BAYIBOLU YEKALA WANYI MUKANDA WASAYANSI, ILAÑA MWEKALA NSAÑU YAHOSHA HAYUMA YIKAMWEKANA KUMBIDI. SHINSHIKENU HAYAKUTALILAHU YANTESHA.

Komana iwulu niiseki jikweti ntachikilu?

Asayantisiti hatachi akaanineña nawu iwulu niiseki hijikweti ntachikiluku. Ilaña ichi aneteji nawu iwulu niiseki jikweti ntachikilu. Bayibolu yashimwineñahu dehi yumiyi.—Kutachika 1:1.

Iseki dekala ñahi?

Kuyaaka yakunyima, antu amavulu atoñojokeleña nawu iseki dekala desekana. Muyaaka nkulakaji yamuchitanu B.C.E., asayantisiti awaGiriki ahosheli nawu dadiña danjiñumuki. Ilaña henohu kanda eluki ichi chikuma, muyaaka nkulakaji 8 B.C.E., nsoneki waBayibolu Isaya wahosheli nindi “chikelubula cheseki” kuzatisha izu dinateli kubalumuna cheñi nawu “njiñumuki.”—Isaya 40:22.

Komana mawulu itwamonaña ayileñeli nawu akatokeña?

Sayantisiti wawaGiriki Aristotle, wamuyaaka nkulakaji yamuchiwana B.C.E., wahosheli nindi, kutoka kwekala hohu hamaseki, ilaña mawulu hiyahimpikaña hela kutokaku. Antu atwalekelihu kukuhwelela mwenimu hadi yaaka yayivulu. Ilaña muyaaka nkulakaji yamu 19, asayantisiti aluwañesheli yitoñojoka yawantu. Ahosheli nawu yuma yejima chili yamwiwulu hela yahamaseki yatokaña. Sayantisiti wejina da Lord Kelvin niyena waletesheli antu aluwankani chikupu kuhitila mukuhosha nindi, Bayibolu yahosha kutalisha kwiwulu niiseki nawu: “Wejima wawu akakula chikwehina dakuvwala.” (Masamu 102:25, 26) Kelvin wakuhweleleli neyi chochahosha Bayibolu nindi, Nzambi nateli kukañesha iku kutoka kulonda kubuli kukisañana yileñaleña Yindi.—Mukwakutaŋisha 1:4.

Yumanyi yakwata mapulaneti chidi neyi iseki hitwekala?

Aristotle wahosheli nindi, yuma yejima yamwiwulu yekala mumusululu wanjiñumuki, yejima jadikwata hamu iku iseki didi mukachi. Muyaaka nkulakaji yamuma 18 C.E., asayantisiti etejeli nawu tutumbwa nimapulaneti ajikudika hamukunkulu. Ilaña mumukanda waYoba wasonekeliyi muyaaka nkulakaji yamu 15 B.C.E., twatañañamu netu Nleñi “wakudikaña iseki hamukunkulwayi.”—Yoba 26:7.

HELA CHAKWILA BAYIBOLU HIYEKALA MUKANDA WAYITUKUMBUKU, MWEKALA YISHINA YAYIWAHI YAKWASHAÑA ANTU KUMUJIMBA.

Kwambula antu akata

Nshimbi yaMosi yahosheli nawu antu akata mbumba atela kushakama kwakankawawu. Muyaaka yamuma 1800 diyi mpinji yelukiliwu andotolu chakuzatisha ichi chishina, chinakuzatika nimakonu.—Alevi, kapetulu 13 ni 14.

Kwisuka kumakasa hanyima yakukwata chibimbi.

Kumakumishilu ayaaka yamuma 1800, andotolu adiña nakukwata yibimbi kuhiñahu aya nakukwata ayeji chakadi kwisuka kumakasa. Chumichi chaletesheli antu amavulu kufwa. Hela chochu, Nshimbi yaMosi yahosheli nawu muntu wukukwata chibimbi wadiña wamajilu. Yahosheli nawu kwatela kwikala menji akwisukamu antu anakwati yibimbi. Iyi ntanjikilu yamukwitiya yakwashili antu kumujimba.—Kuchinda 19:11, 19.

Kuvumbika tuji.

Chaaka nichaaka, anyana amavulu afwileña namusoñu wakuhitisha, muloña wakubula kuvumbika tuji. Nshimbi yaMosi yahosheli nawu tuji twamuntu atela kutuvumbika.—Kuhituluka 23:13.

Mpinji yakwalamisha.

Nshimbi yaNzambi yahosheli nawu mwana weyala atela kumwalamisha neyi nashikiji dehi mafuku 8. (Alevi 12:3) Mwana neyi wudi namulungu wumu kufuma hanasemukiyi, chilonda chadikwataña swayi. Kumpinji yakunyima, henohu kanda kwikali yitumbu yinakuzatishawu makonu, kwalamisha mwana henohu munahiti dehi mulungu wumu kwadiña kwakuwahi.

Kukola kwamuyitoñojoka nikukola kwakumujimba chikwendelaña hamu.

Akwakusandujola yitumbu niasayantisiti ahoshaña nawu kwikala namuzañalu, kuchiñeja, kusakilila nikwikala namuchima wakwanakena kwakwashaña muntu kumujimba. Bayibolu yahosha nawu: “Muchima wazañajala hiyitumbu yayiwahi; ilaña muchima wabaluka womishaña mafwaha.”—Yishimu 17:22.