AMAKWAWU AKANAÑA. Ndotolu wumu wesekejeli kuzatisha Bayibolu nawu yitukwashi nakuzatisha mukanda wamu 1920 kutañishamu akashikola kemesitili. Muntu wumu wabula kulemesha Bayibolu wahosheli nindi wukutwesha wanyi kuzatisha mukanda wachakuzatisha kopyuta yakunyaaka kulonda wiluki chakuzatisha kopyuta yayiha. Munjila yikwawu antu amakwawu ahoshaña nawu Bayibolu kwila yikwashana nehi muloña yinashimbuli.

Muloñadi muntu chikuzatishilayi mukanda wakunyaaka mukanu kaayi munenzali jakutuñatuña jakatataka? Nawa hamawebusayiti amavulu anakushahu nsañu yinateli kukwasha nikulombola antu. Maprogilamu aha TV amwekeshaña nsañu yahosha hadi antu adiza hayitoñojoka yawantu, hachihandilu chawantu niansoneki. Maluña ahembelañawu nyikanda, alandishañaku nyikanda yakukwasha antu nawa ayilandishaña namali amavulu.

Chineli kudi nsañu yayivulu yakatataka, muloñadi antu chatela kushindamenawu haBayibolu mukanda wasonekeliwu yaaka 2,000 yinahitihu? Neyi awuzatisha, komana chinayi mukwila nawu antu abula kulemesha Bayibolu ahoshaña mwalala hakuhosha nawu kuzatisha iwu mukanda wasonekeliwu kunyaaka chidi neyi anakuzatisha mukanda wakunyaaka wakemesitili hela mukanda wachakuzatisha kopyuta yakunyaka? Kafwampi, awantu atwambaña. Nsañu yasayansi nijakutuñatuña jahimpaña mumpinji-mumpinji, hanu dinu antu anakushakama chiwahi? Antu achidi kukeña kwikala nachihandilu chachiwahi chamuzañalu, chakiñewa, kwikala nachisaka chachiwahi ninamabwambu amawahi.

Hela chakwila yinashimbuli, Bayibolu yinateli kutukwasha muniku kukala nimukukala kukwawu. Nawa yahosha nawu ayonena kudi Nleñi yetu. Yatulombolaña muchihandilu chetu chejima nawa yatukwashaña nimukukala kudi kwejima kutwamonaña. (2 Timotewu 3:16, 17) Sweje dinu, yahosha nawu mwekala kufumba kwakuwahi, kufumba kwekalamu hikwamanañaku. Bayibolu yayeni yahosha nawu: “Mazu aNzambi amomi.”—Aheberu 4:12.

Komana mwahoshaña Bayibolu mwalala? Komana yaleka dehi kuzatika tahindi himukanda wunateli kutukwasha, dikwila nawu mukanda wuchidi kuzatika? Ayinu magazini yaKaposhi Kakutalila, sweje-e nyitu yakutachikilahu, yikuyikwasha kuwana ñakwilu yanawa malwihu.