FWIKIJENU CHUMICHI: Munayi nakutala mumuziyamu munenzali yuma yakushankulu. Yayivulu yinalokoki, yinafukuluki nawa yinahumoki. Yikwawu yinafumi yibalu yamaneni. Hela chochu, mudi chuma chimu chakwila hosi nihichinafwi. Himukwihula muntu wunakuyitalisha nenu, “Ichi dichachiha kubadika yuma yejima?” Yena hakwakula nindi, “Inehi, dichinashimbuli kubadika yuma yejima nawa achiwahishahu wanyi.” Himukwihula nenu, “Achikiñili hakwila nawu chibuli kukisika?” Yena hakwakula nindi, “Inehi, hanichi chuma hanakunkili mpepela yeneni nawa hananokeli ninvula. Nawa antu amavulu aneseki nawu achikisañani.” Hadaha mukudihula iku munahayami nenu, ‘Ichi chuma achituñili nankahi?’

Munjila yoyimu, Bayibolu niyena yidi neyi ichi chuma. Himukanda wunashimbuli chikupu kubadika nyikanda yikwawu. Hela chochu, kudi nyikanda yikwawu yinashimbuli chikupu. Ilaña kufwana chuma chinashimbuli nawa chinakisiki, nsona jikwawu jasonekeliwu dehi jinakisiki muloña wampinji yinahitihu. Chakutalilahu, nsañu yahosha hasayansi yekalamu, yinambuki nansañu yakatataka yinakumwekana neyi yalala. Nsañu yahosha hakuuka yekalamu, ayimonaña nawu yawubanji chatela ayimoni nawu yikuyikwasha. Nsañu yayivulu yakunyaaka ayisonekeli hatuyuma twamukunkulwayi kwesekeja nachadiña yuma, chumichi chaletesheli jikwawu jijimbali hela jikisiki.

Hela chochu, Bayibolu yambukaku chikupu. Hela chakwila ayisonekeli yaaka 3,500 yinahitihu, nsañu yamuBayibolu yalala. Nawa hela chakwila anayilukuki kapampa kakavulu hadi yaaka yayivulu nakuyocha, kuyilekesha nikuyimona neyi yamukunkulwayi, nsañu yekalamu yalala. Kwila tuhosha netu anayiluwañeshi nansañu yayiha yidiku nehi muloña Bayibolu yahoshaña  yuma yakuhayamisha yakamwekana.—Talenu chikasha chinakwila nawu “Nsañu Yekalamu Yaleka Dehi Kuzatika Tahindi Yikazatika niKumbidi?”

Hela chochu, munateli kudihula nenu, ‘Komana ntañishilu yamuBayibolu yinateli kutukwasha nimakonu?’ Hakwila nawu muwani ñakwilu, dihulenu nenu: ‘Kukalanyi kunakuvula kumonawu antu makonu?’ Kukalanyi kwasweja kutama nankashi?’ Hadaha munakutoñojoka hamanjita, kutamisha mpepela, wubanji hela majika kanwa. Tushinshikenu hayishina yimu yatañishaña Bayibolu. Chitukushinshikaña haniyi yishina, dihulenu nenu, ‘Neyi chakwila antu adiña nakulondela iyi yishina, kaayi kadi kwikala ñahi?’

KUKEÑA KUWUNDA

“Adi namuzañalu wowu antu aletaña kuwunda, muloña akayitena nawu anyana kaNzambi.” (Matewu 5:9) “Neyi chinatwesheki, ikalenu awunda nawantu ejima kwesekeja nahanakumini ñovu jenu.”—Aroma 12:18.

LUWI NIKWANAKENA

“Adi namuzañalu wowu antu akweti luwi, muloña akayitiyila luwi.” (Matewu 5:7) “Ditiyililenuña wumu namukwawu nikudanakena wumu namukwawu chakufuma kumuchima hela chakwila kudi muntu wudi namuloña namukwawu. Neyi chayanakeneniyi Yehova * chakufuma kumuchima, ninenu nawa mwatela kwila mwomumu.”—Akolosi 3:13.

KUBULA CHAAMBU CHEKOWA

Nzambi “waleñeli nyuza yejima yawantu kufuma kudi muntu wumu kulonda ashakameña hanu hamaseki hejima.” (Yilwilu 17:26) “Nzambi hakweti chaambuku, ilaña munyuza yejima, muntu wamutiyaña woma nawa welaña yuma yaloña, amutambwilaña kudi yena.”—Yilwilu 10:34, 35.

