KUDIHU YUMA YIMWAFUKULA KWILA MUCHIHANDILU CHENU KUMBINDI? Antu amakwawu akuhwelela nawu kudi dehi yuma yalombolaña chihandilu chawu, bayi yuma yafukulañawuku. Neyi akañanya kushikija mwafuukwiliwu, adishakaminaña. Ahoshaña nawu “ami hiyanfukwilili kwila ichi chumaku.”

Amakwawu ahayamaña neyi amona yuma yatama yinakumwekana mukaayi mutunakushakama. Hadaha afwilaña kwikala nachihandilu chachiwahi, ilaña yuma yidi neyi njita, wubanji, yuma yadimwekenaña niyikatu yayikañeshaña kwila yuma yafwilañawu. Adihulaña aweni nawu, ‘Muloñadi chinukudikabishila?’

Mwamweni mpinji nakululakana kwakañeshaña kwila yuma yimunafuukuli. (Mukwakutaŋisha 9:11) Hela chochu, mwatela kufuukulahu yuma yimukela kumbidi. Bayibolu yamwekeshaña nawu mbidi yenu yashindamena hayuma yimwafuukulaña. Talenu chiyahosha.

Mosi, nlomboli wamuza wawaIsarela, walejeli antu hampinji yakeñeleñawu kwiñila Mwituña daChikaninu nindi: “Nakushili dehi kumesu eyi niwumi nikufwa, ninkisu niishiñu; dichi dinu tondaku wumi kulonda wuhandi, nineyi nianyaneyi; wukeñi Yehova Nzambi yeyi, wovwahili mwizu dindi, wumulamati.”—Kuhituluka 30:15, 19, 20.

“Nakushili dehi kumesu eyi niwumi nikufwa ninkisu niishiñu dichi dinu tondaku wumi.”—Kuhituluka 30:19

Eña! Nzambi wayifumishili aIsarela muwuduñu muEjipitu nawa ekalili asubuka chikupu nimuzañalu Mwituña daChikaninu. Ilaña yumiyi hiyadi kwinza hohu neyi muchilotaku. Hakwila atambwili iji nkisu, ateleleli ‘kutondahu wumi.’ Munjilanyi? ‘Kuhitila mukukeña Nzambi, mukutiyilila mwizu dindi nikumulamata yena.’

Makonu, ninetu twafuukulañahu yuma yadifwana nawa mwejima mumukufuukula mukafuma yuma yayiwahi hela yatama. Neyi mumukeña Nzambi mumutiyililaña nawa mumulamata dikwila nawu munakutonda wumi, wumi wahaya nyaaka muparadisa hamaseki. Hanu dinu munabombeli yumanyi?

Kukeña dichilwilu chaNzambi chabadika. Kapostolu Yowanu amoneneni kusoneka nawu, “Nzambi hikukeña.” (1 Yowanu 4:8 ) Hamuloña wachumichi Yesu chamwihwiliwu lushimbi lwabadika nshimbi jejima, wakwili nindi: “Keñaku Yehova Nzambi yeyi namuchima weyi wejima, nawumi weyi wejima, nayitoñojoka yeyi yejima.” (Matewu 22:37) Wubwambu walala naYehova Nzambi watela kushindamena hakukeña, bayi hawoma hela hakumwovwahila chakubula kwilukaku. Hanu dinu muloñadi chitwatelela kutondahu kumukeña?

Kukeña kwakeñayi Yehova antu kudi neyi kwanvwali nanyanindi. Hela chakwila awanina wanyi, anvwali akweti kukeña alejaña, akoleshaña, akwashaña nawa afumbaña anyana muloña akeñaña nawu ekali namuzañalu nawa eleña yuma yayiwahi. Yumanyi yakeñañawu anvwali? Akeñaña anyanawu kuyikeña nikuzatisha yuma yinakuyilejawu kulonda ekali anyana amawahi. Komana chachiwahi wanyi Tata yetu wamwiwulu kukuhwelelela nindi twatela kumusakilila hayuma yejima yatwililayi?

