Neyi munakukeña kwiluka muntu chiwahi, chikuwaha neyi mwiluka yuma yakoñayi nikukala kwomikayi. Munjila yoyimu, neyi munakukeña kumwiluka Nzambi chiwahi, mwatela kwiluka yuma yinakoñiyi. Chimukwilukaña, mukuhayama hakumona yuma yakoñeliyi kunyima chiyikutukwasha ayinu mpinji nikumbidi.

Yehova Nzambi diyi Nleñi Wabadika, nawa “yilwilu yindi yabulaña kumwekana, yamwekana hatooka kufuma tuhu mpinji yaleñeliyi iseki kuya nikumbidi, muloña yamwekenaña muyuma yaleñayi.” (Aroma 1:20) “Yena neli maseki nañovu jindi, nakoleshi mpata yamunu mwishina namaana indi, natanjiki mawulu nakashinshi kindi.” (Yeremiya 10:12) Yileñaleña yakuhayamisha yamwekeshaña nawu Nzambi watukeña.

Toñojokenu, Yehova watuleña etu antu munjila yayiwahi neyi “chekalayi yomweni.” (Kutachika 1:27) Dikwila nawu watuleñeli munjila yakwila tumwekesheña yilwilu yindi yayiwahi. Watuleñeli nampwila yakukeña kumwiluka hela netu wuswa wakwiluka chamonañayi yuma nikulemesha nshimbi jindi. Dichi neyi tukulondelaña nshimbi jeniji, tukwikala namuzañalu waweni nawa chihandilu chetu chikwikala chachiwahi. Sweje-e dinu, watwinka wuswa wakukolesha wubwambu wetu nayena.

Neyi tushinshika yuma yekala hamaseki, yamwekeshaña chatukeñayi Nzambi. Mazu akapostolu Pawulu amwekeshaña nawu, Nzambi “hayilekeli chakadi kuyileja wunsahu windi wakwila chachiwahiku, wakoñeli yuma yayiwahi nawa [watwinkaña] nvula niyilaaka yasoñelañamu yakuda [nakutwikutisha etu] nikwinzesha nyichima [yetu] namuzañalu.” (Yilwilu 14:17) Nzambi watwinkeli yuma yayivulu yatukwashaña kuhanda. Watwinkeli yuma yayivulu yashiyashana kulonda yituzañalesheña. Ilaña iyi  hiyuma yantesha hohu hayuma yinakukeña kutwililayi Nzambi.

Yehova waleñeli iseki kulonda antu ashakameñahu haya nyaaka. Bayibolu yahosha nawu: “Maseki nayinkuwu anyana kawantu,” nawa “wadileñeli dibuli kwikala damukunkulwayi wadiwumbili mushakami antu.” (Masamu 115:16; Isaya 45:18) Anyi ateleleli kushakamamu nawa yaaka yiñahi? “Akwakuloña akaswana ituña, akashakamamu haya nyaka.”—Masamu 37:29.

Munjila yoyimu, Yehova waleñeli iyala nimumbanda watachi, Adama naEva, wayishili muparadisa heseki kulonda ‘adidimeña nikudihemba chiwahi.’ (Kutachika 2:8, 15) Nzambi wayinkeli mudimu mwadibombeleli yuma yiyedi: “Semununenu, muvuleña, muwanini heseki, mudovwahishi.” (Kutachika 1:28) Dichi Adama niEva adiña nakuchiñeja kwakutwalekahu kuhanda chakadi kufwa. Chawushona, adikañili naNzambi nawa ajimbesheli kukooleka kwakwikala hadi antu ‘aloña’ “akaswana ituña.” Hela chochu, neyi chitukudiza, chiluwa chawu hichahimpili nkeñelu yaYehova hadi etu hela yesekiku. Chatachi, tutalenu chuma chikwawu chinakoñiyi Nzambi.

Bayibolu ayitenaña cheñi nawu Izu daNzambi. Muloñadi Yehova chatwinkelayi Bayibolu? Chuma chacheni wakeñaña nindi tumwiluki. (Yishimu 2:1-5) Eña, Bayibolu yakula wanyi malwihu ejima kutalisha hadi Nzambi, kwosi mukanda wakulaku. (Mukwakutañisha 3:11) Ilaña yuma yejima yidi muBayibolu yatukwashaña kumwiluka Nzambi. Twelukaña chekalayi neyi tushinshika chelañayi nawantu. Tweluka antu akeñayi niabula kukeñayi. (Masamu 15:1-5) Tweluka chatoñojokañayi hansañu yakudifukula, yilwilu ninsañu yamaheta. Bayibolu yatulejaña chekala yilwilu yaYehova muyuma yahosheleña niyakoñeleñayi Mwanindi, Yesu Kristu.—Yowanu 14:9.

Chuma chikwawu chatwinkelayi Yehova Izu dindi, Bayibolu, wakeñaña nindi twikali namuzañalu nichihandilu chachiwahi. MuBayibolu, Yehova watulejaña chakwikala namuzañalu muchisaka, chakuzañalala nayuma yitukweti nichakuumika nayihuñu. Nawa neyi chinalumbululiwu kumbidi muyinu magazini, Bayibolu yaakula malwihu alema adi neyi: Muloñadi antu chinakukabakenawu nankashi? Yumanyi yikamwekana kumbidi? Yashimuna cheñi yuma yinakoñiyi Nzambi kulonda yashikiji nkeñelu yindi.

