• Amutonda kudi Nzambi. “Ami namudiishi mwanta wami wanta . . . Ami nukukwinka nyuza yawantu yili wuswana weyi, nikwakumina maseki kwakekala kwambala kweyeyi.”—Masamu 2:6, 8.

• Nswana yaMwanta Davidi. “Kudetu kunavwaliki mwana, anatwinki mwana weyala . . . Wanta windi nikuwunda kwindi kwakayaña ho-o kukuma nehi hetanda daDavidi dawanta nimumpata yayulañayi kulonda kushimatishamu.”—Isaya 9:6, 7.

• Wavwalikilili muBetelemi. “Eyi Betelemi. . . , mudeyi mwakafuma wumu wakutemesha kudami, diyi wakekala mukwakuyula . . . Nekali dehi muneni kushika nikunsa jeseki.”—Mika 5:2, 4.

• Amukaanini kudi antu nawa amujahili. “Amudiwili neyi muntu abutilañawu antu mesu awu hitwamumweni kulemaku. Amukatishilili nyiloña yetwetu amuchikilili kuluwa kwetwetu.”—Isaya 53:3, 5.

• Amusañwili mudi afu nawa amulemesheli. “Hiwakanshiya mukaluñaku; hela kumwiteja weyi wajila kumona kutokaku. . . . Muchikasa cheyi chachidiilu mudi yakutiyisha nachu kuwaha haya nyaka.”—Masamu 16:10, 11.

Kufuma tuhu kunyima, muntu wumu hohu diyi wunashikili iyi yuma yatelela Nyuuli wamuwahi, iwu muntu hiYesu Kristu. Nawa kañelu wamulejeli Mariya, mama yaYesu nindi: “Nzambi wakamwinka itanda datata yindi Davidi, . . . nawa Wanta windi hiwamba kakumaku.”—Luka 1:31-33.

Yesu hekalilihu nyuuli hamasekiku. Ilaña, wakayuula antu neyi Mwanta waWanta waNzambi iku wudi mwiwulu. Chumanyi chaletesha yekali Nyuuli watelela? Talenu yuma yeliliyi Yesu hadiña heseki.

•   Yesu wadiña nakwakamena antu. Yesu wakwashili amayala niambanda, atwansi niakulumpi hichikweti muloña nakwafumawu hela yuma yikwetiwuku. (Matewu 9:36; Maku 10:16) Mukwambumba chafukaminiyi nakulemba nindi: “Neyi wunakeñi, wunateli kuntookesha,” Yesu wamutiyilili wushona nawa wamukuli.—Maku 1:40-42.

• Yesu watudizishili chakumuzañalesha Nzambi. Wahosheli nindi: “Himunateli kukalakela Nzambi hampinji yoyimu niMahetaku.” Wahosheli cheñi nindi twatela kwilila akwetu yuma yitunakukeña ninetu netu atwilili, ichi chishina makonu achitenaña nawu Lushimbi Lwalema. Kubombelahu, wamwekesheli cheñi nindi Nzambi helukaña hohu yuma yitwelañaku ilaña welukaña chitwatoñojokaña nichitwatiyaña. Hakwila tumuzañaleshi Nzambi twatela kudiyuulaña mumuchima wetu. (Matewu 5:28; 6:24; 7:12) Yesu wakonkomweneni nindi hakwila twikali namuzañalu waweni, twatela kwiluka yuma yinakukeñayi Nzambi nindi twileña nawa twatela kuyila.—Luka 11:28.

• Yesu watudizisha mwatalisha kukeña antu. Mazu aYesu ninyidimu yindi jadiña nañovu chikupu nawa jayishikileña antu hanyichima. “Mazaza awantu ahayamini chikupu nantañishilu yindi, muloña wayitañishileña neyi muntu wukweti wuswa.” (Matewu 7:28, 29) Wadizishili nindi: “Keñenuña ayilumbu jenu.” Wayilombeleliku niantu amujahili nindi: “Tata, yanakeni, muloña hiyaneluki chuma chinakwilawuku.”—Matewu 5:44; Luka 23:34.

Yesu nateleli kwikala Nyuuli wawantu mukaayi kejima. Hanu dinu wakatachika kuyuula mpinjinyi?