Izu dadeni dazatishiliwu mwidimi dasonekeliwu Bayibolu dakwila nawu “tiyililaku,” kakavulu mwabombela yitoñojoka “yakwovwahila.” Komana dimutwatalishaña wanyi neyi tuleja mwana netu, “Tiyililaña anvwali jeyi”? Dichi, kutiyilila kwizu daNzambi, kwatalisha mukudiza nikwovwahila yuma yahoshañayi. Chineli hitunateli kutiya izu daNzambi dadeniku, twamutiyililaña kuhitila mukutaña nikuzatisha yuma yekala Mwizu dindi, Bayibolu.—1 Yowanu 5:3.

Hakumwekesha kulema kwakutiyilila kwizu daNzambi, mpinji yimu Yesu wahosheli nindi: “Muntu hatela kuhanda namankendi hohuku, ilaña namazu ejima afumaña mukanwa kaYehova.” (Matewu 4:4) Neyi chochalema yakuda yakumujimba yitwadaña, izu daNzambi nidena dalema, dalema nikubadikahu. Muloñadi? Mwanta Solomoni wamaana walumbulwili nindi: “Maana hichuma chakudihemba nachu, neyi chaneluwu mali hichuma chakudihemba nachu; ilaña kwiluka yuma chasweja kuwaha muloña maana ahembaña wumi wamuntu wayiheta.” (Mukwakutaŋisha 7:12) Kwiluka nimaana afumaña kudi Nzambi anateli kutukiña makonu nikutukwasha kutonda yuma yayiwahi yinateli kutukwasha tukekali nawumi wahaya nyaaka kumbidi.

Anukenu chishimu chaYesu chitwashimuna muchibaaba chinafumihu, mwahosheliyi nindi: “Chiisu chanyanya ninjila yanyanya yatwalaña kuwumi nawa antesha diwu ayiwanaña.” (Matewu 7:13, 14) Hakwila twendi munjila yamuchidiwu, twatela kulondela chikupu nlomboli wakuluka yitembi neyi tunakukeña kushika kutunakuya, dikwila nawu wumi wahaya nyaaka. Dichi, twatela kuswina chikupu kudi Nzambi. (Masamu 16:8) Hanu dinu tunateli kuswina ñahi?

Kudi yuma yayivulu yitwatela kwila niyitwafwilaña kwila mafuku ejima. Yuma yamuchidiwu yinateli kutumanishila mpinji hela kutuluwañesha chakwila hitukwikala nampinji yakutoñojoka yuma yakeñañayi Nzambi nindi twileñaku. Dichaletesha Bayibolu yitwanukisheña nawu: “Ilukenu chimwendaña, bayi mwendeña neyi antu abula maanaku, ilaña neyi akwamaana, zatishenuña chiwahi mpinji yenu, muloña anu mafuku anatami.” (Aefwesesa 5:15, 16) Twaswinaña chikupu kudi Nzambi kuhitila mukulemesha wubwambu wetu nayena muwumi wetu.—Matewu 6:33.

Hela chakwila himunateli kuhimpa yuma yimwelili kunyimaku, munateli kutondahu kwikala nambidi yenu yayiwahi niyawantaña jenu. Bayibolu yamwekeshaña nawu Tata yetu wamwiwulu, Yehova Nzambi, watukeña chikupu nawa watulejaña yuma yakeñañayi nindi twileña. Talenu mazu akaprofwetu Mika:

“Eyi muntu, yena nakuleji dehi chuma chinawahi. Indi Yehova nakeñi chumanyi kudeyi? Nakeñi wili chaloña, wukeñi luwi, wendi naNzambi yeyi chakudizoza.”—Mika 6:8.

Mukwiteja mutambi waYehova wakwenda hamu nindi kulonda mwakatambwili nkisu yatentekelayi antu etejaña mutambi windi? Mwatela kutondahu!