IKU HIKUCHIÑEJA KWAKUWAHI CHIKUPU! Nleñi yetu watukana nindi wakatwinka wumi wahaya nyaaka, hohanu hamaseki. Hela chochu, antu amavulu chayikalilaña kukuhwelela mwenimu. Ahoshaña nawu ‘muntu wejima wukweti mpinji yakafwayi. Muntu welaña yafwa yasañuka cheñi.’ Amakwawu eluka nawu antu anateli kuhanda haya nyaaka, ilaña bayi neyi hanu hamasekiku. Ahoshaña nawu wumi wahaya nyaaka wekalañaku neyi muntu nafwi nawa yaya mwiwulu. Enu mweluka nenudi?

Henohu kanda mwakuli, kwila mutaña chakula Bayibolu awa malwihu asatu nehi: Njila mwamuleñelawu muntu yatulejaña nawu watela kushakama yaaka yiñahi? Muloñadi Nzambi chaleñeleliyi iseki niantu? Antu atachikili ñahi kufwa?

Hayuma yejima yaleñayi Nzambi hamaseki, muntu wekala wambukaku chikupu. Munjilanyi? Bayibolu yamwekeshaña nawu muntu amuleñeli ‘muchinfwana chindi’ hela ‘neyi chekalayi yomweni.’ (Kutachika 1:26, 27) Chumichi chinatalishi mudihi? Chatalisha mukwila nawu muntu wukweti yilwilu yadifwana nayaNzambi, yidi neyi kukeña niwuñanji.

Kubombelahu, antu ayileña namaana niwuswa wakutoñojoka, kwiluka yilwilu yayiwahi nikumwiluka Nzambi. Dichaleteshaña tutiyeña kuwaha nayuma yejima yaleñawu yekala mwiwulu nihanu hamaseki, kubombelahu ninyevulu, tumina niyisela. Chabadika, antu ayileña nawuswa wakudifukula kudi Nleñi. Yilwilu yamuchidiwu diyaleteshaña antu kwikala ambukaku chikupu nayileñaleña yejima yahamaseki.

Dichi dihulenu nenu; Komana Nzambi wadi kuleña antu nayilwilu yayiwahi, nikuyinka wuswa wakutwaleka kwikala nayu nikuyimwekesha neyi chakwila watuleñeli nindi tushakameña kapinji kantesha? Walala wudi wakwila nawu Nzambi waleñeli antu naniyi yilwilu yayiwahi niwuswa kulonda adiluñisheña chihandilu chachiwahi hamaseki haya nyaaka.

Hela chochu, antu amakwawu ahoshaña nawu Nzambi haleñeli antu nindi ashakameña hamaseki haya nyaakaku. Atoñojokaña nawu iseki adileñeli dakushakamahu kapinji kanti, hakwilukila hohu antu atela kuya mwiwulu nakushakama haya nyaaka naNzambi. Ilaña neyi dimu, komana chumichi chadi  kumwekesha wanyi nawu Nzambi diyi wakojejaña yuma yatama yinakumwekana hamaseki? Chumichi chikwambuka chikupu nachekalayi Nzambi. Bayibolu yahosha chekalayi nawu: “Muloña mwatwalañayi mwejima mwawuñaji hohu; hiNzambi wakashinshi wakadi ninaha haheñelayi, waloña zwa, woloka.”—Kuhituluka 32:4.

Bayibolu yashimuna Nzambi chaleñeleliyi iseki munawa mazu: “Mawulu himawulu ambala aYehova, hakwinza maseki nayinkuwu anyana kawantu.” (Masamu 115:16) Mwamweni, Nzambi waleñeli iseki kulonda hashakameña antu nawa washilimu yuma yejima yinateli kutukwasha kudiluñisha chihandilu chachiwahi haya nyaaka.—Kutachika 2:8, 9.

“Mawulu himawulu ambala aYehova, hakwinza maseki nayinkuwu anyana kawantu.”—Masamu 115:16

Bayibolu yashimuna cheñi hatooka chaletesheli Nzambi yaleñi antu. Walejeli antu atachi nindi “Semununenu, muvuleña, muwanini heseki, mudovwahishi; ikalenu anyanta niawanshi amwijiya, niawatujila ahaluzwizu, niayuma yayumi yejima yendaña hamaseki.” (Kutachika 1:28) Adiña namudimu wawuwahi wakuwahisha nikutohesha Paradisa mukala wawu! Chakubula nikujina, aAdama naEva nianyanawu achiñejeleña kushakama hamaseki haya nyaaka, bayi mwiwuluku.

Muloñadi dinu chitwafwilaña? Bayibolu yamwekeshaña nawu chileñaleña wumu wakuspiritu, enjili nakutenawu nawu Satana Diyabolu, wakisañeni mwafuukwiliyi Nzambi mwitempa daEdeni. Munjilanyi?

Satana wadimbili anvwali jetu akusambila, aAdama naEva kulonda adikañi naNzambi. Chelili Satana yahoshi nindi Nzambi wayikañesheleña yuma yayiwahi dikwila nawu wuswa wakwiluka aweni yuma yayiwahi niyatama, atachikili kumulonda Satana nakumufutalela Nzambi. Chumanyi chafuminimu? Chimwahitili mpinji afwili, neyi chahosheliyi Nzambi. Ajimbesheli kukooleka kwakushakama hamaseki haya nyaaka.—Kutachika 2:17; 3:1-6; 5:5.

Kudikaña kwaAdama naEva kwaletesha antu ejima kwikala nanshidi kushika nilelu. Izu daNzambi dahosha nawu: “Neyi chocheñilili nshidi mukaayi kuhitila mudi muntu wumu, [Adama] nikufwa nikwena kwenjili kuhitila munshidi, dichi kufwa kwataandili kudi antu ejima.” (Aroma 5:12) Twafwaña muloña twaswana nshidi nikufwa kufuma kudi anvwali jetu atachi, bayi neyi hamuloña wakwila kwekala yuma ‘yafuukulayi’ Nzambi yitwabula kwilukaku.

Kudikaña kwadiñaku muEdeni hikwakañesha nkeñelu yaNzambi hadi antu nikwisekiku. Kukeña kwaNzambi niwuñanji windi waloña wamuletesha yatukuli kuwuduñu wanshidi nikufwa wutwaswana. Kapostolu Pawulu walumbwilili nindi: “Wufwetu wanshidi, hikufwa, ilaña chawaana chahanañayi Nzambi, hiwumi wahaya nyaaka mudi Kristu Yesu Mwanta wetu.” (Aroma 6:23) Muloña wakukeña, Nzambi “watemesheli Mwanindi wumu hohu, kulonda muntu wejima wukumukuhwelela yakabuli kujilumuka, ilaña yakekali nawumi wahaya nyaaka.” (Yowanu 3:16) Kuhitila mukudihana yomweni neyi ifutu danyiloña chakufuma hamuchima, Yesu wafuntishili yuma yejima yajimbesheli Adama. a

Katataka yuma yashiikayi Nzambi kutalisha haparadisa hamaseki yishikijewi. Ichi chikaninu chinateli kushikijewa hadenu neyi mulondela kuleja kwaYesu kwakwila nawu: “Iñililenu muchiisu chanyanya, muloña chiisu cheneni ninjila yabwambwañana yatwalaña kukujilumuka nawa amavulu dimu mweñililañawu; ilaña chiisu chanyanya ninjila yanyanya yatwalaña kuwumi nawa antesha diwu ayiwanaña.” (Matewu 7:13, 14) Mwamweni, mbidi yenu yidi mumakasa enu. Dichi mukwiladi?