HENOHU Yesu kanda yafunti mwiwulu, wayilejeli atumbanji twindi nindi: “Mwakela ayinsahu jami . . . kwakumina maseki.” (Yililu 1:8) Hanu dinu, adi kutwesha ñahi kushimwina kwakumina maseki?

Martin Goodman, nkuluñaña wahaYunivesiti yaOxford wahosheli nindi, “mudimu wawakwaKristu wayambulaña nansakililu jikwawu, kubombelahu niaYudeya adiñaku muRoma hakusambila.” Yesu wayileña nakushimwina kwejima. Akwakristu alala ateleleli kumwimbujola kuhitila mukushimwina “nsañu yayiwahi yaWanta waNzambi” kwejima. Ateleli kukeña antu amwekesheleña mpwila yakukeña kwiluka chalala. (Luka 4:43) Dichaletesheli muyaaka nkulakaji yakusambila kwikali “apostolu,” izu datalisha kudi antu atumañawu kuya nakuzata mudimu. (Maku 3:14 NWT) Yesu wayilejeli atumbanji twindi nindi: “Dichi yenu, mwakelishi atumbanji munyunza yejima.”—Matewu 28:18-20.

Apostolu aYesu 12 hiyadi cheñi hamasekiku, ilaña ambuña aYehova makonu anakuzata mudimu wakushimwina neyi cheliliwu. Neyi ayileja kuya nakushimwina kudi kukankila kweneni, ahoshaña nawu: “Yamonu, ntemeshami.” (Isaya 6:8) Amakwawu, chidi neyi amanakwetu niahela ahita muShikola yaGileyadi, aya kumatuña akwakulehi. Amakwawu ekala mwituña dawu ilaña aya hohu kumaluña acheñi. Amavulu anadizi idimi dacheñi kulonda akwashi chipompelu hela izanvu.  Chumichi chapela wanyi, ilaña awa amanakwetu niahela ejima adihanini kulonda amwekeshi nawu amukeña Yehova niantu. Dichi adiloñesheleñahu dehi chadimu nawa azatishili mpinji, ñovu nimali awu hakukwasha mudimu wakushimwina kudi kukaankila. (Luka 14:28-30) Mudimu wunakuzatawu awa amanakwetu niahela walema nankashi.

Bayi neyi wejima wetu tunateli kuya nakuzatila kudi kukaankila hela kudiza idimiku. Ilaña wejima wetu tunateli kwikala neyi amishonali muyipompelu yetu.

Muyaaka yawapostolu, akwaKristu amavulu adiña nakudikita mumudimu wakushimwina munyisumba yawu hela chakwila adiña amishonali wanyi. Pawulu wamulejeli Timotewu nindi: ‘Ilaku mudimu wamukwakushimwina nsañu yayiwahi; kalakalaku mudimu weyi wuwumanishi chikupu.’ (2 Timotewu 4:5) Awa mazu akundamini kudi akwaKristu akusambila, ilaña ninetu makonu atwikundama. AkwaKristu ejima atela kwovwahila lushimbi lwakushimwina nsañu yaWanta nikwilisha atumbanji. Dichi nimuyipompelu yetu kudi njila jajivulu jitunateli kuzatilamu neyi amishonali.

Chakutalilahu, amishonali neyi anayi kumatuña acheñi, chihandilu chahimpaña chikupu nawa azataña nañovu hakwila enjilili. Hela chakwila hitunateli kuya nakuzatila kudi kukaankilaku, kwila tuwanaku njila yayiha yakushimwinamu kudi antu nehi? Chakutalilahu, mu 1940, amanakwetu ayikolesheli kushimwina munyikwakwa ifuku dimu mumulungu. Mwesekahu dehi kushimwina mumukwakwa? Mwashimwinahu dehi kuzatisha mesa? Chikuma chidi chakwila nawu, munakweseka kuzatisha njila jajiha jakushimwinamu nsañu yayiwahi?

Neyi mukweti muchima wakuzata, mukwikala neyena dakudikita chikupu mumudimu wakushimwina. Antu ayaña nakuzatila kudi kukaankila hela adizaña idimi dacheñi ekala akwakushimwina ashikahu nawa anateli kukwasha chipompelu. Chakutalilahu, azataña chikupu mumudimu wakushimwina. Amishonali niwena alombolaña muchipompelu sampu amanakwetu muchipompelu  anashikuhu kulombola. Neyi mudi manakwetu wapapatishewa, komana ‘munakushikahu,’ dikwila nawu munadihani kukalakela amanakwenu niahela muchipompelu chenu neyi nkoñi wakuzatila hela eluda?—1 Timotewu 3:1.

Tunateli cheñi kukwasha chipompelu munjila jikwawu. Wejima wetu, anyiki hela akulumpi, amanakwetu niahela tunateli ‘kukwasha akwetu’ akwakwitiya anakukeñeka wukwashu.—Akolose 4:11.

Hakwila tukwashi amanakwetu niahela twatela kuyiluka chiwahi. Bayibolu yatukoleshaña nawu “tuditoñojokenu muntu himuntu” hela kwiluka yuma yinakukeñawu amanakwetu niahela, neyi tunapompi hamu. (Aheberu 10:24) Chumichi hichinayi mukwila nawu twatela kwiluka yuma yejima hadi amanakwetuku. Ilaña chinayi mukwila nawu twatela kwiluka kukala kunakumonawu amanakwetu niahela niyuma yinakukeñawu. Hadaha anakukeña wukwashu wakumujimba, kuyikundeja nikuyikolesha naNsona. Mpinji yikwawu aeluda niankoñi akuzatila diwu hohu anateli kuyikwasha. (Aŋalija 6:1) Ilaña wejima wetu tunateli kukwasha amanakwetu niahela akula dehi hela yisaka yidi mukukala.

A Salvatore ayikwashili muniyi njila. Chelili mali anayimani, akeñeleña kulandisha yuma yejima, itala niyuma yayivulu yamwitala. Wakameneni nankashi chisaka chindi. Chisaka chimu muchipompelu chamweni nawu awantu akeñekeleña kuyikwasha. Ayinkeli aSalvatore mali nawa ayikeñeleli mudimu hamu nawañodawu. Namelela adiña nakuhanjeka, kuyitiyilila nikuyikolesha. Ekalili amabwambu chikupu. Chayinu mpinji iyi yisaka yiyedi yinakwanuka yuma yayiwahi yadiluñishiliwu hampinji yadiña nakuhanjekawu mumpinji yakala.

AkwaKristu alala alejaña antu yuma yakuhwelelawu. Twatela kwimbujola Yesu nikuleja antu ejima kwiluka yuma yayiwahi yatukanayi Nzambi. Hela chakwila tukuya hela nehi, wejima wetu tunateli kuzata nañovu kukwasha amakwawu muchipompelu. (Aŋalija 6:10) Neyi tukwasha akwetu, tukwikala namuzañalu nawa ‘tukusoña nyikabu munyidimu yayiwahi yejima.’—Akolose 1:10; Yililu 20:35.