1, 2. Kukalanyi kwawantu kwasonekawu mumukanda waKutachika, nawa iyi nsañu yikutukwasha ñahi?

MWATOÑOJOKAHU dehi hadi antu abulili kutiyashana ashimunawu muBayibolu? Mutupetulu twakutachikilahu twamukanda waKutachika, twatañaña nawu, Kena wajahili Abeli (Kutachika 4:3-8); Lameki wajahili mukwenzi weyala wamukatishili (Kutachika 4:23); Atubiña twaAbarahama atobokeleña nawatubiña twaLoti (Kutachika 13:5-7); Haga wadimweneña kulema kubadika Sara, nawa Sara wamuhililili Abarahama (Kutachika 16:3-6); Ishimeli waheleli akwawu nawa niwena amuheleli.—Kutachika 16:12.

² Muloñadi iyi yakutalilahu chiyayisonekelawu muBayibolu? Muloña tunateli kudizila kuyakutalilahu yanawa antu abula kuwanina adiña mukukala. Ninetu twawanina wanyi, nawa neyi tunakutiyashana wanyi nawakwetu, tunateli kwimbujola yakutalilahu yayiwahi yekala muBayibolu nikutondolwela yakutalilahu yatama. (Aroma 15:4) Chumichi chikutukwasha kushakama mukuwunda nawakwetu.

3. Nsañwinyi yitukuhanjeka muchinu chibaaba?

 ³ Muchinu chibaaba, tukudiza muloña wutwatela kumanishila kukala nichitunateli kukwimanisha. Tukudiza cheñi yishina yamuBayibolu yinateli kutukwasha kumanisha kukala kulonda tutwalekihu kwikala nawubwambu wawuwahi naYehova ninawakwetu.

4. Yilwilwinyi yinatandi mukaayi, nawa yumanyi yinafumimu?

⁴ Satana diwaleteshaña antu kubula kutiyashana chiwahi. Tunahoshelidi mwenimu? MuEdeni, Satana wahosheli nindi muntu wejima watela kudifuukwila yuma yayiwahi hela yatama chakadi Nzambi. (Kutachika 3:1-5) Ilaña neyi tukushinshika mukaayi makonu, tukuwana netu yilwilu yamuchidiwu yinakuleta hohu kukala. Antu amavulu atoñojokaña nawu akweti wuswa wakutonda yuma yinakeñiwu. Hiyakwakudivwimba, akwalwisu, akwakudibecha nawa abulaña kwakamena nawu kufuukula kwawu kukuneñesha akwawu. Yilwilu yamuchidiwu yaleteña yikonkojola kudi antu. Bayibolu yatulejaña nawu neyi tunyakalaña kuzuwa, tukutiyañanaña wanyi nawakwetu nawa tukukoñaña nshidi.—Yishimu 29:22.

5. Yesu wayidizishili ñahi antu chakumanisha kukala?

⁵ Yesu chahaniniyi Mpanji yindi yahaMpindi, walejeli atumbanji twindi kwikala mukuwunda nikubula kutoboka, hela chakwila amweni neyi hiyatela kwila mwenimuku. Chakutalilahu, wayilejeli kwikala naluwi, kwikala mukuwunda nawantu, kuleka kuzuwa, kumanisha kukala swayi nikukeña ayilumbu jawu.—Matewu 5:5, 9, 22, 25, 44.

6, 7. (a) Muloñadi wutwatelela kumanishila kukala swayi-swayi? (b) Antu jaYehova ejima atela kudihulawu malwihwinyi?

⁶ Makonu, neyi tunakulomba, tunakushimwina nikuya nakupompa dikwila nawu tunakudifukula kudi Yehova. Neyi tubula kuleta kuwunda nawamanakwetu, Yehova wukwiteja wanyi kudifukula kwetu. (Maku 11:25) Hakwila twikali amabwambu jaYehova, twatela kwanakena akwetu neyi anatuvulumuni.—Tañenu Luka 11:4; Aefwesesa 4:32.

⁷ Yehova wakeñaña ambuñindi ejima anakeneña akwawu nikwikala mukuwunda nawantu. Twatela kudihula netu: ‘Nanakenaña amanakwami swayi? Natiyaña kuwaha kuhanjeka nawu?’ Chimweluka nenu chayikalilaña kwanakena akwenu, mulombenu Yehova yayikwashi kulonda mwanakeneña. Tata yetu wamwiwulu wukutiya kulomba kwamuchidiwu nawa wukukwakula.—1 Yowanu 5:14, 15.

8, 9. Chumanyi chitwatela kwila neyi anatuhilishi?

