1. Kufuma tuhu kunyima, antu jaNzambi atweshaña ñahi kuzatila hamu?

YEHOVA naYesu ekala anuñañana kufuma tuhu haleñeluwu yuma yejima. Yehova waleñeli Yesu henohu kanda yaleñi yuma yejima. Kuhiñahu, Yesu wazatili hamu naNzambi nawa wadiña “mukalawenu.” (Yishimu 8:30) Ambuña aYehova niwena adiña anuñañana mumudimu wazatileñawu. Chakutalilahu, Nowa nichisaka chindi atuñili watu hamu. Kuhiñahu, aIsarela azatili hamu hakutuña tabanaka, kuyikasununa nikuyisenda kufuma kwiluña dimu nakuya kwiluña dikwawu. Embilileña hamu tumina nikumushimeka Yehova natumina twatuwahi hatembeli. Antu jaYehova atwesheli kwila yuma yejimiyi muloña adiña anuñañana.—Kutachika 6:14-16, 22; Kuchinda 4:4-32; 1 Kushindulula 25:1-8.

2. (a) AkwaKristu amumafuku awapostolu adiña antu amuchidinyi? (b) Malwihwinyi itukuhanjekahu?

 ² AkwaKristu amumafuku awapostolu niwena adiña anuñañana. Kapostolu Pawulu walumbulwili nindi hela chakwila adiña nawuswa washiyashana ninyidimu yashiyashana, adiña anuñañana. Wejima wawu embujolileña Nlomboli yawu, Yesu Kristu. Pawulu wayesekejeli namujimba wudi nayidi yayivulu yazatilaña hamu. (Tañenu 1 Akorinda 12:4-6, 12.) Indetu makonu? Tunateli kwikala ñahi anuñañana mumudimu wakushimwina, muchipompelu nimuchisaka?

3. Chimwenwinyi chamweniyi kapostolu Yowanu?

³ Muyaaka nkulakaji yakusambila, kapostolu Yowanu wamweni chimwenu mwadiña añelu 7 anakwimba mpuña. Chelili kañelu wamuchitanu yembi mpuña, Yowanu wamweni “katumbwa kanaholoki dehi kwiwulu kanashiki dehi hamaseki.” Kana “katumbwa” kazatishili nsapi hakwenzununa kuchisu chawina wakunama nawa mwekala mwidima. Chatachi, muwina mwakakumukili wishi nawa muwishi himukufuma tubola. Chatela itu tubola tukisañani nyitondu nimunyenvu, ilaña twena twalukukili antu abulili “chilamiki chaNzambi hamahamawu.” (Chimwekeshu 9:1-4) Yowanu welukili nindi tubola tunateli kukisañana chikupu, muloña twakisañenihu dehi muEjipitu mumafuku aMosi. (Kwidika 10:12-15) Tubola twamweniyi Yowanu twemenañaku akwaKristu awayishewa ashimwinaña nsañu yakusompesha nsakililu yakutwamba. Nawa yihita yawantu atalilaña kuheta wumi hamaseki adibombaña kudi awayishewa. Wejima wawu, anakuzatila hamu mumudimu wakushimwina. Iwu mudimu wunakwashi antu amavulu kufuma munsakililu yakutwamba nikusubuka kukaayi kanakuyuulayi Satana.

4. Mudimwinyi watela kuzatawu antu jaNzambi, nawa anateli kwila ñahi mwenimu?

⁴ Tukweti mudimu wakushimwina “nsañu yayiwahi” kudantu mukaayi kejima henohu kukuma kanda. Iwu mudimu weneni chikupu. (Matewu 24:14; 28:19, 20) Twatela kutambika ejima adi “nampwila” anwi “meji awumi,” dikwila nawu, twatela kudizisha antu ejima anakukeña kutiyisha chalala chamuBayibolu. (Chimwekeshu 22:17) Tunateli kwila mwenimu neyi ‘twekala adinuña hamu’ nawa tunakuzatila hamu muchipompelu.—Aefwesesa 4:16.

5, 6. Twanuñañanaña ñahi neyi tunakushimwina nsañu yayiwahi?

⁵ Hakwila nawu tushimwini antu  amavulu, twatela kudiloñesha chikupu mumudimu wakushimwina. Kufumba kutwatambwilaña kuchipompelu kwatukwashaña kudiloñesha. Hanyima yakubulakana kwakuya mumudimu wamwiha, twayaña nakuleja antu nsañu yayiwahi yaWanta. Nawa twayinkaña nyikanda yashindamena haBayibolu. Iyi nyikanda tunayihani yayivulu mukaayi kejima. Mpinji yikwawu anateli kutuleja kuzataku mumakampeni adimena. Neyi muzata iwu mudimu, mukuzatila hamu nayihita yawantu amakwawu mukaayi kejima anakushimwina nsañu yoyimu. Cheñi nawa, munakuzatila hamu nawañelu, anakukwasha antu jaNzambi kushimwina nsañu yayiwahi.—Chimwekeshu 14:6.

