Nzambi Wayakamenaña
MuBayibolu mwekala kufumba kwakuwahi nankashi kunateli kutukwasha kwikala nawubwambu wakola naNzambi. Bayi neyi himukanda wahosha hansañu jakukola kumujimbaku, ilaña yinateli kutukwasha munjila jashiyashana chitwatela kwila nayuma yinakutuneñesha, yitoñojoka yatama, yuma yinakutukata kumuchima niyinakutukabisha kumujimba nimuyitoñojoka.
Chasweja kulema, Bayibolu yatulejaña nawu Nleñi yetu, Yehova Nzambi, a weluka yitoñojoka yetu nichitwatiyaña kubadika muntu wudi wejima. Nakukeñesha kutukwasha nakukala kwejima kutunakuhitamu. Chakutalilahu, talenu awa mazu akukundeja adi muniyi nyikanda yiyedi yamuBayibolu:
“Yehova wudi kwakwihi nawantu abaluka nyichima; wamwinaña antu achikeka muspiritu.”—ISAMU 34:18.
“Ami, Yehova Nzambi yeyi, nakukwati kuchikasa cheyi chachidiilu, yami inakukuleja nami, ‘Bayi wutiya womaku. Nakakukwasha.’”—ISAYA 41:13.
Hanu dinu, Yehova watukwashaña ñahi neyi tunakukabakana nayitoñojoka? Neyi chimukumona muyibaaba yinalondelihu, Yehova wamwekeshaña nindi watwakamenaña chikupu munjila jashiyashana.
a Yehova didu ijina daNzambi.—Isamu 83:18.