⁸ Wejima wetu twawanina wanyi, dichi antu anateli kuhosha hela kwila  yuma yinateli kutuneñesha. (Mukwakutaŋisha 7:20; Matewu 18:7) Neyi ayineñesha, mukwiladi? Tunateli kudizila kunichi chuma chamwekeni: Hampinji yadiñawu nachidika, muhela wemushili amanakwetu ayedi. Ilaña manakwetu wumu wahilili nachamwimushiliwu kudi muhela. Chayiliyi muhela, manakwetu wahilili watachikili kutoba hadi muhela. Ilaña, manakwetu mukwawu wamulejeli nindi iwu muhela namukalakeli Yehova nakashinshi hadi yaaka 40 hela chakwila wamonaña kukala. Iwu manakwetu welukili nindi muhela wakeñeleña wanyi kumuneñesha. Indi manakwetu wahilili welili ñahi? Wahosheli nindi, “Muwunahoshi dimu.” Dichi wadiwili yuma yamwekeni.

⁹ Tunateli kudizila kwodi kunichi chuma chamwekeni? Neyi muntu yatuhilisha, tunateli kufuukula chitukwila. Muntu wukweti kukeña wanakenaña. (Tañenu Yishimu 10:12; 1 Petulu 4:8.) Neyi ‘tudiwula mwanatuvulumuniwu,’ Yehova wukutiya kuwaha. (Yishimu 19:11; Mukwakutaŋisha 7:9) Neyi muntu yakahosha hela kwila yuma yikayineñesha, kadihulenu nenu: ‘Natela kudiwulaku? Natela kutwaleka kutoñojokahu?’

10. (a) Muhela wumu hatachi welili ñahi chamuhosheleñawu? (b) Nsonanyi yamukwashili iwu muhela kwikala mukuwunda?

¹⁰ Chinateli kutukalila kudiwula neyi antu atuhosha chatama. Talenu chakutalilahu chamuhela payiniya wutukutena netu Lucy. Amanakwetu niahela amuseheleña chazatileñayi mudimu wakushimwina nichazatishileñayi mpinji yindi. Lucy waneñeli nankashi nawa walombeli wukwashu kudi amanakwetu apama. Chumanyi chafuminimu? Wahosheli nindi, azatishili Bayibolu kumukwasha kuleka kutoñojoka hamazu atama ahosheleñawu akwawu kulonda yatachiki kutoñojoka nankashi hadi Yehova. Watiyili kuwaha chatañiliyi Matewu 6:1-4. (Tañenu.) Awa mavasi amukwashili kwiluka nindi kumutiyisha Yehova kuwaha dichuma chalema nankashi. Dichi wafuukwilihu kudiwula mwahosheleñawu antu. Chayinu mpinji, hela amakwawu akuhosha chatama nachazatañayi mudimu wakushimwina, watiyaña kuwaha muloña weluka nindi nakuzata nañovu kulonda yamutiyishi Yehova kuwaha.

11, 12. (a) MukwaKristu watela kwila ñahi neyi yamona nindi manakwindi “wudi namuloña” nayena? (b) Chumanyi chitukudizila kudi Abarahama chamanishiliyi kukala? (Talenu mwevulu wakutachikilahu.)

¹¹ “Wejima wetu twaluwaña muyuma yayivulu.” (Yakoba 3:2) Neyi mwiluka nenu manakwenu wahilili nachimwahosheli hela chimwelili. Munateli kwila ñahi? Yesu wahosheli nindi neyi “wudi nakutwala mulambu weyi kukameña, kwenoku hiwukwanuka neyi nidi  namuloña namana kwami, shiyaku mulambu weyi kwenoku kukameña, wuyi wusambili kutiyañana namana kweyi; winzi dinu nakuhana mulambu weyi.” (Matewu 5:23, 24) Dichi hoshenu namanakwenu. Neyi muhosha nindi, mwatela kufwila kuleta kuwunda. Mwatela kwiteja nenu mwaluwañesha nawa bayi mumufwisha namuloñaku. Kwikala mukuwunda nawamanakwetu kwalema nankashi.

¹² Bayibolu yalumbulula ambuña aNzambi chiyanateli kuleta kuwunda neyi hadi kukala. Chakutalilahu, Abarahama namwiha windi Loti adiña nayimuna yayivulu, atubiña twawu atachikili kutoboka muloña iluña dakeheli. Chineli Abarahama wakeñeleña kuleta kuwunda, wamwitejeli Loti kutonda iluña dadiwahi. (Kutachika 13:1, 2, 5-9) Twatela kumwimbujola. Abarahama wakabakeni chineli wetejeli Loti kutonda iluña dadiwahi? Inehi. Hashimbwili wanyi, Yehova wakanini kumwinka Abarahama yuma yejima yajimbesheliyi. (Kutachika 13:14-17) Tunakudizilaku kwodi? Hela chakwila tukabakana muloña wakufwila kuleta kuwunda, Yehova wukutukiswila neyi tumanisha kukala munjila yakukeña. ^[1]—Talenu mazu adi kunsa.