⁶ Twatiyaña kuwaha neyi tutaña muYearbook hayuma yayiwahi yinakufuma mumudimu wetu wakushimwina mukaayi kejima. Toñojokenu cheñi chitwazatilaña hamu mukaayi kejima neyi tunatambiki antu kukupompa kwetu kweneni. Twatiyililaña kunsañu yoyimu. Jimpanji, yimwenu niyakutalilahu yatukoleshaña wejima wetu kumukalakela chikupu Yehova. Twanuñañana nawamanakwetu niahela mukaayi kejima neyi tuya kuChanukishu hachaaka hachaaka. (1 Akorinda 11:23-26) Twapompaña ifuku dodimu daNisani 14, hanyima yakuhuma kwetañwa kulonda tumwekeshi kusakilila hachuma chatukoñeleliyi Yehova nikwovwahila lushimbi lwaYesu. Nawa munyilungu yakwila Chanukishu kanda, twazatilaña hamu kutambika antu amavulu kulonda akenzi kuchidika chalema.

7. Neyi tunakuzatila hamu, twatweshaña kwiladi?

⁷ Kabola kamu kakutwesha wanyi kukisañana chikupu. Nkawetu kwila tutwesha kushimwina antu ejima nehi. Ilaña chineli twazatilaña hamu, twashimwinaña antu amavulu kulonda amwiluki Yehova nikukwasha amakwawu kulonda amuhameki nikumulemesha.

8, 9. (a) Chakutalilahwinyi chazatishiliyi Pawulu hakukwasha akwaKristu kwikala anuñañana? (b) Tunateli kuzatila ñahi hamu muchipompelu?

⁸ Pawulu wayilumbulwili akaAefwesesa chatela kuzatila hamu chipompelu, nawa wayilejeli nindi antu ejima muchipompelu atela kukula “muyuma yejima.” (Tañenu Aefwesesa 4:15, 16.) Pawulu wazatishili chakutalilahu chamujimba hakulumbulula nindi mukwaKristu wejima watela kukwasha chipompelu kwikala chanuñañana nikulondela Yesu, Nlomboli wachipompelu. Wahosheli nindi yidi yejima yamujimba yakwashañanaña ‘mumanuñi, yidi yejima hiyikwila nyidimu yawu.’ Dichi, hela tudi atwansi hela  akulumpi, twakola kumujimba hela nehi, chumanyi chitwatela kwila wejima wetu?

⁹ Yesu watonda aeluda kulonda alomboleña muchipompelu, nawa wakeñaña nindi wejima wetu tuyilemesheña nikulondela munakutulejawu. (Aheberu 13:7, 17) Kwila mwenimu kwakala. Ilaña twatela kulomba Yehova netu yatukwashi. Spiritu yajila yinateli kutukwasha kwovwahila mwejima mwanatulejiwu aeluda. Toñojokenu cheñi chimunateli kuleta kunuñañana muchipompelu neyi mwadizoza nawa mwazatilaña hamu nawa eluda. Chipompelu chikwikala chanuñañana nawa kukeña kwetu kukuswejelaku.

10. Ankoñi akuzatila akwashaña ñahi chipompelu kwikala chanuñañana? (Talenu mwevulu wakutachikilahu.)

¹⁰ Ankoñi akuzatila niwena akwashaña chipompelu kwikala chanuñañana. Azataña nañovu kukwasha aeluda nawa twasakililaña hanyidimu yawu. Chakutalilahu, ankoñi akuzatila atwinkaña nyikanda yakuzatisha mumudimu wakushimwina nawa ashikijaña antu enzaña nakupompa. Akwashaña cheñi kuloñesha Itala daWanta nikudiwahisha. Neyi tuzatilaña hamu nanawa amanakwetu, tukwikala anuñañana nawa tukumuzatilaña Yehova munjila yoloka.—Esekejenu Yililu 6:3-6.

11. Amanakwetu achinyiki anateli kukwasha ñahi chipompelu kwikala chanuñañana?

¹¹ Aeluda amakwawu anazati nañovu muchipompelu hadi yaaka yayivulu. Ilaña hadaha hiyanateli kuzata neyi chazatileñawu muloña wakukula. Amanakwetu achinyiki anateli kuzata. Neyi ayidizisha, anateli kuzata nyidimu yayivulu muchipompelu. Nawa neyi ankoñi akuzatila azata nañovu, anateli kwikala aeluda kumbidi. (1 Timotewu 3:1, 10) Aeluda amakwawu achidi atwansi anazati nañovu. Anakuzata neyi ankoñi añinza nawa anakukwasha amanakwetu niahela muyipompelu yayivulu. Twatiyaña kuwaha neyi amanakwetu achidi atwansi adihana kukalakela amanakwetu niahela.—Tañenu Masamu 110:3; Mukwakutañisha 12:1.

12, 13. Chisaka chinateli kwikala ñahi chanuñañana?

¹² Tunateli kukwasha ñahi chisaka chetu kuzatila hamu? Kudifukula kwachisaka kunateli kutukwasha. Neyi anvwali nianyana ekalaña nampinji yakudiza chekalayi Yehova, kukeña kwawu kukuswejelaku. Haniyi mpinji, anateli kuhituluka muyuma yakazatishawu mumudimu wakushimwina,  nawa chumichi chikuyikwasha wejima wawu kwikala adiloñesha. Neyi wejima wawu ahoshaña nsañu yakuspiritu nawa amona nawu amukeña Yehova nikukeña kumuzañalesha, akwikala anuñañana.

