatelela kwovwahila iku kufumba?

⁴ Yuma yeliliyi Timotewu yinateli kukukwasha. Welukili Nsona chikupu muloña amama yindi niankaka yindi amudizishili Nsona. Hela chochu, Pawulu wamulejeli Timotewu nindi: “shakamaku muyuma yiwadizili nakushinshikamu.” (2 Timotewu 3:14, 15) Izu dinazatishiwu dakwila nawu “kushinshikamu” datalisha “kukwiluka nikukuhwelela chikupu nawu ichi chuma chalala.” Dichi Timotewu welukili chikupu nindi chalala nateli kuchiwana muNsona. Bayi neyi wetejeli chalala muloña amama yindi niankaka yindi amulejeliku, ilaña muloña watoñojokeli hayuma yadiziliyi nikushinshikamu.—Tañenu Aroma 12:1.

5, 6. Muloñadi chiwatelela ‘kuzatisha yitoñojoka’ yeyi henohu wuchidi kansi?

⁵ Indeyi? Hadaha wunashimbuli muchalala. Neyi wunashimbuli, toñojokaku hayuma yaletesheli wukuhweleli. Chumichi chikukukwasha kukolesha chikuhwelelu cheyi nikukukwasha kubula kufuukula mwaluwa muloña wekakeja dawakwenu atwansi, yuma yidi mukaayi hela yuma yiwafwilaña kwila.

⁶ Neyi wiluka ‘kuzatisha yitoñojoka’ yeyi henohu wuchidi kansi, wukwiluka chakwakula malwihu ehulañawu akwenu adi neyi: ‘Weluka ñahi neyi mwalala Nzambi wekala kwoku? Neyi Nzambi watukeña, muloñadi chetejelañayi yuma yatama kumwekana? Neyi Nzambi diyi waleñeli yuma yejima, hinyi wamuleñeli Nzambi?’ Neyi wunadiloñeshi, awa malwihu akukuletesha wanyi wutachika kujinooka ilaña akukukwasha kudiza Bayibolu chikupu.

7-9. Shimunenu yibaaba yaha jw.org yahoshaña nawu “What Does the Bible Really Teach?,” chiyinateli kukolesha chikuhwelelu chenu.

 ⁷ Kudiza kwahalweyi kukukwasha kwakula malwihu, kuleka kujinooka nikukolesha chikuhwelelu cheyi. (Yililu 17:11) Tukweti nyikanda yayivulu yiwunateli kuzatisha. Atwansi amavulu anazatishi buloshuwa yaThe Origin of Life—Five Questions Worth Asking nimukanda waIs There a Creator Who Cares About You? Cheñi, atwansi amavulu anaheteli muyibaaba yahoshaña nawu “What Does the Bible Really Teach?” yekala ha jw.org. Munateli kuyiwana hanasonekiwu nawu BIBLE TEACHINGS. Yibaaba yejima ayisoneka munjila yakwila yinateli kuyikwasha mukuhweleli chikupu yuma yimwadizaña muBayibolu.

⁸ Chineli wudi kadizi waBayibolu, watela weluka dehi ñakwilu yamalwihu amakwawu. Wunakuhweleli chikupu neyi ñakwilu yeyi yalala? Hakudiza kwalweyi watela kusandujola munyikanda yetu kulonda wukoleshi chikuhwelelu cheyi. Nawa chumichi chikukwasha kuhakwilaku yuma yiwakuhwelela. Neyi wayaña ha jw nakutaña yibaaba yahosha nawu “What Does the Bible Really Teach?” watela kuyizatishaña hakudiza kwahalweyi kulonda wukoleshi chikuhwelelu cheyi.

⁹ Watela kwiluka chikupu neyi ichi dichalala. Chumichi chikukwasha kudiloñesha kupapatishewa. Kansi wamumbanda wumu wahosheli nindi: “Henohu kanda nifuukuluhu kupapatishewa nadizili Bayibolu nawa nelukili nami iyi diyi nsakililu yalala. Ifuku dejima chikuhwelelu chami chakoleleleñaku.”

10. Muloñadi chitukuhoshela netu Mukwakristu wapapatishewa watela kumwekesha chikuhwelelu chindi kwesekeja nayilwilu yindi?

 ¹⁰ Bayibolu yahoshaña nawu: ‘Chikuhwelelu chakadi nyidimu chafwa.’ (Yakoba 2:17) Neyi mukweti chikuhwelelu chakola, mukuchimwekeshela muyilwilu yenu. Mukwikala nayilwilu yatena Bayibolu nawu “kujila nakwakama Nzambi.”—Tañenu 2 Petulu 3:11.

