Neyi munakukeña kwiluka muntu, mwasambilaña kwihula nenu, “Ijina denu yenu anyi?” Neyi mumwihula Nzambi ilu lwihu, wukwakula nindidi?

“Yami Yehova; didu ijina dami.”—Isaya 42:8.

Nzambi walemesha nankashi ijina dindi. Kwosi wamutumbili Nzambi ijinaku; waditumbili yomwenindi. Yehova wahosheli nindi: “Ijina dami dodenidi dahaya nyaka, dodamba kañanukañawu nachu, kunyaka yejima yamba kavwalikilañawu antu.” (Kwidika 3:15) MuBayibolu, ijina daNzambi daYehova adisoneka hahavulu kubadika nkumbu jikwetiyi, jidi neyi Wabadika Ñovu, Tata, Mwanta hela Nzambi nawa dekala hahavulu kubadika majina awantu adi neyi Abarahama, Mosi, Davidi hela Yesu. Sweje-e dinu, Yehova wakeñaña nindi antu eluki ijina dindi. Bayibolu yahosha nawu: “Kulonda antu eluki nawu, ijina deyi yeyi Yehova, yeyi hohu Mukwakubadika heseki dejima.”—Masamu 83:18.

Yesu wadilemesheli idi ijina. Mukulomba kwatenañawu nawu Kulomba kwaMwanta, Yesu wayilejeli atumbanji twindi nindi alombeña kudi Nzambi kuzatisha awa mazu: “Ijina deyi diikali dajila.” (Matewu 6:9) Yesu yomweni walombeli kudi Nzambi nindi: “Tata, lemeshaku ijina deyi.” (Yowanu 12:28) Yesu walemesheleña nankashi ijina daNzambi muchihandilu chindi, dihafumini hakuhosha mukulomba nindi: “Ami naleñeli ijina deyi adiluki, dichi nakadileñela akadiluki.”—Yowanu 17:26.

Antu amwiluka Nzambi alemesha idi ijina. Antu jaNzambi akunyima elukili nawu hakwila ayamwini  nikukiñewa chiña eluka ijina daNzambi dabadika. “Ijina daYehova hikaposhi kakola mukwakuloña hakutemukilamu, amwenenamu nizo-o.” (Yishimu 18:10) “Yowu muntu wakatambika ijina daYehova wakapuluka.” (Yoweli 2:32) Bayibolu yatulejaña nawu ijina daNzambi dakayimwekesha antu amukalakelaña Nzambi. “Muloña nyuza yawantu yejima yakenda, iwu mwijina damukishi wawu, iwu mwijina damukishi wawu, hakwila etu twakendaña mwijina daYehova Nzambi yetu chahaya nyaka nanyaka.”—Mika 4:5; Yilwilu 15:14.

Idi ijina damulumbululaña Nzambi. Antu amavulu adiza Bayibolu ahoshaña nawu ijina daYehova datalisha mukwila nawu “Wakojejaña Yuma Kwikalaku.” Yehova Nzambi wakeñeli ijina dindi dilumbuluki chiwahi chelili yahoshi yomweni awa mazu ahosheliyi naMosi nindi: “AMI YAMI MWOMUNEKALILA KWAMI.” (Kwidika 3:14) Dichi, ijina daNzambi hidatalisha hohu mukulumbulula mudimu wukwetiyi wakwikala Nleñi wakojejaña yuma kwikalakuku. Ijina dindi datalisha cheñi mukwila nawu wukweti ñovu yakudilisha yomweni hela yileñaleña yindi kwikala chuma chejima chinakukeñayi kulonda yeli nkeñelu yindi. Hela chakwila nkumbu jashimunaña chifulu chikwetiyi Nzambi, wuswa hela wanta, ilaña ijina dindi hohu, daYehova, didamushimunaña chekalayi nichinateli kwikalayi.

Idi ijina damwekeshaña nawu Nzambi watukeña. Mwatalisha Ijina daNzambi, mwamwekeshaña nawu wakeña yileñaleña yindi, kushilahu ninetu. Cheñi, chineli Nzambi watuleja ijina dindi chinakumwekesha nawu nakukeña nindi tumwiluki. Nawa yena diyi wadiña mutachi kutuleja ijina dindi henohu kanda tudiluki. Mwamweni, Nzambi nakukeña nindi tumumoneña netu hiMuntu itunateli kudiluka nindi bayi neyi mukishi wutunateli kubula kudiluka nindiku.—Masamu 73:28.

Neyi tukudizatishaña ijina daNzambi tukumwekeshaña netu twamukeña. Twili netu, munaleji muntu imunakukeña nenu yekali ibwambu denu kulonda yayiteneña hejina denu. Mukutiya ñahi neyi iwu muntu nakukaana chikupu kuzatisha ijina denu? Mukuhita kwampinji, mukutachika kujinoka neyi iwu muntu mwalala nakukeña kwikala ibwambu denu. Dichidi niNzambi. Yehova wayileja antu ijina dindi nawa nakukeña nindi tudizatisheña. Chitwadizatisha, tukumwekesha kudi Yehova netu tunakukeña kwikala amabwambu jindi. Wayiluka antu “atoñojokaña [hela “alemesha,”] ijina dindi.”—Malaki 3:16.

Njila yatachi yakumwilukilamu Nzambi hikwiluka ijina dindi. Bayi dinu tukumina hohenahaku. Twatela kumwiluka yomweni wukweti idi ijina. Twatela kwiluka chekalayi.