Yesu walumbulwili yuma yaleteshaña ‘twiluki netu Wanta waNzambi wudi kwakwihi.’ (Luka 21:31) Washimwini nindi, hakachi kayuma yikamwekana, kwakekala njita jamaneni, kukeha kwayakuda niyipupu, diyuma yitunakumona makonu.—Luka 21:10-17.

Bayibolu yashimuna cheñi nawu “mafuku akukuminina” achiyuulu chawantu twakayilukilaña kuyilwilu yawantu, sweje-e dinu kukuluwalala kwawu. Neyi mutaña 2 Timotewu 3:1-5, mukumona chayilumbululawu. Chimwamona antu anakumwekesha yilwilu yamuchidiwu, mukwiteja chikupu nenu wuprofwetu wamuBayibolu wunesekani nayuma yitunakumona makonu.

Chumanyi chikamwekana? Mpinji yinashiki kulonda Wanta waNzambi wuhimpi chikupu nakuwahisha nshakaminu yawantu hamaseki. (Luka 21:36) MuBayibolu, Nzambi washiika nindi hamaseki hakekala yuma yayiwahi nawa antu akashakamañahu akadiluñishaña. Talenu yuma yashiikayi.

‘Amwinka [Yesu] nikuyuula, mpuhu, wanta, kulonda antu amwacheñi namwacheñi ejima ninyunza yawantu yejima, niakwamadimi eñi naeñi ejima akamukalakelaña. Chiyuulu chindi chaya nyaaka nanyaaka, hichamba kahitaku, niwanta windi hiwakakisikaku.’—DANYELI 7:14.

Chuma chikamwekana: Mwakashakamaña chiwahi muchiyuulu chanfulumendi yaNzambi yamwinkayi Mwanindi kwikala Mwanta kuyuula kaayi kejima.

“Mwenimbu hakahosha nindi Ami nakataku.”—ISAYA 33:24.

Chuma chikamwekana: Himwakakataña hela kwikala nawufwayiku nawa mwakafwaña wanyi.

“Diyi wakumishaña majita mwakumina iseki dejima.”—MASAMU 46:9.

Chuma chikamwekana: Hikwakekala cheñi njita niyihuñu yenzaña muloña wanjitaku.

“Muntu watama hakekala nawa mwokuku . . . Akwakudizoza akaswana ituña.”—MASAMU 37:10, 11.

Chuma chikamwekana: Hikwakekala cheñi antu atamaku, chiña antu afwilaña kumwovwahila Nzambi.

‘Akatuña matala, akashakamamu. Akadima matempa anyivinyu, akada nyikabu yayu.’—ISAYA 65:21, 22.

Chuma chikamwekana: Iseki dejima dakawaha. Nzambi wakaakula kulomba kwetu kwakwila nawu nkeñelu yindi ayili “hamaseki.”—Matewu 6:10.