KUBULA KUKISAÑANA ISEKI

“Yehova Nzambi watweli muntu, yomusha nimwitempa daEdeni, nindi, Kadidimi, kadihembi chachiwahi.” (Kutachika 2:15) Nzambi wakajilumuna “antu anakukisañana iseki.”—Chimwekeshu 11:18.

KUBULA LWISU NIYILWILU YAWUVUMBI

“Tondolwelenuña lwisu lwejima, muloña hela chakwila muntu wukweti yuma yayivulu nankashi, wumi windi hiwashindamena hayuma yahetayiku.” (Luka 12:15) “Wuvumbi, niyuma yawuzondu yejima nilwisu bayi mujitenaña mukachi kenuku, muloña yumiyi hiyatelela akwakujilaku.”—Aefwesesa 5:3.

KASHINSHI NIKUZATA NAÑOVU

“Tunakufwila kwikala ashinshika muyuma yejima.” (Aheberu 13:18) “Muntu weyaña yaleki kwiya, ilaña yazati nañovu, yakalakali mudimu wawuwahi namakasa indi.”—Aefwesesa 4:28.

KUKWASHA ANTU ANAKAANKILI

“Kundejenu antu ananeñi, koleshenu azeya nawa ikalenu mukuwunda nawantu ejima.” (1 Atesalonika 5:14) “Kuhemba chiwahi anyana anshona niambanda anfwila anakumona lukadi.”—Yakoba 1:27.

Kudi chuma chaletesha Bayibolu yishimuni iyi yikuma. Yatukwashaña kulemesha yishina yamuchidiwu nikuyizatisha muchihandilu chetu chejima. Neyi antu amavulu azatishileña yikuma yitunashimuni, kukala kunakumonawu antu kwadi kukeha. Mwamweni, yishina yamuBayibolu yatukwashaña chikupu nawa  yinenzi hampinji yatelela. Hanu dinu, yuma yatañishaña Bayibolu yinateli kuyikwasha ñahi makonu?

Muntu wumu wasweja maana wahosheli nindi: “Yuma yaloña yelañayi muntu, diyamwekeshaña nawu wukweti maana.” (Matewu 11:19) Komana kwila mwiteja mwahosheliyi nehi? Maana alala amwekenaña muyuma yaleñayi muntu. Munateli kudihula nenu: ‘Neyi chakwila Bayibolu yakwashanaña, kwila yinkwasha muchihandilu chami nehi? Yikunkwasha ñahi nakukala kunakumona makonu?’ Shinshikenu hanichi chakutalilahu.

Delphine, * wazatileña nyidimu yayivulu nawa yayiwahi nankashi muchihandilu chindi. Hela chochu, wamweni mukukala mukulondashana. Wafwishili mwanindi wamumbanda kampululu, amuseñeli nawa wamweni kukala kwamali. Wahosheli nindi: “Nakabakeni chikupu muloña nadiña wanyi namwana, iyala niitala. Nadimweneña wamukunkulwayi muloña hinadiña namwana, iyala hela italaku. Hinadiña nañovuku nikuchiñejaku.”

Delphine wadimweneneni namesu kapu chikuma chakwila nawu: “Mafuku anyaka yetu ashikaña munyaka 70, hela neyi nañovu yamuntu yikushika munyaka  80, ñovu oyu yakukabakana chakukabakana hohu nakumona ihuñu; mwaka yaya dehi, hitukutuuka.”—Masamu 90:10. (NWT)

Delphine wamweni Bayibolu chiyamukwashili hampinji yadiñayi muniku mukukala. Bayibolu chiyamukwashili, chinakumwekesha nawu ninetu yinateli kutukwasha. Yibaaba yisatu yinalondelihu yikuhosha haBayibolu chiyinakwashi antu amakwawu chazatishiliwu kufumba kwekalamu hampinji yadiñawu mukukala. Eluki nawu Bayibolu yidi neyi china chuma chitwalumbulula kumatachikilu. Komana antu aneluki chumichi muloña wakwila Bayibolu ayisoneka munjila yambukaku? Tahindi mwekala yitoñojoka yaNzambi bayi yawantuku?—1 Atesalonika 2:13.

Hadaha ninenu mwamonaña kukala muchihandilu chenu. Neyi mudi mukukala kweneni, kudihi kumwawanaña kukundeja, wukwashu nikufumba kwalala?

Tushinshikenu njila jisatu mwatukwashilaña Bayibolu muchihandilu chetu. Yinateli kuyikwasha

1. kubula kwiñila mukukala neyi chinatwesheki.

2. kumanisha kukala neyi kunamwekani.

3. kuumika kukala kumunateli kubula kumanisha.

Yibaaba yinalondelihu yikuhosha haniyi yuma yisatu.