Neyi mudi mukukala, mukukeña ibwambu denu kwinza nakuyikwasha. Chumichi chakojejaña antu amakwawu kuhosha nawu, Nzambi hibwambu detu wanyi muloña watukwashaña wanyi. Kuhosha hohu chalala, Nzambi natwilili yuma yayivulu nawa wakamanisha cheñi kukala kwejima niyihuñu yitunakumona makonu. Yumanyi yikakoñayi Nzambi?

Nzambi wakamanisha kukala kwejima nawa wakafumishahu yomweni wakukojejaña. Bayibolu yamutena iwu wakojejaña kukala chiyahosha nawu: “Kaayi kejima kadi mumakasa awatama.” (1 Yowanu 5:19) Iwu “watama” diyi ateneniyi Yesu nindi “nyuuli wakanu kaayi,” Satana Diyabolu. (Yowanu 12:31) Wufwinda wudi mukaayi wunakukojeja antu kumona yihuñu wunakumwekesha nawu Satana diyi wakojejaña kukala. Yumanyi yakelayi Nzambi?

Katataka Yehova Nzambi yazatilihu kuhitila mudi Mwanindi, Yesu Kristu, kulonda “yatweshi kufumishahu wakojejaña kufwa, dikwila nawu Diyabolu.” (Aheberu 2:14; 1 Yowanu 3:8) Bayibolu yatulejaña cheñi nawu Diyabolu yomweni weluka nindi “nashali dehi nakapinji kantesha” nakumukisañana. (Chimwekeshu 12:12) Nzambi wakafumishahu cheñi kutama niantu ejima akukojejaña.—Masamu 37:9; Yishimu 2:22.

Neyi nafumishihu dehi kutama kwejima heseki, Nleñi yetu wakazatilahu kulonda yakashikiji nkeñelu yindi yakusambila yaleñeleliyi antu niiseki. Yumanyi yitunakutalila?

Kuwunda nikukiñewa kwahaya nyaaka. “Akwakudizoza akaswana ituña, akatiya kuwaha nankashi nakushakama chachiwahi chamwena.”—Masamu 37:11.

Yakuda yayivulu. “Hanu hamaseki hansa jampidi jamaneni hakavula kabaka.”—Masamu 72:16.

Matala amawahi ninyidimu. “Akatuña matala, akashakamamu. Akadima matempa anyivinyu, akadya nyikabu yayu. . . . Antu ami inatonda akaluña luñe-e nanyidimu yamakasawu.”—Isaya 65:21, 22.

Komana munakukeña kudiluñisha yuma yamuchidiwu? Katataka tuhu antu ejima akadiluñishi yumiyi.

Makonu, antu ejima akataña nawa afwaña, ilaña katataka yuma yihimpiki. Nzambi keña yazatishi ifutu danyiloña daYesu kulonda “muntu wejima wukumukuhwelela yakabuli kujilumuka, ilaña yakekali nawumi wahaya.” (Yowanu 3:16) Yumanyi yikamwekana?

Yikatu akayifumishahu. “Mwenimbu hakahosha nindi Ami nakataku; antu ashakamamu akayanakena kuluwa kwawu.”—Isaya 33:24.

Kufwa hikwakakabishaña cheñi antuku. “Naminyi dehi kufwa chahaya nyaka; Yehova wakakombola madilu mumesu awantu ejima.”—Isaya 25:8.

Antu akashakamaña haya nyaaka. “Chawaana chahanañayi Nzambi, hiwumi wahaya nyaaka mudi Kristu Yesu Mwanta wetu.”—Aroma 6:23.

Afu akayisañula cheñi. “Kwamba kekala kusañuka kwawantu aloña niabula kuloña.” (Yilwilu 24:15) Afu akayisañula muloña wachawaana chaNzambi chefutu danyiloña.

Nzambi wakela ñahi yumiyi?

Nzambi wakela nkeñelu yindi yaleñeleliyi antu niiseki kuzatisha nfulumendi yamwiwulu, yikweti Nyuuli yachu watondewa Kristu Yesu. (Masamu 110:1, 2) Yesu walejeli atumbanji twindi nindi alombeña iyi nfulumendi hela wanta kuzatisha awa mazu: “Tata yetu wekala mwiwulu, . . . Wanta weyi winzi.”—Matewu 6:9, 10.

Wanta waNzambi wakayuula iseki dejima nawa wakafumishahu yihuñu nimakabi ejima adi hamaseki. Iwu Wanta hinfulumendi yayiwahi kubadika nfulumendi jejima jawantu. Dihafumini Yesu hakushimwina chikupu “nsañu yayiwahi yaWanta” hampinji yadiñayi hamaseki nawa wayilejeli atumbanji twindi kushimwina.—Matewu 4:23; 24:14.

Yehova Nzambi washiika nindi wakayilila yumiyi muloña wasweja kukeña antu. Komana chumichi chinayinki wanyi chipepa chakukeña kumwiluka kulonda mukundami kudi yena? Wulokwinyi wumwakatambwila neyi mumwiluka? Chibaaba chinalondelihu chikushimuna.