11. Lumbululenu mwatalisha izu dakwila nawu “kujila.”

¹¹ Yilwilu ‘yakujila’ hiyilwilwinyi? Neyi yilwilu yenu yajila, dikwila nawu mutooka. Chakutalilahu, anukenu tukweji 6 tunahituhu. Chayesekeliwu kwila yuma yatama, mwelili ñahi, mwatoñojokeli hayuma yayiwahi nayatama? (Aheberu 5:14) Munakwanuka mpinji yimwabulili kwiteja kweseka hela ikakeja dawakwenu? Mwamwekeshaña yilwilu yayiwahi kudi akwenu kushikola? Mwatwalekañahu kwikala ashinshika kudi Yehova tahindi mwakeñaña kwikala neyi akwenu akashikola kulonda abuleña kuyiseha? (1 Petulu 4:3, 4) Kwosi muntu wawanina. Mpinji yikwawu, niantu anamukalakeli Yehova hadi yaaka yayivulu atiyaña nsonyi nawa chayikalilaña kushimwina. Ilaña muntu wadihana kudi Nzambi wadimwekeshaña nawu hiChinsahu chaYehova kuhitila muyilwilu yindi yayiwahi.

12. ‘Kumwakama Nzambi’ kwatalisha mudihi, nawa mwatela kuyimona ñahi iyi nyidimu?

¹² ‘Kumwakama Nzambi’ kwatalisha mudihi? Kumwakama Nzambi kwabombelamu nyidimu yimwazataña muchipompelu, yidi neyi kuyaña nakupompa nikushimwina. Ilaña mwabombela cheñi yuma yabulaña kumonawu antu, yidi neyi kulomba nkawenu kudi Yehova nikudiza halwenu. Muntu wunadihani kudi Yehova watoñojokaña wanyi nindi iyi nyidimu hichisenda. Watiyaña neyi chatiyiliyi Mwanta Davidi wahosheli nindi: “Natiyi kuwaha nakwila muchima weyi, eyi Nzambi yami, mwalala, nshimbi jeyi jidi mukachi kamuchima wami.”—Masamu 40:8

13, 14. Yumanyi yikuyikwasha ‘kumwakama Nzambi’, nawa atwansi amakwawu anahetelimu ñahi muniyi yuma?

¹³ Kuyikwashaku kufuukula yuma yimunakukeña kwila, talenu weki shiti yidi hamafu 308 ni 309 mumukanda waQuestions Young People Ask—Answers That Work, Volume 2. Haweki shiti, wunateli kusonekahu ñakwilu yeyi yamalwihu adi neyi: “Mwalombañadi, nawa kulomba kwenu kwamwekeshaña ñahi kukeña kumwamukeña Yehova?” “Yumanyi yimwadizaña hakudiza kwahalwenu?” “Mwayaña nakushimwina hela chakwila anvwali jenu anayi wanyi?” Haweki shiti cheñi hadi hiwunateli kusoneka yuma yiwunakukeña kwila kutalisha hakulomba, kudiza halweyi nikushimwina.

¹⁴ Iyi weki shiti yinakwashi atwansi amavulu afwilaña kupapatishewa. Muhela wakansi wejina daTilda wahosheli nindi: “Nazatishili weki shiti kusonekahu yuma yinakeñeleña kwila. Nayishikijileña chimu chimu, nawa chimwahitili chaaka nadiloñesheli kupapatishewa.” Manakwetu wakansi wejina Patrick niyena dicheliliyi. Wahosheli nindi: “Nadiña neluka dehi yuma yinakela muchihandilu chami, ilaña kuyisoneka kwankwashili kuzata nañovu hakwila nawu niyishikiji.”

15. Lumbululenu muntu wunakukeña kupapatishewa chatelelayi kudifuukwila yomweni?

 ¹⁵ Lwihu lumu haweki shiti lwekala nawu: “Wukutwalekahu kumukalakela Yehova hela chakwila anvwali jeyi niamabwambu jeyi aleka kumukalakela?” Neyi wudihana kudi Yehova nawa wupapatishewa, wukwikala nawubwambu nayena. Dichi, mwatela wanyi kushindamena hadi anvwali jenu hela muntu wudi wejima hakumuzatila Yehova. Yilwilu yenu yakujila nikumwakama Nzambi yikumwekesha chikupu nawu mweluka chalala nawa mwalondelaña  nshimbi jindi. Mukushikahu kupapatishewa.

