Mpinji Yikamana Kuhelañana Lwejima!
Hela chakwila tukuleka kuhela antu, hitukutwesha kukañesha antu atunyeñumuka kuhela antuku. Antu akadi muloña anatwalekihu kuyihela. Hanu dinu hinyi wunateli kumanisha kuhelañana lwejima?
Yehova Nzambi hohu diyi wunateli kufumishahu lwejima kuhelañana kutunakumona makonu. Ichi dichuma chashiika Bayibolu nawu wakelamu.—Yishimu 20:22.
NZAMBI WAKAFUMISHA YUMA YEJIMA YAKOJEJAÑA KUHELAÑANA
-
1. SATANA DIYABOLU. Satana, kañelu wadikañili diyi wakojejaña kuhelañana kutunakumona makonu. Nzambi wakamujaha Satana niantu ahela akwawu.—Masamu 37:38; ARoma 16:20.
-
2. KAAYI KASATANA KANENZALI NAKUHELAÑANA. Nzambi wakajiyisha yuma yejima yakojejaña kuhelañana, munabombeli akamatuña nachiyuulu niakulumpi jakwitiya asañumunaña kuhelañana. Cheñi Nzambi wakafumishahu mutayi wakulanda nakulandulula wunakudiila antu mabula hanyitu.—2 Petulu 3:13.
-
3. KUBULA KUWANINA KWAWANTU. Bayibolu yalumbulula nawu antu ejima aswana kubula kuwanina, chilwilu chayiletesha kutoñojoka, kutiya nikwila yuma yatama. (ARoma 5:12) Kwikala nandulu nikuhela antu hiyilwilu yimu yenzaña hamuloña wakubula kuwanina. Nzambi wukakwasha antu kushinda iku kubula kuwanina kwejima kulonda kuhelañana akakufumishihu lwejima.—Isaya 54:13.
BAYIBOLU YASHIIKA ITUÑA MWAKADI KUHELAÑANA
-
1. KWOSI MUNTU WAKAMONAÑA YUMA YATAMA. Kaayi akakiyuulaña kudi Wanta waNzambi. Wakayuulilaña mwiwulu nawa wakaleta wuñanji haya nyaaka. (Danyeli 2:44) Kwakekala wanyi chaambu niyitoñojoka yambuka. Nzambi wakafumishahu yuma yatama yejima yinakumonawu antu.—Luka 18:7.
-
2. ANTU EJIMA AKEKALA MUKUWUNDA. Kwosi wakakabakanaña hamuloña wamadombu ninjitaku. (Masamu 46:9) Antu ejima akashakama heseki akekala mukuwunda nawa iseki dakekala iluña dadiwahi dakiñewa.—Masamu 72:7.
-
3. ANTU EJIMA AKEKALA AWANINA HAYA NYAAKA. Antu ejima akashakama hamaseki akadikeña wumu namukwawu. (Matewu 22:39) Kwosi muntu wakakabakanaña nayitoñojoka yatama. (Isaya 65:17) Hayina mpinji, neyi kuhelañana kwejima kunamani, antu “akazañalala chikupu nakushakama mukuwunda kwakweni.”—Masamu 37:11.
Komana munakukeña kushakama mwituña damuchidiwu? Nichayinu mpinji, antu amavulu anakudiza chakuleka kuhelañana kuhitila mukuzatisha yishina yamuBayibolu. (Masamu 37:8) Dichinakwilawu aYinsahu jaYehova mukaayi kejima. Hela chakwila afuma kuyisemwa nawa akweti yitachi yashiyashana, adiluñishaña kukeña kwekala muchisaka chikweti kukeña nawa chanuñañana.—Isaya 2:2-4.
AYinsahu jaYehova akutiya kuwaha kuhanjeka nenu yuma yinadiziwu kutalisha hachakuumika neyi anayili chatama hela anakuyimwekeshela chaambu. Yuma yimukudiza yikuyikwasha kuleka kuhelañana nakutachika kumwekesha kukeña. Mukwiluka chakumwekeshela antu ejima luwi kushilahu niantu abulaña kusakilila hela ayihela. Chikufumamu, mukwikala namuzañalu chayinu mpinji nawa mukwikala nawubwambu wakola nawakwenu. Nawa chuma chasweja kubadika, mukwiluka yuma yimwatela kwila hakwila nawu mukashakami muWanta waNzambi mukabula kuhelañana haya nyaaka.—Masamu 37:29.
You May Also Like
KAPOSHI KAKUTALILA
Yumanyi Yikela Wanta WaNzambi?
Yesu welukili nindi Wanta waNzambi diyi nfulumendi hohu yinateli kumanisha kukala heseki. Yumanyi yineli dehi iwu Wanta yinateli kukolesha chikuhwelelu chetu?
