4 | MuBayibolu Mwekala Kufumba Kwakuwahi
BAYIBOLU YAHOSHAÑA NAWU: “Nsona yejima . . . yayiwahi.”—2 TIMOTEWU 3:16.
Mwatalisha Awa Mazu
Hela chakwila himukanda wahosha hansañu jakukola kumujimbaku, muBayibolu mwekala kufumba kwakuwahi nawa kwakwashanaña. Iku kufumba kunateli kumukwasha muntu wunakukabakana nayitoñojoka. Talenu iyi yakutalilahu.
Iku Kufumba kwamuNsona Chikunateli Kutukwasha
“Antu akola hiyakeñaña ndotoluku, chiña akata.”—MATEWU 9:12.
Bayibolu yahoshaña nawu tunateli kudimona nandotolu neyi twakata. Antu amavulu akasunukaña chelukawu chikatu chawu chakuwoñu neyi adimona nandotolu nakutambwila wukwashu watelela.
‘Kukolesha mujimba kwakuwahi.’—1 TIMOTEWU 4:8, Contemporary English Version.
Neyi mwikalaña nampinji yakwila yuma yakukolesha mujimba yikuyikwasha kwikala nayitoñojoka yayiwahi. Yumiyi munabombeli kukolesha mujimba mpinji yejima, kuda yakuda yatelela nikukaama swayi.
“Muchima wazañalala hiyitumbu yayiwahi, ilaña spiritu yachikeka yamwaaña ñovu yamuntu.”—YISHIMU 17:22.
Neyi mutañaña nsañu yamuBayibolu yakukolesha nikufuukula kwila yuma yimukutwesha, chinateli kuyikwasha kutwalekahu kwikala namuzañalu. Kumona yuma munjila yayiwahi kunateli kuyikwasha kutwalekahu kuumika hampinji yimunakukabakana nayitoñojoka.
“Maana adi nawantu adikehesha.”—YISHIMU 11:2.
Munateli kuwana nawu himukutwesha kwila yuma yejima yimunakukeña kwila kankawenuku, dichi itejenu akwenu ayikwashi. Amabwambu nichisaka chenu hadaha anakukeña kuyikwasha, ilaña anateli kwiluka wanyi hakutachikila. Dichi yilejenu yuma yatela kwilawu hakwila ayikwashi. Bayi mukeña nenu ayilili yuma yabadika muñovu jawuku, ilaña sakililenuña hawukwashu wejima wunayililiwu.
Kufumba Kwakuwahi kwamuBayibolu Chikunakukwasha Antu Anakukabakana
Nicole, a wakabakanaña nachikatu chakuwoñu, wahosheli nindi: “Natiyili chiwahi wanyi kumujimba, dichi nayili nakudimona nandotolu. Diyi wanwanini nanichi chikatu. Chumichi chankwashili kwiluka kukala kunadiña naku niyitumbu yinatela kuzatisha hakwila nitiyiku chiwahi.”
Peter, wakabakanaña nachineñi, wahosheli nindi: “Nawani nami kutaña Bayibolu mpinji yejima namwinikwami kwankwashaña kutachika ifuku nayitoñojoka yayiwahi nawa yakukolesha. Nawa kakavulu neyi kudi mafuku inakukañanya kuumika, kwekalaña vasi yanshikaña hamuchima.”
Ji-yoo, wekala nakukala mundiilu, wahosheli nindi: “Chankalilileña kuleja antu kukala kunadiña naku muloña natiyileña nsonyi nankashi. Ilaña ibwambu dami inadikundileña nindi wadiña nakuntiyilila nakanañachima nikuntoñojokelaku. Neyi nihanjeka nindi natiyileñaku chiwahi nawa wankwashileña kwiluka nami nidi nkawami wanyi.”
Timothy, wakabakanaña nachikatu chaobsessive-compulsive disorder, wahosheli nindi: “Bayibolu yinankwashi kwila yuma nakwesekeja, chidi neyi kwikala nampinji yakuzata nimpinji yakunooka. Maana ekalamu anankwashi kwiluka chakwila nakukala kwamuyitoñojoka kunalwishaña naku.”
a Majina amakwawu anayihimpi.
