Mbañu yaTitusa yikweti yinjikijilu yamaneni yiyedi yinakumwekesha yuma yamaneni yamwekeni kunyima. Hela chakwila antu amavulu eluka wanyi, kudi yuma yimu yadifwana yekala haniyi mbañu nimuBayibolu—Mbañu yaTitusa yekala nawunsahu wakujinda wabula kwilukawu antu ilaña wamwekeshaña kushikijewa kwawuprofwetu wamuBayibolu.

Hanyima yakuvwalika kwaYesu, chiyuulu chawaRoma chadiña nakuyuula Britain niGaul (dinakutenawu makonu nawu France) chatachikili kuyuula Ejipitu, dichi adiña mukuwunda hiyamweneñahu kukala kudi kwejimaku. Ilaña iluña dimu dadiña nakuyitisha aRoma kutama—iluña daYudeya.

Mukanda waEncyclopedia of Ancient Rome wahosha nawu: “Maluña antesha ayuulileñawu kudi aRoma aheleliwu, ayisonekeli hambañu kwishinadi nikwishinadi, neyi cheliliwu naYudeya. A Yudeya akeñeleña wanyi kuyiyuula kudi antu acheñi abulileña kulemesha chisemwa chawu nawa aRoma amweni nawu kudikaña kwawaYudeya hiyatela kukwitejaku.” A Yudeya amavulu akuhweleleli nawu nlomboli yawu wakafumishahu aRoma aheleliwu nakuleta kuwunda kudi aIsarela. Ilaña mu 33 C.E., Yesu Kristu wahosheli nindi Yerusalema wakamona kukala.

Yesu wahosheli nindi: “Mafuku akenza hadi eyi hakatuñawu ayilumbu jeyi mpwembu yanyitondu yasoñoloka nakukunyeñumuka nikukulukuka kumbadi jejima. Akakunata heseki hamu nawanyaneyi adi mudi eyi, nawa hiyakashiya ilola nidimu hewulu delola dikwawu mudi eyiku.”—Luka 19:43, 44.

Mazu aYesu chakubula nikujina ahayamishili atumbanji twindi. Chimwahitili mafuku ayedi, chamweniwu tembeli yamuYerusalema, wumu hakachi kawu wabidikili nindi: “Ntañishi, talaña! awa malola nimatala okuwaha!” Mwamweni, malola akutembeli amakwawu ayishimuna nawu adiña mamita 11 mukuleha, mamita 5 muwihi nawa adiña adita mamita asatu! Ilaña Yesu wayakwili nindi: “Iyi yuma yimunakumona, mafuku akenza hakela kwosi ilola nidimu dakashala hewulu delola dikwawu dakabula kwalumunawuku.”—Maku 13:1; Luka 21:6.

Nawa Yesu wayilejeli cheñi nindi: “Chimwakamona Yerusalema anamukuchiki kudi mashidika, mwakeluki nenu kujilumuka kwindi kunaswini dehi kwakwihi. Dichi antu akekala muYudeya akatachiki kutemukila kumapidi, antu akekala mukachi kaYerusalema akafumimu, nawa antu akekala mumaluña amukamwihi bayi akeñila muYerusalemaku.” (Luka 21:20, 21) Komana mazu aYesu ashikijeweli?

Mwahitili yaaka 33, aYudeya achidiña nakutiya kutama mumpaanda yawaRoma. Ilaña mu 66 C.E. chelili nguvulu wawaRoma wakuYudeya, Gessius Florus, yeyi mali muchimbañu, aYudeya ahilili nankashi.  Hashimbwili wanyi, aYudeya eñilili muYerusalema, ajahili mashidika awaRoma nawa abidikili nawu anasubuki kudi aRoma.

Chimwahitili tukweji tusatu, mashidika awaRoma kubadika ha 30,000, alombweliwu kudi Cestius Gallus, ayili muYerusalema nakujilumuna akwakudikaña. Aroma eñilili mumusumba swayi-swayi nawa ahumwini mbañu yahanji yatembeli. Aswamini chakadi nimuloña. A Yudeya adikañili atiyili kuwaha nawa atemukili. Chelili mashidika awaRoma afunti, akwaKristu atiyilili kusoñamisha kwaYesu atemukili kufuma muYerusalema nakuya kumapidi mwishinadi daKaloña Yodana.—Matewu 24:15, 16.

Chaaka chalondelelihu, aRoma ayifuntilili cheñi aYudeya, ayilombweleña kudi General Vespasian nimwanindi Titusa. Hela chochu, chafwiliyi Emperor Nero mu 68 C.E., Vespasian wafuntili kuRoma nakutambula itanda, nakushiya aYudeya mumakasa amwanindi Titusa nimashidika akushika ku 60,000.

Mu June 70 C.E., Titusa walejeli mashidika indi kuya nakutema nyitondu yadiña kwakwihi naYudeya, yazatishiliwu hakutuña mbañu yamakilomita 7 kunyeñumuka Yerusalema. Mu September, aRoma ajilumwini nikwocha musumba nitembeli yayu nawa malola ayibaloleli helola-helola, neyi chahosheliyi Yesu. (Luka 19:43, 44) Antu amakwawu ahoshaña nawu, “antu afwili muYerusalema adiña kwakwihi na 500, 000 nawa mwituña dejima.”

Mu 71 C.E., Titusa wafuntili kuItaly kwamutambwililiwu namuzañalu kudi enimbu amuRoma. Musumba wejima welili chidika cheneni chiyabulahu dehi kwila mwituña.

Mazaza atiyili kuwaha kutamba chamachiñileñawu munyikwakwa yamuRoma yejima. Ashili maana hambopolu jatambwiliwu, hanyevulu yaleñeliwu yamwekesheleña chashindiliwu kunjita nawa niyuma yatambwiliwu mutembeli yamuYerusalema.

Titusa wamuswanini tata yindi Vespasian mu 79 C.E. Ilaña chimwahitili yaaka yiyedi hohu, Titusa wafwili. Mwanyikindi Domitian, wamuswanini nawa washikeneni kutuña mbañu yakushinda hakumulemesha Titusa.

Makonu antu amavulu ayaña nakutala Mbañu yaTitusa chaaka nichaaka neyi anayi kuRome. Amakwawu ahoshaña nawu hadiña mudimu weneni chikupu hakutuña iyi mbañu, amakwawu ahoshaña nawu yamwekeshaña ñovu yadiña nawaRoma nawa amakwawu nawu chanukishu chakujilumuka kwaYerusalema nitembeli yachu.

Hela chochu, antu ataña chikupu Bayibolu akunkululaña nawu Mbañu yaTitusa yamwekeshaña chuma chalema chikupu. Yamwekeshaña wunsahu walala wakujinda wamwekeshaña kushikijewa kwawuprofwetu wamuBayibolu nawa chamwekeshaña nawu ayonena kudi Nzambi.—2 Petulu 1:19-21.