Nzambi Ijina Dindi Hinyi? Yomweni wahosha nindi: “Yami Yehova; didu ijina dami.” (Isaya 42:8) Ijina daNzambi dadeni damwekana mapampa 7,000 muBayibolu. Hela chochu, mumaBayibolu amavulu ijina daNzambi adisinsisha nankumbu jidi neyi “Mwanta.” Nzambi nakukeña mwikali ibwambu dindi, dichi nakuyileja nindi “tambikenu ijina dindi.”—Masamu 105:1.

Nkumbu jaYehova. Bayibolu yazatisha iji nkumbu hakumutena Yehova, jidi neyi, “Nzambi,” “Mukwakubadika,” “Nleñi, “ “Tata,” “Mwanta” nawa “Nyuuli.” MuBayibolu mwekela kulomba kwakuvulu kwamutenawu Yehova naniji nkumbu niijina dindi dadeni, daYehova.—Danyeli 9:4.

 Chekalayi Nzambi. Nzambi hispiritu. (Yowanu 4:24) Bayibolu yahosha nawu “kwosi muntu wamumonahu dehi Nzambi.” (Yowanu 1:18) Bayibolu yashimuna chatiyañayi Yehova. Antu anateli kumuneñesha hela kumutiyisha “kuwaha.”—Yishimu 11:20; Masamu 78:40, 41.

Yilwilu yaNzambi Yabadika Kuwaha. Nzambi hekala nachaambu kudi antu ejima akunyuza niyitachi yashiyashanaku. (Yilwilu 10:34, 35) Nawa wekala “nawushona, watoñaña antu, hazuwaña swayuku, wasweja niluwi, wavulisha ninsañu yalala.” (Kwidika 34:6, 7) Hela chochu, Nzambi wukweti yilwilu yiwana yasweja kuwaha.

Ñovu. Chineli ‘Nzambi hiMukwakubadika,’ wukweti ñovu yasweja yakushikija mwejima mwakanayi.—Kutachika 17:1.

Maana. Maana aNzambi abadika awantu ejima. Dimwatalisha Bayibolu hakuhosha nawu yena nkawindi hohu diyi “wekala namaana.”—Aroma 16:27.

Wuñanji. Nzambi welaña mwaloña mpinji yejima. Yuma yejima yelañayi ‘yalala chikupu,’ nawa “wakadi ninaha haheñelayi.”—Kuhituluka 32:4.

Kukeña. Bayibolu yahosha nawu “Nzambi hikukeña.” (1 Yowanu 4:8) Bayi neyi Nzambi wamwekeshaña hohu kukeñaku, ilaña diyi kukeña. Kukeña kwindi dikwamusañumunaña kwila yuma yejima, nawa yatukwashaña.

Wubwambu Wekala Hadi Nzambi naWantu. Nzambi, hiTata yetu wamwiwulu wukweti kukeña. (Matewu 6:9) Neyi tumukuhwelela tukwikala amabwambu jindi. (Masamu 25:14) Nawa Nzambi nakuyitambi nindi muswini kwakwihi nayena kuhitila mukulomba nikumumbila “kwakama kwenu kwejima, muloña yena wayakamenaña.”—1 Petulu 5:7; Yakoba 4:8.

Yesu HiNzambiku. Yesu wambukaku chikupu, yena nkawindi hohu diyi aleñeliwu kudi Nzambi yomweni. Dimuloña waweni Bayibolu yamutena nawu Mwana kaNzambi. (Yowanu 1:14) Chamuleñeliwu Yesu, Yehova wamuzatishili iwu wedi windi kwikala ‘Mukalawenu’ hakuleña yuma yejima.—Yishimu 8:30, 31; Akolosi 1:15, 16.

 Yesu Kristu hahoshelihu Nindi HiNzambiku. Ilaña walumbulwili nindi: “nidi ñimeni [yaNzambi], nawa Yenowu diyi wantemesheli.” (Yowanu 7:29) Hampinji yahosheleñayi nakambanji wumu, Yesu wamuteneni Yehova nindi: “Tata yami nawa Tata yenu,” “Nzambi yami nawa Nzambi yenu.” (Yowanu 20:17) Chafwiliyi Yesu, Yehova wamusañwili nakuya mwiwulu nawa wamulemesheli kuchikasa chindi chachidilu.—Matewu 28:18; Yilwilu 2:32, 33.

Yesu Kristu Nateli Kuyikwasha Kuswina Kwakwihi naNzambi

Yesu wenjili hanu hamaseki nakutudizisha tumwiluki Tata yindi. Yehova yomweni wahosheli nindi: “Iwu diyi Mwanami, inakeña. Mutiyililenu.” (Maku 9:7) Kwosi muntu wamwiluka Nzambi kubadika Yesuku. Wahosheli nindi: “Kwosi muntu wamwiluka Mwana, chiña Tata, nawa kwosi muntu wamwiluka Tata, chiña Mwana, nimuntu wejima anakeñiyi Mwana nindi yamwiluki Tata.”—Luka 10:22.

Yesu wamwekesheleña chikupu yilwilu yaTata yindi. Yesu wamwekesheleña yilwilu neyi yaTata yindi chakwila wahosheli nindi: “Muntu wejima wunamoni ami, dikwila nawu namoni niTata.” (Yowanu 14:9) Yesu waswijili antu kwakwihi naNzambi kuhitila mukumwekesha kukeña neyi kwaTata yindi mumazu nimunyidimu. Wahosheli nindi: “Ami yami njila, yami chalala, yami wumi. Kwosi muntu wunateli kwinza kudi Tata chakadi kuhitila mudi amiku.” (Yowanu 14:6) Wahosheli cheñi nindi: “Akwakudifukula alala [akadifukulaña] kudi Tata muspiritu nimuwalala, muloña Tata nakukeña antu adi neyi awa kulonda adifukuleña kudi yena.” (Yowanu 4:23) Fwikijenu chumichi, Yehova nakukeña antu adi neyi enu anakufwila kwiluka chalala hadi yena.