13. Nkoñi wumu welili ñahi namazu atama amuhosheliwu, nawa tunateli kudizilaku kwodi kunichi chakutalilahu?

¹³ Talenu chakutalilahu chamakonu. Nkoñi wamuha kudipatimenti yahakupompa kweneni watemesheleli foni kudi manakwetu neyi chakwila wukwiteja kuzata muniyi dipatimenti. Manakwetu wahosheli mazu atama nawa waketwili foni muloña wachidiña wahila namanakwetu wadiña nkoñi kunoyu dipatimenti. Nkoñi wamuha wahilili wanyi, ilaña wadiwili wanyi yuma yamwekeni. Chimwahitili ora yimu, watemesheleli cheñi manakwetu foni nakumuleja nindi akabulakani. Mulungu walondelelihu, awa manakwetu abulakeneni Hetala daWanta, chalombeliwu kudi Yehova, ahanjekeli hadi ora yimu. Manakwetu walumbulwili yuma yejima yamwekeni nankoñi wadiñahu. Nkoñi wamuha wamutiyilili nakanañachima nawa wahanjekeli nindi kuzatisha nsona. Chafuminimu, awamanakwetu ekalili mukuwunda nawa azatilili hamu hakupompa. Manakwetu watiyili muloña nkoñi wahanjekeli nindi munjila yayiwahi nawa yakukeña.

14, 15. (a) Mpinjinyi yitunateli kuzatisha kufumba kwekala haMatewu 18:15-17? (b) Njilanyi jisatu jateneniyi Yesu, nawa muloñadi wutwatela kujizatishila?

¹⁴ Kukala kwakuvulu kwamwekanaña hakachi kawakwaKristu ayedi atela kukwimanisha mwayedi wawu. Hela chochu, mpinji yikwawu chakala kwila mwenimu. Kukala kukwawu kwakeñekaña wukwashu kudi antu amakwawu neyi chahosha Matewu 18:15-17. (Tañenu.) ‘Kuvulumuna’ kwateneniyi Yesu hikwadiña tuyiluwa twanyanya twekalaña hakachi kawakwaKristuku. Tuneluki ñahi? Yesu wahosheli nindi neyi muntu wunavulumuni yakaana kubalumuka hanyima  yakuhanjeka namanakwindi, hamesu awayinsahu niamanakwetu ashikahu, atela kumumona neyi “kaJentili, hela neyi nsonkeshi.” Makonu, awa mazu atalisha mukwila nawu watela kuhañewa muchipompelu. Iku ‘kuvulumuna’ kwabombelamu wupwapoki nimatuñu, ilaña kwabombelamu wanyi nshidi yidi neyi wujila, wuvumbi weyala neyala, kasekesha hela kupesha. Muloña kuvulumuna kwamuchidiwu aeluda diwu atela kukwimanisha.

¹⁵ Yesu wahosheli muniyi njila kulonda yatuleji chitwatela kukwasha manakwetu muloña twamukeña. (Matewu 18:12-14) Tunateli kulondela ñahi iku kufumba? (1) Twatela kuleta kuwunda namanakwetu chakadi kulejamu antu amakwawu. Twatela kuhanjeka nindi kakavulu. Hanu dinu tunateli kwila ñahi neyi kukala kutwalekahu? (2) Twatela kuhanjeka nindi iku hadi muntu wuneluki kukala chikudi hela wunateli kumona neyi hadi kukala. Neyi mumanisha kukala, ‘munamukwashi manakwenu.’ Ilaña neyi mukañanya kuleta kuwunda henohu munahanjeki nindi kakavulu mwatela (3) kuleja aeluda iku kukala.

16. Chumanyi chinakumwekesha nawu kufumba kwaYesu kwazatikaña nawa kwamwekeshaña kukeña?

¹⁶ Mpinji yikwawu, tunateli kuzatisha wanyi njila jejima jisatu jekala haMatewu 18:15-17. Muloñadi? Muloña kakavulu muntu wunavulumuni wetejaña nindi naluwañeshi nawa wazatilañahu kulonda abuli kumuhaña muchipompelu. Kuhiñahu muntu anavulumuniwu watela kumwanakena manakwindi kulonda ekali mukuwunda. Tunamoni hatooka mukufumba kwaYesu netu, komana twatela kuya wanyi swayi kudi aeluda. Tunateli kuleja aeluda kukala neyi tunalondeli dehi yikuma yiyedi yakusambila nawa kudi wunsahu walala wunakumwekesha nawu hadi kukala.

17. Nkiswinyi yitukatambwila neyi ‘tukeñakeña kuwunda’ nawakwetu?

¹⁷ Chineli twawanina wanyi, tukuhilishaña akwetu. Kambanji Yakoba wasonekeli nindi: “Muntu wukubula kuluwa mukanwa diyi muntu walala chikupu, natweshi kufumba nimujimba wejima.” (Yakoba 3:2) Hakwila tumanishi kukala, twatela kuzata nañovu ‘kukeña kuwunda nikukwihaña.’ (Masamu 34:14) Neyi tukutwalekahu kwikala mukuwunda nawakwetu, tukwikala nawubwambu wawuwahi nawamanakwetu niahela nawa tukwikala anuñañana. (Masamu 133:1-3) Sweje-e dinu, tukwikala nawubwambu wawuwahi naYehova, ‘Nzambi wahanaña kuwunda.’ (Aroma 15:33) Tunateli kutambwila iji nkisu neyi tukumanishaña kukala munjila yakukeña.