Tunateli kutiya kutama nankashi neyi tumona ibwambu detu nakukabakana nachikatu chakuwoñu. Ilaña tunateli kumwekesha chitwamwakamenaña ibwambu detu kuhitila mukumukwasha kuumika kukala kukwetiyi. Munjilanyi?

‘Nyakalenuña kutiya.’​—YAKOBA 1:19.

Njila yimu yakukwashilamu ibwambu denu hikumutiyilila neyi nakukeña kuhosha. Bayi mutoñojoka nenu mwatela kuhoshahu hayuma yejima yikuhoshayiku. Lekenu amoni nindi munakutiyilila nawa munakumwakamena. Ilukenu chinakutiyayi nawa tondolwelenu kukunkulula mwaheña hela kumusompesha. Anukenu nenu nateli kuhosha yuma yabula kukeña kuhoshayi nawa nkumininaku hakuditoñesha.—Yoba 6:2, 3.

“Kundejenu.”​—1 ATESALONIKA 5:14.

Hadaha ibwambu denu nakwakama nankashi, indi kwiji nakudimona nindi wamukunkulwayi. Neyi mumuleja nenu mwamwakamenaña munateli kumukundeja nikumukolesha, hela chakwila muneluki wanyi mazu imwatela kuhosha.

“Ibwambu walala wamwekeshaña kukeña mpinji yejima.”​—YISHIMU 17:17.

Mukwashenu kwesekeja nakukala kukwetiyi. Chatela mutoñojokeña nenu muneluki chakumukwasha, mwihulenu chimwatela kwila. Neyi ibwambu denu chinakumukalila kuyilumbulwila yuma yinakukeñayi, esekenu kumwihula neyi kudi chuma chimwatela kwilila hamu nindi, chidi neyi kuya nakwendujola. Hela munateli kudihana kuya nakumulandilaku yuma, kumuwahishilaku hetala, indi  kwiji kumuzatilaku tunyidimu tukwawu.—AÑalija 6:2.

“Diwunjikenuña.”​—1 ATESALONIKA 5:14.

Hadaha ibwambu denu nakukeña wanyi kuhosha hanoyu mpinji. Mulejenu nenu mukumutiyilila neyi wukukeña kuhosha. Muloña wayikatu, ibwambu denu nateli kuhosha hela kwila yuma yinateli kuyineñesha. Nateli kukaana kwila yuma yimunakukeña nenu mwilili hamu nindi indi kwiji wukuhila. Diwunjikenuña nawa mutiyililenuña hampinji yimunakumukwasha.—Yishimu 18:24.

Farrah, a wukweti ibwambu dindi wekala nakukala mundiilu, waswejaña kwakama nikuneña, wahosheli nindi: “Nekalaña wakasunuka kulonda atwesheña kuhosha nanami. Hela chakwila hinukutwesha kumanisha kukala kukwetiyiku, nafwilaña kutiyilila chinakuhoshayi. Mpinji jikwawu wakeñaña hohu muntu wakumutiyilila hakwila atiyiku chiwahi.”

Ha-eun, wakabakanaña nachineñi, wahosheli nindi: “Ibwambu dami wumu wekala chiwahi nawa wankoleshaña. Wantambikili kwitala dindi nakudiila hamu nindi. Muloña wakukeña kwammwekesheleliyi, champeleleli kuhosha chinatiyileña. Chumichi chankolesheli chikupu!”

Jacob, wukweti ñodindi wakabakanaña nachineñi, wahosheli nindi: “Kudiwunjika kwalema nankashi. Neyi ñodami neli chuma chinanneñeshi, nadanukishaña nami chuma chinaleteshi eli chumichi himuloña wayikatu, dichekalayi wanyi. Chumichi chankwashaña kutondolwela kuhila nawa namutoñojokelañaku chikupu.”

Enrico, wakabakanaña nachikatu chakwakama, wahosheli nindi: “Mwinikwami wankwashaña nankashi nikunkundeja. Neyi nisweja kwakama, wankanjikijaña wanyi kwila yuma yinnakubula kukeña. Mpinji jikwawu wafuukulañahu kubula kwila chuma chakeñañayi. Namulemesha nankashi muloña wekala nachisambu nawa wadihana chikupu.”