¹³ Eyala namumbanda anateli kwikala ñahi anuñañana? (Matewu 19:6) Neyi wejima wawu amukeña Yehova nikumukalakela hamu, akwikala namuzañalu nawa akunuñañana muwulu wawu. Atela kudikeña neyi chadikeñeliwu aAbarahama naSara, Isaka naRebeka niElekana naHana. (Kutachika 26:8; 1 Samweli 1:5, 8; 1 Petulu 3:5, 6) Neyi eyala namumbanda adikeña, akwikala anuñañana nawa akukundama kwakwihi naYehova.—Tañenu Mukwakutaŋisha 4:12.

14. Neyi anfumwenu hela añodenu amukalakelaña wanyi Yehova, munateli kwila ñahi kulonda mwikali nawuluwi wakola?

¹⁴ Bayibolu yakanisha kusumbula hela kusumbuka namuntu wabulaña kumukalakela Yehova. (2 Akorinda 6:14) Ilaña, kudi amanakwetu niahela asumbula hela asumbuka namuntu wabula kwikala Chinsahu chaYehova. Amu adizili chalala henohu adisumbula dehi, ilaña mwinikwawu yakana kwikala Chinsahu. Amakwawu asumbwili hela kusumbuka naChinsahu, ilaña nfumwawu indi kwiji ñodawu wafumini muchipompelu. Muniyi yakutalilahu, akwaKristu atela kuhemba wuluwi wawu kuhitila mukwovwahila kufumba kwamuBayibolu. Chumichi chapela wanyi. Chakutalilahu, aMary nawanfumwawu aDavid, adiña nakumukalakela Yehova hamu. Dichi, aDavid alekeli kupompa. Ilaña aMary atwalekeluhu kwila yuma yayiwahi nikwikala nayilwilu yawakwaKristu. A Mary adizishileña cheñi nianyanawu 6 kumwiluka Yehova nikutwalekahu kuya nakupompa kwachipompelu nikweneni. Chimwahitili yaaka, aMary atwalekeluhu kumukalakela Yehova  hela chakwila chayikalilili hanyima yakwila anyanawu anakuli dehi nawa anafumi hetala. Dichi, aDavid atachikili kutaña magazini ayishilileñawu kudi añodawu. Mukuhita kwampinji, atachikili kuya nakupompa cheñi. Mwizukulwawu wayaaka 6 wayishilileña chitwamu hakushakama, neyi kwinza nehi, iwu kansi wayilejeleña nindi, “Nkaaka, nayimona wanyi kukupompa.” Chimwahitili yaaka 25 a David afuntili kudi Yehova, nawa wena niañodawu adi namuzañalu muloña anakumuzatila Yehova cheñi hamu.

15. Antu anashimbuli muwulu anateli kukwasha ñahi anadisumbuli katataka?

¹⁵ Satana nakulukuka yisaka. Dimuloña waweni iyala namumbanda amuzatilaña Yehova chatelelelawu kunuñañana. Hela chakwila munashimbuli muwulu hela nehi, toñojokenu yuma yimunateli kwila kulonda mukoleshi wulu wenu. Neyi munashimbuli mumaluwi, munateli kwikala chakutalilahu chachiwahi kudi anadisumbuli katataka. Hadaha munateli kuyitambika kukudifukula kwenu kwachisaka. Akwiluka nawu hela chakwila munashimbuli mumaluwi, mwatela kudikeña nikwikala anuñañana.—Titusa 2:3-7.

16, 17. Antu jaNzambi anuñañana anakutaliladi?

¹⁶ Hampinji yayiliwu aIsarela kuyidika yawu muYerusalema, azatilileña hamu. Aloñesheli yuma yejima yakudikwasha nachu munjila. Kuhiñahu, endeleleña hamu nikudikwasha wumu namukwawu. Mutembeli, ashimekeleña nikudifukula kudi Yehova hamu. (Luka 2:41-44) Makonu, chitunakudiloñesha kushakama mwituña dadiha, twatela kwikala anuñañana nikuzatila hamu nawakwetu. Kudihu njila mumunateli kwililamu mwenimu?

¹⁷ Antu amavulu mukanu kaayi anakutoboka nikuzuña hayuma yayivulu. Twamusakililaña Yehova hakutukwasha kwikala mukuwunda nikwiluka chalala. Antu jindi mukaayi kejima anakudifukula munjila yakeñayi. Sweje-e munanu mafuku akukuminina, antu jaYehova ananuñañani chikupu. Wejima wetu tunakuya hamu “kumpidi yaYehova” neyi chaprofweteli Isaya naMika. (Isaya 2:2-4; tañenu Mika 4:2-4.) Twakatiya kuwaha kumbidi neyi antu ejima hamaseki ‘anadinuñi hamu’ nawa anakuzatila hamu hakudifukula kudi Yehova.