Delphine itwatena muchibaaba chinafumihu, wamweni nindi kwakama kwamuleñeleleña kukeña kusheta. Bayibolu yakanisha wanyi kunwa walwa, ilaña yahosha nawu: “Bayi wikalaña hamu nawantu aswejaña kunwa walwaku.” (Yishimu 23:20 NWT) Kusheta walwa kwaletaña kukala kumujimba, kujaha wulu nawa antu amavulu anakufwa chaaka nichaaka. Kukala kwamuchidiwu kwadi kumana neyi antu alondelaña kufumba kwamuBayibolu.

Delphine wazatishili kufumba kwamuBayibolu. Wahosheli nindi: “Walwa wamanishileña wanyi yuma yañakamishileña. Nazatishili kufumba kwekala haAfwilipi 4:6, 7 kwahosha nawu: ‘Bayi mwakama chuma hela chimuku, ilaña . . . mulejenuña Nzambi yuma yonsu yimunakukeña.’ Mpinji yejima nawufuku, neyi nitachika kutoñojoka hayuma yañakamishileña, namulejeleñamu Yehova. Namulejeli yuma yejima yinatiyileña kushilahu tuhu nikuzuwa, kutiya kutama, chineñi nawa namulembeleli nami yankwashi kulonda nikali namuzañalu. Chikwachili nantetemena, nalekeli kwakama. Kulomba kwankwashili kusha maana hayuma yinadiña nayu chatela nitoñojokeña hayuma yinabulili. Nafuukwilihu kubula kunwa walwa cheñi. Chineli nekalili namuzañalu chikupu, hinakeñeli kuwujimbeshaku.”

Antu amavulu anakumona kukala kudi neyi kukata muchima nichineñi muloña wawuvumbi. Ilaña yishina yamuBayibolu yinateli kutukwasha kubula kumona kukala kwamuchidiwu kuhitila mukutuleja yuma yaletaña iku kukala, chakutalilahu, kukenkama nikutala nyevulu yanzekesi. Samuel kansi weyala wahosheli nindi, “kukenkama kwankalilileña wanyi. Mpinji yikwawu, nadikundileña wanyi nawantu, ilaña nelukileña nami iwu nakunkeña, chumichi chaletesheleña nimukenkamini nimami.” Samuel kakavulu amwilaña nawu wakenkama hela chakwila dichakeñañayi wanyi, chumichi chamuletesheli yafuukuli nindi wukukenkamaña. Ilaña ichi chaaku chamuneñesheleña. Wahosheli nindi, “Ichi chaaku chatama muloña chaleñelaña muntu kudimona kuwaha.”

Samuel watañili chibaaba chasonekelawu atwansi chekala ha jw.org. Nawa watoñojokeli mazu ekala haYishimu 20:11 ahosha nawu: “Hela mwana wanyanya amwilukilaña kuyuma yelañayi, neyi nyidimu yindi yitooka, hela neyi yoloka.” Chumichi chamukwashili ñahi? Samuel welukili nindi kukenkama hikwadiña kutooka hela kwaloñaku. Dichi wahosheli nindi: “Nelukili cheñi nami kansi wakenkamaña wekalaña nayilwilu yamuleñelaña kwikala muntu watama neyi yeñila muwulu. Natachikili kutoñojoka chakatiyañayi ñodami neyi yamona inakukenkamina mumbanda wacheñi. Chumichi chaleñeleli niluki nami ichi chaaku chatama. Chineli kukenkama kwakala wanyi dichaletesha kwikali kwatama.” Samuel walekeli kukenkama. Kuleka kukenkama kwamukwashili kubula kwila wuvumbi.

Antonio wadiña mukukala kweneni kwakwila wuvumbi: Wadiña nachaaku chakutala nyevulu yanzekesi. Hela chakwila wasumbwili mumbanda wamuwahi, watwalekelihu kutala nyevulu yanzekesi. Wahosheli nindi, kutoñojoka ha 1 Petulu 5:8 kwamukwashili nankashi. Hahosha nawu: “Hembenuña yitoñojoka yenu, tonenuña! Mukwankunyi nenu Diyabolu wendujolaña neyi mutupa wunakubuluma, wunakukeñakeña watela kudayi.” Antonio wahosheli nindi: “Nyevulu yanzekesi yidi mukaayi kejima nawa iyi nyevulu yinateli kutentama muyitoñojoka. Iyi vasi yankwashili chikupu kwiluka kwafumaña iku kweseka. Nanukili nami yina nyevulu yanzekesi yinatalileña yafumini kudi Diyabolu. Ichi neluki nami Yehova hohu diyi wunateli kunkwasha ‘kuhemba yitoñojoka yami nikwikala watona’ kulonda nishindi kukala kunateli kutamisha yitoñojoka yami, muchima wami niwulu wami.” Antonio wawanini wukwashu wakeñeleñayi nawa waleka chikupu chaaku chindi chatama. Nawa chumichi chinamukwashi nikubula kwiñila mukukala kwasweja.

Mwamweni, muBayibolu mwekala kufumba kunateli kutukwasha kubula kwiñila mukukala kweneni. Indi kukala kunashimbuli nawa kunakumwekana neyi kukumana wanyi? Tushinshikenu Izu daNzambi chidinateli kutukwasha kumanisha kukala kwamuchidiwu.