“Yeyi watiyaña mwalombañawu antu, antu ejima akwinza kudeyi.”​—Masamu 65:2.

Antu amakwawu alombaña muloña ahoshaña nawu chayikwashañaku, hela chakwila akuhwelela wanyi nawu kudi watiyaña kulomba kwawu. Ilaña bayi neyi twalombaña hohu kulonda tuwundishi nyichima hakwila tumanishi kukala kutukwetiku. Bayibolu yatulejaña nawu: “Yehova * wudi kwakwihi nawantu ejima akumutambika, nawejima akumutambika chalala chakubula kutwamba. . . . Wukutiya nawa chakubilelawu, Wukuyamwina.”—Masamu 145:18, 19.

Dichi twatela kwiluka netu, Yehova Nzambi watiyaña kulomba kwawantu adifukulaña kudi yena. Watuleja nindi: “Henohu dihu mwamba kantambika, mwamba kaya nakulomba kudami, ninami namba kayitiyilila.”—Yeremiya 29:12.

“Lombenuña chakadi kuzeya.”​—Aroma 12:12.

MuBayibolu, atuleja ‘kutwalekahu kulomba’ nawa ‘kulomba mpinji yejima.’ Mwamweni, Yehova Nzambi nakukeña nindi tumulombeña.—Matewu 26:41; Aefwesesa 6:18.

Muloñadi Nzambi chinakukeñelayi nindi tulombeña kudi yena? Chakutalilahu: Komana nvwali nateli kutiya kutama neyi mwanindi yamwila nindi, “Tata nkwashenuku.” Inehi, hela chakwila tata yawantu neluki yuma yinakukeñayi mwanindi nichinakutiyayi, neyi mwanindi yamuleja awa mazu wukwiluka nindi mwanindi wamukuhwelela nawa wamukeña. Munjila yoyimu, neyi tumulomba Yehova Nzambi, twamwekeshaña netu twamukuhwelela nawa twamukeña.—Yishimu 15:8; Yakoba 4:8.

“Muumbilenuña kwakama kwenu kwejima, muloña yena wayakamenaña.”​—1 Petulu 5:7.

Yehova nakukeña nindi tumulombeña muloña watukeña nawa watwakamenaña. Weluka kukala kutukweti niyuma yatwakamishaña nawa nakukeña kutukwasha.

Muchihandilu chindi chejima, Mwanta Davidi wamulombeleña Nzambi kulonda yamukwashi nawa wamulejeleña yitoñojoka yindi nichatiyileñayi. (Masamu 23:1-6) Chumanyi chafuminimu? Nzambi wamukeñeli Davidi nawa wakwileña kulomba kwindi. (Yilwilu 13:22) Ninetu nawa, Nzambi watiyaña kulomba kwetu muloña watwakamenaña.

Awa mazu ayihosheli kudi nsoneki wumu waBayibolu wasonekeliku mukanda waMasamu. Welukili nindi Nzambi watiyileña kulomba kwindi nawa ichi chuma chamukwashili hama. Welukili cheñi nindi wadiña nawubwambu wawuwahi naNzambi nawa chamukwashili kwikala nañovu yakuumika yihuñu nimakabi.—Masamu 116:1-9.

Neyi twiluka netu Nzambi watiyaña kulomba kwetu, tukulombaña mpinji yejima. Talenu chuma chamumwekeneni Pedro washakamaña muSpain. Mwanindi wadiña nayaaka 19 wafwili mumaposu ahamukwakwa. Haniyi mpinji, Pedro wamulejelimu Nzambi chatiyileñayi, wamulombeleña kulonda yamukundeji nawa yamukwashi. Chumanyi chafuminimu? Wahosheli nindi: “Yehova wakwili kulomba kwami kuzatisha akwetu akwaKristu atukundejeleña nikutukwasha.

Hela chakwila kulomba kwamusañwili mwanindi wanyi, ilaña kwamukwashili chikupu Pedro nichisaka chindi. Ñodindi María Carmen wahosheli nindi: “Kulomba kwankwashili kumanisha chineñi. Nelukili nami Yehova Nzambi wakwileña kulomba kwami muloña neyi nihosha nindi muchima wawundileña.”

Bayibolu, niyuma yashimunañawu antu yamwekeshaña nawu Nzambi watiyaña kulomba. Cheñi, chinamwekani hatooka nawu Nzambi waakulaña kulomba kwejima wanyi. Muloñadi Nzambi chabulilañayi kwakula kulomba kwejima?