16, 17. (a) Yumanyi yatela kumusañumuna muntu kwikala mukwaKristu? (b) Tunateli kulumbulula ñahi kusakilila kwetu kwefutu danyiloña?

¹⁶ Ifuku dimu, iyala welukili nshimbi jaMosi chiwahi wamwihwili Yesu nindi: “Lushimbi lwabadika nshimbi jejima lushimbinyi?” Yesu wamwakwili nindi: “Keñaku Yehova Nzambi yeyi namuchima weyi wejima, nawumi weyi wejima, namaaneyi ejima.” (Matewu 22:35-37) Yesu walumbulwili nindi kukeña kutwamukeña Yehova dikwaleñelaña muntu yapapatishewi nikwikala mukwakristu. Njila yimu yayiwahi muwatela kukoleshela wubwambu weyi naYehova hikutoñojoka chiwahi hefutu danyiloña, chawana chalema chatwinkayi Nzambi. (Tañenu 2 Akorinda 5:14, 15; 1 Yowanu 4:9, 19) Neyi wila mwenimu, wukumwekesha kusakilila hanichi chawaana chachiwahi nawa chalema.

¹⁷ Kusakilila kweyi kwachawaana chefutu danyiloña tunateli kukwilumbulula muniyi njila: Fwikijaku wunakunwina, dichi muntu yakupulwisha. Komana wukuya kwitala chakadi kumusakilila iwu muntu hakukupulwisha? Inehi! Wukumusakililaña mpinji yejima iwu muntu wunakupulwishi. Munjila yoyimu, twatela kumusakilila chikupu Yehova niYesu hakutwinka ifutu danyiloña. Muloña wumi wetu wekala mumakasawu. Atukuula kunshidi nikukufwa. Tukweti kuchiñeja kwakushakama haya nyaka hamaseki muParadisa muloña atukeña!

18, 19. (a) Muloñadi chimukubulila kutiya woma kwikala kukabadi kaYehova? (b) Kumukalakela Yehova kwayizañaleshaña ñahi muchihandilu chenu?

¹⁸ Mwasakililaña yuma yayililayi Yehova? Neyi mwasakililaña, komana dinu mwatela kudihana nikupapatishewa. Neyi mudihana munakumukana Yehova nenu mukwilaña nkeñelu yindi haya nyaka. Komana mwatela kutiya woma kumukana Nzambi? Inehi! Yehova wakeñaña nindi mwikaleña namuzañalu nawa wakakiswila antu elaña nkeñelu yindi. (Aheberu 11:6) Mukwikala namuzañalu muchihandilu chenu neyi mudihana kudi Yehova nikupapatishewa. Manakwetu wudi nayaaka 24 wapapatisheweli henohu kanda yekali kampululu wahosheli nindi, “Nadi kwilukisha yuma chiwahi neyi nadiña nakula dehi, ilaña kufuukulahu kudihana kudi Yehova kunankwashi kubula kwila yuma yamukaayi.”

¹⁹ Yehova wakeñaña nindi mwikaleña namuzañalu. Ilaña, Satana wekala nalwisu nawa wayakamenaña wanyi. Kwosi yuma yayiwahi yikuyinkayi neyi mutachika kwila nkeñelu yindi. Wukuyinka ñahi yuma yabulayi? Hakweti nsañu yayiwahiku nawa wukuyikwasha wanyi kwikala nakuchiñeja. Nateli kuyikojeja hohu kwikala nachihandilu chatama, muloña dichihandilu chinakuhembelelayi.—Chimwekeshu 20:10.

20. Chumanyi chatela kwilayi kansi hakwila ayiliku hambidi kulonda yadihani nikupapatishewa? (Talenu chikasha chinakwila nawu “Nsañu Yikuyikwasha Kuyilaku Hambidi.”)

²⁰ Kudihana kudi Yehova dichuma chachiwahi chiwatela kwila muchihandilu cheyi. Wunadiloñeshi kudihana kudi Yehova? Neyi wunadiloñeshi, bayi wutiya woma kudihanaku. Ilaña neyi wunakumona neyi wunadiloñeshi wanyi, zatishaku nsañu yidi muchinu chibaaba kulonda wutwalekihu kuyilaku hambidi. Pawulu walejeli amanakwindi akuFwilipi kutwalekahu kuyilaku hambidi. (Afwilipi 3:16) Neyi wulondela iku kufumba, hakushimbula wanyi wukudihana kudi Yehova nikupapatishewa.