Komana mwadihulahu dehi hayuma yikayimwekena kumbindi nichisaka chenu? Komana mukekala namaheta, atuzweñi, akeñañana hela ahelañana? Komana mwakashakama yaaka yayivulu tahindi nehi? Hadi yaaka yayivulu, antu anahani ñakwilu yashiyashana hanawa malwihu.

Makonu antu anadizi hakuhimpika kwakaayi ahoshaña yuma yikamwekana kumbidi. Hela chakwila yuma yikwawu yahoshañawu yashikijewaña, ilaña yikwawu yashikijewaña wanyi. Chakutalilahu, mu 1912 Guglielmo Marconi watachikili jayisanji, wahosheli nindi: “kwinza kwayisanji kwakaletesha majita kumana.” Nawa mukulumpi wakampani yaDecca Record wakaanini izanvu dawakwakwimba daBeatles mu 1962, welukili nindi antu akaleka kutiya kutumina twakwimba nagita.

Antu amavulu ayaña nakuhoña kulonda eluki yuma yikamwekana kumbidi. Amakwawu atiyililaña kudi akwakuhoña natutumbwa; mumagazini amavulu nimu manyuzi pepa ashimunaña mwalumbulukila tutumbwa. Amakwawu ayaña kudi akwakuhoña hohu ahoshaña nawu anatweshi kwiluka yuma yakumbidi kuhitila mukulumbulula mwatalisha ma tarot cards, manambala hela kutala hohu mumakasa.

Hakwila nawu eluki yuma yikamwekana kumbidi, amakwawu kushankulu ayileña kudi atupristu awamayala niawambanda ahosheleña nsañu yafumineña kudi nzambi yawu iyadiña nakwimenaku. Chakutalilahu, antu ahoshaña nawu Mwanta Croesus wakuLydia watemesheli yawaana yawuseya kudi kapristu Delphi, Greece kulonda yamuleji yuma yikamwekana neyi yazuña njita naKirusi wakuPeresi. Kapristu wahosheli nindi Croesus wakakisañana “wanta weneni” neyi yazuña naKirusi. Chineli wakeñeleña kushinda, Croesus wayili kunjita, ilaña wanta windi weneni awukisañeni.”

Nsañu yahosheleña kapristu yadiña yamukunkulwayi, muloña yadi kumwekana neyi yalala hela chakwila izanvu hidikushinda njitaku. Croesus wajimbesheli yuma yejima hamuloña wansañu yakutwamba yamulejeliwu. Komana antu anakuhosha hanjila yakwilukilamu yuma yakumbidi makonu anakushimuna mwalala