Bayibolu himukanda wabadika nyikanda yejima, himukanda waNzambi. Awusonekeli kudi antu 40 muyaaka yakubadika ha 1,600, ilaña mutu wansañu yachu wuchidi kutiyakana muloña ayisoneka kudi Nzambi. (2 Timotewu 3:16) Kwambukaku nanyikanda yakushankulu, ayibalumuna choloka nakuyihemba chiwahi muyaaka yejimiyi, neyi chamwekeshaña mamanyusikiliputi aBayibolu akushankulu. Cheñi nawa, Bayibolu yajiya wanyi hela chakwila ayilumbu afwilileña kulekesha mudimu wakuyibalumuna, kutandisha hela kuyitaña. Makonu, Bayibolu himukanda wudi nawantu wabalumunawu mumadimi amavulu. Chineli Bayibolu yichidi kwoku nikulelu chinakumwekesha nawu “izu daNzambi yetu saña dakolela haya nyaka.”—Isaya 40:8.

Chuma chikwawu chineliyi Nzambi hintanjikilu yindi yadimena yatushiikayi yachuma chakatwililayi. Neyi chitwashimuna dehi, Nzambi wakeñeleña nindi antu ashakameña haya nyaaka hamaseki. Ilaña, chelili Adama yadikañi naNzambi, wavulumwini wajimbesheli kukooleka kwakwikala nawumi wahaya nyaaka yena nianyanindi ejima adi kuvwalika kumbidi. “Chocheñilili nshidi mukaayi kuhitila mudi muntu wumu, nikufwa nikwena kwenjili kuhitila munshidi, dichi kufwa kwataandili kudi antu ejima muloña wejima wawu avulumwini.” (Aroma 5:12) Kudikaña kwawantu kwazuñishili nkeñelu yaNzambi. Indi Yehova welilidi?

Yuma yelili Yehova yesekeni nachekala yilwilu yindi. Wayinkeli aAdama naEva muloña hachuma chakoñeliwu, ilaña waweni njila jakukwashilamu anyanawu akavwalika kumbidi. Namaanindi, Yehova  wakeñeli njila yakumanishilamu iku kukala, nawa wanyakeli kushimuna chakukumanisha. (Kutachika 3:15) Mudi Mwana kaNzambi, Yesu Kristu, dimwadi kufumishilayi nshidi nikufwa. Mwabombelelidi?

Hakwila antu ayikuuli kunshidi yaAdama, Yehova watemesheli Yesu hamaseki nakuleja antu njila yaya kuwumi “nikuhana wumi windi kwikala ifutu danyiloña dakukuula nachu antu amavulu.” a (Matewu 20:28; Yowanu 14:6) Yesu watwesheli kuhana ifutu danyiloña muloña wadiña wawanina neyi Adama. Kwambukaku naAdama, Yesu watwalekelihu nakwovwahila chikupu, kushika nikukufwa. Chineli Yesu hateleleli kufwaku, Yehova wamusañwili nawa wafuntili mwiwulu. Ichi Yesu nateli kwila yuma yakañenyi Adama kwila, kwinka antu ashinshika kukooleka kwakwikala nawumi wahaya nyaaka. “Muloña neyi chochayilishiliwu antu amavulu kwikala akwanshidi muloña wakudikaña kwamuntu wumu, munjila yoyimu, antu amavulu akayibalumuna kwikala aloña kuhitila mukwovwahila kwamuntu wumu.” (Aroma 5:19) Kuzatisha ifutu damulambu waYesu, Nzambi wakakoña mwejima mwayishiikiliyi antu nawu akashakamaña hamaseki haya nyaaka.

Twamwilukaña Yehova chikupu neyi tushinshika njila yamanishililimu kukala kwaleteyili Adama. Tunamoni netu kwosi chuma chinateli kumukañesha Yehova kwila chuma chashimwiniyi hatachi; izu dindi ‘dakoñaña mudimu wadu.’ (Isaya 55:11) Tunadizi cheñi chatukeñayi Yehova nankashi. “Muloña wachumichi, Nzambi wamwekesheli kukeña kwindi hadi etu hakutemesha mukaayi Mwanindi wumu hohu kulonda tukatweshi kwikala nawumi kuhitila mudi yena. Imu dimwatalisha iku kukeña, Nzambi diyi watukeñeli etu nakututemeshela Mwanindi kwikala mulambu wakufumishahu nshidi jetu, bayi neyi yetu twamukeñeliku.”—1 Yowanu 4:9, 10.

Nzambi “hakañesheli Mwanindi kumona makabi hamuloña wanetu ejimaku,” tunakuhweleli netu Nzambi ‘wakatwinka yuma yikwawu yejima’ yatushiikayi. (Aroma 8:32) Nzambi watushiika nindi wakatwilila yumanyi? Twalekenuhu kutaña.